1, 2. (a) Oinsá mak domin ho fiar iha ligasaun? (b) Ita sei koʼalia kona-ba pergunta saida deʼit?

ITA hadomi Jeová “tanba nia hadomi uluk ita”. (1 João 4:19) Nia promete katak nia sei fó bensaun ba ninia atan neʼebé laran-metin ba nia. Se ita-nia domin ba nia aumenta, ita-nia fiar ba nia mós sei sai boot liután, no neʼe sei ajuda ita atu fiar katak nia sei fó kolen ba ema neʼebé nia hadomi.—Lee Ebreu 11:6.

² Jeová mak ida neʼebé fó kolen no nia gosta tebes atu fó kolen ba ema. Tan neʼe, se ita la fiar katak nia sei fó kolen ba ema neʼebé buka nia ho laran, ita-nia fiar seidauk kompletu. Tanbasá? Tanba “se ita iha fiar, ita sei laran-metin katak ita-nia esperansa sei sai loos”. (Ebreu 11:1) Neʼe katak ita tau fiar ho laran tomak ba nia atu fó bensaun ba ema neʼebé laran-metin ba nia. Maibé oinsá mak hanoin kona-ba kolen neʼebé Jeová sei fó bele ajuda ita? Iha dalan saida mak Jeová fó ona kolen ba ninia atan sira iha tempu uluk no agora?

3. Maromak halo promete saida iha Malaquias 3:10?

³ Maromak Jeová promete katak nia sei fó kolen ba ninia atan neʼebé laran-metin. Tan neʼe mak nia husu ita atu fó buat neʼebé  diʼak liu ba nia no tau fiar katak nia sei fó fali bensaun mai ita. Nia dehan: “Favór ida koko haʼu kona-ba ida-neʼe, atu haree se haʼu bele loke ba imi odamatan sira iha lalehan no fakar tun ba imi bensaun toʼo imi la falta tan buat ida.” (Malaquias [Maleakhi] 3:10) Ita hatudu agradese ba nia liuhusi halo tuir ninia liafuan atu koko nia.

4. Tanbasá mak ita bele tau fiar ba Jesus nia liafuan neʼebé hakerek iha Mateus 6:33?

⁴ Jesus promete ba ninia dixípulu sira katak se sira buka uluk Maromak nia Ukun, Maromak sei tau matan ba sira-nia presiza. (Lee Mateus 6:33.) Jesus iha fiar katak Maromak nia promesa hotu sei sai loos. (Isaías [Yesaya] 55:11) Tan neʼe se ita tau fiar tomak ba Jeová, nia mós sei kumpre ninia promesa tuirmai neʼe: “Haʼu sei nunka husik ó no haʼu sei nunka fila kotuk ba ó.” (Ebreu 13:5) Eskritura neʼe ajuda duni ita atu tau fiar ba Jesus nia liafuan neʼebé hakerek iha Mateus 6:33.

5. Tanbasá mak Jesus nia resposta ba Pedro fó laran-manas mai ita?

⁵ Loron ida apóstolu Pedro husu ba Jesus: “Ami husik ona buat hotu atu tuir Ita, ami sei hetan saida?” (Mateus 19:27) Jesus la korrije nia kona-ba ninia pergunta neʼe. Jesus hatete deʼit ba ninia dixípulu sira katak sira sei simu kolen tanba sakrifísiu neʼebé sira halo. Apóstolu sira no ema seluk neʼebé hatudu laran-metin sei ukun hamutuk ho Jesus iha lalehan iha futuru. Maibé Jesus mós hatete katak sira simu daudauk kolen, nia dehan: “Ema hotu neʼebé husik uma, maun-alin ka feton, inan ka aman, oan, ka rai tanba haʼu-nia naran sei simu barak liu fali no sei hetan moris ba nafatin.”  (Mateus 19:29) Ohin loron, liuhusi kongregasaun, ita bele hetan aman, inan, maun-alin, feton, no labarik barak. Kolen sira-neʼe mak folin-boot liu fali buat neʼebé ita husik atu serbí Jeová.

6. Tanbasá mak Jeová hakarak fó kolen ba ninia atan sira?

⁶ Jeová promete atu fó bensaun furak oioin mai ita ohin loron no bensaun boot liután iha futuru. (1 Timóteo 4:8) Nia halo promete neʼe tanba nia hakarak ajuda ita atu hatudu laran-metin bainhira ita-nia fiar hetan koko. Hodi fiar metin katak Jeová “sei fó kolen ba sira neʼebé buka nia ho laran”, neʼe ajuda ita atu hatudu laran-metin ba nia.—Ebreu 11:6.

7. Oinsá mak esperansa hanesan ho ankor?

⁷ Iha Jesus nia diskursu, nia dehan: “Haksoit bá ho haksolok, tanba imi-nia kolen boot tebes iha lalehan, basá iha dalan hanesan neʼe mós sira fó-terus ba profeta sira neʼebé uluk liu imi.” (Mateus 5:12) Maromak nia atan balu sei hetan kolen atu moris iha lalehan, no balu tan atu moris ba nafatin iha paraízu iha rai. Neʼe mós razaun ida atu ‘haksoit ho haksolok’. (Salmo [Mazmur] 37:11; Lucas 18:30) Maski ita iha esperansa neʼebé la hanesan, maibé ita hotu bele halo ita-nia fiar sai “nuʼudar ankor neʼebé loos no metin ba ita-nia moris”. (Ebreu 6:17-20) Bainhira tasi boot no siʼak, ankor bele tahan ró hodi tasi la lori ró neʼe. Hanesan neʼe mós ho ita-nia esperansa neʼebé metin, neʼe sei halo ita-nia moris hakmatek. Ita-nia esperansa bele ajuda ita atu tahan tempu susar sira iha ita-nia moris.

8. Oinsá mak ita-nia esperansa bele hamenus laran-taridu?

⁸ Esperansa bele ajuda atu hamenus laran-taridu. Maromak nia promesa sira bele halo ita-nia laran sente kmaan hanesan mina-bálsamu neʼebé halo mamar ita-nia kulit. Bainhira ita entrega ita-nia laran-susar ba Jeová, nia sei hametin ita, neʼe halo ita-nia laran sente kmaan tebes, loos ka lae? (Salmo [Mazmur] 55:22) Ita bele tau fiar tomak katak “Maromak bele halo barak liu fali buat hotu neʼebé ita husu no hanoin”. (Éfeso 3:20) Jeová sei fó ajuda ba ita, laʼós uitoan ka barak, maibé barak liután.

9. Oinsá mak ita bele simu bensaun husi Jeová?

⁹ Ita presiza tau fiar tomak ba Jeová no halo tuir ninia matadalan se ita hakarak atu simu kolen. Moisés hatete ba nasaun Izraél: “Jeová sei haraik duni bensaun ba imi iha rai neʼebé Jeová, imi-nia Maromak, sei fó ba imi atu foti nuʼudar imi-nia liman-rohan, maibé nia sei haraik bensaun neʼe só deʼit se imi rona ba Jeová, imi-nia Maromak nia lian no halo tuir ho didiʼak ninia mandamentu hotu neʼebé haʼu hatoʼo ba imi ohin. Tanba Jeová, imi-nia Maromak, sei haraik bensaun ba imi hanesan nia promete ona ba imi.” (Deuteronômio [Ulangan] 15:4-6) Ita fiar ho laran tomak ka lae katak, se Ita mak serbí Jeová ho laran, nia sei fó bensaun ba Ita? Ita la iha duvida kona-ba neʼe, loos ka lae?

10, 11. Iha dalan saida deʼit mak Jeová fó kolen ba José?

¹⁰ Buat hotu neʼebé hakerek iha Bíblia diʼak ba ita. Bíblia mós esplika oinsá Maromak fó kolen ba nia atan sira iha tempu uluk. (Roma 15:4) Ezemplu kapás ida mak kona-ba José. Foufoun ninia maun sira faʼan nia sai atan. Tuirmai ninia patraun nia feen duun-matak nia no ema hatama nia ba komarka iha rai-Ejitu. Komarka bele haketak nia husi Jeová ka lae? Lae! Bíblia dehan: “Jeová nafatin hamutuk ho José no kontinua hatudu domin neʼebé laran-metin  ba José . . . Jeová hamutuk ho José no Jeová halo José nia serbisu sai susesu.” (Gênesis [Kejadian] 39:21-23) Maski José moris iha terus laran, nia hein ho pasiénsia ba ninia Maromak.

¹¹ Tinan balu liutiha, liurai Ejitu hasai José husi komarka no foti nia sai ema ho pozisaun segundu iha rai-Ejitu. (Gênesis [Kejadian] 41:1, 37-43) Bainhira ninia feen tuur-ahi oan-mane rua, “José hanaran nia oan-mane primeiru nuʼudar Manase, tanba nia dehan: ‘Maromak halo haʼu haluha ona haʼu-nia susar hotu no haʼu-nia aman nia umakain tomak.’ No nia hanaran nia oan segundu nuʼudar Efraim, tanba nia dehan: ‘Maromak fó ona oan barak ba haʼu iha rai neʼebé haʼu hetan terus.’” (Gênesis [Kejadian] 41:51, 52) Tanba José nia laran-metin, Jeová fó bensaun ba nia no José konsege salva ema Izraél ho ema Ejitu sira husi rai-hamlaha. José hatene katak Jeová mak ida-neʼebé fó kolen no bensaun ba nia.—Gênesis (Kejadian) 45:5-9.

12. Oinsá mak Jesus bele tahan hasoru terus sira?

¹² Jesus Kristu mós hasoru terus barak, maibé nia laran-metin nafatin, tan neʼe Jeová fó kolen ba nia. Saida mak ajuda nia hodi tahan? Bíblia dehan: “Tanba ksolok neʼebé tau ona iha nia oin, nia tahan iha ai-riin terus nian hodi la sente moe.” (Ebreu 12:2) Jesus haksolok duni hodi haree katak nia bele halo Jeová nia naran sai santu, no Jeová simu nia hodi fó priviléjiu furak oioin ba nia. Bíblia dehan katak nia “tuur ona iha Maromak nia kadunan nia sorin loos”, no eskritura seluk mós hatete katak “Maromak foti nia ba pozisaun neʼebé aas liu no ho laran-diʼak Maromak fó ba nia naran ida neʼebé boot liu naran sira seluk”. Neʼe mak kolen neʼebé furak tebes ba Jesus.—Filipe 2:9.

13, 14. Jeová sente oinsá kona-ba buat hotu neʼebé ita halo ba nia?

¹³ Ita bele fiar katak Jeová hafolin tebes ita-nia hakaʼas an hodi serbí nia. Nia komprende ita-nia sentimentu kona-ba la fiar-an ka bainhira ita sente katak buat neʼebé ita halo la iha folin. Nia hanoin tebes bainhira ita laran-taridu kona-ba serbisu ka oinsá atu tau matan ba ita-nia família. No nia mós komprende katak ita la bele halo tan buat barak hanesan ita halo uluk tanba moras ka depresaun. Maibé ita bele fiar ho laran tomak katak Jeová hafolin tebes ita-nia laran-metin maski ita hasoru daudauk problema oioin.—Lee Ebreu 6:10, 11.

¹⁴ Ita mós presiza hanoin-hetan katak Jeová mak “Maromak neʼebé rona ba orasaun”. Tan neʼe bainhira ita halo orasaun, nia sei rona ita. (Salmo [Mazmur] 65:2) Ita-nia “Aman neʼebé laran-sadiʼa no Maromak neʼebé fó kmaan ba ema iha situasaun hotu” sei fó apoiu oioin ba ita hodi ita bele hakbesik nafatin ba nia. Dala ruma nia uza ita-nia irmaun-irmán sira atu halo nuneʼe. (2 Korinto 1:3) Jeová kontente tebes bainhira ita hatudu laran-diʼak ba ema seluk. Bíblia dehan: “Ema neʼebé hatudu laran-diʼak ba ema kiak fó-empresta ba Jeová, no Nia sei selu fali buat neʼebé ema neʼe halo.” (Provérbios [Amsal] 19:17; Mateus 6:3, 4) Loos duni, bainhira ita fó ajuda ho laran ba ita-nia irmaun-irmán sira, ba Jeová neʼe hanesan ita fó-empresta ba nia, no nia promete katak nia sei selu fali ita-nia laran-diʼak neʼe.

15. Ita hein namanas atu simu kolen saida? (Haree dezeñu iha pájina 24.)

¹⁵ Ema kose-mina sira sei simu “koroa hahalok loos nian” nuʼudar kolen husi Jesus.  (2 Timóteo 4:7, 8) Maibé ema neʼebé iha esperansa atu moris ba nafatin iha rai mós iha folin-boot ba Maromak. “Bibi seluk” sira-neʼe hein namanas atu simu sira-nia kolen moris rohan-laek nian iha paraízu iha rai. Iha neʼebá “sira sei hetan ksolok boot tanba iha dame barak”.—João 10:16; Salmo (Mazmur) 37:11.

16. Kmaan saida mak ita hetan husi 1 João 3:19, 20?

¹⁶ Dala ruma ita sente buat neʼebé ita halo atu serbí Jeová mak kiʼik tebes, ka ita hanoin karik Jeová la simu buat neʼebé ita halo ba nia. Karik ita mós sente katak ita la merese atu simu kolen husi Jeová. Maibé ita tenke hanoin-hetan katak “Maromak mak boot liu fali ita-nia laran no hatene buat hotu”. (Lee 1 João 3:19, 20.) Se ita mak serbí Jeová tanba ita fiar ba nia no hadomi nia, ita bele fiar katak nia sei fó kolen ba ita, maski ita sente buat neʼebé ita halo mak kiʼik tebes.—Marcos 12:41-44.

17. Kolen neʼebé ita iha daudauk ohin loron mak saida deʼit?

¹⁷ Jeová fó daudauk bensaun ba ninia povu iha Satanás nia mundu aat neʼe. Nia fó koñesimentu no dame neʼebé boot mai ita nuʼudar ninia povu. (Isaías [Yesaya] 54:13) Jesus promete katak Jeová sei fó kolen ba ita ohin loron atu hetan família boot ida neʼebé iha domin, neʼe mak ita-nia irmaun no irmán sira iha mundu tomak. (Marcos 10:29, 30) No mós sira neʼebé buka Maromak ho laran tomak sei hetan kolen atu iha dame iha laran, kontente, no ksolok.—Filipe 4:4-7.

18, 19. Jeová nia atan sira sente oinsá kona-ba kolen neʼebé sira simu?

¹⁸ Jeová nia atan iha mundu tomak simu duni kolen neʼebé furak. Porezemplu, Bianca husi rai-Alemaña hatete: “Haʼu fó-agradese beibeik ba Jeová tanba nia ajuda ona haʼu hodi la laran-taridu no nia sempre iha haʼu-nia sorin. Mundu neʼe runguranga no nakukun. Maibé bainhira haʼu halo tuir Jeová, haʼu sente seguru iha ninia liman. No bainhira haʼu halo sakrifísiu ba nia, nia selu fali haʼu ho bensaun dala atus ida.”

¹⁹ Irmán ida naran Paula husi rai-Kanadá ho idade 70, nia iha moras espina bifida. Ninia ruin boot kotuk halo susar ba nia atu halaʼo atividade ruma. Maski ninia kondisaun halo susar ba nia atu book an, maibé neʼe la hanetik nia atu haklaken. Nia dehan: “Haʼu uza dalan seluk atu haklaken, hanesan liuhusi telefone no haklaken iha dalan neʼebé la formál. Atu fó kmaan ba haʼu-nia an rasik, haʼu hakerek eskritura no pontu diʼak sira husi ita-nia livru iha kadernu ida hodi haʼu bele uza fali iha tempu neʼebé haʼu presiza . . . Laran-tun mak buat neʼebé temporáriu deʼit se ita hanoin beibeik kona-ba Jeová nia promesa sira. Maski ita hasoru situasaun oioin iha moris, Jeová sempre prontu atu fó ajuda ba ita.” Karik ita-nia situasaun la hanesan ho Bianca ka Paula nian. Maibé karik ita sei hanoin-hetan dalan oioin neʼebé Jeová fó ona kolen ba ita no ba ema seluk. Sin, hodi hanoin kona-ba oinsá mak Jeová fó daudauk kolen mai ita no kolen seluk tan neʼebé nia sei fó iha futuru, neʼe sei halo ita sente kmaan fali!

20. Ita bele hein ba saida se ita kontinua serbí Jeová ho laran tomak?

²⁰ Keta haluha katak orasaun neʼebé ita halo ho laran “sei lori bensaun barak”. Ita bele fiar katak bainhira ita “halo tiha Maromak nia hakarak, [ita sei] simu buat neʼebé nia promesa ona”. (Ebreu 10:35, 36) Tan neʼe, mai ita kontinua hametin ita-nia fiar no halo buat hotu ho laran tomak ba Jeová. Ita bele fiar metin katak Jeová sei fó kolen ba ita!—Lee Koloso 3:23, 24.