MAIZUMENUS iha tinan 1910, haʼu-nia inan-aman muda husi Tbilisi, rai-Jeórjia bá rai-Kanadá. Sira hela iha uma kiʼik ida besik knua Pelly, Saskatchewan, iha Kanadá parte oeste. Haʼu moris iha 1928, no haʼu mak oan-ikun husi oan naʼin-neen. Haʼu-nia apá mate fulan neen antes haʼu moris, no amá mate bainhira haʼu sei bebé hela. Lakleur haʼu-nia biin boot, Lucy mós mate ho idade 17 deʼit. Tan neʼe haʼu-nia tiun Nick mak hakiak ami.

Bainhira haʼu sei kiʼik, loron ida haʼu-nia família haree haʼu dada halimar kuda nia ikun. Sira hakilar makaʼas ba haʼu atu para, tanba sira taʼuk kuda sei tebe haʼu. Maibé haʼu la fila oin ba sira tanba haʼu la rona sira-nia lian. Diʼak tanba kuda la tebe haʼu. No iha tempu neʼebá mak sira foin hatene katak haʼu tilun-diuk.

Ami-nia família nia kolega ida fó sujestaun ba sira katak diʼak liu haruka haʼu bá eskola ho labarik tilun-diuk sira. Tan neʼe tiu Nick hatama haʼu bá eskola tilun-diuk nian iha Saskatoon, Saskatchewan. Haʼu taʼuk atu bá eskola neʼe tanba haʼu foin tinan lima no eskola neʼe dook husi haʼu-nia família. Iha tempu feriadu deʼit mak bele vizita família. Maibé ikusmai haʼu aprende língua liman nian no gosta tebes halimar ho labarik sira seluk.

Haʼu-nia biin Marion kaben ho Bill Danylchuck iha 1939, no sira mak tau matan fali ba haʼu ho haʼu-nia biin Frances. Sira mak ema primeiru husi ami-nia família neʼebé estuda ho Testemuña ba Jeová. Iha tempu haʼu feriadu, sira koko makaʼas atu fahe buat neʼebé sira aprende husi Bíblia ba haʼu. La fasil atu koʼalia ho sira tanba sira la komprende língua liman nian, maibé sira bele haree katak haʼu gosta tebes atu aprende kona-ba  Jeová. Haʼu bele haree katak buat neʼebé sira halo daudauk mak kona-ba Bíblia, tan neʼe haʼu tuir sira bá hamutuk hodi haklaken. Liutiha tempu balu haʼu hakarak atu hetan batizmu, no iha 5 Setembru 1941, Bill fó batizmu ba haʼu iha tanke besi, bee neʼe malirin tebes!

Bainhira haʼu fila ba uma atu feriadu iha 1946, haʼu bá tuir reuniaun boot ida iha Cleveland, Ohio, Estadus Unidus. Iha loron primeiru haʼu-nia biin sira hakerek nota ba haʼu hodi haʼu bele komprende programa sira-neʼe. Maibé loron tuirmai, haʼu hakfodak tebes hodi haree katak iha grupu tilun-diuk ida neʼebé tradús ho língua liman nian ba reuniaun boot neʼe. Ikusmai, haʼu bele komprende programa sira, no furak tebes tanba haʼu foin hatene didiʼak lia-loos husi Bíblia!

Iha tempu neʼebá, Funu Mundiál Segundu foin ramata, no ema barak hakarak hatudu katak sira laran-metin ba sira-nia nasaun. Maibé bainhira haʼu fila husi reuniaun boot no fila fali ba eskola, haʼu-nia hakarak mak atu hatudu laran-metin deʼit ba Jeová. Tan neʼe, haʼu la hola parte tan iha inu nasionál, kontinénsia ba bandeira, no selebra loron boot sira. Haʼu mós la bá tan igreja hamutuk ho labarik sira. Profesora sira la kontente ho ida-neʼe, sira koko atu halo taʼuk haʼu no koʼalia lia-bosok oioin hodi halo haʼu troka haʼu-nia hanoin. Haʼu-nia kolega eskola sira hatene buat sira neʼebé akontese daudauk ba haʼu, tan neʼe haʼu uza oportunidade sira-neʼe hodi haklaken ba sira. Kolega eskola balu hanesan, Larry Androsoff, Norman Dittrick, no Emil Schneider ikusmai simu lia-loos no serbí Jeová toʼo ohin loron.

Bainhira haʼu bá vizita sidade seluk, haʼu sempre hakaʼas an atu haklaken ba ema tilun-diuk sira. Porezemplu, iha sidade Montreál haʼu bá fatin ida neʼebé ema tilun-diuk husi komunidade sira halibur hamutuk. Iha neʼebá haʼu haklaken ba Eddie Tager, mane joven husi gang ida. Nia serbí iha kongregasaun tilun-diuk iha Laval, Kebeke toʼo nia mate iha tinan kotuk. Haʼu mós haklaken ba mane joven ida naran Juan Ardanez. Nia hanesan ema Bereia husi Bíblia neʼebé buka-hatene didiʼak kona-ba buat neʼebé nia aprende mai duni husi Bíblia ka lae. (Apóstolu 17:10, 11) Nia mós simu lia-loos, no nia serbí nuʼudar katuas iha kongregasaun Ottawa, Ontario toʼo nia mate.

Iha 1950 haʼu muda ba Vancouver. Maski haʼu gosta tebes atu haklaken ba ema tilun-diuk, maibé haʼu sei nunka haluha esperiénsia ida kona-ba feto ida naran Chris Spicer. Nia bele rona, haʼu haklaken ba nia iha dalan. Nia konkorda atu simu revista fulan-fulan no nia hakarak haʼu atu bá hasoru ninia laʼen Gary. Haʼu bá vizita sira iha uma  no ami koʼalia ba tempu kleur liuhusi hakerek nota ba malu deʼit. Komesa husi tempu neʼe haʼu la hasoru tan sira toʼo loron ida sira hasé haʼu iha reuniaun boot ida iha Toronto, Ontario. Haʼu hakfodak tebes hodi hasoru sira iha neʼebá. Gary atu hetan batizmu iha reuniaun boot neʼe. Esperiénsia neʼe fó-hanoin haʼu katak, importante tebes atu haklaken beibeik tanba ita la hatene ema neʼebé ita haklaken bá, ikusmai karik sei simu lia-loos.

Ikusmai haʼu muda fali ba Saskatoon. Iha neʼebá haʼu hasoru feto ida no nia husu haʼu atu estuda Bíblia ho ninia oan-feto kaduak naʼin-rua, Jean no Joan Rothenberger. Sira mós tuir eskola tilun-diuk neʼebé uluk haʼu eskola. Lakleur sira naʼin-rua mós konta ba sira-nia kolega eskola kona-ba buat neʼebé sira aprende. Ikusmai ema naʼin-lima husi sira-nia klase sai Testemuña ba Jeová. Eunice Colin mak husi sira-neʼe ida. Dala primeiru haʼu hasoru Eunice mak iha tinan ikus iha haʼu-nia eskola tilun-diuk nian. Iha tempu neʼebá nia fó rebusadu ida ba haʼu no husu haʼu atu sai ninia kolega. Ikusmai nia sai duni haʼu-nia kolega moris nian hodi kaben ho haʼu!

Uluk, Eunice nia inan hatene katak nia estuda Bíblia, ninia inan husu Eunice nia diretora atu haruka Eunice para estuda Bíblia. Maski diretora koko no mós hadau hotu Eunice nia livru sira, maibé Eunice hatudu laran-metin nafatin ba Jeová. Iha tempu nia hakarak hetan batizmu, ninia inan-aman hatete ba nia, “Se ó sai Testemuña ba Jeová, ó tenke sai husi uma neʼe!” Tan neʼe Eunice muda husi uma hodi hela ho família Testemuña ida, nia tinan 17 iha tempu neʼebá. Nia kontinua estuda Bíblia no ikusmai hetan batizmu. Bainhira ami kaben iha 1960, ninia inan-aman sira la tuir ami-nia kazamentu. Maski nuneʼe, nuʼudar tempu liu daudauk, sira komesa hatudu fali respeitu ba ami-nia fiar no dalan neʼebé ami haboot ami-nia oan.

La fasil atu haboot ami-nia oan-mane naʼin-hitu tanba sira bele rona. Tan neʼe ami koko ajuda sira atu hatene uza língua liman nian hodi ami bele koʼalia ho sira no hanorin lia-loos ba sira. Irmaun-irmán sira husi kongregasaun mós fó ajuda barak ba ami. Porezemplu, irmaun ida hakerek nota ba ami katak ami-nia oan ida uza liafuan aat iha Reuniaun-Fatin. Hodi nuneʼe ami bele korrije kedas ami-nia oan. Ami-nia oan-mane naʼin-haat, James, Jerry, Nicholas, no Steven serbí nuʼudar katuas kongregasaun no serbí Jeová ho laran-metin hamutuk ho sira-nia feen no oan sira. Nicholas ho ninia feen Deborah ajuda iha tradusaun língua liman nian iha sukursál Bretaña. Steven ho ninia feen Shannan serbí iha tradusaun língua liman nian iha sukursál Estadus Unidus.

Triste tebes, fulan ida antes ami-nia aniversáriu ba dala 40, Eunice mate tanba moras kankru. Maski nia hasoru daudauk terus iha tempu neʼebá, maibé ninia esperansa kona-ba moris-hiʼas metin nafatin. Haʼu hein namanas atu hasoru fali nia loron ida.

Iha fulan-Fevereiru 2012 haʼu monu no ruin knotak tohar. Haʼu presiza tebes ema seluk nia ajuda, tan neʼe haʼu muda ba hela ho haʼu-nia oan-mane ida ho ninia feen. Ami tuir kongregasaun língua liman iha Calgary, no haʼu serbí nafatin nuʼudar katuas iha kongregasaun neʼe. Tuir loloos neʼe mak dala primeiru ba haʼu hodi serbí iha kongregasaun língua liman nian! Entaun oinsá mak haʼu bele hametin haʼu-nia relasaun ho Jeová iha tinan sira neʼebé haʼu serbí iha kongregasaun lia-inglés neʼebé la uza língua liman nian husi tinan 1946? Jeová mak ajuda haʼu. Neʼe tanba nia kumpre ninia promete hodi tau matan ba oan-kiak sira. (Salmo [Mazmur] 10:14) Haʼu agradese tebes ba sira neʼebé hakerek nota ba haʼu, aprende língua liman nian, no ajuda tradús ba haʼu.

Iha tempu uluk, dala ruma haʼu sente la komprende ema koʼalia saida no la iha ema ida mak hatene oinsá atu ajuda ema tilun-diuk. Iha tempu hanesan neʼe, haʼu sente laran-tun no atu rende an deʼit, maibé haʼu hanoin fali ba Pedro nia liafuan neʼebé nia koʼalia ba Jesus: “Naʼi, ami atu bá ho sé loos? Ita iha liafuan moris rohan-laek nian.” (João 6:66-68) Haʼu mós aprende oinsá bele hatudu pasiénsia hanesan irmaun-irmán tilun-diuk sira neʼebé iha lia-loos ba tinan barak ona. Haʼu aprende atu tau fiar ba Jeová no ba ninia organizasaun, no halo nuneʼe lori bensaun barak ba haʼu. Ohin loron iha livru barak ba ema tilun-diuk, no haʼu haksolok tebes hodi bele tuir reuniaun no reuniaun boot sira iha língua liman amerikanu nian. Haʼu bele hatete ho loloos katak haʼu iha moris neʼebé kontente neʼebé lori bensaun barak husi serbí Jeová, ita-nia Maromak neʼebé boot liu hotu.