Mateus nia istória kona-ba tempu neʼebé Jesus moris mai no tempu neʼebé nia sei kiʼik la hanesan ho Lucas nia istória. Neʼe tanba sira-nia istória tau fokus ba ema neʼebé la hanesan.

Mateus nia istória tau fokus liu ba José. Nia konta kona-ba José halo saida bainhira nia hatene katak Maria sai isin-rua, kona-ba José nia mehi neʼebé anju ida esplika sira-nia situasaun, no mós oinsá José halo tuir anju nia matadalan sira. (Mateus 1:19-25) Mateus mós konta kona-ba oinsá anju fó avizu ba José iha mehi hodi halai ba rai-Ejitu ho ninia família no oinsá mak José halo tuir anju nia liafuan. No Mateus mós konta katak José hetan fali mehi ida neʼebé anju haruka José fila fali ba Izraél no José halo tuir, ikusmai José ho ninia família toʼo iha Nazaré no hela iha neʼebá.—Mateus 2:13, 14, 19-23.

Maibé Lucas nia istória tau fokus liu ba Maria. Nia konta kona-ba anju Gabriel bá vizita Maria, Maria bá vizita ninia família Isabel, no kona-ba Maria nia liafuan hahiʼi sira neʼebé nia hasaʼe ba Jeová. (Lucas 1:26-56) Nia mós konta kona-ba Simeão koʼalia saida ba Maria kona-ba Jesus nia terus iha futuru. Lucas konta kona-ba situasaun iha tempu neʼebé Jesus foin tinan 12 bainhira Jesus hamutuk ho ninia família bá vizita templu. Iha istória neʼe Lucas mós hakerek deʼit kona-ba Maria nia liafuan sira, laʼós José nian, no nia hatete katak buat neʼebé akontese iha templu kona tebes Maria nia laran. (Lucas 2:19, 34, 35, 48, 51) Sin, Mateus konta liu kona-ba saida mak José hanoin no halo. Maibé Lucas tau fokus liu ba buat neʼebé Maria hanoin ho halo.

Mateus no Lucas mós fó lista neʼebé la hanesan kona-ba Jesus nia liña jerasaun. Mateus hakerek kona-ba Jesus nia lista jerasaun husi José nia família hodi hatudu katak Jesus nuʼudar José nia oan-hakiak mak iha direitu legál atu simu Liurai David nia kadunan. Tanbasá? Tanba José nia liña jerasaun mai husi Liurai David nia oan Salomão. (Mateus 1:6, 16) Maibé Lucas fó lista kona-ba Jesus nia liña jerasaun husi Maria nia família hodi hatudu katak Jesus mós iha direitu atu simu Liurai David nia kadunan “nuʼudar David nia bei-oan” rasik. (Roma 1:3) Tanbasá? Tanba Maria nia liña jerasaun mai husi Liurai David nia oan Natan. (Lucas 3:31) Maibé tanbasá mak iha Lucas nia lista, nia la hakerek katak Maria mak Heli nia oan-feto? Tanba tuir dokumentu legál iha tempu neʼebá, baibain ema hakerek deʼit mane nia naran husi família ida. Tan neʼe mak iha Lucas nia lista, nia hakerek katak José mak Heli nia oan-mane no ema bele hatene katak neʼe hatudu deʼit José mak Heli nia mane-foun.—Lucas 3:23.

Lista kona-ba Jesus nia liña jerasaun neʼebé Mateus no Lucas hakerek hatudu katak Jesus mak Mesias neʼebé Maromak promete nanis ona. Ema barak hatene katak Jesus mai duni husi Liurai David nia jerasaun toʼo ema farizeu ho saduseu mós la bele nega kona-ba neʼe. Lista kona-ba Jesus nia liña jerasaun neʼebé hetan husi Mateus no Lucas nia evanjellu hametin tebes ita-nia fiar, no ajuda ita atu tau fiar katak Maromak nia promesa seluk mós sei sai loos.