1. Jeová sente oinsá ho ema neʼebé haraik an? Esplika toʼok.

JEOVÁ hadomi ema neʼebé haraik an. Só ema neʼebé hatudu haraik an neʼebé loos mak bele iha relasaun besik ho nia. Maibé, “nia hatene ema loko an husi dook deʼit”. (Sal 138:6) Ita hotu hakarak halo Jeová kontente no sente ninia domin, tan neʼe ita iha razaun diʼak atu aprende oinsá atu haburas hahalok haraik an.

2. Ita sei koʼalia kona-ba saida iha lisaun neʼe?

² Iha lisaun neʼe, ita sei koʼalia kona-ba pergunta tolu: (1) Haraik an katak sá? (2) Tanbasá ita presiza haburas hahalok haraik an? (3) Situasaun saida deʼit mak bele koko ita-nia haraik an? Ita sei haree, kuandu ita haburas hahalok haraik an, neʼe sei halo Jeová nia laran kontente, no mós sei lori benefísiu mai ita.​—Prov 27:11; Isa 48:17.

3. Haraik an katak sá?

³ Ema neʼebé haraik an la haree ninia an importante liu fali ema seluk. Nia la foti an. Nia komprende katak Jeová mak boot liu fali nia. Nia mós komprende katak ema seluk diʼak liu nia iha buat balu.​—Flp 2:3, 4.

4-5. Oinsá mak ema balu haree hanesan haraik an, maibé tuir loloos lae?

⁴ Ema balu haree hanesan haraik an, maibé tuir loloos lae. Karik neʼe mak sira-nia hahalok moe deʼit. Ka, sira hatudu hahalok respeitu tanba kultura ka inan-aman mak haruka sira. Maibé tuir loloos, karik sira mak ema neʼebé foti an. Ikusmai sira sei hatudu sai saida mak iha sira-nia laran.​—Lc 6:45.

 ⁵ Iha mós ema balu neʼebé fiar an no la moe atu fó sai sira-nia opiniaun, maibé neʼe la dehan katak sira foti an. (João 1:46, 47) Maibé, ema hanesan neʼe presiza kuidadu atu la sadere ba sira-nia an rasik, atu la sai foti an. Maski ita mak ema neʼebé fiar an ka lae, ita hotu presiza hakaʼas an atu iha haraik an neʼebé loos.

6. Hanesan temi iha 1 Korinto 15:10, saida mak ita bele aprende husi apóstolu Paulo nia ezemplu?

⁶ Hanoin toʼok kona-ba apóstolu Paulo. Maromak uza nia dala barak atu harii kongregasaun iha sidade oioin. Karik nia halo serbisu neʼebé barak liu fali Jesus Kristu nia apóstolu sira seluk. Maski nuneʼe, nia la haree ninia an diʼak liu fali sira. Ho haraik an nia dehan: “Haʼu kiʼik liu fali apóstolu sira seluk, no haʼu la merese atu bolu nuʼudar apóstolu ida, tanba uluk haʼu fó-terus ba Maromak nia kongregasaun.” (1 Kor 15:9) Tuirmai Paulo hatete katak nia iha relasaun neʼebé diʼak ho Jeová, tan deʼit Jeová hatudu laran-diʼak ba nia, laʼós tanba ninia matenek rasik. (Lee 1 Korinto 15:10.) Sin, Paulo hatudu ezemplu diʼak tebes kona-ba haraik an iha ninia karta ba ema Korinto, maski ema balu iha kongregasaun kritika nia.​—2 Kor 10:10.

7. Oinsá mak irmaun ida neʼebé serbí iha Grupu Administradór hatudu hahalok haraik an?

⁷ Irmaun-irmán barak hetan laran-manas husi irmaun Karl F. Klein nia esperiénsia. Nia uluk serbí nuʼudar membru husi Grupu Administradór. Iha ninia esperiénsia, irmaun Klein ho haraik an koʼalia nakloke kona-ba ninia fraku no problema barak neʼebé nia hasoru iha ninia moris. Porezemplu, maizumenus iha tinan 1920, bainhira nia haklaken ba dala  primeiru, nia sente katak neʼe susar tebes no nia la haklaken tan maizumenus ba tinan rua. No kuandu nia serbí iha Betel, nia rai hirus ba irmaun ida ba tempu balu tanba konsellu neʼebé nia simu. Tanba estrese beibeik, nia iha problema ho emosaun no ikusmai sai diʼak fali. Maibé nia mós iha priviléjiu barak. Irmaun Klein haraik an tebes tanba fó sai ninia fraku sira maski nia mak membru husi Grupu Administradór neʼebé ema barak koñese. Irmaun-irmán barak hanoin-hetan kona-ba irmaun Klein no ninia liafuan sira neʼebé koʼalia ho nakloke iha ninia esperiénsia. *

8. Oinsá mak 1 Pedro 5:6 hatudu katak haraik an bele halo Jeová kontente?

⁸ Razaun importante liu atu haburas hahalok haraik an mak tanba neʼe halo Jeová kontente. Apóstolu Pedro fó sai ida-neʼe ho klaru. (Lee 1 Pedro 5:6.) Livru “Mai Tuir Haʼu” koʼalia kona-ba Pedro nia liafuan, dehan: “Hahalok foti an mak hanesan venenu ida. Foti an bele estraga buat barak. Hahalok neʼe bele halo ema neʼebé matenek sai la folin iha Maromak nia matan. Maibé, ema neʼebé ladún matenek bele sai folin-boot ba Maromak Jeová tanba ninia hahalok haraik an, no Maromak bele uza ema neʼe atu halo ninia serbisu . . . Maromak sei kontente atu haraik bensaun mai ita tanba ita-nia hahalok haraik an.” * Loos duni, halo Jeová kontente mak buat neʼebé diʼak liu hotu.​—Prov 23:15.

9. Oinsá mak haraik an halo ema hakarak ransu ho ita?

⁹ Kuandu ita haburas hahalok haraik an, ita sei simu benefísiu oioin. Porezemplu, se ita haraik an, ema sei hakarak ransu ho ita. Tanbasá? Hanoin toʼok kona-ba ema hanesan saida mak ita gosta atu ransu. (Mt 7:12) Baibain ita la gosta ransu ho ema neʼebé sempre hakarak ema seluk halo tuir deʼit saida mak nia hakarak no lakohi rona ema seluk nia sujestaun. Maibé ita sei kontente atu ransu hamutuk ho ita-nia irmaun-irmán sira neʼebé “hanoin malu, hadomi malu hanesan maun-alin, hatudu laran-sadiʼa no haraik an”. (1 Ped 3:8) Se ita gosta hakbesik ba ema neʼebé haraik an, neʼe katak ema mós hakarak hakbesik mai ita se ita haraik an.

10. Oinsá mak haraik an bele ajuda ita hasoru problema iha ita-nia moris?

 ¹⁰ Haraik an bele ajuda ita hasoru problema iha ita-nia moris. Dala ruma, ita haree buat oioin neʼebé la justisa akontese iha ita-nia moris. Liurai Salomão hatete: “Haʼu haree ona atan sira saʼe kuda maibé ulun-naʼin sira laʼo ain hanesan atan sira.” (Ecle 10:7) Ema balu tuir loloos iha talentu, maibé ema ladún hafolin sira. No dala ruma ema hafolin liu mak sira neʼebé la iha talentu. Maski nuneʼe, Salomão dehan atu simu realidade duké sai laran-kraik kona-ba situasaun moris neʼebé ita hasoru. (Ecle 6:9) Se ita haraik an, fasil ba ita atu simu situasaun moris nian maski karik ita ladún gosta.

11. Tanbasá mak ita presiza haraik an kuandu hetan konsellu?

¹¹ Loroloron, ita iha oportunidade atu hatudu haraik an. Hanoin toʼok kona-ba situasaun balu. Bainhira ita hetan konsellu. Diʼak atu hanoin-hetan katak se ema ruma hakaʼas an atu fó konsellu mai ita, karik neʼe tanba ita halo ona sala neʼebé ita rasik la sente. Iha tempu hanesan neʼe, baibain ita lakohi simu konsellu. Karik ita la gosta ema neʼebé fó konsellu mai ita, ka dalan neʼebé nia fó konsellu. Maibé se ita mak haraik an, ita sei koko atu hadiʼa ita-nia atitude.

12. Tuir Provérbios 27:5, 6, tanbasá ita presiza hatudu agradese bainhira hetan konsellu? Fó toʼok ilustrasaun.

¹² Ema neʼebé haraik an sei kontente atu simu konsellu. Nuʼudar ilustrasaun: Imajina toʼok katak Ita tuir hela reuniaun. Depois koʼalia tiha ho irmaun-irmán balu, sira ida hakbesik Ita no fó-hatene katak iha modo-tahan balu belit iha Ita-nia nehan leet. Klaru, neʼe halo Ita moe duni. Maibé Ita sei kontente tanba ema neʼe fó-hatene Ita, loos ka lae? Tuir loloos Ita hakarak tebes atu ema ruma fó-hatene kedas neʼe mai Ita! Nuneʼe mós, ita presiza ho haraik an hatudu agradese ba maluk ida neʼebé hakarak tebes atu fó konsellu bainhira ita presiza. Ita haree ema neʼe nuʼudar ita-nia belun, laʼós inimigu.​—Lee Provérbios 27:5, 6; Gal 4:16.

13. Oinsá mak ita hatudu haraik an kuandu ema seluk hetan knaar ruma?

¹³ Bainhira ema seluk hetan knaar ruma. Irmaun katuas ida naran Jason hatete: “Bainhira haʼu haree ema seluk  simu knaar ruma, dala ruma haʼu hanoin tanbasá laʼós haʼu mak simu ida-neʼe?” Ita mós dala ruma sente buat neʼebé hanesan ka lae? Neʼe diʼak se Ita hakarak halo buat barak liután ba Jeová. (1 Tim 3:1) Maski nuneʼe, ita presiza kuidadu kona-ba ita-nia hanoin. Se lae, ita bele sai foti an. Porezemplu, irmaun ida bele komesa hanoin katak nia deʼit mak bele halaʼo knaar ruma. Ka irmán ida bele hanoin: ‘Haʼu-nia laʼen bele halaʼo knaar neʼe diʼak liu fali irmaun seluk!’ Maski nuneʼe, se Ita mak haraik an duni, Ita sei la hanoin hanesan neʼe.

14. Saida mak ita bele aprende husi Moisés kuandu ema seluk hetan knaar ruma?

¹⁴ Ita bele aprende husi buat neʼebé Moisés halo kuandu ema seluk hetan knaar ruma. Moisés hafolin ninia knaar atu dirije povu Izraél. Maibé bainhira Jeová husik ema seluk serbí hamutuk ho Moisés, saida mak Moisés halo? Nia la sai laran-moras. (Núm 11:24-29) Nia ho haraik an simu ema seluk nia ajuda atu tesi-lia ba povu sira. (Éx 18:13-24) Neʼe diʼak ba nasaun Izraél tanba sira iha mane barak liu neʼebé bele tesi-lia. Neʼe hatudu mai ita katak Moisés hanoin liu kona-ba ajuda ema seluk duké hanoin liu atu simu priviléjiu barak. Neʼe ezemplu kapás tebes! Hanoin-hetan katak se ita hakarak Jeová uza ita, haraik an mak importante liu duké ita-nia matenek. “Maski Jeová hela iha fatin neʼebé aas, nia haree ema haraik an.”​—Sal 138:6.

15. Iha dalan saida deʼit mak irmaun-irmán barak nia situasaun troka?

¹⁵ Bainhira ita-nia situasaun troka. Foin daudaun, iha irmaun-irmán barak neʼebé laran-metin simu knaar foun. Porezemplu, husi tinan 2014, la iha tan katuas vizitante nian, tan neʼe irmaun sira-neʼe, hamutuk ho sira-nia feen simu fali knaar seluk. Hahú husi tinan neʼebá,  organizasaun fó matadalan foun katak sira neʼebé idade 70 ona labele tan serbí nuʼudar katuas área. No irmaun neʼebé idade 80 liu labele tan serbí nuʼudar koordenadór ba grupu katuas nian. No mós, durante tinan balu liubá, irmaun-irmán balu neʼebé serbí iha Betel hetan knaar foun atu serbí nuʼudar pioneiru. Ema seluk labele halo ona serbisu espesiál ba tempu-tomak tanba problema ho saúde, família, ka problema seluk.

16. Oinsá mak ita-nia irmaun-irmán sira hatudu haraik an iha sira-nia situasaun foun?

¹⁶ La fasil ba irmaun-irmán sira atu halo tuir mudansa sira-neʼe. Sira balu triste tebes atu husik knaar neʼebé sira gosta no halo ba tempu kleur ona, no sente susar atu halo mudansa hodi halaʼo fali knaar foun. Maski nuneʼe, sira kontente atu halo tuir mudansa sira. Tanbasá? Tanba sira-nia domin ba Jeová. Sira komprende katak sira dedika an ba Maromak, laʼós ba serbisu, pozisaun, ka knaar ruma. (Kol 3:23) Sira kontente atu kontinua serbí Jeová ho haraik an iha situasaun naran deʼit. Sira “entrega [sira-nia] laran-susar hotu ba nia”, tanba hatene katak nia hanoin sira.​—1 Ped 5:6, 7.

17. Tanbasá ita agradese katak Maromak nia Liafuan anima ita atu hatudu haraik an?

¹⁷ Ita agradese tanba Maromak nia Liafuan anima ita atu hatudu haraik an, loos ka lae? Se ita haburas haraik an, neʼe sei lori diʼak ba ema seluk, no ba Ita-nia an rasik. Neʼe sei ajuda ita tahan hasoru problema sira iha ita-nia moris. Importante liu mak, ita sai besik liután ho ita-nia Aman iha lalehan. Ita kontente tebes atu hatene katak maski Maromak mak “Aas Liu”, maibé nia hadomi no hafolin ninia atan sira neʼebé haraik an!​—Isa 57:15.