1, 2. Jefté ho ninia oan-feto hasoru dezafiu saida?

IHA tempu neʼebé feto-joven neʼe nia aman manán no fila husi funu, nia halai ho kontente bá hasoru ninia apá. Nia kanta no dansa ho haksolok hodi simu nia. Maibé bainhira ninia apá haree nia, ninia apá halo buat ida neʼebé halo nia sai bilán. Ninia apá lees nia rasik nia roupa hodi hakilar: “Ai pá, haʼu-nia oan-feto! Ó halo haʼu-nia fuan rahun.” Tuirmai nia esplika ba ninia oan-feto katak nia halo ona promete ida ba Jeová neʼebé sei troka ninia oan-feto nia moris tomak. Ninia promete neʼe sei halo ninia oan-feto la kaben tan ka la bele atu iha oan iha futuru. Maibé, ninia oan-feto hatán kedas liafuan sira neʼebé fó laran-manas tebes ba ninia apá hodi ninia apá bele kaer metin ninia promete ba Jeová. Ninia oan-feto nia liafuan sira hatudu katak nia tau fiar duni ba Jeová, nia fiar katak buat naran deʼit neʼebé Jeová husu ba nia atu halo sempre buat neʼebé diʼak. (Juízes [Hakim-Hakim] 11:34-37) Bainhira ninia apá haree ninia fiar, ninia apá sente orgullu tebes tanba hatene katak buat neʼebé ninia oan-feto halo mós halo Jeová kontente.

² Jefté ho ninia oan-feto tau fiar tomak ba Jeová no ba Jeová nia dalan sira. Maski susar mós sira tau fiar nafatin ba Jeová, tanba sira hatene katak halo sakrifísiu ba Maromak mak folin liu fali buat seluk.

3. Oinsá mak Jefté ho ninia oan-feto nia ezemplu bele ajuda ita ohin loron?

 ³ La fasil atu kaer metin ba ita-nia laran-metin ba Jeová. Tan neʼe ita presiza atu “luta makaʼas hodi defende fiar”. (Judas 3) Buat neʼebé bele ajuda ita mak aprende husi Jefté ho ninia oan-feto nia istória. Iha sira-nia moris, sira hasoru susar balu, maibé sira manán hasoru susar sira-neʼe. Saida mak ajuda sira hatudu laran-metin ba Jeová?

4, 5. (a) Bainhira ema Izraél atu tama ba rai neʼebé Maromak promete, Maromak fó mandamentu saida ba sira? (b) Tanba ema Izraél la halo tuir Jeová, Salmo 106 hatete katak neʼe lori rezultadu aat saida ba nasaun Izraél?

⁴ Tanba ema Izraél sira la halo tuir Jeová, neʼe lori rezultadu aat tebes ba sira-nia moris. Jefté ho ninia oan-feto mós bele haree kona-ba ida-neʼe. Maizumenus tinan 300 liubá, Jeová fó mandamentu ba ema Izraél atu oho hotu ema neʼebé adora maromak falsu husi rai neʼebé Maromak promete. (Deuteronômio [Ulangan] 7:1-4) Maibé sira la halo tuir Jeová. Tan neʼe, ema Izraél barak komesa moris tuir ema Kanaán, sira mós komesa adora maromak falsu no moris iha dalan neʼebé la morál.—Lee Salmo (Mazmur) 106:37, 38. ^[1]

⁵ Tanba ema Izraél la halo tuir Jeová, Jeová la proteje tan sira husi sira-nia inimigu. (Juízes [Hakim-Hakim] 2:1-3, 11-15; Salmo [Mazmur] 106:40-43) Karik neʼe halo susar tebes ba ema seluk neʼebé hadomi Jeová hodi bele laran-metin ba Jeová durante tinan susar sira-neʼe. Maibé Bíblia hatete katak, maski nuneʼe, sei iha ema neʼebé laran-metin nafatin ba Jeová, ema hanesan Jefté no ninia oan-feto, Elcana, Ana, no Samuel. Sira kontinua hakaʼas an hodi halo buat neʼebé halo Jeová kontente.—1 Samuel 1:20-28; 2:26.

6. Ohin loron, mundu nia hanoin mak oinsá, no ita tenke halo saida?

⁶ Iha ita-nia tempu, ema barak mós iha hanoin no hahalok hanesan ema Kanaán sira. Iha sira-nia moris, sira-nia hanoin mak kona-ba seks, violénsia, no osan deʼit. Maibé Jeová fó avizu neʼebé klaru ba ita, tanba nia hakarak atu proteje ita hanesan nia proteje ema Izraél husi hahalok aat sira. Ema Izraél nia ezemplu mak avizu diʼak ida ba ita, loos ka lae? (1 Korinto 10:6-11) Ita tenke halakon duni ema Kanaán nia hanoin husi ita-nia moris. (Roma 12:2) Ita hakaʼas an daudauk atu halo nuneʼe ka lae?

7. (a) Jefté nia ema rasik trata nia oinsá? (b) Jefté hatudu hahalok saida?

⁷ Iha Jefté nia tempu, tanba ema Izraél la halo tuir Jeová, ema Filístia no ema Amon fó terus sira. (Juízes [Hakim-Hakim] 10:7, 8) Ba Jefté, susar sira laʼós mai deʼit husi inimigu, maibé mós husi ninia madrasta nia oan no ema Izraél nia ulun-naʼin sira. Tanba ninia maun-alin sira laran-moras no odi nia, sira duni no hadau ninia rai. (Juízes [Hakim-Hakim] 11:1-3) Maski nuneʼe, Jefté nunka hakarak atu halo tuir sira-nia hahalok aat sira-neʼe. Oinsá mak ita hatene? Tanba bainhira katuas husi nasaun Izraél bá husu ninia ajuda, nia bá kedas hodi ajuda sira. (Juízes [Hakim-Hakim] 11:4-11) Saida mak book Jefté hatudu hahalok diʼak sira-neʼe?

8, 9. (a) Prinsípiu saida husi Moisés nia Ukun-Fuan mak ajuda Jefté? (b) Ba Jefté, buat saida mak importante liu ba nia?

⁸ Jefté laʼós asu-waʼin deʼit, nia mós hatene kona-ba Moisés nia Ukun-Fuan no mós Izraél nia istória sira. Istória hanesan Jeová nia relasaun ho ema Izraél, no neʼe ajuda nia atu komprende hahalok saida mak Jeová gosta no la gosta. (Juízes [Hakim-Hakim] 11:12-27) Prinsípiu sira husi Moisés nia Ukun-Fuan ajuda tebes Jefté bainhira nia atu halo desizaun  ruma. Nia hatene katak Jeová la gosta ema atu odi malu, Jeová hakarak ninia povu atu hadomi malu. No nia mós aprende husi Jeová nia Ukun-Fuan katak se ema ruma mak presiza ajuda, nia tenkesér ajuda sira, maski ema neʼe odi hela nia.—Lee Êxodo (Keluaran) 23:5; ^[2] Levítico (Imamat) 19:17, 18. ^[3]

⁹ Karik ezemplu husi José bainhira nia hatudu laran-sadiʼa ba ninia maun-alin neʼebé odi nia mós ajuda Jefté hodi haburas hahalok diʼak sira. (Gênesis [Kejadian] 37:4; 45:4, 5) Karik hanoin kleʼan kona-ba ezemplu sira-neʼe ajuda Jefté atu hatudu hahalok neʼebé halo Jeová kontente. Maski Jefté nia maun-alin sira-nia hahalok hakanek tebes ninia laran, maibé ba Jefté, atu serbí no defende Jeová nia naran ho Jeová nia povu mak importante liu fali ninia sentimentu. (Juízes [Hakim-Hakim] 11:9) Ninia hakarak mak atu hatudu laran-metin ba Jeová, tan neʼe Jeová fó bensaun ba nia no ba ema Izraél sira seluk.—Ebreu 11:32, 33.

10. Oinsá mak Bíblia nia prinsípiu bele ajuda ita hatudu hahalok hanesan ema kristaun?

¹⁰ Saida mak ita bele aprende husi Jefté nia ezemplu? Se iha irmaun ka irmán ida hakanek ita-nia laran ka trata ita iha dalan neʼebé ladiʼak, ita sei halo saida? Ita lakohi husik ita-nia sentimentu atu hanetik ita hodi serbí Jeová. Ita la bele para hodi la tuir tan reuniaun sira ka para atu la ransu tan ho ita-nia kongregasaun. Diʼak atu halo tuir Jefté nia ezemplu hodi laran-metin nafatin ba Jeová. Halo hanesan neʼe bele ajuda ita tahan hasoru situasaun susar sira no ita mós bele sai fali ezemplu diʼak ba ema seluk.—Roma 12:20, 21; Koloso 3:13.

11, 12. Jefté promete saida, no neʼe kona-ba saida?

¹¹ Jefté rekoñese katak nia presiza duni Maromak nia ajuda hodi bele halo ema Izraél livre husi ema Amon. Nia promete ba Jeová katak, se Jeová mak halo nia manán funu neʼe, bainhira nia fila uma, ema primeiru neʼebé sai husi uma hodi simu nia, nia sei fó ema neʼe ba Jeová nuʼudar “sakrifísiu sunu nian”. (Juízes [Hakim-Hakim] 11:30, 31) Sakrifísiu neʼe kona-ba saida?

¹² Ita hatene katak Jefté laʼós atu hasaʼe ema nuʼudar sakrifísiu ida ba Jeová, tanba Jeová odi hahalok hanesan neʼe. (Deuteronômio [Ulangan] 18:9, 10) Tuir Moisés nia Ukun-Fuan, sakrifísiu sunu nian mak sakrifísiu neʼebé fó tomak ba Jeová. Tan neʼe, liafuan neʼebé Jefté promete ba Jeová mak atu fó ema nia moris tomak hodi serbí Jeová iha Jeová nia tabernákulu. Jeová simu duni Jefté nia promete no fó bensaun ba nia hodi manán funu neʼe. (Juízes [Hakim-Hakim] 11:32, 33) Maibé, sé mak Jefté atu fó nuʼudar “sakrifísiu sunu nian” ba Jeová?

13, 14. Oinsá mak Juízes 11:35 hatudu katak Jefté iha fiar?

¹³ Sei hanoin-hetan Jefté nia istória bainhira nia fila husi funu, sé mak ema primeiru neʼebé bá simu nia? Neʼe mak ninia oan-feto neʼebé oan-mesak. Ida-neʼe koko tebes Jefté nia fiar. Nia sei fó ninia oan-feto mesak ba Jeová atu serbí iha tabernákulu ba nafatin tuir buat neʼebé nia promete ba Jeová ka lae?

¹⁴ Dala ida tan, Jefté uza prinsípiu husi Maromak nia Ukun-Fuan hodi ajuda nia foti desizaun neʼebé loos. Karik nia hanoin-hetan liafuan sira husi Êxodo (Keluaran) 23:19 neʼebé hatete katak Jeová nia povu tenke fó buat neʼebé diʼak liu hotu ba Jeová. Ukun-Fuan mós hatete katak se ema ida mak jura ona ba Jeová, nia tenke halo tuir ninia juramentu neʼe, “nia labele kontra ninia liafuan neʼe. Nia tenke kumpre buat hotu neʼebé nia jura ona atu halo”. (Números [Bilangan] 30:2) Jefté tenkesér kumpre ninia juramentu ba Jeová maski nia hatene katak  neʼe sei kona nia no ninia oan-feto nia futuru. Neʼe hanesan ho buat neʼebé Samuel nia inan Ana halo, neʼebé karik moris iha Jefté nia tempu. Ba Jefté, nia iha oan ida deʼit, no ninia oan-feto mesak neʼe mak ninia esperansa atu iha bei-oan hodi lori ninia naran no sai liman-rohan ba futuru. (Juízes [Hakim-Hakim] 11:34) Maski nuneʼe mós, Jefté hatete: “Haʼu loke ona haʼu-nia ibun ba Jeová, no haʼu la bele dada fali.” (Juízes [Hakim-Hakim] 11:35) Jeová simu Jefté nia sakrifísiu no fó bensaun ba nia. Ita mós sei hatudu laran-metin hanesan Jefté nian ka lae?

15. Ita barak halo ona juramentu saida, no oinsá mak ita bele kaer metin ba ita-nia juramentu neʼe?

¹⁵ Bainhira ita dedika ita-nia moris ba Jeová, ita jura ba nia katak buat naran deʼit neʼebé nia husu ita atu halo, ita sei halo ba nia. Ita hatene katak atu kumpre ita-nia promete neʼe la fasil. Karik dala ruma ita simu knaar ida neʼebé ita la gosta atu halo, ita sei halo saida? Se ita mak simu deʼit hodi halo tuir Jeová ho laran, neʼe hatudu katak ita kaer metin duni ba ita-nia promete. Maski sakrifísiu neʼebé ita fó sente todan tebes, maibé Jeová sei fó bensaun boot liu fali ita-nia sakrifísiu neʼe. (Malaquias [Maleakhi] 3:10) Maibé kona-ba Jefté nia oan-feto, nia sente oinsá kona-ba Jefté nia promesa?

16. Jefté nia oan-feto sente oinsá kona-ba promete neʼebé ninia aman halo? (Haree dezeñu iha pájina 5.)

¹⁶ Jefté nia juramentu la hanesan ho Ana nian. Ana jura hodi fó ninia oan-mane Samuel atu serbí iha tabernákulu nuʼudar nazireu. (1 Samuel 1:11) Ema nazireu bele kaben no harii umakain. Maibé Jefté nia oan-feto fó ona hanesan “sakrifísiu sunu nian” tomak ba Jeová, neʼe katak nia nunka sei sai ema nia feen ka atu iha oan iha futuru. (Juízes [Hakim-Hakim] 11:37-40) Hanoin toʼok mós kona-ba ninia pozisaun. Nia mak ulun-naʼin Izraél nia oan-feto, nia bele kaben ho mane neʼebé diʼak liu hotu iha Izraél. Maibé agora nia sai deʼit hanesan atan ida neʼebé serbí iha tabernákulu. Neʼe halo nia sente oinsá? Husi ninia liafuan neʼebé nia hatete ba ninia apá  hatudu katak nia hakarak atu tau uluk serbí Jeová iha ninia moris. Nia dehan: “Apá, se Ita promete ona ba Jeová, entaun halo ba haʼu tuir buat neʼebé ita promete ona.” (Juízes [Hakim-Hakim] 11:36) Nia husik hotu hakarak neʼebé baibain ba ema atu bele iha laʼen no oan hodi serbí Jeová. Oinsá mak ita bele banati-tuir ninia ezemplu neʼe?

17. (a) Oinsá mak ita bele banati-tuir Jefté ho ninia oan-feto nia fiar? (b) Oinsá mak liafuan sira husi Ebreu 6:10-12 anima ita atu fó ita-nia an hodi serbí Jeová?

¹⁷ Ohin loron, iha joven kristaun feto no mane barak mak husik sira-nia oportunidade atu kaben ka atu iha oan hodi serbí Jeová liután. Sira neʼebé idade boot ona mós halo sakrifísiu ba sira-nia tempu neʼebé sira uza atu halimar ho sira-nia oan ka bei-oan. Sira fó fali tempu no forsa sira-neʼe hodi serbí Jeová. Balu halo serbisu konstrusaun ba Jeová nia organizasaun, balu tuir Eskola ba Haklaken-Naʼin Tempu-Tomak, no balu muda ba serbí iha fatin neʼebé presiza haklaken-naʼin. Balu tan halo planu hodi bele aumenta sira-nia haklaken iha tempu Memoriál. Ba Jeová, nia sei nunka haluha kona-ba sakrifísiu sira neʼebé irmaun-irmán sira fó ho laran-haksolok no domin. (Lee Ebreu 6:10-12.) Oinsá ho ita? Ita bele halo sakrifísiu hanesan neʼe hodi bele serbí Jeová liután ka lae?

18, 19. Saida mak ita aprende kona-ba Jefté ho ninia oan-feto, no oinsá mak ita bele banati-tuir sira?

¹⁸ Maski Jefté hasoru susar barak iha ninia moris, maibé nia uza Jeová nia hanoin hodi ajuda nia halo desizaun sira. Nia nunka husik ema seluk book nia atu iha hahalok hanesan sira-nian. Maski ema seluk hakanek ninia laran, nia laran-metin nafatin ba Jeová. Jeová fó duni bensaun ba sakrifísiu neʼebé nia no ninia oan-feto halo. Jeová uza sira hodi habelar adorasaun neʼebé loos. Dala ruma sira haree ema seluk kontra Jeová nia matadalan, maibé Jefté ho ninia oan-feto kaer metin nafatin ba Jeová.

¹⁹ Bíblia fó laran-manas ba ita atu “banati-tuir sira neʼebé simu promesa nuʼudar liman-rohan liuhusi fiar no pasiénsia”. (Ebreu 6:12) Mai ita banati-tuir Jefté ho ninia oan-feto, tanba se ita kaer metin ba ita-nia laran-metin, Jeová mós sei fó bensaun ba ita.