1. Tanbasá mak apóstolu Paulo hakarak ema kristaun ebreu sira atu fó laran-manas ba malu liután iha tempu neʼebá?

APÓSTOLU Paulo fó konsellu ba ema kristaun ebreu sira iha tempu uluk hodi dehan: “Mai ita hanoin malu hodi ajuda malu atu hatudu domin no hahalok diʼak, no maski ema balu sai toman atu la halibur hamutuk, maibé imi keta haluha atu halibur an hamutuk, no fó laran-manas ba malu, liuliu nuʼudar imi haree loron neʼe besik ona mai.” (Ebreu 10:24, 25) Karik irmaun-irmán sira-neʼe hanoin tanbasá mak Paulo hakarak sira fó laran-manas ba malu liután iha tempu neʼebá. Razaun mak tanba latoʼo tinan lima deʼit sira haree katak Jeová nia loron atu tesi-lia ba Jeruzalein besik duni atu mosu ona. Sira rekoñese katak sira presiza halai sai husi sidade neʼe hanesan Jesus fó-hatene nanis ona. (Lucas 21:20-22; Apóstolu 2:19, 20) Jeová nia loron neʼe toʼo duni iha tinan 70 bainhira ema Roma harahun Jeruzalein.

2. Tanbasá mak ita tenke hanoin malu no fó laran-manas ba malu liután ohin loron?

² Ita ohin loron mós iha situasaun neʼebé hanesan. Jeová nia loron neʼebé “boot no kmanek liu” besik ona atu mai. (Joel 2:11) Profeta Sofonias nia liafuan sira mós kona ita ohin loron. Nia dehan: “Jeová nia loron boot besik ona! Neʼe besik ona no sei mai lalais loos!” (Sofonias [Zefanya] 1:14) Tanba razaun neʼe mak ita  tenke “hanoin malu hodi ajuda malu atu hatudu domin no hahalok diʼak”. (Ebreu 10:24) Ita tenke fó atensaun liután ba ita-nia irmaun-irmán sira hodi bele fó laran-manas ba sira iha tempu neʼebé sira presiza.

3. Apóstolu Paulo hatete saida kona-ba fó laran-manas? (Haree dezeñu iha leten.)

³ “Hanoin resin mak halo ema sente laran-triste, maibé liafuan neʼebé diʼak mak halo ema sente laran-haksolok.” (Provérbios [Amsal] 12:25) Loos duni, ita hotu presiza hetan beibeik laran-manas. Paulo hatete katak, maski sira neʼebé iha responsabilidade atu fó laran-manas ba ema seluk, sira rasik mós presiza hetan laran-manas. Nia hakerek karta ba irmaun-irmán sira iha Roma hodi dehan: “Haʼu hakarak tebes atu haree imi, atu haʼu bele fahe liafuan ruma neʼebé sei ajuda imi atu hametin imi-nia relasaun ho Maromak; ka, atu nuneʼe ita bele fó laran-manas ba malu liuhusi ita-nia fiar, imi-nia fiar no mós haʼu-nian.” (Roma 1:11, 12) Sin, apóstolu Paulo rasik mós dala ruma presiza hetan laran-manas.​—Lee Roma 15:30-32.

4, 5. Ita bele fó laran-manas no kmaan ba sesé deʼit ohin loron, no tanbasá?

⁴ Ohin loron, ita bele fó laran-manas ba sira neʼebé serbí Jeová tempu-tomak, hanesan pioneiru sira. Sira barak halo sakrifísiu oioin iha moris atu bele pioneiru. Nuneʼe mós hanesan ho misionáriu sira, katuas área no sira-nia feen, no sira neʼebé serbí iha sukursál ka eskritóriu tradusaun. Irmaun-irmán sira-neʼe halo sakrifísiu oioin hodi uza tempu barak liután atu serbí Jeová. Tan neʼe ita tenke fó laran-manas ba sira. Iha mós irmaun-irmán barak neʼebé uluk serbí tempu-tomak, maibé agora, situasaun moris nian la permite ona sira atu halo nuneʼe. Sira mós agradese tebes ba laran-manas neʼebé ema fó ba sira.

⁵ Sesé tan mak presiza atu hetan laran-manas? Ita bele fó laran-manas ba irmaun-irmán barak neʼebé hili atu la kaben tanba sira hakarak halo tuir Jeová no kaben deʼit “iha Naʼi”. (1 Korinto 7:39) Feen sira mós sente kmaan tebes bainhira laʼen hatete ba sira katak sira-nia laʼen hadomi sira no agradese ba buat hotu neʼebé sira halo. (Provérbios [Amsal] 31:28, 31) No mós sira neʼebé moras ka ema fó terus mós presiza atu hetan kmaan. (2 Tesalónika 1:3-5) Jeová no Jesus fó kmaan ba ema laran-metin neʼe hotu.​—Lee 2 Tesalónika 2:16, 17.

6. Tuir Isaías 32:1, 2, katuas sira iha knaar saida deʼit?

⁶ Lee Isaías (Yesaya) 32:1, 2. * Ita hela daudauk iha tempu neʼebé susar, no fasil ba ita atu sai triste no laran-kraik. Jesus Kristu fó kmaan ba ita liuhusi “ulun-naʼin sira”, neʼe mak katuas kongregasaun husi Kristu nia alin sira no mós husi bibi seluk. Katuas sira-neʼe laʼós atu “domina” ita-nia fiar, maibé sai “maluk serbisu-naʼin” ba ita-nia ksolok. Sira hakarak ajuda ita atu iha kontente no kontinua laran-metin.​—2 Korinto 1:24.

7, 8. Iha dalan saida mak katuas sira bele fó kmaan no laran-manas ba ema seluk liuhusi liafuan no hahalok?

⁷ Katuas sira bele banati-tuir apóstolu Paulo neʼebé sempre koko atu fó kmaan no laran-manas ba ema seluk. Nia hakerek karta ba ema kristaun sira iha Tesalónika neʼebé hetan terus husi ema hodi dehan: “Ami hanoin tebes imi, no ami kontente atu fahe ba imi laʼós deʼit liafuan diʼak kona-ba Maromak, maibé mós fó ami-nia moris hodi ajuda imi, tanba ami hadomi imi tebetebes.”​—1 Tesalónika 2:8.

 ⁸ Katuas sira-nia liafuan bele hametin duni ema seluk. Maibé liafuan deʼit toʼo ona ka lae? Paulo hatete ba katuas sira iha Éfeso: “Imi tenke tau matan ba sira neʼebé fraku. No imi tenke hanoin-hetan Naʼi Jesus nia liafuan kuandu nia rasik dehan: ‘Kontente liu atu fó duké simu.’” (Apóstolu 20:35) Paulo ‘kontente tebes atu fó buat hotu no fó ninia an rasik’ ba irmaun-irmán sira. (2 Korinto 12:15) Hanesan neʼe mós katuas sira tenke fó laran-manas no kmaan ba ema seluk, laʼós liuhusi liafuan deʼit, maibé mós liuhusi buat neʼebé sira halo. Halo nuneʼe hatudu katak sira hanoin duni ita.​—1 Korinto 14:3.

9. Oinsá mak katuas sira bele fó konsellu iha dalan neʼebé la halo ema sente laran-kraik?

⁹ Dala ruma katuas sira presiza fó konsellu atu hametin irmaun-irmán sira. Katuas sira bele aprende ezemplu sira husi Bíblia oinsá atu fó konsellu iha dalan neʼebé la halo ema sente laran-kraik. Jesus hatudu ezemplu neʼebé diʼak tebes kona-ba fó konsellu bainhira nia hetan moris-hiʼas. Nia haruka mensajen ba kongregasaun sira iha Ásia Menór. Nia hatoʼo konsellu balu neʼebé makaʼas ba kongregasaun sira iha Éfeso, Pérgamo, no Tiatira. Maibé antes nia fó konsellu, nia gaba sira kona-ba buat diʼak hotu neʼebé sira halo daudauk. (Apokalipse 2:1-5, 12, 13, 18, 19) Jesus hatete ba kongregasaun iha Laodiseia: “Haʼu fó konsellu no dixiplina ba sira hotu neʼebé haʼu hadomi. Tan neʼe, sai laran-manas bá no hakribi sala.” (Apokalipse 3:19) Katuas sira koko makaʼas atu banati-tuir Kristu iha dalan neʼebé nia fó konsellu.

10. Iha dalan saida mak ita hotu bele hametin malu?

¹⁰ Laʼós katuas sira deʼit mak iha responsabilidade atu fó kmaan no laran-manas ba ema seluk. Paulo husu ba ema kristaun hotu atu koʼalia ‘buat neʼebé presiza atu hametin ema seluk, hodi nuneʼe sira-nia liafuan bele fó buat neʼebé diʼak’ ba ema seluk. (Éfeso 4:29) Ita ida-idak tenke fó atensaun kona-ba ema presiza saida hodi nuneʼe ita bele fó ajuda ba sira. Paulo hakerek karta ba ema kristaun ebreu sira hodi dehan: “Halo loos imi-nia liman neʼebé kbiit-laek no imi-nia ain-tuur neʼebé fraku, no kontinua halo loos dalan  ba imi-nia ain, atu nuneʼe ida neʼebé kudeʼik la sai aat liután, maibé bele sai diʼak fali.” (Ebreu 12:12, 13) Ita hotu bele hametin no fó kmaan ba ema seluk liuhusi ita-nia liafuan, maski ita mak joven.

11. Saida mak ajuda Marthe bainhira nia hetan depresaun?

¹¹ Marthe mak irmán neʼebé hetan depresaun ba tempu balu. * Nia dehan: “Loron ida haʼu halo hela orasaun atu hetan kmaan, no depois neʼe, haʼu hasoru irmán ida neʼebé idade liu haʼu. Nia hatudu laran-diʼak no hanoin tebes haʼu. Haʼu presiza tebes ajuda hanesan neʼe iha tempu neʼebá. Nia mós konta ninia esperiénsia ba haʼu kona-ba susar neʼebé nia uluk hasoru neʼebé hanesan buat neʼebé haʼu hasoru daudauk, no neʼe ajuda tebes haʼu atu sente katak laʼós haʼu mesak deʼit mak hasoru susar hanesan neʼe.” Karik irmán idade neʼe la hatene katak ninia liafuan sira-neʼe fó kmaan tebes ba Marthe!

12, 13. Oinsá mak ita bele aplika sujestaun neʼebé hetan husi Filipe 2:1-4?

¹² Paulo hakerek karta ba ema kristaun iha Filipe hodi dehan: “Se imi ida deʼit ho Kristu, no se imi fó laran-manas no fó kmaan ba ema seluk tan imi-nia domin, no mós se imi hatudu katak imi hanoin ema seluk, imi hadomi sira no hatudu laran-sadiʼa ba sira, entaun halo haʼu-nia ksolok sai kompletu hodi hatudu katak imi iha hanoin ida deʼit no hadomi malu, no imi sai ida deʼit, hodi iha neon ida. Keta halo buat ida hodi buka atu manán deʼit ka foti-an, maibé ho haraik-an hodi haree ema seluk boot liu imi. Keta buka deʼit imi rasik nia diʼak, maibé buka mós ema seluk nia diʼak.”​—Filipe 2:1-4.

¹³ Ita hotu tenkesér buka oportunidade atu ajuda malu. Ita bele “fó kmaan” liuhusi hatudu domin, hatudu hahalok “hanoin ema seluk” no “laran-sadiʼa” hodi fó laran-manas ba ita-nia irmaun-irmán sira.

14. Dalan ida ita bele fó laran-manas ba ema seluk mak saida?

¹⁴ Ita sente kontente hodi hatene katak ema neʼebé ita fó ajuda iha tempu uluk, agora laran-metin daudauk iha lia-loos. Apóstolu João dehan: “La iha buat ida neʼebé halo haʼu haksolok liu fali ida-neʼe, katak haʼu rona haʼu-nia oan sira kontinua laʼo iha lia-loos.” (3 João 4) Pioneiru barak sente haksolok tebes hodi rona katak ema neʼebé uluk sira ajuda hodi aprende kona-ba lia-loos, ohin loron serbí daudauk Jeová ho laran-metin, balu mós serbí daudauk nuʼudar pioneiru. Tan neʼe, se ita haree pioneiru ruma sente laran-kraik, ita bele fó-hanoin ba sira kona-ba buat barak neʼebé sira halo ona hodi ajuda ema seluk.

15. Ita bele halo saida atu fó laran-manas ba ema neʼebé serbí Jeová ho laran-metin?

¹⁵ Katuas área barak hatete katak, sira ho sira-nia feen sente kontente tebes bainhira sira simu karta husi irmaun-irmán sira neʼebé hatoʼo agradese ba sira-nia vizita. Nuneʼe mós kona-ba katuas kongregasaun, misionáriu, pioneiru, no ema Betel sira. Se ita hatoʼo agradese ba sira-nia laran-metin iha Jeová nia serbisu, neʼe sei fó laran-manas ba sira.

16. Dalan simples atu fó kmaan ba ema seluk mak saida?

¹⁶ Oinsá se ita sente la fiar an atu fó laran-manas ba ema seluk? Tuir loloos la susar atu halo nuneʼe. Koko atu hatudu deʼit oin-midar ba ema seluk. Se ema ruma la hatudu fali oin-midar ba Ita, karik sira hasoru daudauk problema ruma no hakarak buka ema atu fó sai sira-nia sentimentu. Ita bele fó kmaan ba sira liuhusi rona ba sira.​—Tiago 1:19.

17. Saida mak fó kmaan ba irmaun joven ida?

¹⁷ Irmaun joven ida naran Henri sai triste  tebes tanba ema balu husi ninia família lakohi tan atu serbí Jeová. Ema ida husi sira mak ninia aman rasik neʼebé uluk serbí nuʼudar katuas kongregasaun. Katuas área ida nota katak Henri sente triste no konvida nia bá hemu kafé hamutuk. Nia rona didiʼak ba Henri bainhira Henri fó sai ninia sentimentu. Bainhira koʼalia tiha ho katuas área Henri rekoñese katak, dalan ida atu ajuda ninia família fila fali ba Jeová mak nia rasik tenkesér hatudu laran-metin ba Jeová. Nia mós hetan kmaan liuhusi lee eskritura sira husi Salmo 46, Sofonias 3:17, no Marcos 10:29, 30.

18. (a) Liurai Salomão hatete saida kona-ba fó kmaan? (b) Apóstolu Paulo fó sujestaun kona-ba halo saida?

¹⁸ Ita bele aprende saida husi Marthe no Henri nia esperiénsia neʼe? Ita hotu bele fó kmaan no hametin ita-nia irmaun-irmán sira. Liurai Salomão dehan: “Liafuan neʼebé koʼalia iha tempu neʼebé loos mak furak tebetebes! Matan neʼebé nabilan [ka, “hateke ho oin-midar”] halo ema laran-kontente; No mensajen neʼebé diʼak fó forsa ba ruin sira.” (Provérbios [Amsal] 15:23, 30) Ita nota daudauk sesé deʼit mak sente laran-kraik ka triste ka lae? Ita bele fó ajuda neʼebé simples hodi lee informasaun ruma husi Livru Haklaken ka ita-nia sítiu ba nia. No Paulo mós hatete katak kanta hamutuk knananuk adorasaun nian bele halo ita sente diʼak fali. Nia dehan: “Kontinua hanorin no fó laran-manas ba malu ho salmu no hahiʼi ba Maromak, no kanta knananuk adorasaun nian ho agradese, kanta ba Jeová iha imi-nia laran.”​—Koloso 3:16; Apóstolu 16:25.

19. Tanbasá mak importante tebes ba ita atu hametin malu liután, no ita tenke halo saida?

¹⁹ Jeová nia loron besik loos ona atu mai, tan neʼe importante tebes ba ita atu hametin malu liután. (Ebreu 10:25) Ita sei hetan ksolok neʼebé boot tebes se ita halo tuir buat neʼebé Paulo hatete. Nia dehan: “Kontinua fó aten-brani ba malu no hametin malu, hanesan imi halo daudaun ona.”​—1 Tesalónika 5:11.