Entrega Ita-nia laran-susar hotu ba Jeová
“Entrega imi-nia laran-susar hotu ba [Jeová], tanba nia hanoin imi.”—1 PEDRO 5:7.
KNANANUK: 23, 22
1, 2. (a) Tanbasá mak ita hasoru susar? (Haree foto iha leten.) (b) Ita sei koʼalia kona-ba saida iha lisaun neʼe?
OHIN LORON, Satanás “laʼo bá-mai hanesan leaun ida neʼebé hasai lian makaʼas no buka atu han ema ruma”. (1 Pedro 5:8; Apokalipse 12:17) Tan neʼe mak ita-nia moris nakonu ho susar. Husi tempu uluk kedas Jeová nia atan sira hasoru ona susar hanesan neʼe. Porezemplu, Bíblia hatete katak dala ruma Liurai David sente laran-taridu. (Salmo [Mazmur] 13:2) No apóstolu Paulo “hanoin barak tanba kongregasaun hotu”. (2 Korinto 11:28) Maibé, saida mak ita bele halo bainhira ita sente laran-taridu?
2 Ita-nia Aman iha lalehan neʼebé nakonu ho domin ajuda ona ninia atan sira iha tempu uluk hodi sai husi laran-susar, ohin loron nia mós hakarak ajuda ita. Bíblia dehan: “Entrega imi-nia laran-susar hotu ba nia, tanba nia hanoin imi.” (1 Pedro 5:7) Maibé oinsá mak ita bele halo nuneʼe? Iha dalan haat neʼebé bele ajuda ita. (1) Halo orasaun, (2) lee no medita kona-ba Maromak nia Liafuan, (3) husik Jeová nia espíritu santu ajuda ita, no (4) koʼalia ba ema neʼebé ita bele tau fiar. Husi dalan haat neʼe, haree toʼok saida mak ita hakarak hadiʼa liután.
ENTREGA ITA-NIA LARAN-SUSAR HOTU BA JEOVÁ
3. Iha dalan saida mak ita bele ‘entrega ita-nia laran-susar hotu ba Jeová’?
3 Dalan primeiru ita bele entrega ita-nia laran-susar ba Jeová mak liuhusi orasaun neʼebé halo ho laran. Bainhira ita hasoru daudauk laran-taridu, ita-nia Aman lalehan neʼebé nakonu ho domin hakarak ita fó sai ita-nia sentimentu ba nia. David husu ba Jeová hodi dehan: “Oh Maromak, rona ba haʼu-nia orasaun.” Tuirmai, nia dehan: “Entrega ó-nia laran-susar hotu ba Jeová, no nia sei apoia ó.” (Salmo [Mazmur] 55:1, 22) Bainhira ita hakaʼas an ona atu rezolve problema ida, diʼak liu halo orasaun duké hanoin demais kona-ba problema neʼe. Maibé oinsá mak orasaun bele ajuda ita atu la hanoin demais tan kona-ba ita-nia problema?—Salmo (Mazmur) 94:18, 19.
4. Tanbasá mak importante atu halo orasaun bainhira ita laran-taridu?
4 Lee Filipe 4:6, 7. Se ita halo orasaun beibeik ho laran ba Jeová, nia sei hatán ba ita-nia orasaun. Oinsá? Nia bele ajuda ita atu sente kalma hodi ita la bele iha hanoin negativu ka sentimentu laran-tun. Maromak Jeová sei ajuda ita atu sente dame iha ita-nia laran neʼebé liu fali ita-nia kbiit. Jeová ajuda ona irmaun-irmán barak no nia mós bele ajuda ita. Loos duni, “Maromak nia dame” bele ajuda ita tahan hasoru susar naran deʼit! Ita bele tau fiar tomak ba Jeová nia liafuan tuirmai neʼe: “Keta laran-taridu tanba haʼu mak imi-nia Maromak. Haʼu sei hametin imi, sin, haʼu sei ajuda imi.”—Isaías (Yesaya) 41:10.
HETAN DAME HUSI MAROMAK NIA LIAFUAN
5. Oinsá mak Maromak nia Liafuan bele ajuda ita atu sente dame?
5 Dalan segundu atu bele sente dame iha ita-nia laran mak liuhusi lee no medita kona-ba eskritura sira. Tanbasá importante atu halo nuneʼe? Tanba Bíblia mak Maromak nia Liafuan. Eskritura sira iha matadalan neʼebé diʼak husi ita-nia Kriadór. Bainhira ita sente laran-taridu, medita kona-ba Maromak nia hanoin no kona-ba ninia konsellu sira neʼebé hametin ita. Halo nuneʼe bele ajuda ita atu halakon, hamenus, ka hasees an husi laran-taridu. Jeová rasik hatete katak lee ninia Liafuan bele halo ita “sai aten-brani no sai forte” hodi ita la “nakdedar ka taʼuk”.—Josué (Yosua) 1:7-9.
6. Oinsá mak Jesus nia liafuan sira bele ajuda ita?
6 Husi Bíblia ita bele lee kona-ba Jesus nia liafuan sira. Ema gosta rona ba Jesus tanba ninia liafuan sempre fó kmaan ba sira, liuliu ba ema neʼebé fraku ka sente laran-tun. (Lee Mateus 11:28-30.) Jesus hanoin tebes kona-ba ema nia sentimentu. (Marcos 6:30-32) Jesus promete ba ninia apóstolu sira neʼebé laʼo hamutuk ho nia katak nia sei ajuda sira, no ita fiar katak nia mós sei ajuda ita. Ita la presiza laʼo iha Jesus nia sorin atu hetan ninia tulun. Agora daudauk, nia mak ita-nia Liurai iha lalehan, no nia kontinua hatudu ba ita katak nia iha domin ba ita. Tan neʼe mak bainhira ita sente laran-taridu, ita bele tau fiar katak Jesus sei ‘sai nuʼudar ajuda-naʼin’ hodi ita bele ‘hetan ajuda iha tempu neʼebé loos’ husi nia. Sin, Jesus nia liafuan sira sei ajuda ita atu hetan esperansa no kbiit hodi ita bele tahan hasoru laran-taridu.—Ebreu 2:17, 18; 4:16.
HAHALOK SIRA NEʼEBÉ MAI HUSI ESPÍRITU SANTU
7. Oinsá mak Maromak nia espíritu santu bele ajuda ita?
7 Dalan terseiru atu hamenus laran-taridu mak liuhusi espíritu santu. Jesus promete katak ita-nia Aman iha lalehan sei fó espíritu santu ba ita se ita husu ba Nia. (Lucas 11:10-13) Oinsá mak espíritu santu bele ajuda ita? Espíritu santu mak Maromak nia forsa, no forsa neʼe bele ajuda ita atu haburas hahalok diʼak hanesan Maromak nian. (Lee Galásia 5:22, 23; Koloso 3:10) Hahalok sira-neʼe sei hametin liután ita-nia relasaun ho ema seluk, no mós ajuda ita atu hasees an husi situasaun neʼebé bele halo ita laran-taridu. Mai ita haree toʼok oinsá mak hahalok sira neʼebé mai husi espíritu santu bele ajuda ita-nia moris.
8-12. Iha dalan saida deʼit mak hahalok sira neʼebé mai husi espíritu santu bele ajuda ita?
8 “Domin, kontente, dame.” Bainhira ita hatudu respeitu ba ema seluk, neʼe bele hamenus ita-nia laran-taridu. Tanbasá? Tanba se ita mak hatudu domin no respeitu, neʼe bele ajuda ita atu hasees an husi situasaun neʼebé bele halo ita sente hirus no estrese. No fasil mós ba ita atu iha dame ho ema seluk.—Roma 12:10.
9 “Pasiénsia, laran-diʼak, hahalok diʼak.” Bíblia dehan: “Hatudu laran-diʼak ba malu, hanoin malu, perdua malu ho laran.” (Éfeso 4:32) Bainhira ita halo tuir Bíblia nia matadalan sira-neʼe, ita sei haburas relasaun neʼebé diʼak ho ema seluk, no neʼe mós bele ajuda ita atu la hamosu situasaun neʼebé bele halo ita sente laran-taridu. Se situasaun ruma mosu tanba ema nia fraku, fasil ba ita atu tahan bainhira ita hatudu hahalok diʼak sira-neʼe.
10 “Fiar.” Ohin loron, hanoin beibeik kona-ba osan ka sasán bele hamosu laran-taridu. (Provérbios [Amsal] 18:11) Oinsá mak fiar bele ajuda ita atu la sente laran-taridu kona-ba buat sira-neʼe? Fiar neʼebé metin ba Jeová bele ajuda ita atu la duvida katak nia sei tau matan ba ita-nia presiza sira. Apóstolu Paulo fó konsellu ba ita atu sente haksolok ho buat neʼebé ita iha ona. Jeová hakarak ita halo nuneʼe tanba nia dehan ona: “Haʼu sei nunka husik ó no haʼu sei nunka fila kotuk ba ó.” Tan neʼe mak ita mós bele fiar hanesan Paulo hodi dehan: “Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?”—Ebreu 13:5, 6.
11 “Laran-maus, no kontrola an.” Diʼak atu iha hahalok sira-neʼe tanba neʼe sei ajuda ita atu la halo ka la koʼalia sai liafuan sira neʼebé bele halo ita sente laran-taridu. Hahalok sira-neʼe mós bele ajuda ita hasees an husi “laran-moras oioin, hirus, laran-nakali, hakilar malu, koʼalia aat”.—Éfeso 4:31.
12 Ita presiza haraik-an atu bele tau fiar ba “Maromak kbiit-naʼin” no atu ‘entrega ita-nia laran-susar hotu ba nia’. (1 Pedro 5:6, 7) Se ita mak haraik-an, Jeová sei apoia no tau matan ba ita. Bainhira ita rekoñese katak ita-nia kbiit iha limitadu, ita sei la sadere ba ita-nia an. Ita sei aprende atu sadere ba Maromak no neʼe bele hamenus ita-nia laran-taridu.—Miquéias (Mikha) 6:8
“KETA HANOIN BARAK”
13. Jesus nia liafuan, “Keta hanoin barak” katak sá?
13 Jesus dehan: “Keta hanoin barak.” (Lee Mateus 6:34.) Karik ita sente susar atu halo tuir Jesus nia konsellu neʼe. Maibé Jesus nia liafuan katak sá? Ita hatene katak David no Paulo mós dala ruma hanoin barak. Jesus nia liafuan la dehan katak ema neʼebé serbí Jeová sei nunka hanoin barak. Maibé Jesus hakarak ajuda ninia dixípulu sira atu komprende katak hanoin beibeik ka hanoin demais la bele ajuda atu rezolve problema. Ita hasoru susar loroloron, tan neʼe mak ita la bele aumenta tan susar ba ita-nia an hodi hanoin kona-ba buat neʼebé liu ona ka kona-ba problema sira iha futuru. Entaun, oinsá mak Jesus nia konsellu bele ajuda ita atu hamenus ita-nia laran-taridu?
14. Saida mak bele ajuda ita atu la hanoin beibeik kona-ba sala neʼebé uluk ita halo?
14 Dala ruma ema sente laran-taridu kona-ba sala neʼebé sira halo iha tempu uluk. No maski tinan barak ona, karik sira-nia laran sei fó sala beibeik ba sira kona-ba buat neʼebé sira halo. Dala ruma Liurai David mós sente ninia ‘sala sira barak toʼo halo nia mout’. Nia dehan: “Haʼu-nia laran-susar halo haʼu halerik ho lian makaʼas.” (Salmo [Mazmur] 38:3, 4, 8, 18) Bainhira iha situasaun hanesan neʼe, David halo buat ida neʼebé matenek. Nia tau fiar ba Jeová nia laran-sadiʼa no nia fiar katak Jeová fó perdua ba nia. David hatete: “Ksolok ba ema neʼebé hetan ona perdua ba ninia hahalok aat.”—Lee Salmo (Mazmur) 32:1-3, 5. *
15. (a) Ita bele aprende saida husi David? (b) Saida mak Ita bele halo hodi hamenus laran-taridu? (Haree kaixa “ Dalan atu hamenus laran-taridu.”)
15 Problema ohin loron nian mós bele halo ita laran-taridu. Porezemplu, bainhira David hakerek Salmo 55, nia taʼuk hela ema atu oho nia. (Salmo [Mazmur] 55:2-5) Maski nuneʼe, nia nunka husik ninia laran-taridu atu halakon ninia fiar ba Jeová. Nia husu beibeik Jeová atu ajuda nia, no nia mós hatene katak importante atu halo buat ruma kona-ba ninia situasaun neʼe. (2 Samuel 15:30-34) Ita bele aprende lisaun ida husi David. Duké husik laran-taridu halo Ita mout, diʼak atu hakaʼas an hodi rezolve Ita-nia problema, no tau fiar ba Jeová katak nia sei ajuda Ita.
16. Oinsá mak signifika husi Maromak nia naran bele hametin ita-nia fiar?
16 Dala ruma ita mós bele hanoin demais kona-ba problema sira iha futuru. Maibé ita la presiza hanoin barak kona-ba buat neʼebé seidauk akontese. Tanbasá? Tanba dala barak buat neʼebé ita taʼuk la akontese tuir buat neʼebé ita hanoin. No la haluha katak la iha situasaun ida mak bele halo susar ba Jeová. Tanba signifika husi Maromak nia naran neʼebé dehan “Nia mak Halo” hatudu katak buat hotu neʼebé nia promete ba ita sei sai loos. (Êxodo [Keluaran] 3:14) Ita bele fiar katak Maromak sei fó bensaun ba ninia atan neʼebé laran-metin ba nia no ajuda sira atu la hanoin barak kona-ba tempu uluk, tempu agora, no kona-ba futuru.
KOʼALIA NAKLOKE BA EMA NEʼEBÉ ITA TAU FIAR
17, 18. Oinsá koʼalia nakloke bele ajuda ita atu la laran-taridu demais?
17 Dalan haat neʼebé bele ajuda ita tahan hasoru laran-taridu mak koʼalia nakloke ba ema neʼebé ita bele tau fiar, hanesan ita-nia kaben, belun diʼak, ka katuas kongregasaun. Karik sira bele ajuda ita atu komprende diʼak liután kona-ba ita-nia situasaun. Bíblia dehan: “Hanoin resin mak halo ema sente laran-triste, maibé liafuan neʼebé diʼak mak halo ema sente laran-haksolok.” (Provérbios [Amsal] 12:25) No Eskritura mós dehan: “Planu sira sei la sai loos kuandu ema la koʼalia ba malu, maibé buat hotu sei laʼo ho diʼak kuandu ema barak fó ideia.”—Provérbios (Amsal) 15:22.
18 Reuniaun sira mós bele ajuda ita atu la sente laran-taridu demais. Iha semana ida-idak ita gasta tempu hamutuk ho irmaun-irmán sira neʼebé hanoin ita no sira hakarak tebes atu fó laran-manas ba ita. (Ebreu 10:24, 25) “Fó laran-manas ba malu” liuhusi dalan hanesan neʼe bele hametin ita no halo fasil ba ita atu tahan hasoru ita-nia laran-taridu.—Roma 1:12.
ITA-NIA RELASAUN HO JEOVÁ MAK ITA-NIA KBIIT
19. Tanbasá mak Ita fiar katak relasaun diʼak ho Jeová bele hametin Ita?
19 Katuas kongregasaun ida husi rai-Kanadá aprende katak importante tebes atu entrega ninia laran-susar ba Jeová. Nia serbisu nuʼudar mestre iha eskola no nia mós iha moras neʼebé halo susar ba nia atu kontrola ninia laran-taridu. Saida mak ajuda nia hodi tahan hasoru ninia situasaun neʼe? Nia dehan: “Buat importante liu ba haʼu mak atu hakaʼas an hametin haʼu-nia relasaun ho Jeová.” Ajuda husi belun diʼak iha kongregasaun no koʼalia nakloke kona-ba ninia sentimentu ba ninia feen ajuda tebes nia atu tahan hasoru ninia susar sira. No katuas kongregasaun ho katuas área nian mós ajuda nia atu haree ninia situasaun tuir Jeová nia haree. Doutór mós ajuda irmaun neʼe atu komprende kona-ba ninia moras, no neʼe ajuda nia atu halo mudansa ba ninia moris hodi buka tempu atu deskansa no halo desportu ruma. Neineik-neineik irmaun neʼe aprende oinsá atu kontrola ninia situasaun no sentimentu. Bainhira nia sente la iha kbiit atu halo nuneʼe, nia entrega deʼit ba Jeová atu ajuda nia.
20. (a) Oinsá mak ita bele entrega ita-nia laran-taridu ba Jeová? (b) Ita sei koʼalia kona-ba saida iha lisaun tuirmai?
20 Iha lisaun neʼe ita aprende ona katak importante tebes atu entrega ita-nia laran-taridu ba Jeová liuhusi halo orasaun, lee no medita kona-ba ninia Liafuan. Ita mós aprende katak importante tebes atu husik Jeová nia espíritu santu ajuda ita, koʼalia ba ema neʼebé ita bele tau fiar, no tuir reuniaun sira. Iha lisaun tuirmai ita sei koʼalia kona-ba oinsá mak Jeová ajuda ita liuhusi kolen neʼebé nia atu fó ba ita.—Ebreu 11:6.
^ par. 14 Salmo 32:1-3, 5 1 Ksolok ba ema neʼebé hetan ona perdua ba ninia hahalok aat, no ninia sala taka ona. 2 Ksolok ba ema neʼebé ninia sala Jeová la hanoin-hetan tan, no ksolok ba ema neʼebé la laran-makerek. 3 Bainhira haʼu nonook deʼit, haʼu-nia ruin sira sai fraku ona tanba haʼu-nia neon-susar ba loron tomak. 5 Ikusmai haʼu fó sai haʼu-nia sala ba Ita; haʼu la taka haʼu-nia sala. Haʼu dehan: “Haʼu sei fó sai haʼu-nia sala sira ba Jeová.” No Ita fó perdua ona ba haʼu-nia sala sira.
