1. Bainhira mak susar liu atu serbí Jeová?

TUIR Ita-nia hanoin, bainhira mak tempu neʼebé susar liu atu serbí Jeová, kuandu Ita hasoru daudaun susar ka kuandu Ita moris iha dame laran? Bainhira ita hasoru susar, fasil liu ba ita atu sadere ba Jeová. Maibé baibain ita halo saida kuandu ita moris iha dame laran? Karik ita komesa sai okupadu ho ita-nia moris no la tau uluk ita-nia adorasaun. Maromak Jeová fó avizu ba ema Izraél atu kuidadu kona-ba ida-neʼe.​—Deut 6:10-12.

2. Liurai Asa hatudu ezemplu diʼak saida?

² Liurai Asa mak ezemplu diʼak kona-ba hatudu matenek hodi sadere ba Jeová. Nia serbí Jeová durante tempu susar no mós tempu dame. Durante ninia moris tomak “Asa serbí Jeová ho laran tomak”. (1 Reis 15:14) Dalan ida neʼebé Asa hatudu katak nia serbí Jeová ho laran tomak mak hodi halakon adorasaun falsu husi rai-Judá. Bíblia hatete katak “[Asa] hasai altár ba maromak rai seluk nian no harahun fatin aas sira, baku rahun fatuk lulik no tesi ai-riin lulik sira”. (2 Krón 14:3, 5) Asa mós hasai ninia avó-feto Maaka husi pozisaun nuʼudar liurai-feto. Tanbasá? Tanba Maaka anima ema atu adora estátua.—1 Reis 15:11-13.

3. Iha lisaun neʼe, ita sei koʼalia kona-ba saida?

³ Asa laʼós deʼit halakon estátua sira, maibé nia mós ajuda povu Judá atu adora fali Jeová iha dalan neʼebé loos. Jeová haraik bensaun ba Asa no ema Judá hodi fó sira tempu dame. * Durante Asa nia ukun, “rai neʼe hakmatek” ba tinan sanulu. (2 Krón 14:1, 4, 6) Iha lisaun neʼe, ita sei  koʼalia kona-ba oinsá Asa aproveita didiʼak tempu dame nian. Ita mós sei koʼalia kona-ba ema Kristaun iha apóstolu sira-nia tempu neʼebé mós aproveita tempu dame nian hanesan Asa. Ita mós sei hatán ba pergunta neʼe: Se Ita hela iha rai neʼebé governu fó liberdade atu adora Jeová, oinsá mak Ita bele aproveita didiʼak tempu dame neʼe?

4. Tuir 2 Krónikas 14:2, 6, 7, oinsá Asa aproveita tempu dame nian?

⁴ Lee 2 Krónikas 14:2, 6, 7. Asa hatete ba povu katak Jeová mak ‘halo ona sira moris hakmatek husi sira-nia inimigu sira hotu neʼebé haleʼu sira’. Asa la hanoin katak tempu dame nian mak tempu atu goza moris. Duké halo nuneʼe, nia komesa harii sidade, moru, uma aas, no portaun sira. Nia hatete ba povu Judá: “Rai neʼe hotu mak Ita-nian.” Asa nia liafuan neʼe signifika saida? Neʼe katak sira bele laʼo bá-mai no harii buat oioin iha rai neʼe tanba la iha inimigu neʼebé hanetik sira. Nia anima povu atu aproveita didiʼak tempu dame neʼe.

5. Tanbasá Asa hametin ninia forsa militár?

⁵ Liurai Asa mós aproveita tempu dame nian atu hametin ninia forsa militár. (2 Krón 14:8) Neʼe katak Asa la tau fiar ba Jeová ka lae? Lae. Nuʼudar liurai, Asa hatene katak nia presiza prepara povu ba situasaun susar neʼebé karik bele mosu. Asa hatene katak situasaun bele troka no dame iha rai-Judá mós bele lakon. Neʼe akontese duni.

6. Oinsá mak ema Kristaun iha apóstolu sira-nia tempu aproveita tempu dame nian?

⁶ Maski ema fó-terus beibeik ba ema Kristaun iha apóstolu sira-nia tempu,  maibé sira mós iha tempu dame nian. Oinsá sira aproveita tempu neʼe? Mane no feto laran-metin sira-neʼe haklaken ho laran-manas no tau fokus atu serbí Jeová. No rezultadu mak dixípulu barak “aumenta liután”. Neʼe hatudu ho klaru katak Jeová haraik bensaun ba sira tanba haklaken ho laran-manas durante tempu dame nian.—Após 9:26-31.

7-8. Saida mak Paulo no apóstolu sira halo bainhira sira iha oportunidade? Esplika toʼok.

⁷ Dixípulu sira aproveita oportunidade hotu atu habelar liafuan diʼak. Porezemplu, kuandu apóstolu Paulo haree katak nia bele haklaken ba ema barak liután iha Éfeso. Nia aproveita oportunidade neʼe hodi hela nafatin iha sidade neʼe no kontinua haklaken.—1 Kor 16:8, 9.

⁸ Paulo no ema Kristaun hetan oportunidade seluk tan atu haklaken ba ema barak. Neʼe akontese iha tinan 49 EC, bainhira apóstolu sira no katuas sira iha Jeruzalein foti desizaun kona-ba sirkunsizaun. (Após 15:23-29) Bainhira desizaun neʼe fó sai tiha ba kongregasaun, tuirmai dixípulu hotu hakaʼas an atu haklaken “liafuan diʼak kona-ba Jeová nia liafuan”. (Após 15:30-35) Neʼe lori rezultadu saida? Bíblia hatete katak “kongregasaun sira-nia fiar kontinua sai metin liután no loron ba loron fiar-naʼin sira aumenta ba beibeik”.—Após 16:4, 5.

9. Saida mak akontese ho serbisu haklaken iha rai barak? Saida mak ita bele husu ba ita-nia an?

⁹ Iha rai barak, ita bele haklaken ho livre. Ita hela iha rai hanesan neʼe ka lae? Se sin, husu ba Ita-nia an: ‘Haʼu uza haʼu-nia liberdade neʼe iha dalan oinsá?’ Jeová nia povu sente kontente iha loron ikus sira tanba sira hola parte iha serbisu haklaken no hanorin neʼebé halaʼo iha mundu tomak. (Mc 13:10) Iha buat oioin neʼebé ita bele halo hodi haklaken ba ema.

10. 2 Timóteo 4:2 anima ita atu halo saida?

¹⁰ Oinsá Ita bele aproveita tempu dame nian? (Lee 2 Timóteo 4:2.) Hanoin didiʼak Ita-nia situasaun no haree toʼok se Ita ka Ita-nia família ida bele halo mudansa balu atu nuneʼe bele aumenta ita-nia haklaken, ka karik serbí nuʼudar pioneiru. Agora laʼós tempu atu buka riku tanba buat neʼebé ita iha sei lakon mohu iha terus boot.—Prov 11:4; Mt 6:31-33; 1 João 2:15-17.

11. Saida mak irmaun-irmán balu halo atu bele haklaken liafuan diʼak ba ema barak liután?

¹¹ Irmaun-irmán barak aprende língua foun atu nuneʼe sira bele ajuda ema seluk aprende kona-ba Jeová. Jeová nia organizasaun prepara publikasaun barak atu ajuda ita haklaken iha língua barak liután. Porezemplu, iha tinan 2010, ita-nia publikasaun tradús ona ba língua maizumenus 500. Ohin loron, ida-neʼe aumenta toʼo língua 1.000 liu.

12. Oinsá ema hetan benefísiu hodi rona liafuan diʼak iha sira-nia língua rasik? Fó toʼok ezemplu.

¹² Ema sente oinsá bainhira rona kona-ba Jeová iha sira-nia língua rasik? Hanoin toʼok esperiénsia husi irmán ida. Nia tuir reuniaun boot neʼebé halaʼo iha língua Kiniaruanda iha Estadus Unidus. Lian Kiniaruanda mak língua neʼebé ema koʼalia iha parte balu husi Áfrika. Depois reuniaun boot remata, irmán neʼe hatete: “Husi tempu neʼebé haʼu muda mai, tinan 17 ona, ohin mak dala primeiru haʼu bele komprende ho didiʼak informasaun neʼebé hatoʼo iha reuniaun boot.”  Klaru katak informasaun neʼebé nia rona iha ninia língua rasik book duni ninia laran. Se Ita-nia situasaun permite, Ita bele aprende língua foun atu ajuda ema iha Ita-nia haklaken-fatin ka lae? Karik iha Ita-nia haklaken-fatin iha ema barak neʼebé gosta liu atu rona lia-loos iha sira-nia língua rasik. Ita-nia hakaʼas an sei lori ksolok boot ba ita.

13. Oinsá irmaun-irmán iha rai-Rúsia aproveita tempu dame nian?

¹³ Iha nasaun balu, irmaun-irmán sira labele haklaken ho livre tanba governu bandu serbisu haklaken. Porezemplu, hanoin toʼok kona-ba ita-nia irmaun-irmán sira iha rai-Rúsia. Sira hetan terus oioin durante tinan barak, maibé ikusmai governu fó lisensa ba sira atu adora Jeová ho livre iha fulan-Marsu tinan 1991. Iha tempu neʼebá, iha Testemuña ba Jeová maizumenus naʼin-16.000 iha rai-Rúsia. Tinan 20 liutiha, haklaken-naʼin aumenta toʼo naʼin-160.000 liu. Klaru katak ita-nia irmaun-irmán sira hatudu matenek bainhira sira iha oportunidade atu haklaken ho livre. Maibé situasaun troka iha rai-Rúsia, maski nuneʼe irmaun-irmán sira nafatin adora Jeová ho laran-manas. Sira kontinua halo buat hotu neʼebé sira bele atu serbí Jeová.

14-15. Oinsá Jeová uza ninia forsa atu ajuda Asa?

¹⁴ Iha Liurai Asa nia tempu, tempu dame nian remata. Tropa boot hamutuk naʼin-milliaun ida mai husi rai-Etiópia. Tropa Etiópia nia komandante naran Zerá fiar an katak nia no ninia tropa bele manán rai-Judá. Maski nuneʼe, Liurai Asa tau fiar ba ninia Maromak Jeová, laʼós ba ninia forsa militár. Asa halo orasaun: “Oh Jeová, ami-nia Maromak,  favór ida ajuda ami, tanba ami sadere ba Ita, no ami mai kontra ema-lubun neʼe hodi Ita-nia naran.”—2 Krón 14:11.

¹⁵ Maski tropa Etiópia mak barak liu dala rua tropa Judá, maibé Asa hatene katak Jeová mak forsa boot liu no Jeová bele ajuda ninia povu. No Jeová ajuda duni. Sira manán funu hasoru tropa Etiópia.—2 Krón 14:8-13.

16. Oinsá ita hatene katak tempu dame nian sei remata?

¹⁶ Ita la hatene ho klaru saida mak sei akontese ba ita iha futuru, maibé ita hatene katak dame neʼebé karik agora daudaun ita iha mak temporáriu deʼit. Hanoin-hetan, Jesus fó-hatene nanis katak iha loron ikus sira, “nasaun sira hotu sei odi” ninia dixípulu. (Mt 24:9) Apóstolu Paulo mós hatete katak “ema hotu neʼebé hakarak atu moris ho laran-metin ba Maromak nuʼudar Kristu Jesus nia dixípulu sei hetan mós terus”. (2 Tim 3:12) Satanás “hirus makaʼas” no ita labele hasees an husi rezultadu aat husi ninia hirus.—Apok 12:12.

17. Karik ita-nia fiar sei hetan koko iha dalan oinsá?

¹⁷ Lakleur tan, ita hotu nia fiar sei hetan koko, tanba sei mosu terus boot no “toʼo agora seidauk mosu terus hanesan neʼe”. (Mt 24:21) Durante terus boot, karik ita-nia família sei kontra ita no governu sei bandu ita-nia serbisu haklaken. (Mt 10:35, 36) Ita sei banati-tuir Liurai Asa no fiar katak Jeová sei ajuda no proteje ita ka lae?

18. Tuir Ebreu 10:38, 39, saida mak bele ajuda ita atu prepara an bainhira tempu dame nian remata?

¹⁸ Jeová prepara daudaun ita atu nuneʼe ita-nia fiar sei metin. Nia uza “atan laran-metin no matenek” atu “fó ai-han ba [ita] iha tempu loloos” hodi nuneʼe ita hotu bele nafatin iha fiar neʼebé metin. (Mt 24:45) Maibé ita ida-idak presiza hakaʼas an atu hametin ita-nia fiar ba Jeová.—Lee Ebreu 10:38, 39.

19-20. Depois lee tiha 1 Krónikas 28:9, pergunta saida mak ita presiza husu ba ita-nia an, no tanbasá?

¹⁹ Hanesan Liurai Asa, ita presiza “buka Jeová”. (2 Krón 14:4; 15:1, 2) Ita  komesa buka Jeová bainhira ita aprende kona-ba nia no hetan batizmu. Ita presiza aproveita oportunidade hotu atu hametin ita-nia domin ba Jeová. Atu buka-hatene se ita halo nuneʼe, ita bele husu ba ita-nia an: ‘Haʼu tuir beibeik reuniaun sira ka lae?’ Bainhira tuir reuniaun, ita hetan kbiit atu kontinua serbí Jeová no hetan laran-manas husi ita-nia irmaun-irmán sira. (Mt 11:28) Husu mós ba ita-nia an: ‘Haʼu toman atu halo estuda mesak ka lae?’ Se Ita hela ho Ita-nia família, Ita halaʼo adorasaun família nian semana-semana ka lae? Ka se Ita hela mesak, Ita nafatin halaʼo ida-neʼe ka lae? No mós, Ita hakaʼas an atu haklaken no hanorin ema seluk ka lae?

²⁰ Tanbasá ita presiza husu pergunta sira-neʼe ba ita-nia an? Bíblia hatete katak Jeová mak buka-hatene ita-nia hanoin no ita-nia laran, tan neʼe ita mós presiza halo nuneʼe. (Lee 1 Krónikas 28:9.) Se ita haree katak ita presiza troka ita-nia planu ka hanoin ruma, ita presiza halo orasaun ba Jeová atu husu nia ajuda ita atu halo mudansa sira-neʼe. Agora mak tempu atu prepara ita-nia an ba koko neʼebé ita sei hasoru iha futuru. Keta husik buat ida hapara ita atu aproveita didiʼak tempu dame nian.