LIUTIHA tempu balu, Antonia bá fali uma neʼe, no feto neʼe siʼak tan nia. Antonia halo saida? Nia hatete: “Situasaun neʼe susar mai haʼu. Nia la iha razaun atu siʼak haʼu hanesan neʼe.” Maibé dala ida tan, Antonia husu deskulpa no dehan ba feto neʼe katak nia komprende susar neʼebé nia hasoru daudauk.

Se Ita mak iha Antonia nia fatin, Ita sei halo saida? Ita sente susar atu la sai hirus, ka Ita sei hatudu laran-maus? La fasil atu kalma nafatin bainhira ema siʼak ita la ho razaun, hanesan Antonia nia situasaun.

Maibé Bíblia fó laran-manas ba ita atu hatudu laran-maus. Tuir loloos, Maromak nia Liafuan liga hahalok laran-maus ho matenek. Bíblia hatete: “Iha imi-nia leet, iha ema matenek ka lae? Se nuneʼe, nia tenke iha hahalok diʼak neʼebé hatudu katak nia halo buat hotu ho laran-maus neʼebé mai husi matenek.” (Tiago 3:13) Tanbasá mak haburas hahalok laran-maus hatudu katak ita iha matenek neʼebé mai husi  Maromak? Saida mak bele ajuda ita haburas hahalok neʼe?

Hatudu laran-maus bele halo situasaun kalma fali. “Hatán ho liafuan mamar sei hatún hirus, maibé liafuan neʼebé makaʼas halo ema hirus liután.”—Provérbios (Amsal) 15:1.

Hatán fali ho hirus bele halo situasaun sai aat liután, neʼe hanesan ita aumenta ai ba ahi. (Provérbios [Amsal] 26:21) Maibé hatán ho laran-maus bele halo ema neʼebé siʼak sente kalma.

Neʼe mak buat neʼebé akontese ba Antonia. Bainhira feto neʼe haree Antonia hatudu laran-maus, nia tanis no esplika katak nia rasik hasoru problema balu no mós problema ho família. Antonia fó sasin ba nia no ikusmai komesa estuda ho feto neʼe. Neʼe akontese tanba Antonia hatudu hahalok kalma no laran-maus.

Hatudu laran-maus bele halo ita kontente. “Kontente ba sira neʼebé laran-maus, tanba sira sei simu rai nuʼudar liman-rohan.”—Mateus 5:5.

Tanbasá mak ema laran-maus sira kontente? Ema barak neʼebé uluk hirus lalais no ikusmai hakaʼas an ‘tau laran-maus nuʼudar sira-nia hatais’, sira sai kontente tebes. Sira-nia moris sai diʼak liután, no hatene katak sira iha esperansa furak ba futuru. (Koloso 3:12) Katuas área nian husi rai-España naran Adolfo konta kona-ba ninia moris antes nia sai Testemuña ba Jeová.

Nia dehan: “Uluk haʼu sente haʼu-nia moris la iha folin. Haʼu sempre hirus lalais toʼo haʼu-nia kolega balu mós taʼuk haʼu. Bainhira haʼu baku malu ho ema, ema sona haʼu ho tudik dala neen, no haʼu-nia raan sai barak toʼo besik atu mate. Akontesimentu neʼe mak troka haʼu-nia moris.”

Maibé agora, Adolfo hanorin ema seluk kona-ba laran-maus liuhusi ninia liafuan no ezemplu. Ema barak gosta hahalok diʼak neʼebé nia hatudu ba sira. Adolfo dehan katak nia kontente tanba mudansa sira neʼebé nia halo ona, no nia mós agradese ba ajuda neʼebé Jeová fó ba nia atu haburas laran-maus.

Hatudu laran-maus halo Jeová kontente. “Haʼu-nia oan, sai matenek bá no halo haʼu-nia laran-kontente, atu nuneʼe haʼu bele hatán ba ida neʼebé koʼalia aat haʼu.”—Provérbios (Amsal) 27:11.

Jeová nia inimigu Diabu Satanás koʼalia aat ba nia. Tuir loloos, Maromak Jeová iha razaun atu sai hirus ba Satanás tanba nia, ho neon, koʼalia aat ba Jeová. Maibé Bíblia dehan katak Jeová “la hirus lalais”. (Êxodo [Keluaran] 34:6) Se ita mak banati-tuir Jeová hodi kontrola ita-nia hirus no hatudu laran-maus, neʼe hatudu katak ita iha matenek, no Jeová sei kontente tebes ho ita.—Éfeso 5:1.

Iha mundu aat neʼe, dala ruma ita hasoru ema neʼebé “gaba an, loko an, koʼalia aat, . . . konta ema nia vida, la kontrola an, siʼak”. (2 Timóteo 3:2, 3) Maibé tanba ema iha mundu mak hanesan neʼe, la dehan katak ema kristaun sira la bele haburas laran-maus. Maromak nia Liafuan fó-hanoin ita katak ‘matenek husi lalehan mak buka dame no la ulun-toos’. (Tiago 3:17) Se ita hakaʼas an buka dame no la ulun-toos, ita hatudu katak ita mak matenek. Matenek neʼe sei ajuda ita atu hatán ho laran-maus se ema ida siʼak ita la ho razaun, no ita sei hakbesik liután ba Ida neʼebé hun ba matenek, Maromak Jeová.