1. Iha dalan saida deʼit mak ita bele serbisu hamutuk ho Jeová?

BAINHIRA Jeová kria tiha ema, nia hakarak sira atu sai ninia maluk serbisu-naʼin. Maski agora ema la perfeitu ona, maibé sira neʼebé laran-metin sei bele serbisu hamutuk ho Jeová loron-loron. Porezemplu, bainhira ita haklaken no ajuda ema sai Jesus nia dixípulu, tuir loloos ita sai daudauk “Maromak nia maluk serbisu-naʼin”. (1 Korinto 3:5-9) Ita iha duni priviléjiu neʼebé furak tanba Kriadór neʼebé boot liu hotu hili ita hodi halo serbisu neʼebé importante tebes! Maski nuneʼe, haklaken laʼós dalan ida deʼit atu bele serbisu hamutuk ho Jeová. Iha lisaun neʼe, ita sei haree dalan seluk tan neʼebé ita bele serbisu hamutuk ho Jeová liuhusi fó ajuda ba ita-nia família no ema seluk iha kongregasaun, hatudu hahalok laran-diʼak, ajuda ho projetu sira neʼebé Jeová nia organizasaun halo iha mundu tomak, no aumenta serbisu ba Jeová.​—Koloso 3:23.

2. Tanbasá mak la matenek atu kompara ita-nia an ho ema seluk kona-ba serbisu neʼebé ita halo ba Jeová?

² Bainhira estuda lisaun neʼe, importante atu la kompara ita-nia an ho ema seluk kona-ba serbisu neʼebé ita halo ba Jeová. Diʼak atu hanoin-hetan katak ita ida-idak nia idade, saúde, situasaun, no abilidade la hanesan. Apóstolu Paulo hatete: “Ema ida-idak tenke buka-hatene ninia hahalok rasik, no tuirmai nia sei  iha razaun atu gaba an kona-ba ninia an rasik, laʼós hodi kompara nia an ho ema seluk.”​—Galásia 6:4.

3. Tanbasá mak ita bele dehan katak ema neʼebé tau matan ba ninia família, serbisu hamutuk ho Maromak?

³ Jeová hakarak ita atu tau matan ba ita-nia família. Porezemplu, karik Ita tenke serbisu atu tau matan ba família nia presiza. Inan barak presiza hela iha uma atu tau matan ba oan sira. No se ita-nia inan-aman la bele tau matan ona ba sira-nia an, karik ita presiza tau matan fali ba sira. Neʼe mak ita-nia responsabilidade sira. Bíblia dehan: “Se ema ida la tau matan ba ninia família, no liuliu ba sira neʼebé iha ninia uma laran rasik, nia nega ona ninia fiar no aat liu fali ema neʼebé la iha fiar.” (1 Timóteo 5:8) Se Ita mak iha responsabilidade atu tau matan ba família, karik Ita la iha oportunidade barak atu halo serbisu liután ba Jeová tuir Ita-nia hakarak. Maibé keta sai laran-triste! Ita halo Jeová kontente kuandu ita tau matan ba Ita-nia família.​—1 Korinto 10:31.

4. Iha dalan saida mak inan-aman bele tau uluk Jeová iha sira-nia moris, no neʼe sei lori rezultadu saida deʼit?

⁴ Inan-aman serbisu hamutuk ho Jeová liuhusi ajuda oan atu halo planu espirituál. Inan-aman barak halo nuneʼe. Rezultadu mak, ikusmai sira-nia oan deside atu serbí Jeová tempu-tomak toʼo fatin sira neʼebé dook. Balu sai misionáriu, balu pioneiru iha fatin neʼebé presiza haklaken-naʼin liután, no balu tan serbí iha Betel. Inan-aman balu la bele gasta tempu ho oan tanba oan sira serbí iha fatin seluk. Maski nuneʼe, sira fó laran-manas ba sira-nia oan atu kontinua halaʼo sira-nia knaar. Tanbasá? Tanba sira kontente atu haree sira-nia oan tau uluk Jeová iha sira-nia moris. (3 João 4) Inan-aman barak sente hanesan Ana neʼebé hatete katak nia fó-empresta ninia oan Samuel ba Jeová. Sira sente katak serbisu hamutuk ho Jeová iha dalan neʼe mak priviléjiu neʼebé boot tebes.​—1 Samuel 1:28.

5. Iha dalan saida mak Ita bele fó ajuda ba irmaun-irmán sira iha Ita-nia kongregasaun? (Haree dezeñu iha leten.)

⁵ Se Ita la iha responsabilidade urjente atu tau matan ba família, Ita bele fó ajuda ba irmaun-irmán neʼebé moras ka idade ona, ka sira neʼebé presiza ajuda seluk ka lae? Ka bele fó ajuda ba ema neʼebé tau matan ba sira ka lae? Haree didiʼak sé mak presiza ajuda hanesan neʼe husi Ita-nia kongregasaun. Porezemplu, karik iha irmán ruma neʼebé tau matan daudauk ba ninia inan ka aman neʼebé idade ona. Karik Ita bele gasta tempu uitoan hamutuk ho irmán neʼe nia inan ka aman hodi irmán neʼe bele halo buat seluk. Ka karik Ita bele tula ema balu ba reuniaun, kompras, ka atu bá vizita ema ruma iha ospitál. Se Ita mak halo buat sira-neʼe, karik Ita serbisu hamutuk daudauk ho Jeová hodi hatán ba ema seluk nia orasaun.​—Lee 1 Korinto 10:24.

6. Hatudu laran-diʼak envolve saida?

⁶ Maromak nia maluk serbisu-naʼin sempre simu ema seluk ho laran-diʼak. Iha Bíblia, liafuan gregu neʼebé tradús nuʼudar “laran-diʼak” signifika “hadomi ema estranjeiru sira”. (Ebreu 13:2; nota-rodapé.) Bíblia iha ezemplu barak neʼebé hanorin ita oinsá bele hatudu laran-diʼak ba ema seluk. (Gênesis [Kejadian] 18:1-5) Kuandu ita iha oportunidade, ita bele no tenkesér fó ajuda ba ema seluk, maski ema sira-neʼe “ita-nia maluk fiar-naʼin” ka laʼós.​—Galásia 6:10.

7. Simu irmaun-irmán sira neʼebé serbí tempu-tomak lori benefísiu saida deʼit?

⁷ Ita bele serbisu hamutuk ho Jeová atu hatudu laran-diʼak hodi simu ninia atan  sira neʼebé serbí tempu-tomak ka lae? (Lee 3 João 5, 8.) Neʼe mak oportunidade neʼebé diʼak tebes ba ita atu “fó laran-manas ba malu liuhusi ita-nia fiar”. (Roma 1:11, 12) Haree toʼok ezemplu ida husi irmaun Olaf. Bainhira nia sei joven, katuas área klosan ida vizita ninia kongregasaun no presiza fatin atu hela, maibé ema iha kongregasaun la iha fatin ba nia. Olaf koʼalia ba ninia inan-aman neʼebé laʼós Testemuña kona-ba atu konvida nia hela hamutuk ho sira. Sira hatán maibé hatete katak Olaf tenke toba fali iha sofá. Olaf konkorda no nia nunka arrepende kona-ba ninia desizaun neʼe. Nia hafolin tebes tempu neʼebé nia gasta ho katuas área neʼe. Dadeer-dadeer, sira matabixu hamutuk no koʼalia kona-ba buat barak. Katuas área neʼe fó laran-manas tebes ba Olaf toʼo Olaf deside hodi serbí Jeová tempu-tomak. Nia serbí nuʼudar misionáriu iha rai oioin ba tinan 40 ona.

8. Tanbasá mak ita tenke hatudu nafatin laran-diʼak maski foufoun ema ladún hafolin ida-neʼe? Fó toʼok ezemplu.

⁸ Ita bele hatudu domin ba ema estranjeiru iha dalan oioin, maski foufoun sira ladún hafolin ida-neʼe. Porezemplu, irmán ida iha España estuda Bíblia ho Yesica husi Ekuadór. Loron ida Yesica tanis la para durante estuda Bíblia no irmán husu nia tansá nia tanis. Yesica hatete katak antes nia mai España, nia kiak tebes. Loron ida nia la iha hahán hodi fó ba ninia oan-feto, nia fó bee deʼit. Yesica koko hamaus ninia oan atu toba, no iha tempu neʼebé hanesan, nia halo orasaun ba Maromak nia ajuda. Lakleur, Testemuña naʼin-rua mai vizita nia no fó revista ba nia. Maibé nia tarata sira no lees revista neʼe hodi dehan: “Imi atu fó ida-neʼe ba haʼu-nia oan atu han ka?” Irmán naʼin-rua neʼe koko atu konsola nia, maibé Yesica lakohi rona. Loron seluk, irmán sira-neʼe tau ai-han raga ida iha ninia odamatan. Yesica tanis durante estuda Bíblia tanba nia la rekoñese katak Maromak hatán duni ninia orasaun. Agora, Yesica hakarak tebes atu serbí Jeová. Sin, irmán sira-nia laran-diʼak lori duni rezultadu furak.​—Eclesiastes (Pengkhotbah) 11:1, 6.

9, 10. (a) Iha tempu uluk, ema Izraél sira iha oportunidade saida deʼit atu halo serbisu voluntáriu? (b) Iha dalan saida deʼit mak irmaun sira bele fó ajuda iha kongregasaun ohin loron?

⁹ Iha tempu uluk, ema Izraél sira iha oportunidade barak atu halo serbisu voluntáriu. (Êxodo [Keluaran] 36:2; 1 Crônicas [Tawarikh] 29:5; Neemias 11:2) Ohin loron, Ita mós iha oportunidade oioin atu fó ho voluntáriu kona-ba Ita-nia tempu, sasán, no matenek hodi ajuda irmaun-irmán sira. Halo nuneʼe lori ksolok neʼebé boot no Ita mós sei hetan bensaun oioin husi Jeová.

¹⁰ Maromak nia Liafuan fó laran-manas ba mane sira iha kongregasaun atu serbisu hamutuk ho Jeová hodi serbí nuʼudar atan ba kongregasaun no katuas. (1 Timóteo 3:1, 8, 9; 1 Pedro 5:2, 3) Irmaun sira neʼebé hetan knaar neʼe hakarak buka dalan atu fó ajuda ba ema seluk no mós ajuda sira iha dalan espirituál nian. (Apóstolu 6:1-4) Irmaun katuas sira husu Ita atu sai asistente ka tau matan ba livru, mapa, hadiʼa buat ruma iha Reuniaun-Fatin, ka buat seluk ka lae? Irmaun sira neʼebé fó ajuda iha dalan sira-neʼe hatete katak sira haksolok tebes atu bele fó ajuda.

11. Irmán ida hetan benefísiu saida husi serbisu voluntáriu ba projetu konstrusaun sira?

¹¹ Baibain, sira neʼebé halo serbisu voluntáriu iha projetu ruma hetan belun foun barak. Irmán Margie serbisu iha projetu konstrusaun Reuniaun-Fatin ba tinan 18. Durante projetu sira-neʼe, nia gasta tempu  ho irmán sira neʼebé idade kiʼik liu nia no ajuda hodi fó treinu ba sira. Nia dehan katak, halo projetu sira-neʼe fó oportunidade furak ba ema sira neʼebé serbisu voluntáriu atu fó laran-manas ba malu. (Roma 1:12) No bainhira nia hasoru problema ruma iha ninia moris, ninia belun sira husi projetu sira-neʼe ajuda tebes nia. Ita halo ona serbisu voluntáriu iha projetu konstrusaun ruma ka lae? Maski Ita la iha matenek kona-ba projetu sira-neʼe, Ita bele fó ajuda iha serbisu sira-neʼe.

12. Oinsá mak Ita bele fó ajuda iha tempu dezastre ruma mosu?

¹² Ita mós bele serbisu hamutuk ho Jeová liuhusi fó ajuda ba irmaun-irmán sira neʼebé hetan dezastre. Porezemplu, ita bele fó osan nuʼudar kontribuisaun. (João 13:34, 35; Apóstolu 11:27-30) Dalan seluk atu apoia mak ajuda hamoos ka hadiʼa buat neʼebé aat iha fatin dezastre sira. Irmán Gabriela husi Polónia, bainhira bee saʼe, ninia uma hetan estragu no nia kontente hodi haree irmaun-irmán sira husi kongregasaun oioin mai atu fó ajuda ba nia. Kuandu hanoin fali kona-ba esperiénsia neʼe nia dehan: “Haʼu la preokupa ho buat sira neʼebé haʼu lakon, buat sira-neʼe sasán deʼit. Tuir loloos haʼu hetan fali buat neʼebé furak. Esperiénsia neʼe fó-hanoin mai haʼu katak, bele sai parte ida ba kongregasaun mak priviléjiu neʼebé úniku tebes no mós lori ksolok ba ita.” Ema barak neʼebé hetan ajuda tanba dezastre mosu mós sente hanesan neʼe. No ema neʼebé serbisu hamutuk ho Jeová hodi fó ajuda iha tempu dezastre mós sente haksolok tebes.​—Lee Apóstolu 20:35; 2 Korinto 9:6, 7.

13. Oinsá mak serbisu voluntáriu bele hametin ita-nia domin ba Jeová? Fó toʼok ezemplu.

¹³ Irmán Stephanie ho haklaken-naʼin seluk iha oportunidade atu serbisu hamutuk ho Maromak. Sira fó ajuda ba Testemuña seluk neʼebé halai ba Estadus Unidus tanba funu mosu iha sira-nia rai. Sira ajuda refujiadu sira-neʼe hodi buka hela-fatin no sasán ba uma laran. Nia dehan: “Haree irmaun-irmán sira-neʼe nia ksolok no agradese tanba sira esperiénsia rasik domin husi maluk fiar-naʼin iha mundu tomak book tebes ami-nia  laran. Irmaun-irmán sira-neʼe sente katak ami fó ajuda makaʼas ba sira, maibé tuir loloos sira mak ajuda tebes ami. Ami haree ema hotu hatudu domin, iha unidade, fiar, no sadere ba Jeová, neʼe hametin tebes ami-nia domin ba Jeová. Ida-neʼe halo ami agradese tebes ba buat hotu neʼebé ita simu husi Jeová nia organizasaun.”

14, 15. (a) Profeta Isaías hatudu hahalok saida? (b) Oinsá mak ita bele banati-tuir Isaías nia ezemplu?

¹⁴ Ita hakarak serbisu hamutuk ho Jeová liután ka lae? Se nuneʼe, Ita bele muda ba fatin neʼebé presiza haklaken-naʼin liután ka lae? Dala ruma ita la presiza muda ba fatin dook atu bele hatudu ita-nia laran-diʼak. Maibé ba irmaun-irmán sira neʼebé bele halo nuneʼe, sira hatudu hahalok neʼebé profeta Isaías hatudu. Bainhira Jeová husu: “Sé mak haʼu sei haruka? Sé mak sei lori ami-nia lia-menon?” Isaías hatán: “Haʼu mak neʼe! Haruka haʼu bá!” (Isaías [Yesaya] 6:8) Ita bele fó ajuda ba Jeová nia organizasaun hodi hatudu hahalok hanesan Isaías nian ka lae? Iha dalan saida deʼit mak Ita bele ajuda?

¹⁵ Bainhira Jesus koʼalia kona-ba serbisu haklaken no ajuda ema sai ninia dixípulu, nia dehan: “Serbisu koʼa nian boot tebes, maibé serbisu-naʼin uitoan deʼit. Tan neʼe, husu ba toʼos-naʼin atu haruka tan ema hodi halo serbisu koʼa nian.” (Mateus 9:37, 38) Ita bele serbí nuʼudar pioneiru iha fatin neʼebé presiza tan haklaken-naʼin ka lae? Ka Ita bele ajuda ema seluk atu halo nuneʼe ka lae? Irmaun-irmán barak hatete katak, dalan neʼebé diʼak liu hotu atu hatudu sira-nia domin ba Maromak no ema seluk mak hodi foti pioneiru iha fatin neʼebé presiza haklaken-naʼin. Iha dalan seluk tan ka lae neʼebé Ita bele serbí Jeová liután? Se Ita mak halo nuneʼe, Ita sei sente kontente tebes.

16, 17. Iha dalan saida tan mak Ita bele serbí Jeová liután?

¹⁶ Ita bele serbí iha Betel ka lae? Ka ita bele hola parte iha projetu konstrusaun sira nuʼudar voluntáriu temporáriu, ka ajuda ba loron ida ka liu iha semana ida nia laran ka lae? Jeová nia organizasaun sempre presiza ajuda husi ema neʼebé prontu atu serbí iha fatin neʼebé deʼit no halo serbisu naran deʼit, maski ema sira-neʼe iha fali matenek no esperiénsia kona-ba serbisu seluk. Jeová hafolin tebes ema neʼebé fó sira-nia an nuʼudar voluntáriu atu serbí iha fatin neʼebé presiza ajuda.​—Salmo (Mazmur) 110:3.

¹⁷ Ita hakarak hetan treinu liután hodi bele serbí Jeová iha dalan boot liután ka lae? Karik Ita bele hatama formuláriu atu tuir Eskola ba Haklaken-Naʼin Tempu-Tomak. Eskola neʼe fó treinu ba irmaun-irmán maduru sira neʼebé serbí daudauk Jeová tempu-tomak, hodi Jeová nia organizasaun bele uza sira atu halo serbisu barak liután. Ema sira neʼebé tuir eskola neʼe tenkesér prontu atu serbí iha fatin neʼebé deʼit bainhira hetan ona graduasaun husi eskola neʼe. Ita hakarak halo serbisu barak liután ba Jeová liuhusi dalan neʼe ka lae?​—1 Korinto 9:23.

18. Serbisu hamutuk ho Jeová loron-loron lori benefísiu saida deʼit?

¹⁸ Ita hatudu laran-luak, laran-diʼak no domin tanba ita mak Jeová nia povu. Loron-loron ita hanoin kona-ba ema seluk nia presiza. Neʼe lori kontente no dame ba ita. (Galásia 5:22, 23) Maski ita ida-idak nia situasaun la hanesan, Ita bele hetan ksolok nafatin, naran katak Ita banati-tuir Jeová nia hahalok laran-diʼak, no kaer metin ba Ita-nia priviléjiu hodi sai ninia maluk serbisu-naʼin.​—Provérbios (Amsal) 3:9, 10.