1, 2. (a) Iha dalan saida mak Isaías 60:22 sai loos daudauk iha loron ikus sira-neʼe? (b) Jeová nia organizasaun parte rai nian presiza liután saida?

“BUAT neʼebé uitoan sei sai rihun ida, no buat neʼebé kiʼik sei sai nasaun neʼebé forte.” (Isaías [Yesaya] 60:22) Liafuan sira-neʼe sai loos daudauk iha loron ikus sira-neʼe. Iha tinan 2015, ita bele haree Jeová nia povu naʼin-8.220.105 mak haklaken iha mundu tomak. Kona-ba neʼe, Maromak hatete: “Haʼu Jeová rasik mak sei halo ida-neʼe ho lalais tuir ninia tempu.” Nuʼudar tempu laʼo daudauk, ita mós iha serbisu barak atu halo. Ita hakaʼas an hodi haklaken no hanorin ema kona-ba Bíblia ka lae? Irmaun-irmán barak mak serbí hela nuʼudar pioneiru regulár ka pioneiru estra. Balu muda ona ba rai seluk atu ajuda iha serbisu haklaken, no balu tan hola parte iha serbisu konstrusaun.

² Tinan-tinan ita forma kongregasaun foun maizumenus hamutuk 2.000. Kongregasaun foun sira-neʼe presiza tan katuas no atan ba kongregasaun atu tau matan. Porezemplu, kada tinan karik ita presiza atan ba kongregasaun naʼin-10.000 atu serbí nuʼudar katuas, no ita mós presiza irmaun seluk rihun ba rihun atu sai nuʼudar atan ba kongregasaun. Husi neʼe ita bele haree duni katak sei iha serbisu barak “iha Naʼi” atu halo, ba irmaun no mós irmán sira.—1 Korinto 15:58.

3, 4. Ita rasik bele halo planu espirituál saida deʼit?

³ Lee 1 Timóteo 3:1. Liafuan gregu neʼebé tradús ba “hakarak” mak hanesan ema neʼebé hakaʼas an hodi lolo ninia liman atu foti buat ida, karik tanba buat neʼe dook husi nia. Apóstolu Paulo uza liafuan neʼe hodi hatudu katak atu laʼo ba oin iha lia-loos, presiza duni hakaʼas an. Ezemplu ida mak kona-ba irmaun neʼebé hanoin daudauk atu kumpre kritériu hodi sai atan ba kongregasaun. Haree tiha kritériu sira, nia rekoñese katak nia presiza hakaʼas an liután atu haburas hahalok diʼak sira. Bainhira nia sai ona atan ba kongregasaun, nia mós kontinua hakaʼas an atu kumpre kritériu hodi sai katuas ba kongregasaun.

⁴ Nuneʼe mós ba irmaun-irmán sira neʼebé hakarak atu serbí nuʼudar pioneiru, serbí iha Betel, ka voluntáriu atu ajuda harii Reuniaun-Fatin, sira mós presiza hakaʼas an hodi bele kumpre sira-nia planu sira. Agora mai ita haree toʼok oinsá mak Bíblia bele ajuda ita atu laʼo ba oin iha lia-loos.

5. Iha dalan saida deʼit mak joven sira bele uza sira-nia forsa atu serbí Jeová?

⁵ Joven sira bele halo buat barak atu serbí Jeová tanba sira iha forsa no saúde neʼebé diʼak. (Lee Provérbios [Amsal] 20:29.) ^[1] Irmaun joven balu serbisu iha Betel hodi ajuda print, halo livru no Bíblia sira. Iha mós irmaun-irmán joven barak neʼebé serbisu harii ka hadiʼa Reuniaun-Fatin sira. Bainhira dezastre mosu, joven sira sempre bá hamutuk ho irmaun-irmán neʼebé iha ona esperiénsia atu fó ajuda. No ita haree iha joven barak mak aprende língua foun hodi bá haklaken iha fatin neʼebé ema koʼalia língua sira-neʼe.

6-8. (a) Iha dalan saida mak mane joven ida halo mudansa ba ninia moris, no neʼe lori rezultadu saida? (b) Oinsá mak ita bele ‘koko no haree katak Jeová mak diʼak’?

⁶ Ita hadomi tebes Jeová no hakarak serbí nia ho laran tomak. Maibé, karik ita bele sente hanesan Aaron. Husi kiʼik kedas nia tuir beibeik reuniaun no bá haklaken. Nia hakarak serbí Jeová maibé nia nunka sente iha ksolok. Nia dehan, “Haʼu sente tuir reuniaun no haklaken halo haʼu baruk.” Entaun, nia halo saida?

⁷ Aaron hakaʼas an atu lee Bíblia beibeik, prepara didiʼak ba reuniaun, no fó komentáriu. Nia mós halo orasaun beibeik. Halo buat sira-neʼe ajuda nia laʼo ba oin iha lia-loos, no aumenta ninia koñesimentu kona-ba Jeová. Tan neʼe ninia domin ba Jeová mós aumenta liután. Neʼe halo Aaron kontente. Tuirmai nia foti serbisu pioneiru. Bainhira dezastre mosu, nia bá ajuda. No nia mós bá haklaken iha rai seluk. Ohin loron nia serbí nuʼudar katuas no serbisu iha Betel. Nia sente oinsá kona-ba buat sira neʼebé nia halo? Aaron hatete: “Haʼu ‘koko no haree duni katak Jeová mak diʼak’. Jeová fó duni bensaun mai haʼu, haʼu sente haʼu debe buat barak husi nia no neʼe halo haʼu hakarak halo buat barak liután atu serbí nia, no halo hanesan neʼe lori duni ksolok ba haʼu-nia moris.”

⁸ Ema neʼebé hakerek salmu dehan: “Sira neʼebé buka Jeová sei la falta buat diʼak ida.” (Lee Salmo [Mazmur] 34:8-10.) ^[2] Loos duni, bainhira ita serbí Jeová ho laran tomak, ita mós sei sente kontente tebes tanba ita hatene katak ita halo ona buat neʼebé Jeová gosta. No nia mós promete ba ita katak nia sei tau matan ba ita.

9, 10. Tanbasá mak importante atu hatudu pasiénsia?

⁹ Se ita mak hein hela atu hetan priviléjiu ruma husi kongregasaun ka se ita-nia situasaun  la permite ita atu kaer knaar ruma, Ita tenke hatudu pasiénsia hodi hein ba Jeová. (Miquéias [Mikha] 7:7) Maski dala ruma Jeová husik ita hein, maibé ita bele fiar katak Jeová sempre apoia ninia atan. Ezemplu ida mak kona-ba Abraão. Jeová promete ba nia atu iha oan-mane ida, maibé nia tenke iha fiar no hein ho pasiénsia, tanba liutiha tinan barak mak Isaac foin moris. Maski nuneʼe, Abraão nunka sente laran-tun ka lakon ninia fiar ba Jeová nia promesa.—Gênesis (Kejadian) 15:3, 4; 21:5; Ebreu 6:12-15.

¹⁰ La fasil duni atu hein. (Provérbios [Amsal] 13:12) Maibé se ita mak hanoin beibeik kona-ba ita-nia situasaun no tanbasá mak ita-nia hakarak seidauk sai loos, neʼe bele halo ita laran-tun. Diʼak liu atu uza ita-nia tempu atu hadiʼa ita-nia hahalok sira hodi bele kumpre kritériu atu serbí iha kongregasaun. Haree toʼok buat tolu tuirmai neʼebé ita bele halo.

11. Ita bele haburas hahalok diʼak saida, no tanbasá mak hahalok sira-neʼe importante?

¹¹ Haburas hahalok neʼebé diʼak. Lee Bíblia no medita kona-ba buat neʼebé ita lee bele ajuda ita atu iha matenek, hanoin iha dalan neʼebé matenek, no halo desizaun ho matenek. Liuliu ba irmaun sira, hahalok sira-neʼe importante tebes atu bele tau matan ba kongregasaun. (Provérbios [Amsal] 1:1-4; Tito 1:7-9) Bainhira ita lee ita-nia livru sira, ita bele hatene Jeová sente oinsá kona-ba buat ruma. No iha moris loroloron nian, ita mós bele uza informasaun neʼe atu halo desizaun neʼebé Jeová gosta. Hanesan  desizaun kona-ba osan, oinsá bele sai belun neʼebé diʼak, atividade halimar nian, no oinsá atu hili roupa ka hafurak an iha dalan neʼebé diʼak.

12. Oinsá mak ita bele hatudu katak kongregasaun bele tau fiar ba ita?

¹² Hakaʼas an hodi halaʼo ita-nia knaar sira ho didiʼak. Bainhira Maromak nia povu fila ba Jeruzalein atu harii fali templu, Neemias presiza mane balu atu tau matan ba knaar oioin. Nia hili sira neʼebé iha naran diʼak, hadomi Maromak, no bele tau fiar ba sira. (Neemias 7:2; 13:12, 13) Ohin loron mós hanesan, ema neʼebé laran-metin, badinas, no iha naran neʼebé diʼak, sira mak ema neʼebé bele kaer knaar iha kongregasaun laran. (1 Korinto 4:2) Tan neʼe mak ba irmaun ka irmán, ita tenke hakaʼas an atu halaʼo didiʼak knaar neʼebé ita simu.—Lee 1 Timóteo 5:25.

13. Se ema ruma trata ita iha dalan neʼebé ladiʼak, oinsá mak José nia ezemplu bele ajuda ita?

¹³ Sadere ba Jeová. Oinsá se ema seluk trata ita iha dalan neʼebé ladiʼak? Karik ita bele esplika ba sira kona-ba ita-nia sentimentu. Maibé se ita mak defende an beibeik no hanoin katak ita mak loos, neʼe sei halo problema sai boot liután. Ita bele aprende husi José nia ezemplu. Ninia maun-alin sira trata nia aat tebes, maibé nia nunka rai odi ba sira. Ikusmai ema bobar lia hodi hatama nia ba komarka. Maibé nia sadere nafatin ba Jeová. Nia kaer metin nia fiar ba Jeová nia promesa no laran-metin ba nia. (Salmo [Mazmur] 105:19) Durante tempu susar sira-neʼe, José mós haburas hahalok diʼak barak neʼebé ikusmai ajuda tebes nia atu halaʼo knaar importante ida iha ninia moris. (Gênesis [Kejadian] 41:37-44; 45:4-8) Bainhira ema trata ita iha dalan neʼebé ladiʼak, halo orasaun atu husu matenek husi Jeová. Nia sei ajuda ita atu sente kalma no koʼalia iha dalan neʼebé diʼak.—Lee 1 Pedro 5:10.

14, 15. (a) Tanbasá mak ita tenke “haree didiʼak” ba dalan neʼebé ita haklaken? (b) Ita bele halo saida hodi haklaken tuir situasaun? (Haree foto iha pájina 20 no mós kaixa “ Ita hakarak koko dalan seluk ka lae?”)

¹⁴ Apóstolu Paulo hatete ba Timóteo: “Kontinua hakaʼas an iha ó-nia knaar atu lee iha ema nia oin, hodi fó laran-manas, no hodi hanorin. Haree didiʼak ó-nia an no ó-nia hanorin.” (1 Timóteo 4:13, 16) Timóteo haklaken ona ba tinan barak, entaun tanbasá mak nia presiza laʼo ba oin nafatin? Tanba ema no ema nia situasaun bele troka, tan neʼe mak se Timóteo la tau matan didiʼak nafatin ba dalan neʼebé nia hanorin, karik ema sei la rona ba nia. Ita mós tenkesér halo nuneʼe ohin loron.

¹⁵ Iha fatin balu, baibain ita la hasoru uma-naʼin bainhira ita haklaken husi uma ba uma. Iha fatin balu tan ema hela iha uma neʼebé portaun xave metin, no ita la bele hasoru ema sira-neʼe. Se ida-neʼe mak ita-nia situasaun, karik bele uza fali dalan seluk atu haklaken ba ema sira-neʼe.

16. Oinsá mak bele hetan rezultadu diʼak bainhira haklaken iha fatin públiku?

¹⁶ Haklaken iha fatin públiku mak dalan diʼak ida atu habelar liafuan diʼak ba ema. Irmaun-irmán barak gosta haklaken iha fatin hanesan terminál komboiu, terminál bís, merkadu, no jardín. Iha fatin sira-neʼe, karik ita bele hahú koʼalia kona-ba notísias, sira iha oan neʼebé diʼak, ka husu kona-ba sira-nia serbisu. Se ema neʼe gosta atu koʼalia tan kona-ba buat sira-neʼe, bele temi pontu ida husi Bíblia no husu ninia hanoin kona-ba pontu neʼe. Baibain neʼe bele halo ema hakarak hatene liután kona-ba Bíblia.

17, 18. (a) Saida mak bele ajuda ita fiar an atu haklaken iha fatin públiku? (b) Oinsá mak David nia sentimentu atu hahiʼi Jeová bele ajuda ita iha serbisu haklaken?

¹⁷ Se ita sente susar atu hahú koʼalia ho  ema neʼebé ita la koñese iha dalan haklaken públiku, la bele rende an. Eddie, pioneiru ida husi sidade Novaiorke uluk mós sente hanesan neʼe. Maibé ikusmai nia buka-hetan buat ida neʼebé ajuda nia atu fiar an hodi koʼalia ho ema. Nia dehan: “Iha tempu adorasaun família nian, haʼu ho haʼu-nia feen hanoin kona-ba tanbasá ema lakohi rona, no pergunta sira neʼebé baibain ema husu, depois ami halo riset atu buka oinsá ami bele fó resposta. Ami mós husu sujestaun oioin husi haklaken-naʼin sira seluk.” Agora Eddie gosta tebes dalan haklaken públiku neʼe.

¹⁸ Bainhira ita sai matenek atu haklaken no fiar an liután, ema seluk bele haree duni katak ita laʼo ba oin daudauk iha lia-loos. (Lee 1 Timóteo 4:15.) Neʼe sei fó glória ba Jeová no karik mós bele ajuda ema seluk atu sai Jeová nia atan. David hatete: “Haʼu sei hahiʼi Jeová iha tempu hotu; haʼu sei la para atu hahiʼi nia ho haʼu-nia ibun. Haʼu sei gaba an tanba Jeová; ema laran-maus sira sei rona no sai haksolok.”—Salmo (Mazmur) 34:1, 2.

19. Tanbasá mak Jeová nia atan neʼebé laran-metin bele iha ksolok maski hela iha situasaun neʼebé susar?

¹⁹ David mós hatete: “Oh Jeová, buat hotu neʼebé Ita halo sei fó glória ba Ita, no Ita-nia ema sira neʼebé laran-metin sei hahiʼi Ita. Sira sei haklaken kona-ba Ita-nia glória nuʼudar liurai no koʼalia kona-ba Ita-nia kbiit boot, atu fó-hatene ba ema kona-ba Ita-nia hahalok boot sira no kona-ba Ita-nia glória boot nuʼudar liurai.” (Salmo [Mazmur] 145:10-12) Liafuan sira-neʼe haleno duni Jeová nia testemuña neʼebé laran-metin nia sentimentu. Maibé, oinsá se tanba moras ka idade mak hanetik ita atu la bele uza tempu barak liu hodi haklaken husi uma ba uma? Ita presiza hanoin-hetan katak ita bele hahiʼi Jeová liuhusi haklaken ba ema neʼebé tau matan ita, hanesan enfermeiru ka doutór. Se tanba fiar mak ema hatama ita ba komarka, karik ita sei bele nafatin atu koʼalia ba ema seluk kona-ba Jeová, no neʼe halo Jeová nia laran kontente. (Provérbios [Amsal] 27:11) Jeová mós kontente atu haree katak ita serbí nafatin nia maski ita-nia família la adora nia. (1 Pedro 3:1-4) Loos duni, maski ita moris iha situasaun susar, ita mós bele hahiʼi Jeová no laʼo ba oin iha lia-loos.

20, 21. Se ita hetan knaar barak iha Jeová nia organizasaun, oinsá mak ita bele sai hanesan bensaun ida ba ema seluk?

²⁰ Jeová sei fó duni bensaun ba ita se ita kontinua atu laʼo ba oin iha lia-loos. Karik ita bele halo mudansa balu ba dalan neʼebé ita uza ita-nia tempu no dalan neʼebé ita halaʼo moris. Halo nuneʼe bele fó oportunidade barak liután ba ita atu ajuda ema seluk hodi aprende kona-ba Maromak nia promesa furak sira. Ita-nia laʼo ba oin mós bele ajuda liután irmaun-irmán sira. No bainhira sira haree ita serbisu makaʼas ho haraik-an atu ajuda kongregasaun, sira mós sei hadomi liután ita.

²¹ Maski ita serbí Jeová ba tempu kleur ona ka foin serbí nia, ita hotu bele laʼo ba oin nafatin iha lia-loos. Maibé oinsá mak ita bele ajuda ema seluk atu laʼo ba oin iha lia-loos? Lisaun tuirmai sei koʼalia kona-ba tópiku ida-neʼe.