Eskritura neʼe hatete: “Se ó haree ema-boot hanehan sira neʼebé kiak no la hatudu justisa no hahalok loos iha ó-nia distritu, keta hakfodak kona-ba neʼe. Tanba iha ema seluk neʼebé boot liu fali ema-boot neʼe mak haree ba nia, no iha mós sira seluk neʼebé boot liután ema sira-neʼe.”—Ecle 5:8.

Bainhira ita la hanoin didiʼak kona-ba saida mak Jeová sente kona-ba tópiku neʼe, karik ita sente katak versíkulu neʼe refere deʼit ba ukun-naʼin sira iha rai. Maibé bainhira ita hanoin kleʼan, versíkulu neʼe mós fó sai lia-loos kona-ba Jeová, no neʼe bele fó kmaan ba ita.

Eclesiastes 5:8 koʼalia kona-ba ukun-naʼin ida ka ema-boot ida neʼebé hanehan ema kiak no la hatudu justisa ba ema. Ukun-naʼin neʼe presiza hanoin-hetan katak iha ida neʼebé aas liu nia ka iha podér boot liu fali nia no haree buat neʼebé nia halo. No karik iha mós ukun-naʼin sira seluk neʼebé iha pozisaun aas liután. Triste mak ukun-naʼin barak iha rai karik halo korrupsaun no povu hetan terus tanba ida-neʼe.

Maski situasaun iha mundu haree hanesan la iha esperansa, maibé ita bele sente kmaan tanba hatene katak Jeová ‘haree ema-boot’ sira neʼebé ukun iha rai. Ita bele husu Maromak nia ajuda no entrega ita-nia laran-susar ba nia. (Sal 55:22; Flp 4:6, 7) Ita hatene katak “Jeová nia matan hateke didiʼak ba mundu tomak atu hatudu ninia kbiit hodi salva ninia atan sira neʼebé laran-metin ba nia”.—2 Krón 16:9.

Entaun, Eclesiastes 5:8 fó-hanoin ita katak maski ema mak ukun iha mundu, maibé sempre iha ida neʼebé pozisaun aas liu sira. Importante liu mak versíkulu neʼe fó-hanoin ita katak Jeová mak aas liu, sin, nia mak Ukun-Naʼin neʼebé Boot Liu Hotu. Agora nia ukun liuhusi ninia Oan-Mane Jesus Kristu, Liurai ba Maromak nia Ukun. Maromak Kbiit Boot Liu Hotu neʼebé haree buat hotu, sempre hatudu justisa, no ninia Oan-Mane mós sempre hatudu justisa.