1, 2. Irmaun ida sente saida mak falta iha ninia moris, no nia halo saida kona-ba neʼe?

ROBERT hetan batizmu bainhira nia sei joven, maibé nia la halo lia-loos sai buat neʼebé importante iha ninia moris. Nia dehan: “Haʼu nunka halo buat neʼebé ladiʼak, maibé haʼu halaʼo haʼu-nia adorasaun hanesan toman deʼit. Haʼu haree hanesan metin tebes iha lia-loos, haʼu tuir reuniaun hotu, no dala ruma foti pioneiru estra. Maibé buat ruma falta iha haʼu-nia moris.”

² Toʼo Robert kaben tiha mak nia foin hatene saida mak falta iha ninia moris. Dala ruma nia ho ninia feen halimar husu pergunta ba malu kona-ba Bíblia. Ninia feen hatene eskritura barak no nia bele hatán pergunta sira fasil deʼit. Maibé pergunta barak mak Robert la hatene resposta sira no neʼe halo nia moe. Nia dehan: “Haʼu sente hanesan haʼu la hatene buat ida. Haʼu hanoin, ‘Se haʼu hakarak sai família nia ulun neʼebé diʼak ba haʼu-nia feen, haʼu tenkesér troka.’” Nia halo duni mudansa. Nia dehan: “Haʼu hahú estuda Bíblia makaʼas, no haʼu bele sente mudansa iha haʼu-nia moris. Haʼu komesa komprende Bíblia no importante liu mak komesa iha relasaun neʼebé metin ho Jeová.”

3. (a) Ita bele aprende saida husi Robert nia esperiénsia? (b) Ita sei koʼalia kona-ba pontu importante saida deʼit husi lisaun neʼe?

 ³ Ita bele aprende lisaun importante husi Robert nia esperiénsia. Karik ita iha koñesimentu balu kona-ba Bíblia no tuir beibeik reuniaun sira no bá haklaken, maibé neʼe la hatudu katak ita mak ema espirituál. Ka karik ita laʼo ba oin iha lia-loos, maibé bainhira ita analiza didiʼak kona-ba ita-nia an, ita rekoñese katak ita presiza halo mudansa balu tan atu sai ema neʼebé espirituál liután. (Filipe 3:16) Iha lisaun neʼe, ita sei koʼalia kona-ba pergunta importante tolu: (1) Oinsá mak ita bele analiza ita-nia kondisaun espirituál? (2) Oinsá mak ita bele sai ema maduru iha lia-loos? (3) Oinsá mak iha Kristu nia hanoin bele ajuda ita iha moris loron-loron nian?

4. Eskritura husi Éfeso 4:23, 24 fó konsellu ba sé?

⁴ Bainhira ita komesa serbí Jeová, ita halo mudansa oioin ba ita-nia moris. Hetan tiha batizmu, ita mós presiza halo beibeik mudansa sira. Tanba Bíblia rasik hatete: “Kontinua hafoun imi-nia dalan atu hanoin.” (Éfeso 4:23, 24) Tanba ita la perfeitu, ita presiza duni halo beibeik mudansa ba ita-nia an. Maski ita serbí Jeová ba tinan barak ona, ita presiza laʼo ba oin nafatin nuʼudar ema espirituál.​—Filipe 3:12, 13.

5. Ita bele husu pergunta saida deʼit atu analiza ita-nia an?

⁵ Ita hotu, maski joven ka idade, tenkesér analiza didiʼak kona-ba ita-nia an. Husu ba ita-nia an: ‘Haʼu rasik sente iha mudansa ka lae kona-ba laʼo ba oin nuʼudar ema espirituál? Haʼu-nia hahalok sira komesa hanesan Kristu nian ka lae? Haʼu-nia hahalok no jeitu iha reuniaun sira hatudu saida kona-ba haʼu? Tópiku sira neʼebé haʼu koʼalia ba ema hatudu saida kona-ba haʼu-nia hakarak sira? Haʼu-nia toman atu estuda, hatais no hadiʼa an, no dalan neʼebé haʼu simu konsellu hatudu saida kona-ba haʼu? Haʼu halo saida bainhira hetan tentasaun atu halo buat neʼebé sala? Haʼu sai maduru ona iha lia-loos ka lae?’ (Éfeso 4:13) Pergunta sira hanesan neʼe bele ajuda ita atu hatene ita laʼo ba oin nuʼudar ema espirituál ka lae.

6. Saida tan mak bele ajuda ita atu hatene ita-nia kondisaun espirituál?

⁶ Dala ruma ita presiza ema seluk nia ajuda hodi analiza ita-nia kondisaun espirituál. Apóstolu Paulo hatete katak ema neʼebé moris tuir hakarak isin nian la bele haree katak Maromak la kontente ho dalan neʼebé ema neʼe moris. Maibé ema neʼebé moris tuir espíritu santu hatene Maromak nia hanoin kona-ba buat hotu. Nia hatene katak Maromak la gosta ema atu moris tuir deʼit hakarak isin nian. (1 Korinto 2:14-16; 3:1-3) Katuas kongregasaun sira iha Kristu nia hanoin, no sira bele haree bainhira ema ruma komesa hatudu hahalok tuir isin nian, no sira koko atu fó ajuda ba ema neʼe. Tan neʼe, se katuas sira koko atu ajuda ita, ita simu sira-nia ajuda hodi halo mudansa ka lae? Se ita halo nuneʼe, ita hatudu katak ita hakarak duni atu sai ema neʼebé espirituál liután.​—Eclesiastes (Pengkhotbah) 7:5, 9.

7. Tanbasá iha deʼit koñesimentu husi Bíblia seidauk toʼo atu sai ema neʼebé espirituál?

⁷ Iha deʼit koñesimentu husi Bíblia seidauk toʼo atu sai ema neʼebé espirituál. Liurai Salomão hatene buat barak kona-ba Jeová, no ninia liafuan matenek sira sai ona parte ba Bíblia. Maibé ikusmai ninia relasaun diʼak ho Jeová sai fraku no nia la laran-metin tan ba Jeová. (1 Reis [Raja-Raja] 4:29, 30; 11:4-6) Entaun, ita presiza halo saida tan? Kontinua laʼo ba oin iha lia-loos. (Koloso 2:6, 7) Oinsá mak ita bele halo nuneʼe?

8, 9. (a) Saida mak bele ajuda ita atu hamriik metin iha lia-loos? (b) Bainhira ita estuda no medita, ita-nia objetivu mak saida? (Haree dezeñu iha pájina 23.)

 ⁸ Iha apóstolu Paulo nia tempu, nia fó laran-manas ba ema kristaun sira atu sai “ema boot”, ka maduru iha lia-loos. (Ebreu 6:1) Oinsá mak ita bele halo tuir Paulo nia konsellu neʼe ohin loron? Dalan importante ida mak hodi estuda livru “Hela Nafatin iha Maromak nia Domin”. Livru neʼe bele ajuda Ita atu hatene oinsá hodi uza Bíblia nia prinsípiu sira iha Ita-nia moris. Se Ita estuda ona livru neʼe, sei iha livru seluk tan neʼebé Ita bele uza hodi ajuda Ita hamriik metin iha lia-loos. (Koloso 1:23) Ita mós presiza medita kona-ba informasaun neʼebé ita lee no husu Jeová ajuda ita oinsá bele uza informasaun sira-neʼe.

⁹ Bainhira ita estuda no medita, ita-nia objetivu mak atu haburas hakarak hodi halo buat neʼebé Jeová simu no halo tuir ninia ukun-fuan sira. (Salmo [Mazmur] 40:8; 119:97) Ita mós presiza hakribi buat hotu neʼebé bele hanetik ita atu laʼo ba oin iha lia-loos.​—Tito 2:11, 12.

10. Joven sira bele halo saida atu sai ema neʼebé espirituál liután?

¹⁰ Se Ita mak ema neʼebé sei joven, Ita iha planu espirituál ka lae? Iha irmaun ida neʼebé serbí iha Betel no bainhira nia tuir reuniaun boot sira, nia iha toman atu husu ba joven sira neʼebé atu hetan batizmu kona-ba sira-nia planu espirituál. Husi joven sira-nia resposta, nia bele haree katak iha joven barak mak halo ona planu kona-ba oinsá atu serbí Jeová iha futuru. Balu hakarak serbí tempu-tomak ka muda ba fatin seluk neʼebé presiza haklaken-naʼin. Maibé, dala ruma joven balu la hatene oinsá atu hatán ba ninia pergunta. Karik tanba sira hanoin la importante atu halo planu espirituál sira. Se Ita mak joven ida, husu ba Ita-nia an: ‘Am Haʼu tuir reuniaun sira no bá haklaken tan deʼit inan-aman mak haruka ka lae? Am Ka haʼu rasik iha relasaun neʼebé metin ho Jeová?’ Ita hotu, maski joven ka idade, tenkesér iha planu espirituál sira. Planu sira-neʼe bele ajuda ita atu sai ema neʼebé espirituál liután.​—Eclesiastes (Pengkhotbah) 12:1, 13.

11. (a) Ita presiza halo saida hodi bele sai ema neʼebé maduru iha lia-loos? (b) Ita bele halo tuir sé nia ezemplu husi Bíblia?

¹¹ Bainhira ita hatene ona katak ita presiza halo mudansa ruma, halo kedas mudansa sira-neʼe. Neʼe importante tebes, tanba neʼe bele lori mate ka moris ba ita. (Roma 8:6-8) Jeová hakarak ita atu sai ema maduru iha lia-loos, laʼós atu sai perfeitu. No nia fó ninia espíritu santu hodi ajuda ita. Maski nuneʼe, ita rasik presiza hakaʼas an. Irmaun John Barr neʼebé uluk serbí iha Grupu Administradór, nia halo komentáriu kona-ba Lucas 13:24 no nia dehan: “Ema barak la bele tama husi odamatan kloot tanba sira ladún badinas atu sai ema neʼebé maduru iha lia-loos.” Ita presiza halo buat neʼebé Jacob halo. Nia luta ho anju no la rende an toʼo hetan bensaun husi anju neʼe. (Gênesis [Kejadian] 32:26-28) Maski estuda Bíblia mak buat neʼebé furak tebes, maibé ita la bele lee Bíblia hanesan lee halimar livru novela deʼit, ita presiza hakaʼas an atu buka pontu murak husi eskritura sira neʼebé bele ajuda ita-nia moris.

12, 13. (a) Saida mak bele ajuda ita atu uza matadalan husi Roma 15:5? (b) Oinsá mak apóstolu Pedro nia ezemplu no konsellu bele ajuda ita? (c) Ita bele halo saida hodi sai ema maduru iha lia-loos? (Haree kaixa “ Oinsá atu sai ema maduru iha lia-loos?”)

¹² Se ita hakaʼas an atu sai ema maduru iha lia-loos, espíritu santu sei ajuda ita atu halo mudansa ba ita-nia hanoin. Neineik-neineik ita mós sei hanoin iha dalan neʼebé Kristu hanoin. (Roma 15:5) Espíritu santu bele ajuda ita atu halakon hakarak neʼebé sala no haburas fali hahalok sira neʼebé Maromak  simu. (Galásia 5:16, 22, 23) Se ita mak sente katak ita-nia moris fokus liu ba rikusoin ka buka ksolok, keta rende an. Husu beibeik Jeová atu fó espíritu santu ajuda ita hodi tau fokus fali ba buat neʼebé loos. (Lucas 11:13) Hanoin kona-ba apóstolu Pedro. Dala ruma nia mós la hanoin tuir Kristu nia hanoin. (Mateus 16:22, 23; Lucas 22:34, 54-62; Galásia 2:11-14) Maski nuneʼe, nia nunka rende an, no Jeová ajuda duni nia. Neineik-neineik Pedro aprende oinsá atu hanoin tuir Kristu nia hanoin. Ita mós bele halo nuneʼe.

¹³ Ikusmai Pedro temi hahalok balu neʼebé bele ajuda ita ohin loron. (Lee 2 Pedro 1:5-8.) Ita presiza haburas hahalok kontrola an, tahan, domin ba irmaun-irmán sira, no hahalok furak seluk tan. Loron ida-idak bele husu ba Ita-nia an: ‘Ohin haʼu presiza hadiʼa hahalok saida hodi sai ema maduru liután iha lia-loos?’

14. Oinsá mak iha Kristu nia hanoin bele ajuda ita iha moris loron-loron nian?

¹⁴ Iha Kristu nia hanoin bele ajuda ita-nia hahalok iha serbisu fatin ka eskola, ita-nia koʼalia, no desizaun neʼebé ita halo loron-loron. Ita-nia desizaun sira bele hatudu sai ita hakaʼas an atu banati-tuir Kristu ka lae. Nuʼudar ema espirituál, ita lakohi husik buat ida atu estraga ita-nia relasaun diʼak ho Jeová. Se ita mak hetan tentasaun ruma atu halo buat neʼebé sala, iha Kristu nia hanoin bele ajuda ita atu hasees an husi tentasaun neʼe. Antes halo desizaun ruma, diʼak atu husu ba ita-nia an: ‘Bíblia nia prinsípiu saida deʼit mak bele ajuda haʼu? Se Kristu mak hasoru situasaun neʼe, nia sei halo saida? Desizaun hanesan saida mak Jeová gosta?’ Diʼak atu iha toman hodi hanoin iha dalan sira-neʼe. Agora mai ita koʼalia kona-ba situasaun balu, no iha situasaun ida-idak, haree toʼok Bíblia nia prinsípiu saida deʼit mak bele ajuda ita atu foti desizaun neʼebé matenek.

15, 16. Oinsá iha Kristu nia hanoin bele ajuda ita bainhira atu foti desizaun kona-ba (a) buka ema neʼebé ita atu kaben? (b) ransu?

¹⁵ Bainhira buka ema neʼebé ita atu kaben. Ita bele hetan Bíblia nia prinsípiu husi 2 Korinto 6:14, 15. (Lee.) Paulo esplika ho momoos katak ema neʼebé moris tuir espíritu santu iha hanoin neʼebé la hanesan ho ema neʼebé moris tuir hakarak isin nian. Oinsá mak prinsípiu sira-neʼe bele ajuda Ita bainhira atu buka ema neʼebé Ita hakarak kaben?

¹⁶ Ransu. Ita bele hetan Bíblia nia prinsípiu husi 1 Korinto 15:33. (Lee.) Ema neʼebé moris tuir espíritu santu la habelun ho ema neʼebé bele halo fraku ninia fiar. Oinsá mak ita bele uza prinsípiu neʼe iha situasaun seluk tan? Porezemplu, oinsá mak prinsípiu neʼe bele ajuda Ita kona-ba média sosiál? Ka ita sei halo saida se ema ruma neʼebé Ita la koñese konvida atu halimar games online?

17-19. Oinsá mak sai ema maduru iha lia-loos ajuda Ita atu (a) hasees an husi atividade folin-laek sira? (b) halo planu espirituál? (c) hadiʼa situasaun bainhira Ita la konkorda ho ema seluk?

¹⁷ Atividade sira neʼebé bele hanetik ita atu sai maduru iha lia-loos. Paulo fó  avizu diʼak ba ita neʼebé temi iha Ebreu 6:1. (Lee.) Saida mak “hahalok mate” neʼebé ita tenke sees? Neʼe mak atividade folin-laek oioin neʼebé la ajuda ita atu hametin ita-nia relasaun ho Jeová. Avizu neʼe bele ajuda ita atu hatán ba pergunta hanesan: ‘Atividade neʼe lori benefísiu ka folin-laek? Diʼak ba haʼu atu envolve iha kontratu neʼe ka lae? Tanbasá ladiʼak ba haʼu atu tuir grupu neʼebé koko atu lori mudansa ba mundu neʼe?’

¹⁸ Planu espirituál. Bainhira Jesus hatoʼo diskursu iha foho, nia fó konsellu neʼebé diʼak ba ita kona-ba halo planu. (Mateus 6:33) Ema neʼebé moris tuir espíritu santu tau uluk Maromak nia Ukun iha ninia moris. Prinsípiu neʼe bele ajuda ita atu hatán ba pergunta hanesan: ‘Haʼu presiza buka edukasaun boot iha universidade ka lae? Diʼak ka lae atu simu serbisu balu?’

¹⁹ La konkorda malu. Paulo fó konsellu diʼak ba ema kristaun sira iha Roma neʼebé mós bele ajuda ita kuandu problema ruma mosu entre ita ho ema seluk. (Roma 12:18) Ita hakarak banati-tuir Kristu, tan neʼe ita koko atu “moris iha dame ho ema hotu”. Ita halo saida se ita la konkorda buat ruma ho ema seluk? Ita sente susar atu rona ba ema seluk nia opiniaun ka lae? Ka ita mak ema neʼebé sempre koko atu buka dame?​—Tiago 3:18.

20. Tanbasá mak Ita hakarak atu laʼo ba oin nuʼudar ema espirituál?

²⁰ Ezemplu sira-neʼe ajuda ita oinsá atu uza Bíblia nia prinsípiu sira atu halo desizaun hodi hatudu katak ita mak ema neʼebé moris tuir espíritu santu. Se ita mak iha Kristu nia hanoin, ita-nia moris sei sai kontente liután. Robert neʼebé temi iha leten hatete: “Bainhira haʼu haburas ona relasaun neʼebé metin ho Jeová, neʼe troka haʼu hodi sai laʼen no aman neʼebé diʼak liután. Haʼu-nia moris sai kontente liu.” Se ita mak hakaʼas an hodi laʼo ba oin nuʼudar ema espirituál, ita mós sei simu bensaun oioin. Ita sei moris ho kontente liután ohin loron, no hetan “moris neʼebé loloos” iha futuru.​—1 Timóteo 6:19.