“Nia fó kbiit ba ema neʼebé kole”
Eskritura ba tinan 2018 mak: “Ema neʼebé tau esperansa ba Jeová sei hetan fali kbiit.”—ISAÍAS (YESAYA) 40:31.
1. Problema saida deʼit mak ita hasoru ohin loron, no tanbasá mak Jeová sente kontente ho ninia atan sira? (Haree foto iha leten.)
LA FASIL atu moris iha mundu aat neʼe. Porezemplu, iha irmaun-irmán barak hasoru daudaun moras neʼebé todan. Balu idade boot ona maibé presiza tau matan fali ba família neʼebé idade liu sira. Balu tan hasoru susar kona-ba tau matan ba família nia presiza. No ita mós hatene katak, irmaun-irmán balu laʼós hasoru problema ida, maibé rua ka tolu dala ida deʼit. Problema sira-neʼe gasta sira-nia tempu, forsa, no osan. Maibé Ita bele fiar ho laran tomak katak Jeová sei ajuda Ita. Ita hatene Jeová promete ona katak sei iha mudansa iha futuru. Hatudu fiar hanesan neʼe halo Jeová kontente tebes!
2. Oinsá mak Isaías 40:29 fó kmaan ba ita, maibé ita bele halo desizaun sala saida?
2 Dala ruma Ita sente katak Ita la bele tahan ona ho problema sira ka lae? Se Ita sente duni nuneʼe, la bele sai laran-kraik, tanba Maromak nia atan balu iha tempu uluk mós sente hanesan neʼe. (1 Reis [Raja-Raja] 19:4; Jó [Ayub] 7:7) Saida mak ajuda sira tahan? Sira sadere ba Jeová nia forsa. Bíblia hatete katak Maromak “fó kbiit ba ema neʼebé kole”. (Isaías [Yesaya] 40:29) Maibé triste mak, Maromak nia atan balu ohin loron sente katak dalan neʼebé diʼak liu atu tahan ho problema sira mak para atu serbí Jeová ba tempu balu. Sira sente katak serbí Jeová lori todan ba sira duké lori bensaun. Tan neʼe, sira la lee ona Bíblia, la tuir ona reuniaun sira, no la haklaken ona. Tuir loloos, Satanás nia hakarak mak atu haree ita la halo tan buat sira-neʼe.
3. (a) Ita bele halo saida atu la husik Satanás halo fraku ita? (b) Ita sei koʼalia kona-ba saida iha lisaun neʼe?
3 Diabu lakohi haree ita iha kbiit. Nia hatene katak se ita mak preokupa ho atividade adorasaun nian, neʼe sei halo ita sai forte liután. Tan neʼe, se Ita mak sente kole, keta sees husi Jeová. Hakbesik nafatin ba nia. Bíblia hatete: “Nia sei halo imi hamriik metin, nia sei halo imi iha kbiit.” (1 Pedro 5:10; Tiago 4:8) Iha lisaun neʼe ita sei aprende husi Isaías 40:26-31 kona-ba oinsá mak Jeová nia kbiit bele fó forsa ba ita. Ita mós sei koʼalia kona-ba situasaun rua neʼebé bele halo ita la badinas tan atu serbí Jeová, no oinsá mak Bíblia nia prinsípiu sira bele ajuda ita atu tahan.
EMA NEʼEBÉ TAU ESPERANSA BA JEOVÁ SEI HETAN FALI KBIIT
4. Ita bele aprende saida husi Isaías (Yesaya) 40:26?
4 Lee Isaías (Yesaya) 40:26. * Seidauk iha ema mak hatene fitun iha hira. Sientista sira fiar katak, iha ita-nia galáksia deʼit, maizumenus iha fitun biliaun 400 liu. Maski nuneʼe, Jeová fó naran ba fitun ida-idak. Neʼe hanorin saida kona-ba Jeová? Se Jeová interese kona-ba buat maten hanesan fitun sira, hanoin toʼok nia sente oinsá kona-ba Ita? Ita serbí nia laʼós tanba obriga an, maibé tanba hadomi nia. (Salmo [Mazmur] 19:1, 3, 14) Ita-nia Aman domin nian hatene buat hotu kona-ba Ita. Bíblia dehan katak “fuuk-lahan iha imi-nia ulun mós nia sura hotu”. (Mateus 10:30) Jeová hakarak ita hatene katak, “ema neʼebé moris ho hahalok loos, Jeová hatene buat hotu neʼebé sira hasoru”. (Salmo [Mazmur] 37:18) Sin, Jeová hatene problema hotu neʼebé Ita hasoru daudaun, no nia bele fó forsa ba Ita atu tahan problema neʼe hotu.
5. Tanbasá mak ita bele fiar katak Jeová bele fó forsa ba ita?
5 Lee Isaías (Yesaya) 40:28. * Jeová mak enerjia hotu nia Hun. Haree toʼok ezemplu ida kona-ba enerjia neʼebé Jeová fó ba loro-matan. Sientista ida naran David Bodanis hatete katak, kada segundu enerjia neʼebé loro-matan fó sai, makaʼas tebes hanesan enerjia husi bomba nukleár biliaun ba biliaun. Peskizadór ida hatete katak, enerjia neʼebé loro-matan fó sai iha segundu ida deʼit bele sustenta ema iha mundu tomak nia moris ba tinan 200.000! Sin, Jeová, ida-neʼebé fó enerjia ba loro-matan, bele fó forsa ba ita atu tahan hasoru ita-nia problema hotu.
6. Iha dalan saida mak sai Jesus nia dixípulu laʼós buat neʼebé susar, no oinsá mak Ita rasik sente ona ida-neʼe?
6 Lee Isaías (Yesaya) 40:29. * Serbí Jeová lori ksolok ba ita. Jesus hatete: “Sai haʼu-nia dixípulu.” No nia hatutan hodi dehan: “Imi sei hetan kmaan. Basá sai haʼu-nia dixípulu laʼós buat neʼebé susar, no buat neʼebé haʼu husu imi atu lori la todan.” (Mateus 11:28-30) Neʼe loos duni! Dala ruma ita sente kole tebes bainhira atu bá reuniaun ka bá haklaken. Maibé halo tiha buat sira-neʼe, ita sente oinsá? Ita sente fresku no iha fali forsa atu hasoru ita-nia problema sira. Loos duni, sai Jesus nia dixípulu laʼós buat neʼebé susar!
7. Fó toʼok ezemplu ida neʼebé hatudu katak Mateus 11:28-30 mak loos.
7 Hanoin toʼok ezemplu kona-ba irmán ida. Nia iha moras depresaun, sempre kona ulun-moras makaʼas no iha mós moras ida neʼebé halo nia kole beibeik. Dala ruma susar tebes ba nia atu tuir reuniaun sira. Maibé loron ida, nia hakaʼas an tebes atu tuir reuniaun. Nia hatete: “Diskursu iha loron neʼe mak kona-ba laran-kraik. Haʼu tanis tanba informasaun iha diskursu neʼe hatudu katak Jeová komprende no hanoin tebes haʼu. Diskursu neʼe fó-hanoin fali haʼu katak haʼu presiza duni tuir reuniaun sira.” Irmán neʼe kontente tebes tanba nia hakaʼas an atu tuir reuniaun neʼe!
8, 9. Apóstolu Paulo nia liafuan, “Kuandu haʼu fraku, haʼu iha kbiit”, neʼe katak sá?
8 Lee Isaías (Yesaya) 40:30. * Diʼak atu rekoñese katak, maski ita iha matenek oioin, maibé ita iha limitadu atu bele halo buat hotu ho ita-nia forsa rasik. Apóstolu Paulo mós iha matenek atu halo buat barak, maibé ninia kbiit latoʼo atu kumpre buat hotu neʼebé nia hakarak atu halo. Bainhira nia fó sai ninia sentimentu ba Jeová, Jeová hatete ba nia: “Haʼu-nia kbiit sai kompletu iha ó-nia fraku.” Paulo komprende buat neʼebé Jeová hatete ba nia. Tan neʼe nia dehan: “Kuandu haʼu fraku, haʼu iha kbiit.” (2 Korinto 12:7-10) Paulo nia liafuan katak sá?
9 Paulo hatene duni katak nia iha limitadu kona-ba ninia kbiit rasik no nia presiza ajuda husi Maromak. Espíritu santu mak bele fó forsa ba nia iha tempu neʼebé nia sente fraku no atu kumpre knaar neʼebé nia la bele halo ho ninia kbiit rasik. Ohin loron mós hanesan. Se Jeová fó espíritu santu ba ita, ita sei sai forsa tebes!
10. Oinsá mak Jeová ajuda David hodi tahan hasoru ninia problema sira?
10 David rasik haree ona oinsá Maromak nia espíritu santu fó forsa ba nia. Nia dehan: “Ho Ita-nia ajuda haʼu bele ataka tropa lubun neʼebé mai kontra hasoru haʼu; ho Maromak nia kbiit haʼu bele saʼe moru aas ida.” (Salmo [Mazmur] 18:29) Dala ruma problema neʼebé ita hasoru boot no aas hanesan moru ida neʼebé susar ba ita atu rezolve rasik. Ita presiza ajuda husi Jeová.
11. Oinsá mak espíritu santu ajuda ita tahan hasoru ita-nia problema sira?
11 Lee Isaías (Yesaya) 40:31. * Manu-makikit laʼós uza sira rasik nia forsa deʼit mak atu semo. Sira aproveita anin manas neʼebé huu sai husi rai mak lori sira semo ba leten. Anin neʼe ajuda manu-makikit hodi bele semo ba fatin dook no la presiza uza forsa barak. Tan neʼe, se ita mak hasoru problema neʼebé boot, diʼak atu hanoin-hetan manu-makikit. Husu beibeik ba Jeová atu hiʼit saʼe ita liuhusi “espíritu santu”. (João 14:26) Ita bele husu Jeová atu fó ninia espíritu santu iha tempu naran deʼit. Karik ita presiza liu Jeová nia ajuda iha tempu neʼebé problema mosu entre ita ho ita-nia irmaun-irmán sira. Maibé tanbasá mak problema bele mosu?
12, 13. (a) Tanbasá mak dala ruma problema mosu entre ita? (b) José nia moris hanorin saida ba ita kona-ba Jeová?
12 Problema mosu tanba ita hotu la perfeitu. Dala ruma ema nia liafuan ka hahalok bele halo ita sente hirus, ka ema sai hirus tanba ita. Problema hanesan neʼe bele koko ita. Maibé neʼe fó oportunidade ba ita atu hatudu laran-metin ba Jeová. Oinsá? Neʼe bele ajuda ita atu serbisu hamutuk ho ita-nia irmaun-irmán sira. Maski sira la perfeitu, Jeová hadomi nafatin sira, no ita mós tenkesér hadomi sira.
Jeová la husik José mesak, no nia mós sei nunka husik Ita mesak (Haree parágrafu 13)
13 Liuhusi José nia moris ita bele haree katak Jeová la hasees ita husi koko sira. Bainhira José sei joven, ninia maun sira laran-moras ba nia. Sira faʼan nia hodi sai atan, no ema lori nia ba rai-Ejitu. (Gênesis [Kejadian] 37:28) Jeová haree buat hotu neʼebé akontese ba José no ita bele fiar katak Jeová sente laran-kanek tebes kona-ba ninia belun José nia terus no dalan neʼebé ema trata nia. Maski nuneʼe, Jeová la hapara buat neʼebé akontese ba José. Ikusmai, bainhira ema hatama José ba komarka tanba duun katak nia koko atu estraga Potifar nia feen, Jeová mós la salva José husi buat neʼebé akontese ba nia. Maibé Jeová husik ona nia ka lae? Lae. Bíblia dehan: “Jeová hamutuk ho José no Jeová halo José nia serbisu sai susesu.”—Gênesis (Kejadian) 39:21-23.
14. Tanbasá diʼak atu husik tiha hirus?
14 Ezemplu seluk mak David. Ladún iha ema barak neʼebé hetan ona koko hanesan David. Maski nuneʼe, Maromak nia belun neʼe nunka rai hirus iha ninia laran. Nia dehan: “Husik tiha hirus no soe tiha laran-nakali; keta sai laran-nakali no halo hahalok aat.” (Salmo [Mazmur] 37:8) Razaun importante liu hotu ba ita atu “husik tiha” hirus mak tanba ita hakarak halo tuir Jeová nia ezemplu. Jeová “la fó kastigu ba ita tuir ita-nia sala” maibé nia fó perdua ba ita. (Salmo [Mazmur] 103:10) Iha mós razaun balu tansá ita hakarak husik tiha hirus. Porezemplu, hirus bele halo tensaun sai aas no moras pulmaun. Hirus bele estraga aten no pánkreas, no hamosu problema ho estómagu. No mós bainhira ita sai hirus, dala barak ita la bele hanoin iha dalan neʼebé loos. Karik ita bele koʼalia ka halo buat ruma neʼebé hakanek ema, no neʼe bele halo ita sente laran-triste ba tempu naruk. Neʼe duni, diʼak atu sai kalma. Bíblia hatete: “Laran neʼebé kalma fó moris ba isin.” (Provérbios [Amsal] 14:30) Entaun, saida mak ita bele halo se ema ruma hakanek ita-nia sentimentu, no oinsá mak ita bele hadame fali ho ita-nia irmaun-irmán sira? Ita bele halo tuir Bíblia nia konsellu.
SE ITA-NIA IRMAUN KA IRMÁN HAKANEK ITA
15, 16. Ita bele halo saida se ema ruma hakanek ita?
15 Lee Éfeso 4:26. Ita la hakfodak bainhira ema neʼebé la serbí Jeová trata aat ita. Maibé se ita-nia irmaun, irmán ka família ida mak koʼalia ka halo buat ruma hakanek ita, karik neʼe bele halo ita sai hirus. Oinsá se ita la bele haluha buat neʼebé akontese ba ita? Diʼak ka lae atu rai hirus, karik toʼo tinan barak? Ita sei halo tuir Bíblia nia konsellu atu rezolve lalais problema neʼebé mosu ka lae? Se ita mak husik tempu liu ba beibeik hodi la koʼalia ba ema neʼe, ita sei sente susar liu atu hadame malu fali ho ema neʼe.
16 Maibé Ita bele halo saida hodi hadame malu fali? Primeiru, halo orasaun ba Jeová. Husu nia atu ajuda Ita bainhira hamutuk ho irmaun neʼe atu bele koʼalia ba malu iha dalan neʼebé diʼak. Hanoin-hetan katak Ita-nia irmaun neʼe mós Jeová nia belun. (Salmo [Mazmur] 25:14) Maromak hadomi nia. Jeová sempre trata ninia belun ho laran-diʼak, no nia mós hakarak ita atu halo buat neʼebé hanesan. (Provérbios [Amsal] 15:23; Mateus 7:12; Koloso 4:6) Segundu, hanoin didiʼak kona-ba saida mak Ita atu koʼalia ba Ita-nia irmaun neʼe. Keta hanoin katak nia mak hakarak hakanek Ita ho neon. Karik problema neʼe mosu tanba hanoin sala deʼit ka tanba Ita mak la komprende nia. Hatudu haraik-an hodi rekoñese katak Ita mós iha sala. Karik Ita bele hahú koʼalia hanesan neʼe: “Karik haʼu mak sente an lalais liu, maibé kuandu horiseik Ita koʼalia ba haʼu, haʼu sente . . . ” Se Ita koʼalia tiha ho irmaun neʼe maibé seidauk hetan dame, koko nafatin. Halo orasaun ba irmaun neʼe. Husu Jeová atu fó bensaun ba nia no ajuda Ita hodi tau fokus ba ninia hahalok diʼak sira. Ita bele tau fiar katak Jeová kontente tebes atu haree Ita hakaʼas an hodi hadame malu ho Ita-nia irmaun, neʼebé mós Jeová nia belun.
SE ITA HANOIN NAFATIN SALA ULUK NIAN
17. Oinsá mak Jeová ajuda ita atu hadiʼa ita-nia relasaun ho nia se ita monu ba sala, no tanbasá mak ita presiza simu ninia ajuda?
17 Ema balu sente la merese tan atu serbí Jeová tanba sira monu ba sala neʼebé sériu. Fó sala ba ita-nia an bele halakon ita-nia dame, ksolok, no forsa. Liurai David mós fó sala beibeik ba ninia an no nia dehan: “Bainhira haʼu nonook deʼit, haʼu-nia ruin sira sai fraku ona tanba haʼu neon-susar loron tomak. Tanba loron-kalan Ita-nia hirus mak hanesan naha todan iha haʼu-nia leten.” Maibé David halo tuir buat neʼebé Jeová hakarak nia atu halo. Nia dehan: “Ikusmai haʼu fó sai haʼu-nia sala ba Ita; no Ita fó perdua ona ba haʼu-nia sala sira.” (Salmo [Mazmur] 32:3-5) Se Ita mak monu ba sala neʼebé sériu, Jeová prontu atu fó perdua ba Ita. Nia hakarak ajuda Ita hadiʼa Ita-nia relasaun ho nia. Maibé Ita presiza simu ajuda neʼebé nia fó liuhusi katuas sira. (Provérbios [Amsal] 24:16; Tiago 5:13-15) Tan neʼe keta demora. Ita-nia futuru depende ba neʼe. Oinsá se Ita fó sala nafatin ba Ita-nia an maski Ita-nia sala hetan ona perdua, Ita bele halo saida?
18. Oinsá mak ezemplu kona-ba Paulo bele ajuda sira neʼebé sente katak sira la merese tan atu serbí Jeová?
18 Dala ruma apóstolu Paulo sente laran-kraik kona-ba sala neʼebé uluk nia halo. Nia dehan: “Basá haʼu kiʼik liu fali apóstolu sira seluk, no haʼu la merese atu bolu nuʼudar apóstolu ida, tanba haʼu fó-terus ba Maromak nia kongregasaun.” Maski nuneʼe Paulo hatete: “Maibé liuhusi Maromak nia laran-diʼak neʼebé boot mak haʼu simu knaar neʼe.” (1 Korinto 15:9, 10) Jeová hatene katak Paulo laʼós ema perfeitu. Maibé nia simu no hatudu nafatin laran-diʼak ba Paulo hodi fó knaar espesiál ba nia. Jeová hakarak Paulo hanoin-hetan kona-ba neʼe. Se Ita mak arrepende an duni kona-ba sala neʼebé uluk Ita halo, no fó sai ona Ita-nia sala ba Jeová, no se presiza, koʼalia ba katuas sira, Ita bele fiar katak Jeová sei hatudu laran-sadiʼa ba Ita. Fiar bá katak Jeová fó ona perdua ba Ita-nia sala, no simu ninia perdua neʼe!—Isaías (Yesaya) 55:6, 7.
19. Eskritura ba tinan 2018 mak saida, no tanbasá mak eskritura neʼe diʼak ba ita?
19 Nuʼudar ita besik ba mundu aat neʼe nia rohan, ita hatene katak ita sei hasoru problema barak liután. Maibé ita presiza hanoin-hetan katak Jeová, ida-neʼebé “fó kbiit ba ema neʼebé kole no fó forsa boot ba sira neʼebé fraku” bele fó buat neʼebé Ita presiza hodi serbí nia ho laran-metin. (Isaías [Yesaya] 40:29; Salmo [Mazmur] 55:22; 68:19) Iha tinan 2018 nia laran, iha tempu ida-idak neʼebé ita tuir reuniaun iha Reuniaun-Fatin, eskritura tinan nian sei fó-hanoin ita kona-ba lia-loos importante neʼe: “Ema neʼebé tau esperansa ba Jeová sei hetan fali kbiit.”—Isaías (Yesaya) 40:31.
^ par. 4 Isaías 40:26 Foti matan ba lalehan no haree. Sé mak kria buat sira-neʼe? Neʼe mak Ida neʼebé dirije ninia tropa sira tuir sira-nia númeru; Nia bolu sira ida-idak nia naran. Tanba ninia forsa boot no ninia kbiit neʼebé kmanek, sira ida mós la falta.
^ par. 5 Isaías 40:28 Ó la hatene ka? Ó la rona ka? Jeová mak Kriadór ba buat hotu iha rai, nia mak Maromak neʼebé iha ba nafatin. Nia nunka sai kole ka fraku. La iha ema ida mak bele hatene ninia matenek.
^ par. 6 Isaías 40:29 Nia fó kbiit ba ema neʼebé kole no fó forsa boot ba sira neʼebé fraku.
^ par. 8 Isaías 40:30 Labarik-mane sira sei sai kole no fraku, no mane joven sira sei sidi no monu.
^ par. 11 Isaías 40:31 Maibé ema neʼebé tau esperansa ba Jeová sei hetan fali kbiit. Sira sei semo aas hanesan manu-makikit. Sira sei halai no la sai fraku; Sira sei laʼo no la sai kole.”
