1. Bainhira Adão no Eva kontra Jeová, nia fó aten-brani no esperansa saida ba ema?

JEOVÁ mak Maromak neʼebé sempre fó aten-brani no kmaan ba ema. Ita bele haree kona-ba neʼe husi tempu neʼebé ema monu ba sala no sai la perfeitu. Bainhira Adão no Eva kontra nia, nia fó sai kedas profesia ida neʼebé sei fó aten-brani no esperansa ba ema iha futuru. Profesia neʼe hakerek iha Gênesis 3:15 neʼebé promete katak Diabu Satanás ho ninia hahalok aat sira sei lakon hotu.​—1 João 3:8; Apokalipse 12:9.

2. Iha dalan saida mak Jeová fó aten-brani ba Noé?

² Jeová nia atan Noé moris iha tempu neʼebé nakonu ho hahalok violénsia no la morál. Noé ho ninia família deʼit mak adora Jeová. Karik Noé mós sente laran-kraik. (Gênesis [Kejadian] 6:4, 5, 11; Judas 6) Maibé Jeová fó aten-brani ba Noé hodi nia bele kontinua adora Jeová no halo buat neʼebé loos. (Gênesis  [Kejadian] 6:9) Jeová hatete ba Noé katak nia atu halakon ema aat sira, no nia esplika ba Noé kona-ba saida mak Noé presiza halo atu Noé nia família bele hetan salvasaun. (Gênesis [Kejadian] 6:13-18) Ba Noé, Jeová mak Maromak neʼebé fó aten-brani duni.

3. Iha dalan saida mak Jeová fó aten-brani ba Josué? (Haree dezeñu iha leten.)

³ Jeová mós fó aten-brani ba ninia atan Josué. Josué hetan responsabilidade boot atu lori Maromak nia povu tama ba rai promete nian no funu hasoru tropa ho forsa makaʼas husi nasaun sira neʼebé hela iha neʼebá. Jeová hatene katak Josué bele sai taʼuk, tan neʼe nia hatete ba Moisés: “Hili Josué no fó aten-brani ba nia no hametin nia, tanba nia mak sei hakur mota neʼe iha povu nia oin no nia mak sei lori sira atu hela iha rai neʼebé ó sei haree.” (Deuteronômio [Ulangan] 3:28) Tuirmai Jeová rasik fó aten-brani ba Josué hodi dehan: “Haʼu fó ona mandamentu ba ó, loos ka lae? Sai aten-brani no sai forte bá. Keta nakdedar ka taʼuk, tanba Jeová, ó-nia Maromak, mak hamutuk ho ó iha fatin hotu neʼebé ó sei bá.” (Josué [Yosua] 1:1, 9) Tuir Ita-nia hanoin Josué sente oinsá bainhira rona liafuan sira-neʼe?

4, 5. (a) Oinsá mak Jeová fó kmaan no aten-brani ba ninia povu iha tempu uluk? (b) Iha dalan saida mak Jeová fó laran-manas ba ninia Oan-Mane?

⁴ Jeová mós fó kmaan no aten-brani ba ninia povu nuʼudar grupu. Porezemplu, Jeová hatene katak ema judeu sira presiza hetan kmaan bainhira ema lori sira ba dadur iha Babilónia, no Jeová fó sai profesia ida neʼebé lori kmaan ba sira hodi dehan: “Keta taʼuk tanba haʼu hamutuk ho ó. Keta laran-taridu tanba haʼu mak ó-nia Maromak. Haʼu sei hametin ó, sin, haʼu sei ajuda ó, haʼu sei kaer metin duni ó ho haʼu-nia liman-loos justisa nian.” (Isaías [Yesaya] 41:10) Jeová mós fó kmaan iha dalan neʼebé hanesan ba ema kristaun sira iha apóstolu nia tempu no mós ba ita ohin loron.​—Lee 2 Korinto 1:3, 4.

⁵ Jeová mós fó laran-manas ba ninia Oan-Mane. Bainhira Jesus hetan tiha batizmu, Jesus rona lian ida husi lalehan neʼebé dehan: “Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.” (Mateus 3:17) Karik liafuan sira-neʼe hametin tebes Jesus durante nia halaʼo serbisu haklaken iha rai, loos ka lae?

6. Oinsá mak Jesus nia ai-knanoik kona-ba osan talentu bele fó laran-manas mai ita?

⁶ Jesus banati-tuir ninia Aman nia ezemplu neʼebé furak. Iha Jesus nia ai-knanoik kona-ba osan talentu, nia anima ema seluk atu hatudu laran-metin ba Maromak. Nia dehan katak talentu nia naʼi hatete ba atan ida-idak neʼebé laran-metin: “Ó atan diʼak no laran-metin, ó halo diʼak loos! Ó laran-metin ba buat neʼebé uitoan. Entaun haʼu sei foti ó atu tau matan ba buat barak. Tama bá ó-nia naʼi nia ksolok.” (Mateus 25:21, 23) Liafuan sira-neʼe fó laran-manas duni ninia dixípulu sira atu kontinua serbí Jeová ho laran-metin!

7. Iha dalan saida mak Jesus anima ninia apóstolu sira, liuliu ba Pedro?

⁷ Maski apóstolu sira haksesuk malu beibeik kona-ba pozisaun, Jesus sempre hatudu pasiénsia ba sira. Nia anima sira atu hatudu haraik-an hodi serbí ema seluk, laʼós hein ema seluk atu serbí sira. (Lucas 22:24-26) Pedro halo sala dala balu no neʼe halo Jesus laran-triste. (Mateus 16:21-23; 26:31-35, 75) Maski nuneʼe Jesus nunka hakribi Pedro. Nia anima nafatin ba Pedro no mós fó knaar ba Pedro atu hametin fali ema seluk.​—João 21:16.

8. Iha dalan saida mak Ezekias hametin xefe tropa no povu sira husi Judá?

⁸ Antes Jesus mai toʼo rai no hatudu ezemplu kona-ba oinsá atu fó kmaan no aten-brani, Jeová nia atan sira iha tempu antigu hatene ona katak sira presiza duni atu fó kmaan no aten-brani ba ema seluk. Ezemplu ida mak kona-ba Ezekias. Bainhira ema Asíria sira atu ataka Jeruzalein, nia halibur xefe tropa no povu hotu hodi hametin sira, no ninia liafuan halo sira hotu aten-brani.​—Lee 2 Crônicas (Tawarikh) 32:6-8. *

9. Ita bele aprende saida husi Job kona-ba fó kmaan?

⁹ Ita bele aprende saida husi Job kona-ba fó kmaan? Maski Job rasik presiza hetan kmaan, nia mak hanorin fali ema seluk oinsá atu fó kmaan. Nia hatete ba ema sira neʼebé mai atu fó kmaan ba nia katak, se nia mak koko atu fó kmaan ba sira, nia sei koʼalia buat neʼebé mak sei hametin no halo sira sente diʼak, laʼós atu halo sira sente kanek. (Jó [Ayub] 16:1-5) Maibé ikusmai Job hetan duni kmaan husi Eliú no husi Jeová rasik.​—Jó (Ayub) 33:24, 25; 36:1, 11; 42:7, 10.

10, 11. (a) Tanbasá mak Jefte nia oan-feto presiza hetan kmaan no laran-manas? (b) Ita bele fó kmaan no laran-manas ba sé ohin loron?

¹⁰ Juis ida naran Jefte iha oan-feto neʼebé mós presiza hetan kmaan no laran-manas. Jefte promete ba Jeová katak, se Jeová mak ajuda nia manán funu hasoru ema Amon, bainhira nia fila uma, ema primeiru neʼebé sai husi uma atu simu nia, ema neʼe sei bá serbí Jeová iha tabernákulu. Ema Izraél manán duni funu neʼe no ema primeiru neʼebé sai atu simu Jefte mak ninia oan-feto mesak. Jefte nia laran rahun tebes. Maski nuneʼe, nia kaer metin ba ninia promesa hodi haruka ninia oan-feto bá serbí iha tabernákulu iha ninia moris tomak.​—Juízes (Hakim-Hakim) 11:30-35.

¹¹ Maski neʼe susar tebes ba Jefte, no karik liuliu ba ninia oan-feto, maibé ho laran, Jefte nia oan-feto halo tuir buat neʼebé ninia aman promete ona. (Juízes [Hakim-Hakim] 11:36, 37) Halo nuneʼe signifika katak ninia oan-feto sei nunka kaben ka atu iha oan. Neʼe mós sei hakotu família nia liña jerasaun. Oan-feto neʼe presiza duni atu hetan kmaan no anima husi ema seluk. Bíblia dehan kona-ba ema nia toman iha Izraél: “Tinan-tinan, feto joven sira husi Izraél bá hodi gaba Jefte nia oan-feto, ema Gilead. Sira halo neʼe ba loron haat iha tinan ida nia laran.” (Juízes [Hakim-Hakim] 11:39, 40) Ezemplu husi Jefte nia oan-feto fó-hanoin ita kona-ba ema kristaun barak ohin loron hili atu la kaben hodi sira bele serbí Jeová liután. Ita hakarak gaba no fó laran-manas ba sira ka lae?​—1 Korinto 7:32-35.

12, 13. Iha dalan saida mak Pedro ‘hametin ninia maluk sira-nia fiar’?

¹² Iha kalan antes Jesus mate, nia hatete ba apóstolu Pedro: “Simão, Simão, haree! Satanás husu atu nia bele haketak imi hanesan ema neʼebé haketak trigu husi nia kulit. Maibé haʼu harohan ona ba Maromak kona-ba ó, atu nuneʼe ó-nia fiar labele sai fraku; no kuandu ó fila, hametin ó-nia maluk sira-nia fiar.”​—Lucas 22:31, 32.

 ¹³ Pedro sai duni hanesan kongregasaun nia riin iha tempu uluk. (Galásia 2:9) Buat neʼebé nia halo ho aten-brani komesa husi Pentekostes hametin tebes irmaun-irmán sira. Serbí tiha ba tinan barak nia hakerek karta ba irmaun-irmán sira hodi dehan: “Haʼu hakerek ba imi ho liafuan balu, atu fó laran-manas ba imi no atu fó sasin ho loloos katak Maromak hatudu duni ba imi ninia laran-diʼak neʼebé boot. Kaer metin ba laran-diʼak neʼe.” (1 Pedro 5:12) Pedro nia karta sira hametin duni ema kristaun sira iha ninia tempu. No karta sira-neʼe mós hametin daudauk ita hodi hein nafatin atu haree Jeová nia promesa sira sai loos.​—2 Pedro 3:13.

14, 15. Iha dalan saida deʼit mak eskritura sira neʼebé apóstolu João hakerek fó kmaan tebes mai ita?

¹⁴ Apóstolu João mós sai hanesan riin ida ba kongregasaun iha tempu uluk. Nia hakerek Evanjellu neʼebé furak tebes kona-ba Jesus nia serbisu haklaken. Tinan atus ba atus ona ninia Evanjellu neʼe fó kmaan ba ema kristaun sira no sei fó nafatin kmaan ba ita toʼo ohin loron. Porezemplu, husi João nia Evanjellu deʼit mak hakerek Jesus nia liafuan neʼebé Jesus hatete katak domin mak identifika ninia dixípulu neʼebé loos.​—Lee João 13:34, 35.

¹⁵ Karta tolu seluk neʼebé João hakerek mós fó sai lia-loos furak oioin. Kuandu ita sente triste tanba halo sala ruma, bainhira lee katak Jesus nia sakrifísiu “hamoos ita-nia sala hotu”, neʼe fó kmaan tebes ba ita. (1 João 1:7) Se ita-nia laran fó sala beibeik ba ita kona-ba sala ruma, liafuan neʼebé hatete katak “Maromak mak boot liu fali ita-nia laran” hametin fali ita. (1 João 3:20) João deʼit mak Bíblia nia hakerek-naʼin neʼebé hatete katak “Maromak mak domin”. (1 João 4:8, 16) João nia karta segundu no terseiru gaba ema kristaun sira neʼebé “kontinua laʼo iha lia-loos”.​—2 João 4; 3 João 3, 4.

16, 17. Iha dalan saida deʼit mak apóstolu Paulo fó laran-manas ba ema kristaun sira iha tempu uluk?

 ¹⁶ Apóstolu Paulo hatudu ezemplu neʼebé diʼak tebes kona-ba fó kmaan ba irmaun-irmán sira. Iha apóstolu sira-nia tempu, apóstolu balu hela iha Jeruzalein, fatin ba grupu administradór. (Apóstolu 8:14; 15:2) Ema kristaun sira iha Judeia haklaken kona-ba Kristu ba ema sira neʼebé fiar ona ba Maromak mesak deʼit. Maibé espíritu santu dirije Paulo hodi haklaken ba ema gregu, Roma, no seluk tan neʼebé adora maromak oioin.​—Galásia 2:7-9; 1 Timóteo 2:7.

¹⁷ Paulo halo viajen ba fatin neʼebé ohin loron hanaran Turkia, no mós Grésia no Itália. Nia haklaken ba ema neʼebé laʼós judeu, no nia harii kongregasaun barak. La fasil ba ema kristaun foun sira tanba ema husi sira rasik nia rai fó terus ba sira, tan neʼe sira presiza tebes atu hetan laran-manas. (1 Tesalónika 2:14) Maizumenus iha tinan 50, Paulo hakerek karta ida neʼebé anima tebes kongregasaun foun iha Tesalónika. Nia dehan: “Ami sempre fó obrigadu ba Maromak kuandu ami temi kona-ba imi hotu iha ami-nia orasaun, basá iha ita-nia Aman Maromak nia oin ami nunka haluha serbisu neʼebé imi halo ho fiar no domin, no oinsá imi tahan susar.” (1 Tesalónika 1:2, 3) Nia mós husu sira atu hametin malu. Nia dehan: “Kontinua fó aten-brani ba malu no hametin malu.”​—1 Tesalónika 5:11.

18. Oinsá mak grupu administradór fó laran-manas ba Filipe?

¹⁸ Iha apóstolu sira-nia tempu, Jeová uza grupu administradór hodi fó laran-manas ba ema kristaun hotu, inklui mós sira neʼebé dirije kongregasaun sira. Bainhira Filipe haklaken kona-ba Kristu ba ema Samaria, grupu administradór fó apoiu ba nia. Sira haruka membru naʼin-rua husi grupu administradór, Pedro no João, hodi halo orasaun ba ema kristaun foun sira-neʼe hodi espíritu santu tun ba sira. (Apóstolu 8:5, 14-17) Filipe no mós irmaun-irmán foun sira-neʼe sente kmaan tebes bainhira simu apoiu husi grupu administradór!

19. Ema kristaun iha apóstolu sira-nia tempu sente oinsá bainhira lee tiha karta husi grupu administradór?

¹⁹ Loron ida grupu administradór presiza foti desizaun importante kona-ba ema kristaun neʼebé laʼós judeu presiza ka lae atu hetan sirkunsizaun hodi tuir Moisés nia Ukun-Fuan. (Apóstolu 15:1, 2) Bainhira grupu administradór halo tiha orasaun hodi husu Jeová nia espíritu santu no analiza didiʼak eskritura, sira deside katak la presiza atu hetan sirkunsizaun. Tuirmai sira hakerek karta hodi esplika desizaun sira-neʼe no haruka irmaun sira lori ba kongregasaun sira. Bainhira ema kristaun sira lee karta neʼe, “sira sai haksolok ho liafuan sira-neʼe”.​—Apóstolu 15:27-32.

20. (a) Iha dalan saida mak Grupu Administradór fó laran-manas ba ita ohin loron? (b) Ita sei koʼalia kona-ba pergunta saida iha lisaun tuirmai?

²⁰ Ohin loron, Grupu Administradór husi Testemuña ba Jeová mós fó laran-manas ba ema Betel, pioneiru tempu-tomak, no ita hotu. Hanesan ema kristaun sira iha tempu uluk, ita mós sente haksolok bainhira simu liafuan sira husi Grupu Administradór. No mós iha tinan 2015 Grupu Administradór fó sai broxura ida ho títulu Kembalilah kepada Yehuwa atu anima sira neʼebé husik lia-loos hodi fila fali mai. Maibé, irmaun sira neʼebé tau matan ba kongregasaun deʼit bele fó kmaan ba ema seluk, ka ita hotu mós iha responsabilidade atu halo nuneʼe? Ita sei koʼalia kona-ba pergunta neʼe iha lisaun tuirmai.