IHA loron 26 Marsu, tinan 1937, mane naʼin-rua Arthur Willis no Bill Newlands neʼebé kole loos lori sira-nia karreta foʼer tama neineik ba sidade Sídnei, Austrália. Durante tinan ida, sira laʼo maizumenus kilómetru 19.300 liuhusi Austrália nia fatin izoladu sira. Maibé mane naʼin-rua neʼe laʼós buka deʼit aventura. Sira mak pioneiru laran-manas no hakarak lori liafuan diʼak kona-ba Maromak nia Ukun ba fatin dook sira iha rai-Austrália.

Besik atu tama ba tinan 1930, Estudante Bíblia sira neʼebé uitoan deʼit iha rai-Austrália haklaken ona iha sidade sira iha Austrália nia parte ninin sira. * Maibé irmaun sira hatene katak Jesus nia dixípulu sira sei haklaken “toʼo rai nia rohan”, inklui mós Austrália nia fatin izoladu sira. (Apóstolu 1:8) Fatin neʼe luan tebetebes, maran, no ema hela dook malu. Se nuneʼe, oinsá mak sira bele kumpre knaar boot neʼe? Sira hakarak hakaʼas an no sira fiar katak Jeová sei fó bensaun ba sira.

Iha tinan 1929, kongregasaun sira iha Queensland no Austrália Oeste, halo uma-karreta sira atu uza ba viajen iha Austrália nia parte klaran. Tanba área neʼebé sira sei haklaken mak fatin fuik sira, pioneiru sira neʼebé lori karreta sira-neʼe tenkesér hatene oinsá atu hadiʼa karreta se karik karreta sai aat iha dalan. Pioneiru sira-neʼe konsege duni vizita fatin barak neʼebé ema seidauk bá atu haklaken.

Pioneiru sira neʼebé osan la toʼo atu hola karreta, uza deʼit bisikleta. Porezemplu, iha tinan 1932, Bennett Brickell neʼebé tinan 23, sai husi Rockhampton, Queensland, no laʼo ho bisikleta ba fulan lima iha parte norte husi Queensland. Nia lori manta, roupa, ai-han no livru barak no neʼe halo ninia bisikleta sai todan. Se bisikleta nia roda mihis ona, nia kontinua deʼit, no fiar katak  Jeová sei ajuda nia. Hela tan kilómetru 320, nia dudu deʼit ninia bisikleta liuhusi área sira neʼebé uluk ema mate hamrook. Durante tinan 30, irmaun Brickell uza bisikleta, motór, no karreta hodi laʼo kilómetru rihun ba rihun. Nia mak loke dalan atu haklaken ba ema aboríjene no ajuda harii kongregasaun foun sira. Ema barak iha fatin sira-neʼe koñese nia no respeitu nia.

Fatin barak iha rai-Austrália, ema hela dook malu, no dala ruma ema uitoan deʼit mak iha. Maibé Jeová nia povu halo buat barak atu buka ema iha fatin izoladu sira-neʼe.

Ezemplu ida mak pioneiru sira Stuart Keltie no William Torrington. Iha tinan 1933, sira laʼo liu rai-maran naran Simpson Desert, atu bele haklaken iha Alice Springs, Austrália nia parte klaran liu. Bainhira sira-nia karreta sai aat, irmaun Keltie, neʼebé uza ain falsu, husik tiha karreta no kontinua laʼo hodi saʼe kuda-kamelu. Iha fatin neʼebé komboiu sira para, naran William Creek, sira hasoru otél nia naʼin naran Charles Bernhardt. Pioneiru sira-nia hakaʼas an lori rezultadu diʼak tanba ikusmai Charles simu lia-loos, faʼan ninia otél, no pioneiru mesak ba tinan 15 iha Austrália nia rai-maran no fatin fuik sira.

Atu hasoru susar oioin, pioneiru sira-neʼe presiza duni aten-brani. Porezemplu, Arthur Willis no Bill Newlands, neʼebé temi ona iha leten, tenkesér uza semana rua atu laʼo ba kilómetru 32 deʼit tanba udan boot halo tahu barak. Dala ruma sira dudu sira-nia karreta iha rai-manas hodi liu husi mota maran sira no rai-henek sira neʼebé hanesan foho. Dala barak, sira-nia karreta sai aat, no sira tenke laʼo ain deʼit ka saʼe bisikleta ba loron balu atu buka sidade ida. Depois, sira hela iha fatin neʼebá toʼo semana balu no hein karreta nia sasán atu mai hodi bele hadiʼa fali. Maski sira hasoru susar barak, maibé sira kontente nafatin. Arthur Willis temi fali liafuan husi livru The Golden Age hodi dehan: “La iha dalan neʼebé tatidik ka dook demais ba Jeová nia testemuña sira.”

Pioneiru ida naran Charles Harris dehan katak susar sira neʼebé nia hasoru bainhira haklaken iha Austrália nia fatin izoladu sira halo nia sai besik liután ba Maromak Jeová. Nia hatete: “Diʼak liu atu moris ho sasán uitoan deʼit. Se Jesus deʼit prontu atu toba iha fitun sira-nia okos, oinsá liután ho ita, ita mós tenke prontu atu halo hanesan.” Sin, pioneiru barak halo hanesan neʼe duni. Tanba sira-nia serbisu ho badinas no hakaʼas an, sira bele haklaken liafuan diʼak ba fatin oioin iha Austrália, no ajuda ema barak tebes atu tama lia-loos hodi apoia Maromak nia Ukun.