ITA-NIA serbisu haklaken mak buat neʼebé importante no iha folin boot tebes. Maibé ba ema seluk, sira la komprende kona-ba ida-neʼe. Maski iha ema balu gosta eskritura sira, maibé sira la komprende tansá mak sira presiza estuda Maromak nia Liafuan ho ita.

Ezemplu ida mak kona-ba Gavin. Nia tuir beibeik reuniaun sira, maibé nia lakohi atu estuda Bíblia. Nia dehan nia lakohi ema atu hatene katak nia ladún hatene kona-ba Bíblia, no nia mós taʼuk ema lohi nia atu tama relijiaun. Tuir ita-nia hanoin, saida mak bele ajuda Gavin? Rona toʼok saida mak Jeová hatete ba ema Izraél sira: “Haʼu-nia liafuan sira sei turuk hanesan mahon-been, hanesan udan neʼebé turuk neineik iha duʼut leten.” Loos duni, ita bele uza liafuan sira husi Bíblia atu ajuda ema hanesan Gavin. (Deuteronômio [Ulangan] 31:19, 30; 32:2) Agora mai ita koʼalia uitoan kona-ba mahon-been hodi kompara oinsá mak serbisu haklaken hanesan ho mahon-been neʼebé bele ajuda ema oioin iha ita-nia haklaken.—1 Timóteo 2:3, 4.

Mahon-been mamar. Mahon-been mai husi bee nia iis. Bee nia iis halibur turuk ida-idak mak foin sai mahon-been. Jeová nia liafuan “turuk hanesan mahon-been”. Neʼe tanba bainhira nia koʼalia ba ninia povu, nia koʼalia iha dalan neʼebé diʼak, mamar, no respeitu. Ita mós bele banati-tuir nia ezemplu hodi hatudu respeitu ba ema seluk nia opiniaun. Ita hakarak anima ema atu hanoin no halo desizaun rasik. Bainhira ita hatudu hahalok hanesan neʼe ba ema, karik sira sei rona no lori rezultadu neʼebé diʼak.

Mahon-been fresku. Se ita buka dalan oioin atu ajuda ema hodi komprende liután kona-ba lia-loos, neʼe halo ita-nia haklaken sai buat fresku ba sira. Hanoin fali kona-ba Gavin. Bainhira irmaun Chris husu nia atu estuda Bíblia, irmaun Chris nunka obriga nia. Irmaun Chris sempre buka dalan oioin atu la halo Gavin sente an hodi sira bele koʼalia kona-ba Bíblia. Nia esplika ba Gavin katak, Bíblia tomak koʼalia kona-ba tema ida deʼit, no se Gavin mak hatene kona-ba tema neʼe, ida-neʼe sei ajuda Gavin atu komprende kona-ba reuniaun sira neʼebé nia rona. Tuirmai, nia esplika ba Gavin kona-ba oinsá mak Bíblia nia profesia ajuda nia rasik atu fiar katak Bíblia mak loos duni. Neʼe halo sira koʼalia liután kona-ba profesia seluk neʼebé sai loos ona. Hodi hatudu hahalok hanesan neʼe halo Gavin sente fresku tebes no ikusmai nia mós komesa hakarak atu estuda Bíblia.

Mahon-been importante ba moris. Tempu bailoro iha rai-Izraél manas no maran tebes, dala ruma iha fulan hirak nia laran, udan mós la tun. Se mahon-been mak laiha, ai sira bele sai namlaek no mate. Jeová fó-hatene nanis katak iha ita-nia tempu sei mosu bailoro ida neʼebé ema sei hamrook kona-ba “atu rona ba Jeová nia liafuan sira”. (Amós 8:11) Maibé Jeová promete katak ema kose-mina sei sai “hanesan mahon-been husi Jeová” hodi haklaken lia-foun diʼak Ukun nian neʼebé ema husi “bibi seluk” mós apoia sira. (Miquéias [Mikha] 5:7; João 10:16) Ita hafolin mensajen neʼebé ita haklaken ba ema tanba neʼe mak parte ida husi Jeová nia ajuda atu fó moris ba sira neʼebé hamrook ba lia-loos.

Mahon-been mak bensaun ida husi Jeová. (Deuteronômio [Ulangan] 33:13) Ita-nia haklaken bele sai hanesan bensaun ka prezente ida ba ema neʼebé rona ita. Bainhira Gavin hahú ona estuda Bíblia, nia hetan resposta ba ninia pergunta hotu. Nia laʼo ba oin lalais iha lia-loos no hetan batizmu. Ohin loron nia hamutuk ho ninia feen Joyce, haklaken ho haksolok.

Uza mahon-been atu kompara ita-nia serbisu haklaken mós bele ajuda ita hodi komprende katak ita ida-idak nia haklaken iha folin boot tebes. Tanbasá? Tanba mahon-been turuk ida karik la folin buat ida, maibé se ita halibur mahon-been turuk rihun ba rihun hamutuk, neʼe bele halo bokon rai tomak. Hanesan neʼe mós ho serbisu haklaken. Karik ita haree ita rasik nia haklaken hanesan buat kiʼik ida, maibé se ita mak tau Jeová nia atan sira hotu nia hakaʼas an hamutuk, neʼe bele fó sasin “ba nasaun hotu”. (Mateus 24:14) Entaun, oinsá mak ita bele halo ita-nia haklaken sai bensaun ida husi Jeová ba ema seluk? Neʼe mak bainhira ita halo ita-nia haklaken sai hanesan mahon-been neʼebé mamar, fresku, no fó moris ba ema!