1, 2. Maromak nia povu hasoru susar saida ohin loron? (Haree foto iha leten.)

IHA doutór no enfermeiru barak serbisu iha fatin neʼebé sira presiza tau matan ba ema ho moras neʼebé bele hadaʼet. Sira tau matan ba pasiente sira-neʼe tanba sira hakarak ajuda pasiente sira. Maski nuneʼe, sira presiza proteje sira-nia an atu la kona fali moras husi pasiente sira. Testemuña ba Jeová mós iha situasaun neʼebé atu hanesan. Ita barak hela no serbisu hamutuk ho ema neʼebé iha hanoin no hahalok neʼebé Maromak la gosta. Dala ruma neʼe lori susar ba ita.

² Iha loron ikus sira-neʼe, ema neʼebé la hadomi Maromak lakohi halo tuir ninia matadalan kona-ba saida mak loos no sala. Bainhira apóstolu Paulo hakerek karta ba Timóteo, nia koʼalia kona-ba hahalok aat oioin. Paulo hatete katak, nuʼudar ita besik liután ba loron ikus nia rohan, hahalok aat sira-neʼe sei aumenta liután. (Lee 2 Timóteo 3:1-5, 13.) Maski ita la gosta hahalok sira-neʼe, maibé se la kuidadu, ema nia hahalok, dalan neʼebé sira hanoin no koʼalia bele kona fali ita. (Provérbios [Amsal] 13:20) Iha lisaun neʼe, ita sei haree oinsá mak hahalok sira-neʼe la hanesan duni ho Maromak nia povu nia hahalok. Ita mós sei haree oinsá bele proteje ita-nia an atu ema neʼebé ita hanorin kona-ba Jeová, sira-nia hahalok la kona fali ita.

3. Ema hanesan saida mak temi iha 2 Timóteo 3:2-5?

 ³ Paulo hatete katak iha loron ikus sira sei mosu “problema barak neʼebé susar atu tahan”. Tuirmai nia temi hahalok ladiʼak 19 neʼebé baibain ema hatudu ohin loron. Hahalok sira-neʼe atu hanesan ho hahalok neʼebé Paulo temi iha Roma 1:29-31. Maibé lista kona-ba hahalok neʼebé Paulo temi iha ninia karta ba Timóteo uza liafuan sira neʼebé ita la hetan iha fatin seluk husi Eskritura Lia-Gregu. Paulo hahú ninia liafuan hodi dehan: “Tanba ema sei . . . ” Maibé neʼe la dehan katak ema hotu hatudu hahalok hanesan buat neʼebé Paulo hatete. Ema kristaun iha hahalok neʼebé la hanesan.​—Lee Malaquias (Maleakhi) 3:18. *

4. Esplika toʼok, hahalok foti-an mak hanesan saida?

⁴ Bainhira Paulo temi tiha katak ema barak sei hadomi deʼit sira-nia an no hadomi osan, nia hatutan hodi dehan katak ema sei gaba an, loko an, no foti-an. Ema neʼebé iha hahalok sira-neʼe baibain hanoin katak sira diʼak liu ema seluk tanba iha oin diʼak, iha abilidade oioin, riku, ka pozisaun aas. Sira-nia hakarak mak atu ema gaba sira. Matenek-naʼin ida hatete katak ema hanesan neʼe, iha ninia laran nia sente hanesan maromak ida no nia adora ninia an. Ema balu hatete katak, foti-an mak hahalok aat tebes toʼo ema sira neʼebé foti an mós la gosta haree ema seluk hatudu hahalok neʼe.

5. Jeová nia atan neʼebé laran-metin mós bele monu ba hahalok foti-an ka lae? Fó toʼok ezemplu.

⁵ Jeová odi hahalok foti-an. No Bíblia hatete katak nia hakribi “matan neʼebé foti an”. (Provérbios [Amsal] 6:16, 17) Hahalok foti-an haketak ema husi Maromak. (Salmo [Mazmur] 10:4) Foti-an mak hahalok neʼebé mai husi Diabu. (1 Timóteo 3:6) Triste mak Jeová nia atan balu neʼebé fiar-metin ba nia mós monu ona ba hahalok foti-an. Porezemplu, Liurai Uzias husi Judá hatudu laran-metin ba tinan barak ona. Maibé Bíblia hatete katak: “Bainhira nia forte ona, nia sai foti an kedas no neʼe lori susar ba nia. Nia la hatudu laran-metin ba Jeová, ninia Maromak.” Nia tama ba Jeová nia templu no sunu insensu, knaar neʼebé nia la iha direitu atu halo. Ezemplu ida tan mak kona-ba Liurai Ezekias neʼebé laran-metin ba Jeová, ba tempu uitoan nia mós monu ba hahalok foti-an.​—2 Crônicas (Tawarikh) 26:16; 32:25, 26.

6. Tuir loloos David bele sai foti-an kona-ba saida? Maibé tanbasá mak nia haraik-an nafatin?

⁶ Ema balu sai foti-an tanba iha oin kapás, famozu, iha talentu kona-ba múzika, forsa, ka ema seluk gosta tebes sira. David iha buat sira-neʼe hotu, maibé nia hatudu haraik-an iha ninia moris tomak. Porezemplu, bainhira David oho tiha Golias, Liurai Saul hatete ba David katak nia bele kaben ho Saul nia oan-feto. Maibé David dehan: “Haʼu neʼe sé? Iha Izraél, haʼu-nia aman nia família mak sé? Oinsá mak haʼu bele sai liurai nia mane-foun?” (1 Samuel 18:18) Saida mak ajuda David hodi haraik-an nafatin? Nia hatene katak hahalok furak oioin, abilidade, no priviléjiu hotu neʼebé nia iha tanba Maromak neʼebé haraik-an mak fó ba nia. (Salmo [Mazmur] 113:5-8) David rekoñese katak buat diʼak naran deʼit neʼebé nia iha mai hotu husi Jeová.​—Kompara 1 Korinto 4:7.

7. Saida mak bele ajuda ita atu hatudu haraik-an?

⁷ Hanesan David, Jeová nia atan sira ohin loron mós koko atu hatudu haraik-an. Maski Jeová mak Maromak neʼebé Aas Liu Hotu, nia haraik-an no neʼe book tebes ita-nia laran. (Salmo [Mazmur] 18:35) Ita hakarak duni atu halo tuir liafuan tuirmai neʼe: “Tau  hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia.” (Koloso 3:12) Ita mós hatene katak domin “la gaba an, la foti-an”. (1 Korinto 13:4) Ita-nia haraik-an bele book ema seluk atu buka-hatene kona-ba Jeová. Se feen mak bele dada ninia laʼen neʼebé la adora Jeová liuhusi hahalok diʼak, Jeová nia atan mós bele dada ema ba Maromak liuhusi hahalok haraik-an.​—1 Pedro 3:1.

8. (a) Ohin loron, ema balu hanoin oinsá kona-ba la halo tuir inan-aman? (b) Bíblia hakarak oan atu halo saida?

⁸ Paulo esplika kona-ba hahalok neʼebé ema sei hatudu ba malu iha loron ikus sira. Nia hatete katak oan sei la halo tuir inan-aman. Ohin loron, livru, filme, no programa oioin husi televizaun halo ema sente katak oan la halo tuir inan-aman mak buat neʼebé baibain deʼit. Maibé realidade mak hahalok kontra halo fraku família, no neʼe bele fó impaktu aat ba komunidade. Ema hotu hatene kona-ba realidade neʼe husi tempu uluk kedas. Porezemplu, iha tempu Grésia antigu, se ema ida mak baku inan-aman, ema neʼe sei lakon ninia direitu nuʼudar sidadaun. No tuir ema Roma nia lei, baku aman mak sala neʼebé todan hanesan oho ema. Eskritura Lia-Ebraiku no Lia-Gregu fó mandamentu ba oan atu hatudu respeitu ba inan-aman.​—Êxodo (Keluaran) 20:12; Éfeso 6:1-3.

9. Saida mak bele ajuda oan atu halo tuir inan-aman?

⁹ Saida mak bele ajuda oan atu halo tuir inan-aman maski ema seluk la hatudu hahalok sira-neʼe? Se oan hanoin kona-ba buat hotu neʼebé inan-aman halo ona ba sira, neʼe sei book sira atu hatudu agradese no halo tuir inan-aman. Oan sira mós presiza hatene katak Maromak, ita hotu nia Aman, hakarak sira atu halo tuir sira-nia inan-aman. Se oan mak koʼalia diʼak kona-ba sira-nia inan-aman, neʼe bele ajuda sira-nia kolega atu hatudu respeitu liután ba sira rasik nia inan-aman. Maibé se inan-aman mak la iha domin ba oan, karik neʼe sei halo susar ba oan atu halo tuir sira. Se oan mak sente katak inan-aman hadomi tebes sira, neʼe sei ajuda sira atu halo tuir inan-aman maski iha tempu neʼebé susar. Austin hatete: “Maski haʼu sente beibeik atu la halo tuir haʼu-nia inan-aman, maibé haʼu-nia inan-aman sempre halo lei neʼebé la todan demais ba haʼu, sira esplika razaun ba lei sira-neʼe, sira nunka taka dalan atu ami bele koʼalia ba malu. Neʼe ajuda tebes haʼu atu halo tuir sira. Haʼu bele haree katak sira hanoin haʼu, no neʼe book haʼu atu halo sira kontente.”

10, 11. (a) Hahalok saida deʼit mak hatudu katak ema la iha domin ba malu? (b) Ema kristaun neʼebé loos hadomi sesé deʼit?

¹⁰ Paulo mós temi hahalok seluk neʼebé hatudu katak ema la iha domin ba malu. Bainhira nia temi tiha hahalok “la halo tuir inan-aman”, tuirmai nia temi hahalok la fó-agradese. Neʼe loos, tanba ema neʼebé la fó-agradese hatudu katak sira la hafolin buat diʼak neʼebé ema seluk halo ba sira. Paulo mós hatete katak ema sei la laran-metin ba malu. Sira ulun-toos, neʼe hatudu katak sira lakohi buka dame ho ema seluk. Sira sei koʼalia aat no sai traidór hodi koʼalia buat neʼebé hakanek ema no mós kontra Maromak. Sira sei konta ema nia vida, liuliu koʼalia lia-bosok neʼebé hafoʼer ema nia naran. *

¹¹ Jeová nia atan la hanesan ho ema barak husi mundu neʼe tanba sira hadomi malu husi laran. Sira sempre hatudu domin ba malu husi tempu uluk kedas. Jesus hatete katak hadomi malu mak mandamentu segundu  neʼebé importante liu hotu husi Moisés nia Ukun-Fuan. Mandamentu primeiru mak hadomi Maromak. (Mateus 22:38, 39) Jesus mós hatete katak ema sei hatene kristaun neʼebé loos liuhusi domin neʼebé sira hatudu ba malu. (Lee João 13:34, 35.) Ema kristaun mós hadomi sira-nia inimigu.​—Mateus 5:43, 44.

12. Oinsá mak Jesus hatudu domin ba ema?

¹² Jesus hatudu duni domin ba ema. Nia laʼo husi sidade ida ba sidade seluk hodi haklaken liafuan diʼak kona-ba Maromak nia Ukun. Nia kura ema neʼebé matan-delek, aleijadu, moras-lepra, no tilun-diuk. Nia fó moris-hiʼas ba ema. (Lucas 7:22) Maski ema barak odi nia, maibé nia fó ninia moris ba sira. Jesus haleno ninia Aman nia domin iha dalan neʼebé perfeitu. Testemuña ba Jeová halo tuir duni Jesus nia ezemplu hodi hatudu domin ba ema seluk iha mundu tomak.

13. Oinsá mak domin neʼebé ita hatudu ba ema seluk bele ajuda ema hakbesik ba Jeová?

¹³ Domin neʼebé ita hatudu ba ema seluk dada ema ba ita-nia Aman lalehan nian. Porezemplu, mane ida husi rai-Tailándia haree irmaun-irmán sira-nia domin ba malu iha reuniaun boot, neʼe book tebes nia. Bainhira nia fila fali ba uma, nia husu atu estuda Bíblia semana ida dala rua. Nia haklaken ba ninia família hotu, no liu tiha fulan neen, nia halaʼo knaar hodi lee Bíblia ba dala primeiru iha Reuniaun-Fatin. Atu hatene ita mós hatudu daudaun domin ka lae, diʼak atu husu ba ita-nia an: ‘Haʼu koko atu fó ajuda ba ema seluk iha haʼu-nia família, kongregasaun, no iha haklaken ka lae? Haʼu hakaʼas an atu haree ema seluk hanesan Jeová haree sira ka lae?’

14, 15. Ema barak hatudu hahalok saida? Oinsá mak ema balu konsege troka sira-nia hahalok?

¹⁴ Iha hahalok seluk tan neʼebé ema hatudu iha loron ikus sira-neʼe no ita presiza hasees an husi hahalok sira-neʼe. Porezemplu, ema barak la hadomi buat neʼebé diʼak. Sira odi buat neʼebé loos no sira kontra hahalok diʼak sira. Ema sira-neʼe la kontrola an, no siʼak. Balu tan lakohi simu konsellu. Sira sempre halo buat ida hodi la hanoin uluk no sira la hanoin kona-ba ema seluk.

 ¹⁵ Ema barak neʼebé uluk hatudu hahalok siʼak hanesan animál, ikusmai konsege troka. Tuir loloos mudansa diʼak hanesan neʼe fó sai nanis ona iha Bíblia. (Lee Isaías [Yesaya] 11:6, 7. *) Eskritura sira koʼalia kona-ba animál fuik hanesan asu-lobu no leaun sei moris hamutuk ho animál maus hanesan bibi-malae oan no karau-oan sira iha dame laran. Oinsá mak neʼe bele akontese? Bíblia dehan: “Mundu tomak sei hatene kona-ba Jeová.” (Isaías [Yesaya] 11:9) Tanba animál la bele aprende kona-ba Jeová, neʼe hatudu katak profesia neʼe kona-ba oinsá ema sei troka sira-nia hahalok neʼebé hanesan animál.

16. Oinsá mak Bíblia bele ajuda ema troka sira-nia hahalok?

¹⁶ Irmaun-irmán barak uluk siʼak hanesan asu-lobu, maibé agora sira iha dame. Ita bele lee kona-ba sira-nia esperiénsia husi série “Bíblia troka ema nia moris” neʼebé hetan husi jw.org. Sira neʼebé hatene ona no serbí daudaun Jeová la hanesan ho sira neʼebé iha ema nia oin hatudu hahalok katak sira adora Maromak, maibé la moris tuir sira-nia adorasaun. Ema hanesan neʼe finje adora Maromak, maibé sira-nia hahalok hatudu katak sira la adora nia. Tuir loloos Jeová nia atan balu uluk mós siʼak maibé agora sira ‘tau hahalok foun nuʼudar sira-nia hatais, katak hahalok foun neʼebé Maromak kria tuir ninia hakarak; no hahalok neʼe mak loos no laran-metin’. (Éfeso 4:23, 24) Bainhira ema aprende kona-ba Maromak, sira rekoñese katak sira presiza halo tuir ninia matadalan. Neʼe ajuda sira troka sira-nia fiar, hanoin, no dalan neʼebé sira halo buat ruma. Maski la fasil atu troka, maibé Maromak nia espíritu santu sei ajuda sira se sira hakarak duni atu halo kontente nia.

17. Oinsá mak ita bele hasees an husi ema neʼebé hatudu hahalok ladiʼak?

¹⁷ Ohin loron, ita bele haree ho klaru liután kona-ba ema neʼebé serbí Maromak no ema neʼebé la serbí nia. Ita tenkesér kuidadu atu hahalok husi ema neʼebé la serbí Maromak la kona ita. Ita hakarak halo tuir Jeová nia matadalan atu hasees an husi ema sira neʼebé hakerek iha 2 Timóteo 3:2-5. Ita hatene katak ita la bele hasees an husi ema hotu neʼebé hatudu hahalok sira-neʼe. Karik ita presiza serbisu hamutuk ho sira, eskola hamutuk ho sira, ka hela hamutuk ho sira. Maibé ita la presiza hanoin ka hatudu hahalok hanesan sira-nian. Saida mak bele ajuda ita? Ita bele hametin ita-nia relasaun diʼak ho Jeová liuhusi estuda Bíblia no hili ema neʼebé hadomi nia atu sai ita-nia belun.

18. Oinsá mak buat neʼebé ita koʼalia no halo bele ajuda ema seluk atu hatene kona-ba Jeová?

¹⁸ Ita mós hakarak ajuda ema seluk atu hatene kona-ba Jeová. Buka oportunidade hodi haklaken, no husu Jeová ajuda Ita atu koʼalia liafuan tuir tempu neʼebé loos. Ita presiza fó-hatene ba ema seluk katak Ita mak Testemuña ba Jeová, atu nuneʼe, Ita-nia hahalok diʼak lori glória ba Jeová, laʼós ba ita-nia an. Jeová hanorin ona ita atu “la simu hahalok neʼebé la tuir ninia hakarak, no atu la simu hakarak mundu nian, maibé atu moris ho hanoin neʼebé loos no hahalok loos no serbí Maromak ho laran-metin iha mundu ohin neʼe nian.” (Tito 2:11-14) Se ita mak halo tuir Jeová no halo buat neʼebé nia hakarak ita atu halo, ema seluk mós sei haree kona-ba neʼe. Karik ema balu sei hatete: “Ami hakarak bá hamutuk ho imi, tanba ami rona ona katak Maromak hamutuk ho imi.”​—Zacarias (Zakharia) 8:23.