1-2. (a) Tanbasá ema bele hein namanas ba Armagedon? (b) Iha lisaun neʼe, ita sei hetan resposta ba pergunta saida deʼit?

EMA balu fiar katak mundu sei lakon mohu tanba funu nukleár ka dezastre naturais. Maibé Bíblia dehan saida? Bíblia hanorin katak lakleur tan sei mosu funu ida neʼebé lori rezultadu diʼak. Funu neʼe hanaran Armagedon, no sei halo ita kontente. (Apok 1:3) Funu Armagedon sei la halakon ema hotu, maibé sei salva ema barak. Oinsá?

² Bíblia hatudu katak Armagedon sei salva ema tanba funu neʼe sei halakon ema nia governu, sei halakon ema aat no husik ema laran-loos moris, no mós sei halakon ema neʼebé estraga mundu. (Apok 11:18) Atu bele komprende liután pontu sira-neʼe, mai ita buka resposta ba pergunta haat: Saida mak Armagedon? Antes Armagedon, saida mak sei akontese uluk? Oinsá mak ita bele hetan salvasaun iha Armagedon? Oinsá mak ita bele laran-metin nafatin nuʼudar Armagedon besik daudaun?

3. (a) Liafuan “Armagedon” signifika saida? (b) Tuir Apokalipse 16:14, 16, tanbasá ita bele dehan katak Armagedon mak fatin simbóliku?

³ Lee Apokalipse 16:14, 16. Liafuan “Armagedon” mosu dala ida deʼit iha Bíblia no neʼe mak fraze Ebraiku ida neʼebé signifika “Foho Megido”. (Apok 16:16; nota) Megido mak sidade ida iha Izraél antigu. (Jos 17:11) Maibé Armagedon la refere ba fatin ida. Tuir loloos, neʼe refere ba situasaun bainhira liurai hotu iha mundu halibur hamutuk atu kontra Jeová. (Apok 16:14) Maibé iha lisaun neʼe, ita mós sei uza liafuan “Armagedon” atu refere ba funu neʼebé akontese lakleur depois liurai sira iha mundu tomak halibur hamutuk. Oinsá mak ita hatene  katak Armagedon refere ba fatin simbóliku? Primeiru, la iha foho ida naran Megido. Segundu, área iha Megido mak kloot liu ba “liurai sira iha mundu tomak”, sira-nia tropa no mós armas sira atu halibur hamutuk. Terseiru, hanesan ita sei aprende iha lisaun neʼe, funu Armagedon sei komesa bainhira “liurai sira” iha mundu ataka Maromak nia povu neʼebé hela iha fatin oioin iha mundu tomak.

4. Tanbasá Jeová liga ninia funu ikus ho Megido?

⁴ Tanbasá Jeová liga ninia funu ikus ho Megido? Iha tempu antigu, ema halo funu barak iha Megido no iha Rai-Tetuk Jezreel neʼebé besik husi Megido. Dala ruma, Jeová ajuda ninia povu atu manán funu sira-neʼe. Porezemplu, “besik mota iha Megido”, Maromak ajuda Juís Barac husi Izraél atu manán ema Kanaan nia tropa no mós sira-nia xefe Sísera. Barac no profeta Débora fó agradese ba Jeová tanba ajuda sira manán. Sira kanta: “Husi lalehan mak fitun sira halo funu . . . hasoru Sísera. Mota Kison lori lakon inimigu sira.”​—Juís 5:19-21.

5. Tanbasá funu Armagedon la hanesan duni ho funu neʼebé Barac halo?

⁵ Barac no Débora remata sira-nia knananuk ho liafuan: “Husik Ita-nia inimigu hotu lakon mohu, oh Jeová, maibé halo sira neʼebé hadomi Ita sai hanesan bainhira loro-matan saʼe no fó naroman boot.” (Juís 5:31) Iha Armagedon, Maromak nia inimigu sira mós sei lakon, maibé ema neʼebé hadomi Maromak sei hetan salvasaun. Maski nuneʼe, iha diferensa boot entre funu rua neʼe. Iha Armagedon, Maromak nia povu la hola parte iha funu neʼe. Sira mós sei la kaer armas. Sira iha kbiit tanba sira “kalma nafatin no tau fiar” ba Jeová no ninia tropa sira husi lalehan.​—Isa 30:15; Apok 19:11-15.

6. Oinsá Maromak sei halakon ninia inimigu sira durante Armagedon?

⁶ Oinsá Maromak sei halakon ninia inimigu sira durante Armagedon? Karik nia sei uza dalan oioin. Porezemplu, karik nia sei uza rai-nakdoko, jelu-fatuk, no mós rai-lakan. (Job 38:22, 23; Eze 38:19-22) Karik nia halo ninia inimigu sira atu funu malu. (2 Krón 20:17, 22, 23) No mós karik nia sei uza ninia anju atu oho ema aat. (Isa 37:36) Dalan naran deʼit neʼebé Maromak uza, nia sei manán duni. Nia sei halakon ninia inimigu hotu. No ema laran-loos hotu sei hetan salvasaun.—Prov 3:25, 26.

7-8. (a) Tuir 1 Tesalónika 5:1-6, ukun-naʼin sira iha mundu sei deklara saida? (b) Tanbasá neʼe mak lia-bosok neʼebé perigozu?

⁷ Antes “Jeová nia loron”, sei iha deklarasaun kona-ba “dame no hakmatek”. (Lee 1 Tesalónika 5:1-6.) Liafuan “Jeová nia loron” iha 1 Tesalónika 5:2 refere ba “terus boot”. (Apok 7:14) Oinsá ita bele hatene terus boot atu hahú ona? Bíblia fó sai katak ukun-naʼin sira sei deklara “dame no hakmatek” no neʼe sei sai nuʼudar sinál katak terus boot atu hahú ona.

⁸ Tanbasá ukun-naʼin sira iha mundu fó sai deklarasaun neʼe? Ita la hatene ho loloos. Ulun-naʼin relijiaun nian sei hola parte ka lae? Karik. Maski nuneʼe, deklarasaun neʼe mak lia-bosok neʼebé mai husi anju aat sira. Lia-bosok neʼe perigu tebes tanba sei halo ema hanoin katak sira moris seguru, maibé tuir loloos  terus boot liu hotu atu hahú ona. Sin, “sira sei lakon derrepente deʼit, hanesan feto isin-rua neʼebé sente moras tuur-ahi nian derrepente deʼit”. Oinsá ho Jeová nia povu sira neʼebé laran-metin? Maski Jeová nia loron hahú derrepente deʼit, maibé sira sei prontu ba ida-neʼe.

9. Maromak sei halakon Satanás nia mundu dala ida deʼit ka lae? Esplika toʼok.

⁹ Jeová sei la halakon Satanás nia mundu dala ida deʼit hanesan iha Noé nia tempu. Nia sei halakon ida-neʼe liuhusi hakat rua. Primeiru, nia sei halakon Babilónia Boot, katak relijiaun falsu hotu. Tuirmai, iha Armagedon, nia sei halakon parte seluk tan husi Satanás nia mundu, inklui sistema polítiku, militár, no ekonomia. Ita sei koʼalia liután kona-ba akontesimentu importante rua neʼe.

10. Tuir Apokalipse 17:1, 6 no 18:24, tanbasá Jeová sei halakon Babilónia Boot?

¹⁰ “Kastigu ba feto-aat neʼebé naran-boot.” (Lee Apokalipse 17:1, 6; 18:24.) Babilónia Boot hafoʼer duni Jeová nia naran. Nia hanorin lia-bosok kona-ba Maromak. Nia hanesan feto-aat tanba la laran-metin ba Maromak hodi apoia ema nia governu sira. Nia uza ninia podér atu domina ninia povu no foti sira-nia osan. Nia mós oho ema barak, inklui Maromak nia atan sira. (Apok 19:2) Oinsá Jeová sei halakon Babilónia Boot?

11. ‘Animál fuik kór-mean’ reprezenta saida? Oinsá Maromak sei uza ida-neʼe atu halakon Babilónia Boot?

¹¹ Jeová sei halakon “feto-aat neʼebé naran-boot” hodi uza “dikur sanulu” no ‘animál fuik kór-mean’. Animál fuik neʼe reprezenta Nasoins Unidas. Dikur sanulu reprezenta governu sira neʼebé apoia organizasaun neʼe. Iha tempu neʼebé Maromak deside ona, governu sira no Nasoins Unidas sei ataka Babilónia Boot. Sira “sei halakon nia no halo nia isin-tanan” hodi hadau ninia rikusoin no hatudu sai ninia hahalok aat sira. (Apok 17:3, 16) Babilónia Boot sei lakon  lalais deʼit, hanesan iha loron ida deʼit. Tan neʼe, ema sira neʼebé apoia Babilónia Boot sei hakfodak, liuliu tanba Babilónia Boot toman atu gaba an no dehan: “Haʼu mak liurai-feto, haʼu laʼós feto-faluk, no haʼu sei nunka tanis.”​—Apok 18:7, 8.

12. Jeová sei la husik nasaun sira atu halo saida? Tanbasá?

¹² Maromak sei la husik nasaun sira atu halakon ninia povu. Ninia povu orgullu atu lori ninia naran no sira halo tuir ona ninia mandamentu hodi hasees an husi Babilónia Boot. (Após 15:16, 17; Apok 18:4) Sira mós hakaʼas an atu ajuda ema seluk hasees an husi Babilónia Boot. Tan neʼe, Jeová nia atan sei la hetan kastigu neʼebé Babilónia Boot hetan. Maski nuneʼe, sira-nia fiar sei hetan koko.

13. (a) Sé mak Gog? (b) Tuir Ezequiel 38:2, 8, 9, bainhira mak funu Armagedon sei hahú?

¹³ Ataka husi Gog. (Lee Ezequiel 38:2, 8, 9.) Bainhira relijiaun falsu hotu lakon, sei hela deʼit relijiaun ida iha mundu, neʼe mak Jeová nia povu. Tuir loloos, Satanás sei sai hirus. Nia sei hatudu sai ninia hirus liuhusi “liafuan foʼer”, katak lia-bosok neʼebé mai husi anju aat atu book grupu nasaun hotu ataka Jeová nia atan sira. (Apok 16:13, 14) Grupu nasaun sira-neʼe hanaran “Gog husi rai-Magog”. Bainhira nasaun sira ataka Maromak nia povu, funu Armagedon sei hahú.​—Apok 16:16.

14. Gog sei hatene saida?

¹⁴ Iha tempu neʼebá, Gog sei tau fiar ba “ema nia liman”, ka ninia tropa sira. (2 Krón 32:8, nota) Ita sei tau fiar ba Maromak Jeová. Karik nasaun sira haree ita-nia desizaun neʼe nuʼudar buat beik. Tanbasá? Tanba uluk Babilónia Boot nia maromak sira labele salva nia husi “animál fuik” no “dikur sanulu”. (Apok 17:16) Entaun Gog sei hanoin katak fasil deʼit atu halakon ita. Nia sei ataka Jeová nia povu “hanesan kalohan neʼebé taka rai”. (Eze 38:16) Maibé ikusmai Gog sei rekoñese katak nia  tama ona ba lasu ida. Hanesan Faraó iha Tasi Mean, Gog mós sei hatene katak nia funu hasoru Jeová.​—Éx 14:1-4; Eze 38:3, 4, 18, 21-23.

15. Saida mak Kristu halo iha funu Armagedon?

¹⁵ Kristu no ninia tropa husi lalehan sei defende Jeová nia povu no halakon nasaun hotu hamutuk ho sira-nia tropa. (Apok 19:11, 14, 15) Maibé, saida mak sei akontese ho Jeová nia inimigu boot, Satanás? Jesus sei soe nia no ninia anju aat sira ba rai-kuak kleʼan, no sira sei iha neʼebá durante tinan rihun ida.​—Apok 20:1-3.

16. (a) Oinsá ita hatudu katak ita “hatene Maromak”? (b) Iha Armagedon, saida mak sei akontese ba ema neʼebé hatene Jeová?

¹⁶ Maski ita kleur ona iha lia-loos ka lae, atu bele hetan salvasaun iha Armagedon, ita tenke hatudu katak ita “hatene Maromak” no “halo tuir liafuan diʼak kona-ba ita-nia Naʼi Jesus”. (2 Tes 1:7-9) “Hatene Maromak” katak hatene saida mak nia gosta, la gosta, no ninia matadalan sira. Ita mós hatudu katak ita hatene Maromak kuandu ita hadomi nia, halo tuir nia no adora nia mesak deʼit. (1 João 2:3-5; 5:3) Se ita halo buat sira-neʼe, Maromak sei hatene ita, neʼe katak nia simu ita. (1 Kor 8:3) Rezultadu mak ita sei hetan salvasaun durante Armagedon.

17. “Halo tuir liafuan diʼak kona-ba ita-nia Naʼi Jesus” katak sá?

¹⁷ “Liafuan diʼak kona-ba ita-nia Naʼi Jesus” inklui lia-loos hotu neʼebé Jesus hanorin, hanesan hakerek iha Bíblia. Ita halo tuir liafuan diʼak neʼe kuandu ita aplika ida-neʼe iha ita-nia moris. Ita mós halo tuir liafuan diʼak neʼe hodi tau uluk Jeová nia Ukun, moris tuir ninia matadalan sira, no haklaken kona-ba Maromak nia Ukun. (Mt 6:33; 24:14) Ita mós tenke apoia Kristu nia alin sira nuʼudar sira halaʼo sira-nia responsabilidade atu haklaken liafuan diʼak no hanorin ema sai dixípulu.​—Mt 25:31-40.

18. Iha dalan saida mak Kristu nia alin sira sei selu fali laran-diʼak neʼebé sira simu?

 ¹⁸ Lakleur tan, Kristu nia alin sira sei selu fali laran-diʼak neʼebé “bibi-malae seluk” hatudu ba sira. (João 10:16) Antes funu Armagedon hahú, ema restu husi ema naʼin-144.000 sei hetan moris-hiʼas ba lalehan nuʼudar espíritu neʼebé nunka mate. Tuirmai, ema naʼin-144.000 hotu sei sai parte ba tropa lalehan nian neʼebé sei halakon Gog no proteje “ema-lubun boot” neʼebé serbí Jeová. (Apok 2:26, 27; 7:9, 10) Sin, ema-lubun boot sei kontente tebes tanba sira apoia Kristu nia alin sira bainhira sira sei iha rai.

19-20. Oinsá mak ita bele laran-metin nafatin nuʼudar Armagedon besik daudaun?

¹⁹ Durante loron ikus sira-neʼe, Jeová nia povu barak tahan hasoru susar oioin. Maski nuneʼe, ita bele tahan ho haksolok. (Tgo 1:2-4) Buat ida neʼebé bele ajuda ita mak kontinua halo orasaun. (Lc 21:36) Liután neʼe, ita mós tenke estuda Bíblia loroloron no medita kona-ba neʼe. Neʼe inklui estuda no medita kona-ba profesia sira neʼebé sei akontese lakleur tan. (Sal 77:12) Se ita halo buat sira-neʼe no hakaʼas an atu haklaken, ita sei hametin ita-nia fiar no esperansa.

²⁰ Imajina toʼok ita sei sente oinsá bainhira Babilónia Boot lakon ona no Armagedon remata ona. Importante liu mak imajina kona-ba kontente neʼebé ita sei sente bainhira ema hotu respeitu Maromak nia naran no ninia direitu atu ukun. (Eze 38:23) Tan neʼe mak ema hotu neʼebé hatene Maromak, halo tuir ninia Oan-Mane no mós tahan toʼo rohan, hein namanas ba Armagedon.​—Mt 24:13.