Ita lee didiʼak informasaun sira husi ita-nia Livru Haklaken foin daudauk neʼe ka lae? Koko atu hatán ba pergunta sira tuirmai neʼe:

Tanbasá mak inan-aman neʼebé muda ba rai seluk tenke hanoin kona-ba língua hodi bele ajuda oan laʼo ba oin iha lia-loos?

Oan sira baibain aprende língua neʼebé ema uza iha rai ida-idak liuhusi eskola ka husi ema seluk. Diʼak ba oan atu hatene koʼalia língua seluk. Inan-aman tenke hanoin kona-ba iha neʼebé mak joven sira bele komprende no laʼo ba oin iha lia-loos. Inan-aman tenke hanoin liu kona-ba oan nia presiza duké hanoin kona-ba saida mak sira rasik hakarak.—w17.05, p. 9-11.

Bainhira Jesus husu ba Pedro: “Ó hadomi haʼu liu fali sira-neʼe ka lae?” liafuan “sira-neʼe” refere ba saida? (João 21:15)

Karik Jesus koʼalia kona-ba ikan sira iha sira-nia oin ka kona-ba kail ikan. Bainhira Jesus mate tiha, Pedro fila fali ba kail ikan. Ema kristaun tenkesér iha hanoin neʼebé loos kona-ba serbisu.—w17.05, p. 22-23.

Tanbasá mak Abraão haruka ninia feen hatete katak nia mak Abraão nia feton? (Gênesis [Kejadian] 12:10-13)

Tuir realidade Sara mak Abraão nia alin duni. Se Sara mak hatete katak Abraão ninia laʼen, karik ema sei oho Abraão no neʼe sei halo Abraão la bele iha bei-oan neʼebé Maromak promete atu fó ba nia.—wp17.3, p. 14-15.

Elias Hutter inventa dalan saida hodi ajuda ema neʼebé hakarak aprende língua ebraiku?

Nia hakarak ninia estudante oinsá atu bele hatene entre liafuan báziku husi língua ebraiku iha Bíblia, hamutuk ho prefiksu ka sufiksu sira. Atu ajuda sira, nia uza letra metan ba liafuan báziku, no letra baibain ba prefiksu no sufiksu. Tradusaun Mundu Foun husi Eskritura Sagrada ho Referénsia (iha lia-inglés) mós uza métodu hanesan neʼe atu esplika liafuan ebraiku nian iha nota-rodapé.—wp17.4, p. 11-12.

Saida deʼit mak bele ajuda ema kristaun foti desizaun kona-ba bele iha kilat ka lae atu proteje an husi ema seluk?

Hanoin kona-ba neʼe: Maromak haree moris nuʼudar sagradu. Jesus la haruka ninia dixípulu sira atu uza surik hodi proteje sira-nia an. (Lucas 22:36, 38) Ita tuku ita-nia surik hodi sai fali xarrua. Moris iha folin boot liu fali sasán. Ita hatudu respeitu ba ema seluk nia konxiénsia, no ita hakarak sai ezemplu diʼak ba ema seluk. (2 Korinto 4:2)—w17.07, p. 31-32.

Tanbasá mak istória husi livru Mateus no Lucas la hanesan kona-ba tempu neʼebé Jesus moris no bainhira nia sei kiʼik?

Mateus nia istória tau fokus liu ba José. Nia konta kona-ba José halo saida bainhira nia hatene katak Maria sai isin-rua, no bainhira nia simu mensajen husi Maromak atu halai ba Ejitu no ikusmai fila fali husi Ejitu. Lucas nia istória tau fokus liu ba Maria; porezemplu, Maria bá vizita ninia família Isabel no Maria halo saida bainhira hatene katak Jesus seidauk fila husi templu.—w17.08, p. 32.

Bíblia tahan hasoru buat saida deʼit?

Nuʼudar tempu liu daudauk, liafuan no fraze balu neʼebé uza iha Bíblia hetan mudansa. Mudansa polítiku mós troka língua neʼebé ema uza iha tempu ida-idak. Iha mós ema kontra atu tradús Bíblia ba língua baibain.—w17.09, p. 19-21.

Ita iha “anjo da guarda” ka lae?

La iha. Jesus hatete katak ninia dixípulu sira-nia anju hateke ba Maromak nia oin. (Mateus 18:10) Jesus nia liafuan neʼe hatudu deʼit katak anju sira interese ba ninia dixípulu sira, laʼós katak anju sira sei halo milagre hodi proteje sira ida-idak.—wp17.5, p. 5.

Domin hanesan saida mak importante liu hotu?

Domin importante liu hotu mak domin agape. Domin neʼe inklui hatudu sentimentu hanoin ema. No domin neʼe book ita atu haleno Bíblia nia prinsípiu sira atu halo buat diʼak ba ema seluk hodi la hanoin an deʼit.—w17.10, p. 7.