1, 2. Bainhira Jesus saʼe tiha ba lalehan, karik apóstolu sira iha hanoin saida?

JESUS nia apóstolu sira hamriik hela iha Foho Oliveira. Sira foin haree sira-nia naʼi no belun Jesus hiʼit an daudauk ba lalehan no kalohan taka nia. (Apóstolu 1:9, 10) Ba tinan rua ona Jesus hanorin, fó laran-manas, no dirije sira. Maibé agora nia la iha ona. Sira sei halo saida?

² Antes atu saʼe ba lalehan, Jesus hatete ba ninia dixípulu sira: “Imi sei sai haʼu-nia sasin iha Jeruzalein, iha Judeia tomak no iha Samaria, no toʼo rai nia rohan.” (Apóstolu 1:8) Oinsá mak sira bele halo serbisu boot neʼe? Jesus promete ba sira katak Maromak nia espíritu santu sei ajuda sira. (Apóstolu 1:5) Maibé sé mak sei dirije no organiza serbisu neʼe iha mundu tomak? Apóstolu sira hatene katak uluk, Jeová uza ema mak dirije povu Izraél sira. Tan neʼe karik sira hanoin, ‘Jeová sei hili ulun-naʼin foun ida ka lae?’

3. (a) Bainhira Jesus saʼe tiha ba lalehan, ninia apóstolu sira foti desizaun importante saida? (b) Pergunta saida deʼit mak ita sei koʼalia iha lisaun neʼe?

 ³ Jesus saʼe tiha ba lalehan no latoʼo semana rua ninia dixípulu sira buka matadalan husi eskritura, halo orasaun husu Maromak nia ajuda, no hili Matias hodi troka fali Judas Iscariotes nia fatin nuʼudar apóstolu 12. (Apóstolu 1:15-26) Tanbasá importante ba sira no ba Jeová atu hili fali apóstolu foun ida? Tanba dixípulu sira hatene katak apóstolu tenkesér iha ema naʼin-12. * (Haree nota iha kraik.) Jesus mak hili apóstolu sira no fó treinu ba sira atu halaʼo knaar importante ba Maromak nia povu. Knaar neʼe mak saida no oinsá mak Jeová no Jesus prepara nanis sira atu halaʼo knaar neʼe? Ohin loron, arranju saida mak hanesan ho tempu uluk? Oinsá mak ita bele ‘hanoin-hetan sira neʼebé dirije ita’, liuliu “atan laran-metin no matenek”?—Ebreu 13:7; Mateus 24:45.

4. Apóstolu no katuas kongregasaun sira iha Jeruzalein kaer knaar saida iha tempu uluk?

⁴ Apóstolu sira hahú dirije kongregasaun kristaun iha Pentekostes, tinan 33. Bíblia hatete katak “Pedro hamriik hamutuk ho sira naʼin sanulu-resin-ida” no hanorin kona-ba salvasaun ba ema-lubun boot. (Apóstolu 2:14, 15) Husi ema-lubun neʼe, balu sai ema kristaun. Tuirmai ema kristaun sira-neʼe “ho laran-manas kontinua aprende husi apóstolu sira”. (Apóstolu 2:42) Apóstolu sira mós iha responsabilidade atu tau matan ba osan iha kongregasaun laran. (Apóstolu 4:34, 35) Sira hanorin Maromak nia povu no halo orasaun kona-ba sira hodi dehan: “Ami sei fó ami-nia forsa no tempu atu halo orasaun no atu halo serbisu ba Maromak nia liafuan.” (Apóstolu 6:4) No sira mós haruka ema kristaun neʼebé iha esperiénsia bá haklaken iha fatin neʼebé seidauk haklaken. (Apóstolu 8:14, 15) Ikusmai, katuas kongregasaun neʼebé hetan kose-mina serbisu hamutuk ho apóstolu sira hodi dirije kongregasaun. Sira sai nuʼudar grupu administradór no fó matadalan ba kongregasaun hotu.—Apóstolu 15:2.

5, 6. (a) Iha dalan saida mak espíritu santu fó kbiit ba grupu administradór? (Haree dezeñu iha pájina 23.) (b) Oinsá mak anju sira fó ajuda ba grupu administradór? (c) Oinsá mak Maromak nia Liafuan fó matadalan ba grupu administradór?

⁵ Ema kristaun iha apóstolu sira-nia tempu hatene katak Jeová mak uza Jesus atu dirije grupu administradór. Tansá mak sira bele fiar ida-neʼe? Primeiru, tanba espíritu santu mak fó kbiit ba grupu administradór. (João 16:13) Ema kose-mina hotu hetan espíritu santu, maibé espíritu santu fó kbiit liuliu ba apóstolu no katuas kongregasaun sira iha Jeruzalein atu halaʼo sira-nia knaar hodi tau matan ba kongregasaun. Porezemplu, iha tinan 49, espíritu santu mak dirije grupu administradór atu foti desizaun kona-ba sirkunsizaun. Kongregasaun sira halo tuir duni desizaun neʼe. Rezultadu neʼebé sira hetan mak, sira “kontinua sai metin liután no loron ba loron fiar-naʼin sira aumenta ba beibeik”. (Apóstolu 16:4, 5) Liuhusi karta neʼebé grupu administradór haruka ba kongregasaun kona-ba sirkunsizaun, ita bele haree katak sira iha duni espíritu santu hodi hatudu hahalok domin no fiar.—Apóstolu 15:11, 25-29; Galásia 5:22, 23.

⁶ Segundu, grupu administradór hetan ajuda husi anju sira. Porezemplu, anju ida haruka Cornélio atu buka apóstolu Pedro. Bainhira Pedro haklaken tiha ba Cornélio ho  ninia família, espíritu santu tun ba sira hotu, maski mane sira iha ninia família seidauk hetan sirkunsizaun. Tan neʼe, Cornélio mak ema jentiu primeiru neʼebé seidauk hetan sirkunsizaun atu sai ema kristaun. Bainhira apóstolu no irmaun sira seluk rona kona-ba neʼe, sira hotu halo tuir Maromak nia hakarak no simu ema jentiu sira neʼebé seidauk hetan sirkunsizaun hodi sai parte ba kongregasaun kristaun. (Apóstolu 11:13-18) Husi neʼe ita haree katak anju sira laran-manas duni atu apoia serbisu haklaken neʼebé grupu administradór tau matan daudauk iha tempu neʼebá. (Apóstolu 5:19, 20) Terseiru, Maromak nia Liafuan mak fó matadalan ba grupu administradór. Irmaun sira-neʼe uza eskritura atu ajuda sira halo desizaun importante kona-ba ema kristaun nia fiar no atu dirije kongregasaun sira.—Apóstolu 1:20-22; 15:15-20.

7. Tansá mak ita bele dehan katak Jesus mak dirije kongregasaun kristaun iha apóstolu sira-nia tempu?

⁷ Maski grupu administradór mak dirije kongregasaun, maibé sira rekoñese katak Jesus Kristu mak sira-nia Ulun-Naʼin. Oinsá mak ita bele hatene kona-ba neʼe? Tanba Paulo hatete katak Jesus mak foti “ema balu nuʼudar apóstolu”. Nia mós dehan katak Kristu mak “ulun” ba kongregasaun. (Éfeso 4:11, 15) No duké bolu sira-nia an tuir apóstolu ida nia naran, “dixípulu sira simu naran kristaun . . . tuir Maromak nia hakarak”. (Apóstolu 11:26) Paulo hatene katak importante duni atu halo tuir hanorin husi Bíblia neʼebé fó sai liuhusi apóstolu sira no irmaun sira neʼebé tau matan ba kongregasaun. Maski nuneʼe, Paulo dehan: “Maibé, haʼu hakarak imi hatene katak mane ida-idak nia ulun mak Kristu.” Liafuan neʼe mós aplika ba membru ida-idak husi grupu administradór. Tuirmai Paulo hatutan tan: “Kristu nia ulun mak Maromak.” (1 Korinto 11:2, 3) Loos duni, Jeová mak foti ninia Oan, Kristu Jesus, atu dirije kongregasaun.

8, 9. Irmaun Russell kaer knaar importante saida?

⁸ Hahú husi tinan 1870, Charles Taze Russell ho ninia belun balu hakaʼas an atu halaʼo fali adorasaun loos. Sira mós hakarak hanorin lia-loos husi Bíblia ba ema neʼebé koʼalia língua oioin. Tan neʼe asosiasaun Zion’s Watch Tower Tract Society hetan rejistu iha tinan 1884, no irmaun Russell mak sai prezidente. * (Haree nota iha kraik.) Irmaun Russell estuda Bíblia ho badinas no nia mós aten-brani tebes hodi fó-hatene ba ema seluk katak igreja nia doutrina sira kona-ba Trindade no klamar, la mai husi Bíblia. Nia aprende husi Bíblia katak Kristu sei mai fali, maibé laʼós ho isin no raan, no “tempu nasaun sira-nian” sei ramata iha tinan 1914. (Lucas 21:24) Irmaun Russell uza ninia tempu, forsa, no osan hodi hanorin ema seluk kona-ba lia-loos sira-neʼe. Ita bele haree ho klaru katak Jeová no Jesus mak uza irmaun Russell iha tempu neʼebá.

⁹ Irmaun Russell la buka atu sai naran boot. Iha tinan 1896 nia hatete katak nia no irmaun sira neʼebé dirije Maromak nia povu lakohi ema seluk atu fó glória ba sira ka uza títulu espesiál atu bolu sira. No sira mós lakohi grupu sira atu hanaran tuir sira-nia naran. Ikusmai nia dehan: “Ida-neʼe laʼós ema nia serbisu.”

10. (a) Horibainhira mak Jesus foti “atan laran-metin no matenek”? (b) Tanbasá liutiha tempu uitoan mak ita-nia livru sira esplika katak Grupu Administradór la hanesan ho Watch Tower Society?

¹⁰ Tinan tolu liutiha husi tempu neʼebé irmaun Russell mate, Jesus foti “atan laran-metin no matenek” iha tinan 1919. Jesus nia objetivu mak saida? Atu fó ba ninia dixípulu  sira “ai-han iha tempu loloos”. (Mateus 24:45) Hahú husi tempu neʼebá, irmaun kose-mina grupu kiʼik neʼe komesa ona prepara no fahe ai-han espirituál husi sede jerál Brooklyn, Novaiorke. Liutiha tinan 1940 mak ita-nia livru sira foin hahú uza liafuan “grupu administradór”. Iha tempu neʼebá irmaun sira hanoin katak grupu administradór mak diretór sira ba asosiasaun Watch Tower Bible and Tract Society. Maibé iha tinan 1971 mak foin esplika fali katak Grupu Administradór la hanesan ho Watch Tower Society, tanba Watch Tower Society tau matan deʼit ba buat legál sira. Komesa husi tempu neʼebá, irmaun kose-mina sira seluk neʼebé la serbí nuʼudar diretór ba asosiasaun neʼe mós bele serbí iha Grupu Administradór. Ohin loron irmaun sira husi “bibi seluk” mós bele serbí nuʼudar diretór iha Watch Tower Society no asosiasaun seluk neʼebé Maromak nia povu uza. Neʼe lori rezultadu diʼak tanba Grupu Administradór bele fokus deʼit atu fahe ai-han espirituál no dirije Maromak nia povu. (João 10:16; Apóstolu 6:4) Livru Haklaken 15 Jullu 2013 esplika katak “atan laran-metin no matenek” mak irmaun kose-mina grupu kiʼik ida neʼebé bolu nuʼudar Grupu Administradór.

11. Oinsá mak Grupu Administradór halo desizaun?

¹¹ Kada semana, irmaun hotu husi Grupu Administradór halaʼo enkontru atu halo desizaun neʼebé importante nuʼudar grupu ida. Halibur hamutuk iha dalan hanesan neʼe bele ajuda sira koʼalia beibeik ba malu no hametin nafatin sira-nia unidade. (Provérbios [Amsal] 20:18) La iha irmaun ida husi Grupu Administradór mak boot liu fali irmaun seluk, tan neʼe kada tinan sira troka malu atu dirije enkontru. (1 Pedro 5:1) Komisaun neen neʼebé Grupu Administradór tau matan mós halo tuir dalan neʼe. Hodi nuneʼe mak la iha irmaun ida husi Grupu Administradór sente katak nia mak ulun-naʼin ba irmaun sira seluk. Sira hotu mós Naʼi nia atan. Sira ida-idak mós presiza ai-han espirituál no halo tuir atan laran-metin nia matadalan sira.

12. Ita sei koʼalia kona-ba pergunta saida deʼit?

¹² Maromak la leno Grupu Administradór no sira mós laʼós ema perfeitu, tan neʼe sira bele sala bainhira atu esplika kona-ba Bíblia ka dalan neʼebé sira dirije Jeová nia organizasaun. Porezemplu, husi Livru atu ajuda Testemuña ba Jeová buka informasaun, iha tópiku ida naran “Ita-nia hanorin neʼebé sai klaru liu”. Iha lista neʼe ita bele haree mudansa balu kona-ba dalan neʼebé ita esplika lia-loos husi Bíblia. Tuir loloos Jesus la hatete katak ninia atan laran-metin sei fó sai ai-han espirituál neʼebé perfeitu. Entaun, saida mak resposta ba Jesus nia pergunta: “Sé loos mak atan laran-metin no matenek?” (Mateus 24:45) Evidénsia saida mak hatudu katak Grupu Administradór mak atan laran-metin neʼe? Mai ita koʼalia kona-ba buat tolu neʼebé fó ajuda ba grupu administradór hanesan iha tempu uluk.

13. Iha dalan saida mak espíritu santu ajuda Grupu Administradór?

¹³ Espíritu santu mak ajuda Grupu Administradór. Espíritu santu mak ajuda Grupu Administradór atu komprende kona-ba lia-loos sira husi Bíblia neʼebé uluk seidauk sai klaru. Porezemplu, se ita haree fali ba lista kona-ba ita-nia hanorin neʼebé sai klaru liu, ita bele haree katak la iha ema ida mak ho ninia matenek rasik bele komprende no esplika kona-ba “buat kleʼan husi Maromak”! (Lee 1 Korinto 2:10.) Grupu Administradór mós sente hanesan apóstolu Paulo neʼebé dehan: “Ita mós koʼalia buat sira-neʼe, laʼós ho liafuan husi ema nia matenek, maibé  ho liafuan neʼebé ita aprende husi Maromak nia espíritu.” (1 Korinto 2:13) Uluk, hanorin falsu domina tinan atus ba atus no Maromak nia povu la bele hetan matadalan neʼebé loos. Maibé tanbasá mak komesa husi tinan 1919, koñesimentu kona-ba Bíblia aumenta liután? Razaun mak tanba Maromak fó ajuda liuhusi ninia espíritu santu.

14. Tuir Apokalipse 14:6, 7, oinsá mak anju sira fó ajuda ba Grupu Administradór ohin loron?

¹⁴ Anju sira fó ajuda ba Grupu Administradór. Ohin loron, Grupu Administradór iha responsabilidade neʼebé boot atu dirije haklaken-naʼin millaun ualu liu hodi haklaken iha mundu tomak. Oinsá mak sira bele halaʼo serbisu neʼe ho susesu? Razaun ida mak tanba hetan apoiu husi anju sira. (Lee Apokalipse 14:6, 7.) Iha esperiénsia barak neʼebé hatudu katak anju sira mak dirije haklaken-naʼin atu hetan ema neʼebé halo orasaun daudauk hodi husu ajuda husi Maromak! * (Haree nota iha kraik.) Maski ema kontra makaʼas serbisu haklaken, maibé serbisu neʼe laʼo ba oin nafatin. Neʼe mós hatudu katak ho anju nia ajuda mak bele kumpre serbisu neʼe.

15. Oinsá mak Grupu Administradór la hanesan ho ulun-naʼin kristaun seluk? Fó toʼok ezemplu.

¹⁵ Maromak nia Liafuan fó matadalan ba Grupu Administradór. (Lee João 17:17.) Haree toʼok saida mak akontese iha tinan 1973. The Watchtower (Livru Haklaken) 1 Juñu 1973 husu pergunta ida kona-ba “ema neʼebé sei iha toman atu fuma bele kumpre kritériu hodi hetan batizmu ka lae?” Livru The Watchtower uza prinsípiu  husi Bíblia mak hatán ba pergunta neʼe. Livru neʼe esplika katak ema neʼe la kumpre kritériu no uza eskritura sira hodi esplika tanbasá mak ema neʼebé lakohi husik ninia toman atu fuma tenkesér hasai husi kongregasaun. (1 Korinto 5:7; 2 Korinto 7:1) Livru neʼe esplika tan katak morál aas neʼe laʼós mai husi ema, maibé “mai husi Maromak. Nia mak fó sai ninia hanoin liuhusi ninia Liafuan”. La iha organizasaun relijiaun ida mak halo tuir Maromak nia Liafuan hotu hanesan Jeová nia organizasaun, maski neʼe susar ba ema balu atu halo tuir. Livru ida kona-ba relijiaun sira iha Estadus Unidus hatete: “Ulun-naʼin relijiaun kristaun sira sempre halo mudansa ba sira-nia hanorin atu tuir buat neʼebé sira-nia membru no ema iha komunidade fiar no hanoin.” Maibé Grupu Administradór nunka halo tuir deʼit ema nia hakarak. Sira sempre husik Maromak nia Liafuan atu fó matadalan ba sira, no neʼe hatudu katak Jeová mak ida neʼebé dirije ninia povu ohin loron.

16. Dalan ida atu hanoin-hetan Grupu Administradór mak saida?

¹⁶ Lee Ebreu 13:7. Eskritura neʼe dehan “hanoin-hetan sira neʼebé dirije imi”. Dalan ida ita bele halo nuneʼe mak temi Grupu Administradór iha ita-nia orasaun. (Éfeso 6:18) Sira iha responsabilidade barak, inklui mós fahe ai-han espirituál, dirije serbisu haklaken iha mundu tomak, no tau matan ba kontribuisaun neʼebé organizasaun simu. Tan neʼe sira presiza ita temi beibeik sira iha ita-nia orasaun!

17, 18. (a) Iha dalan saida mak ita bele halo tuir matadalan husi Grupu Administradór? (b) Tanbasá mak ita presiza haklaken ho badinas?

¹⁷ Ita mós bele hanoin-hetan Grupu Administradór liuhusi halo tuir matadalan neʼebé sira fó. Matadalan neʼe mai husi ita-nia livru sira, reuniaun, no reuniaun boot. Sira mós foti katuas área nian, no depois katuas área mak foti fali katuas iha kongregasaun ida-idak. Katuas área ho katuas kongregasaun sira halo tuir matadalan husi Grupu Administradór ho kuidadu tebes, liuhusi dalan neʼe mak sira hatudu katak sira mós hanoin-hetan Grupu Administradór. Ita hotu hakarak hatudu respeitu ba Jesus liuhusi halo tuir matadalan husi irmaun sira neʼebé Jesus uza atu tau matan ba Maromak nia povu.—Ebreu 13:17.

¹⁸ Dalan ida tan neʼebé ita bele hatudu katak ita hanoin-hetan Grupu Administradór mak liuhusi haklaken ho badinas. Ebreu 13:7 fó laran-manas ba ita atu banati-tuir fiar husi ema neʼebé dirije ita. Grupu Administradór hatudu duni katak sira iha fiar neʼebé boot liuhusi haklaken ho badinas Bíblia nia mensajen ba ema hotu. Ita apoia daudauk irmaun sira-neʼe atu halo serbisu importante neʼe ka lae? Se ita mak halo tuir, ita sei sente haksolok bainhira ita rona Jesus hatete ba ita: “Tanba imi halo ida-neʼe ba haʼu-nia alin kiʼik sira-neʼe ida, imi halo neʼe mai haʼu.”—Mateus 25:34-40.

19. Tanbasá mak Ita hakarak laʼo tuir ita-nia Ulun-Naʼin Jesus?

¹⁹ Bainhira Jesus fila fali ba lalehan, nia nunka husik hela ninia dixípulu sira. (Mateus 28:20) Nia hatene katak bainhira nia iha rai, espíritu santu, anju sira, no Maromak nia Liafuan mak ajuda nia. Tan neʼe Jesus mós fó ajuda neʼebé hanesan ba atan laran-metin ohin loron. Grupu Administradór sempre “laʼo tuir Bibi-Oan [Jesus] ba fatin naran deʼit neʼebé nia bá”. (Apokalipse 14:4) Tan neʼe mak bainhira ita halo tuir matadalan husi Grupu Administradór, ita mós laʼo tuir ita-nia Ulun-Naʼin Jesus. Lakleur tan Jesus sei lori ita ba moris neʼebé laiha rohan. (Apokalipse 7:14-17) No la iha ulun-naʼin ida husi ema mak bele halo promesa hanesan neʼe!