“SE KOMPARA ho funu neʼebé akontese daudauk iha Europa, funu hotu husi tempu uluk la vale buat ida.” Neʼe mak liafuan neʼebé foti husi The Watch Tower 1 Setembru 1915 kona-ba Funu Mundiál Primeiru. Funu neʼe nasaun 30 mak envolve iha laran. No tanba ema nia odi, The Watch Tower neʼe dehan katak “neʼe hanetik tebes atu halaʼo [Maromak nia Ukun nia] serbisu, liuliu iha Alemaña no Fransa”.

Bainhira konflitu neʼe akontese daudauk iha mundu tomak, iha tempu neʼebá estudante Bíblia balu tama militár tanba sira seidauk hatene ho momoos saida mak Bíblia nia prinsípiu kona-ba neutrál. Maski nuneʼe sira la para atu haklaken liafuan diʼak. Iha ema ida naran Wilhelm Hildebrandt, tanba nia hakarak apoia serbisu ba Maromak nia Ukun, nia hameno tratu barak ho títulu The Bible Students Monthly iha lian Fransa. Iha tempu neʼebá nia la serbí nuʼudar pioneiru iha Fransa, maibé nia mak Alemaña nia soldadu ida. Nia hatais tiha ninia farda militár nian haree hanesan ema Fransa nia inimigu, maibé nia hatoʼo mensajen dame nian ba ema Fransa sira neʼebé laʼo liu. Neʼe halo sira hakfodak tebes.

Estudante Bíblia barak husi Alemaña mós hakarak haklaken liafuan diʼak kona-ba Maromak nia Ukun, maski sira serbisu hela iha militár. Irmaun Lemke neʼebé serbí nuʼudar mariña, nia hatete katak ninia maluk mariña naʼin-lima mós hakarak hatene kona-ba lia-loos. Nia dehan: “Maski saʼe hela ró neʼe mós haʼu hetan rezultadu hodi fó hahiʼi ba Jeová.”

Georg Kayser sai ba funu nuʼudar soldadu ida, maibé fila uma sai nuʼudar Maromak nia atan. Oinsá mak neʼe akontese? Nia hetan Estudante Bíblia nia livru ida, no lee tiha, nia simu lia-loos ho laran tomak. Nia rai tiha ninia kilat sira, nia halo fali serbisu seluk neʼebé la presiza ba funu. Funu hotu tiha, nia serbí nuʼudar pioneiru ida ho badinas ba tinan barak.

Maski Estudante Bíblia sira seidauk komprende loloos kona-ba neutrál, maibé sira-nia hanoin no hahalok la hanesan duni ho ema seluk neʼebé apoia funu. Polítiku-naʼin no ulun-naʼin relijiaun sira apoia funu, maibé Estudante Bíblia kaer metin ba “Liurai-Oan Dame nian”. (Isaías [Yesaya] 9:6) Maski sira balu la neutrál iha buat hotu, maibé sira  iha nafatin fiar hanesan Estudante Bíblia ida naran Konrad Mörtter, nia dehan: “Haʼu hatene momoos husi Maromak nia Liafuan katak ema kristaun ida la bele oho.”—Êxodo (Keluaran) 20:13. * (Haree nota iha kraik.)

Iha rai-Alemaña, tuir lei ema la iha razaun atu la tama militár, maibé iha Estudante Bíblia naʼin-20 resin mak lakohi envolve an ho buat militár nian. Sira balu, hanesan Gustav Kujath, ema dehan bulak, tan neʼe ema hatama nia ba ospitál moras mentál no fó ai-moruk hodi lanu nia. Hans Hölterhoff mós lakohi tama militár, no ema kaer nia ba komarka, maibé iha neʼebá nia lakohi halo serbisu naran deʼit neʼebé envolve ho funu. Entaun guarda sira uza kazaku espesiál ida hodi kesi-metin ninia liman toʼo ninia liman maten hotu. Tanba nia kaer metin nafatin ba ninia desizaun, loron ida guarda sira finje atu oho nia. Maibé Hans hamriik metin toʼo funu ramata.

Irmaun sira seluk neʼebé tama militár lakohi kaer kilat no husu atu halo deʼit serbisu neʼebé la envolve funu. * (Haree nota iha kraik.) Johannes Rauthe kaer metin ba ninia desizaun no ema haruka nia bá serbisu halo komboiu nia dalan. Konrad Mörtter hetan knaar hodi serbisu iha ospitál, no Reinhold Weber serbisu nuʼudar enfermeiru. August Krafzig agradese ba ninia knaar atu tau matan deʼit ba pasta sira no laʼós atu bá funu. Estudante Bíblia sira-neʼe no sira seluk tan kaer metin ba sira-nia desizaun atu serbí Jeová tanba sira komprende kona-ba domin no laran-metin.

Tanba Estudante Bíblia nia desizaun kona-ba funu, governu sira sempre hafuhu sira. Tan neʼe mak durante tinan hirak tuirmai iha tempu neʼebá, Estudante Bíblia iha rai-Alemaña atende kazu iha tribunál rihun ba rihun tan deʼit sira halaʼo atividade haklaken nian. Tanba razaun neʼe mak sukursál iha rai-Alemaña forma departamentu lei ida iha Betel husi Magdeburg hodi ajuda irmaun sira-neʼe.

Iha tempu neʼebá, Testemuña ba Jeová sempre hadiʼa dalan atu komprende kona-ba ema kristaun nia desizaun atu la mete buat polítiku nian. Bainhira funu mundiál segundu akontese, sira hasees an duni husi buat militár nian. Tan neʼe mak governu Alemaña haree Testemuña sira hanesan inimigu no fó terus makaʼas ba sira. No neʼe sei fó sai iha série “Husi ita-nia arkivu” iha futuru.—Husi ita-nia arkivu iha Sentru Europa.