1-3. (a) Situasaun saida mak joven sira hasoru, no neʼe kompara hanesan saida? (Haree dezeñu iha leten.) (b) Saida mak bele ajuda joven sira hasoru situasaun neʼe?

IMAJINA toʼok katak Ita planu daudauk atu halo viajen ida hodi bá tuir programa importante ida iha fatin dook. Ita presiza saʼe bís atu bá fatin neʼe. Toʼo tiha terminál bís nian, karik foufoun Ita hakfodak tanba ema barak no mós bís barak. Maibé Ita la sai bilán tanba Ita hatene atu bá neʼebé no atu saʼe bís saida. Ita lakohi saʼe bís seluk tanba Ita hatene katak bís seluk bá fali fatin neʼebé la hanesan.

² Moris mak hanesan viajen neʼe, no joven sira mak hanesan ema sira iha terminál bís nian. Karik dala ruma Ita bele sai bilán kona-ba opsaun oioin neʼebé Ita bele hili ba Ita-nia moris. Maibé se Ita mak hatene atu bá neʼebé, neʼe sei halo fasil ba Ita atu halo desizaun neʼebé loos. Ita tenke hili atu bá neʼebé?

³ Lisaun neʼe sei ajuda hatán ba pergunta neʼe no ajuda Ita atu tau fokus hodi halo buat neʼebé Jeová gosta iha Ita-nia moris. Neʼe inklui halo tuir Jeová nia matadalan kona-ba desizaun hotu neʼebé Ita halo iha moris, hanesan hili edukasaun, serbisu, ka atu kaben no iha oan ka lae. Neʼe inklui mós halo planu espirituál sira neʼebé bele halo Ita hakbesik liután ba Jeová. Se Ita mak tau fokus  hodi serbí Jeová, Ita bele fiar katak nia sei fó bensaun ba Ita no ajuda Ita atu hetan susesu.​—Lee Provérbios (Amsal) 16:3. *

4. Ita sei koʼalia kona-ba saida iha lisaun neʼe?

⁴ Diʼak atu halo planu espirituál. Tanbasá? Ita sei koʼalia kona-ba razaun tolu. Razaun primeiru no segundu sei ajuda Ita atu haree katak kumpre Ita-nia planu espirituál sira sei halo Ita sai belun diʼak liután ho Jeová. Razaun terseiru sei ajuda Ita atu haree tanbasá mak diʼak atu halo planu espirituál bainhira ita sei joven.

5. Razaun importante liu hotu atu halo planu espirituál mak saida?

⁵ Razaun importante liu hotu atu halo planu espirituál mak atu hatudu agradese ba Jeová nia domin no ba buat hotu neʼebé nia fó ba ita. Ema neʼebé hakerek Salmo dehan: “Oh Jeová, diʼak duni atu fó-agradese ba Ita . . . Oh Jeová, Ita halo haʼu haksolok tanba Ita-nia hahalok sira; haʼu haklalak ho haksolok tanba serbisu neʼebé Ita halo ho Ita-nia liman rasik.” (Salmo [Mazmur] 92:1, 4) Hanoin toʼok Jeová fó ona saida ba Ita: moris, fiar, Bíblia, kongregasaun, no esperansa atu moris ba nafatin iha Paraízu. Bainhira Ita halo planu espirituál, Ita hatudu ba Jeová katak Ita agradese tebes ba buat hotu neʼe no neʼe halo Ita hakbesik liután ba nia.

6. (a) Oinsá mak planu espirituál bele kona Ita-nia relasaun ho Jeová? (b) Planu saida deʼit mak Ita bele halo husi tempu joven nian?

⁶ Razaun segundu mak, bainhira ita halo planu espirituál no hakaʼas an atu kumpre planu sira-neʼe, tuir loloos ita halo daudaun serbisu diʼak ba Jeová, no neʼe halo Ita hakbesik liután ba nia. Apóstolu Paulo hatete: “Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ba ninia naran.” (Ebreu 6:10) Keta hanoin katak Ita tinan seidauk toʼo atu bele halo planu espirituál. Porezemplu, bainhira Christine foin tinan 10, nia halo planu hodi lee beibeik esperiénsia kona-ba Testemuña sira neʼebé laran-metin ba Jeová. Bainhira Toby tinan 12, nia halo planu hodi lee Bíblia tomak antes nia hetan batizmu. Maxim tinan 11 no ninia alin feto Noemi tinan 10 bainhira sira hetan batizmu. Sira-nia planu mak atu serbí iha Betel. Sira taka formuláriu atu serbí iha Betel iha sira-nia didin hodi sira la bele haluha kona-ba sira-nia planu neʼe. Oinsá ho Ita? Ita bele hanoin kona-ba planu ruma neʼebé Ita bele halo ka lae, no hakaʼas an hodi kumpre planu neʼe?​—Lee Filipe 1:10, 11.

7, 8. (a) Tanbasá mak iha ona planu halo fasil ba Ita atu foti desizaun? (b) Tanbasá mak joven ida hili atu la bá universidade?

⁷ Saida mak razaun terseiru kona-ba tansá diʼak atu halo planu espirituál bainhira Ita sei joven? Ita presiza halo desizaun oioin iha tempu joven nian. Ita presiza halo desizaun kona-ba edukasaun, serbisu, no buat seluk tan. Desizaun sira-neʼe hanesan kruzamentu ida iha Ita-nia viajen. Se Ita mak hatene atu bá neʼebé, fasil ba Ita atu hili dalan neʼebé Ita atu bá. Hanesan neʼe mós se Ita mak hatene Ita iha planu saida, neʼe fasil ba Ita atu halo desizaun neʼebé matenek. Eskritura iha Provérbios 21:5 dehan: “Ema badinas nia planu sei hetan susesu duni.” Se Ita mak halo planu sedu, Ita mós bele hetan susesu lalais ho Ita-nia planu neʼe. Neʼe mak buat neʼebé Damaris esperiénsia bainhira nia presiza halo desizaun importante ida kuandu nia sei joven.

⁸ Damaris hetan valór neʼebé aas bainhira nia ramata eskola sekundária, no nia iha oportunidade atu hetan bolsa-estudu iha universidade hodi estuda kona-ba lei. Maibé nia foti desizaun hodi serbisu fali part-time  iha banku. Tanbasá? Tanba bainhira nia sei kiʼik, nia halo ona planu atu foti pioneiru. Nia dehan: “Foti pioneiru signifika haʼu tenkesér serbisu part-time deʼit. Se haʼu mak ramata estudu kona-ba lei, haʼu bele manán osan boot, maibé susar atu hetan serbisu part-time.” Damaris pioneiru ba tinan 20 ona. Nia sente katak desizaun neʼebé nia halo husi tempu joven mak desizaun neʼebé loos no matenek ka lae? Sin. Nia hasoru ona advogadu barak iha serbisu-fatin no se nia mak eskola lei, nia mós bele sai hanesan sira. Maibé nia dehan katak advogadu barak mak la kontente ho sira-nia serbisu. Damaris sente pioneiru lori ksolok oioin ba nia no ajuda nia hasees an husi moris neʼebé la kontente hanesan advogadu sira-neʼe.

9. Tanbasá mak ita gaba tebes ita-nia joven sira?

⁹ Ita gaba tebes ita-nia irmaun-irmán joven rihun ba rihun iha mundu tomak neʼebé laʼo ba oin ho diʼak. Sira tau sira-nia relasaun ho Jeová no planu espirituál sai buat neʼebé importante liu hotu iha sira-nia moris. Joven sira-neʼe iha moris neʼebé kontente, no iha tempu neʼebé hanesan, sira mós aprende oinsá atu halo tuir Jeová nia matadalan kona-ba buat hotu, inklui mós edukasaun, serbisu, no moris família nian. Salomão hatete: “Tau fiar ba Jeová ho ó-nia laran tomak.” Nia hatutan hodi dehan: “Hanoin didiʼak kona-ba nia iha ó-nia dalan hotu, no nia sei halo loos ó-nia dalan sira.” (Provérbios [Amsal] 3:5, 6) Joven sira, Jeová hadomi tebes imi! Imi iha folin-boot tebes ba nia, no nia sei proteje, dirije, no fó bensaun ba imi.

10. (a) Tanbasá mak serbisu haklaken tenkesér sai buat neʼebé importante tebes ba ita? (b) Oinsá mak Ita bele hadiʼa dalan neʼebé Ita esplika Ita-nia fiar ba ema seluk?

¹⁰ Se Ita tau fokus atu halo buat neʼebé Jeová gosta, Ita mós hakarak fó-hatene ba ema seluk kona-ba nia. Jesus Kristu dehan katak “liafuan diʼak neʼe ema tenke haklaken uluk”. (Marcos 13:10) Tan neʼe mak serbisu haklaken urjente no buat neʼebé importante tebes iha ita-nia moris. Ita bele halo planu atu haklaken liután ka lae? Ita bele foti pioneiru ka lae? Maibé oinsá se Ita ladún gosta haklaken? No oinsá mak Ita bele hadiʼa dalan neʼebé Ita esplika Ita-nia fiar ba ema seluk? Ita bele halo buat rua tuirmai neʼe: Prepara didiʼak, no keta rende an atu fó-hatene ema seluk kona-ba Jeová. Karik Ita sei hakfodak katak Ita gosta duni haklaken ba ema.

11, 12. (a) Ita bele halo saida hodi prepara Ita-nia an atu koʼalia kona-ba Jeová ba ema seluk? (b) Iha dalan saida mak irmaun joven ida uza didiʼak oportunidade neʼebé nia iha hodi koʼalia kona-ba Jeová iha eskola?

¹¹ Karik Ita bele prepara resposta ba pergunta sira neʼebé baibain Ita-nia kolega eskola husu, hanesan, “Tuir Ita-nia hanoin, Maromak iha interese kona-ba ita-nia terus ka lae?” Iha informasaun balu husi ita-nia sítiu jw.org neʼebé bele ajuda Ita atu hatán ba pergunta neʼe. Se Ita loke iha BÍBLIA NIA HANORIN > JOVEN SIRA > MATADALAN ATU ESTUDA > SAIDA MAK LIA-LOOS KONA-BA MAROMAK? (PARTE 1), Ita bele hetan atividade ida ho títulu “Maromak hanoin ita-nia terus ka lae?” Atividade neʼe bele ajuda Ita oinsá atu prepara Ita rasik nia resposta sira. Atividade neʼe mós iha eskritura balu neʼebé Ita bele uza hodi esplika Ita-nia fiar ba sira, hanesan Tiago 1:13, Gênesis 6:5, 6, no 1 João 4:8. Uza didiʼak atividade sira-neʼe bele ajuda Ita atu hatán ba pergunta oioin neʼebé ema husu ba Ita.​—Lee 1 Pedro 3:15.

¹² Fó-hatene ba Ita-nia kolega eskola sira katak sira rasik bele buka informasaun seluk tan husi jw.org. Neʼe mak buat neʼebé irmaun joven Luca halo. Ninia klase koʼalia daudauk tópiku ida kona-ba relijiaun oioin. Luca nota katak livru neʼebé sira uza koʼalia buat balu laloos kona-ba Testemuña ba Jeová.  Maski Luca sente nakdedar, nia husu ba mestra se nia bele esplika ba klase kona-ba tansá mak informasaun sira-neʼe laloos. Mestra neʼe fó oportunidade ba nia atu esplika buat neʼebé nia fiar no nia mós hatudu ita-nia sítiu ba ninia klase tomak. Tuirmai mestra neʼe fó TPC ba alunu hotu atu haree vídeo kona-ba Defende an la ho liman. Imajina toʼok Luca sente oinsá tanba nia iha oportunidade hodi koʼalia kona-ba Jeová iha eskola?

13. Tanbasá mak ita la bele rende an bainhira hasoru susar ruma?

¹³ Se Ita hasoru susar ruma, la bele sai laran-kraik, hakaʼas an hodi kumpre nafatin Ita-nia planu sira. (2 Timóteo 4:2) Neʼe mak buat neʼebé Katharina halo. Bainhira nia tinan 17, nia halo planu ida atu haklaken ba ema ida-idak iha serbisu fatin. Kolega serbisu ida tarata aat nia fila-fila. Maibé nia nunka husik ninia planu neʼe. Ninia hahalok diʼak neʼe book tebes kolega serbisu ida naran Hans. Nia komesa lee ita-nia livru sira, estuda Bíblia, no hetan batizmu. Katharina la hatene kona-ba neʼe tanba durante tempu neʼe nia muda tiha ba fatin seluk. Tinan 13 liutiha, bainhira Katharina ho ninia família tuir reuniaun, nia haree oradór ba diskursu públiku neʼe mak Hans. Nia hakfodak tebes! Katharina sente haksolok tebes tanba nia nunka rende an atu kumpre ninia planu hodi haklaken ba ninia kolega serbisu sira.

14, 15. (a) Ita la bele haluha kona-ba saida se ema ruma hakaʼas Ita atu halo tuir sira? (b) Ita bele halo saida se ema ruma hakaʼas Ita atu halo tuir sira?

¹⁴ Informasaun sira iha leten fó anima ba Ita atu halo desizaun hodi uza Ita-nia moris atu serbí Jeová no halo planu espirituál sira. Iha joven barak neʼebé idade hanesan ho Ita hakarak uza sira-nia tempu atu goza moris deʼit. Karik sira mós sei konvida Ita atu halo tuir sira. Sedu ka tarde, Ita presiza hatudu ba sira katak importante tebes ba Ita atu kumpre Ita-nia planu sira. Keta husik ema seluk atu halo Ita haluha tiha Ita-nia planu sira. Hanoin toʼok se Ita mak iha terminál bís nian no Ita haree ema seluk iha bís seluk goza sira-nia tempu, Ita sei saʼe tuir sira maski neʼe laʼós bís neʼebé Ita atu saʼe? Lae, loos ka lae?

¹⁵ Entaun Ita bele halo saida se ema ruma  hakaʼas Ita atu halo tuir buat neʼebé sira halo? Hasees an husi situasaun sira neʼebé bele book Ita atu halo tuir ema. (Provérbios [Amsal] 22:3) Hanoin kona-ba konsekuénsia husi halo buat neʼebé sala. (Galásia 6:7) Haraik-an hodi buka sujestaun diʼak husi ema seluk. Rona ba buat neʼebé Ita-nia inan-aman no mós irmaun-irmán sira neʼebé iha ona esperiénsia barak hatete ba Ita.​—Lee 1 Pedro 5:5, 6.

16. Oinsá mak Christoph nia esperiénsia hatudu katak importante tebes atu haraik-an?

¹⁶ Hahalok haraik-an ajuda duni Christoph hodi simu sujestaun diʼak sira. Nia hetan tiha batizmu, lakleur nia komesa bá beibeik gym. Iha neʼebá joven seluk konvida nia atu tuir sira-nia klubu desportu. Nia koʼalia kona-ba neʼe ba katuas kongregasaun ida, no katuas neʼe ajuda nia hodi hanoin didiʼak kona-ba perigu sira, hanesan bele sai ema neʼebé gosta kompete malu. Christoph foti desizaun hodi tuir nafatin klubu neʼe. Maibé tempu balu liutiha, nia haree katak desportu neʼe violénsia no perigu tebes. Nia koʼalia tan ba katuas sira, no katuas sira fó matadalan balu ba nia husi Bíblia. Christoph dehan, “Jeová fó haʼu konsellu-naʼin sira neʼebé diʼak tebes, no maski haʼu demora maibé haʼu rona duni ba Jeová.” Ita hatudu haraik-an hodi rona ba sujestaun sira neʼebé diʼak ka lae?

17, 18. (a) Jeová hakarak saida ba joven sira ohin loron? (b) Saida mak ita bele halo atu la arrepende an kona-ba Ita-nia desizaun sira iha futuru? Fó toʼok ezemplu.

¹⁷ Bíblia dehan: “Oh mane [ka feto] joven, haksolok bá bainhira ó sei joven, no husik ó-nia laran sente kontente durante ó-nia tempu joven.” (Eclesiastes [Pengkhotbah] 11:9) Jeová hakarak Ita atu haksolok iha tempu joven nian. Husi lisaun neʼe Ita aprende ona katak, dalan ida atu hetan ksolok mak tau fokus nafatin ba Ita-nia planu espirituál sira no halo tuir Jeová nia matadalan bainhira halo planu no foti desizaun sira. Se Ita halo nuneʼe sedu iha Ita-nia moris, Ita mós sei hetan esperiénsia sedu iha ita-nia moris kona-ba dalan neʼebé Jeová dirije, proteje, no fó bensaun ba Ita. Hanoin kona-ba konsellu diʼak hotu neʼebé nia fó ba Ita liuhusi ninia Liafuan, no halo tuir matadalan tuirmai neʼe: “Entaun, hanoin-hetan ó-nia Kriadór Boot durante ó-nia tempu joven.”​—Eclesiastes (Pengkhotbah) 12:1.

¹⁸ Tempu joven nian liu lalais deʼit. Hakfodak mai sira sai boot ona. Triste mak ema barak ikusmai arrepende tanba uluk sira halo planu neʼebé sala ka nunka halo planu iha tempu joven nian. Maibé se Ita mak tau fokus nafatin ba Ita-nia planu espirituál sira, aban-bainrua Ita sei haksolok tanba halo ona desizaun sira-neʼe. Neʼe mak Mirjana nia sentimentu. Bainhira sei joven, nia iha talentu kona-ba desportu. Nia mós hetan konvite atu hola parte iha Olimpíada. Maibé nia hili atu serbí Jeová tempu-tomak. Tinan 30 liutiha, nia nafatin serbí Jeová tempu-tomak hamutuk ho ninia laʼen. Nia dehan katak ema neʼebé buka naran-boot, kbiit, no rikusoin nunka sai kontente. Nia mós dehan katak planu neʼebé diʼak liu hotu mak atu serbí Maromak no ajuda ema seluk atu hatene Maromak.

19. Tanbasá diʼak atu tau fokus ba planu espirituál sira bainhira Ita sei joven?

¹⁹ Ita gaba tebes joven sira tanba maski sira hasoru dezafiu barak, maibé sira tau fokus nafatin hodi serbí Jeová. Sira halo planu espirituál oioin no haree serbisu haklaken nuʼudar buat neʼebé importante tebes iha sira-nia moris. No sira mós la husik mundu neʼe halo sira haluha tiha sira-nia planu sira. Joven sira, imi bele fiar katak imi-nia hakaʼas-an sei la sai saugati deʼit. Imi-nia irmaun-irmán sira hadomi tebes imi no apoia imi. Tan neʼe “entrega ó-nia serbisu hotu ba Jeová nia liman, no ó-nia planu sira sei laʼo ho diʼak”.