Jesus nia inimigu sempre buka sala husi Jesus ho ninia dixípulu sira, ida mak kona-ba fase liman. Moisés nia Ukun-Fuan fó duni mandamentu kona-ba se ema ida mak iha moras hanesan been sai husi ninia oin-lulik, ka iha moras-lepra, ka kaer kona ema no animál nia mate-isin, ema neʼe presiza halo tuir ukun-fuan hodi hamoos ninia an. Moisés nia Ukun-Fuan mós fó matadalan kona-ba oinsá mak ema atu hamoos sira-nia an, hanesan hasaʼe sakrifísiu, fase, ka hisik ho raan.—Levítico (Imamat), kapítulu 11-15; Números (Bilangan), kapítulu 19.

Ema judeu nia ulun-naʼin relijiaun uza ukun-fuan sira-neʼe hodi halo tan ukun-fuan barak tebes. Livru ida hatete katak se ema ida mak sai lamoos, sira sempre buka-hatene kona-ba iha situasaun saida mak ema neʼe sai lamoos, neʼe bele hadaʼet ba ema seluk ka lae, no sei hadaʼet ba ema naʼin-hira. Sasán neʼebé nia uza sei moos nafatin ka lae, no ikusliu, atu uza saida no lisan saida mak atu uza hodi hamoos.

Jesus nia inimigu husu nia: “Tansá mak ó-nia dixípulu la halo tuir lisan husi beiʼala sira? Ó-nia dixípulu sira han ho liman neʼebé foʼer.” (Marcos 7:5) Relijiaun nia ulun-naʼin sira husu nuneʼe ba Jesus laʼós tanba sira hanoin katak han ho liman foʼer bele estraga saúde. Sira husu tanba tuir lisan, sira halo ona lei katak antes atu han, tenkesér fui uluk bee ba sira-nia liman. Livru neʼe hatete tan: “Sira mós debate kona-ba uza sasán saida mak atu fui bee, uza bee saida mak diʼak, sé mak atu fui bee, no bee tenkesér fui toʼo liman parte neʼebé.”

Jesus fó sai ninia sentimentu kona-ba lei neʼebé ema sira-neʼe halo. Nia hatete ba ulun-naʼin relijiaun sira: “Isaías fó-hatene nanis ho loloos kona-ba imi ema laran-makerek sira. Nia hakerek: ‘Povu neʼe respeitu haʼu ho ibun-tutun deʼit, maibé sira-nia laran dook husi haʼu [Jeová]. Sira-nia adorasaun ba haʼu saugati deʼit, tanba sira hanorin ema nia ukun-fuan nuʼudar Maromak nian.’ Imi husik Maromak nia mandamentu no kaer metin fali ba ema nia lisan.”—Marcos 7:6-8.