1, 2. Oinsá mak Jeová hatudu laran-diʼak ba ita?

JEOVÁ mak Maromak neʼebé laran-diʼak tebes. Buat hotu neʼebé ita iha mai husi nia. Buat hotu neʼebé iha folin-boot iha mundu neʼe Jeová nian, no nia uza buat sira-neʼe hodi sustenta kriasaun nia moris. (Salmo [Mazmur] 104:13-15; Ageu [Hagai] 2:8) Ita aprende husi Bíblia katak, dala ruma Jeová halo milagre hodi uza buat sira-neʼe atu tau matan ba ninia povu.

² Porezemplu, durante ema Izraél hela iha rai-fuik maran ba tinan 40, Jeová fó maná no bee hodi tau matan ba sira. (Êxodo [Keluaran] 16:35) Tan neʼe nasaun Izraél la falta buat ida. (Neemias 9:20, 21) Iha tempu seluk, Jeová fó kbiit ba Eliseu hodi halo feto-faluk ida nia mina nunka uza toʼo hotu. Liuhusi milagre neʼe, nia bele selu ninia debe no bele tau matan ba ninia an ho ninia oan-mane nia moris. (2 Reis [Raja-Raja] 4:1-7) Iha tempu uluk, Jeová mós fó kbiit ba Jesus hodi halo milagre kona-ba hahán no osan iha tempu neʼebé presiza.​—Mateus 15:35-38; 17:27.

3. Ita sei koʼalia kona-ba saida iha lisaun neʼe?

³ Jeová bele uza buat naran deʼit atu tau matan ba ninia kriasaun sira. Maski nuneʼe, Jeová konvida ninia atan atu fó buat  neʼebé sira iha hodi fó apoiu ba serbisu neʼebé halaʼo iha ninia organizasaun. (Êxodo [Keluaran] 36:3-7; lee Provérbios [Amsal] 3:9. *) Tanbasá mak Jeová hakarak ita atu uza ita-nia sasán neʼebé folin-boot hodi fó fali ba nia? Oinsá mak Jeová nia atan sira iha tempu uluk fó apoiu ba ninia serbisu? Oinsá mak ninia organizasaun uza osan neʼebé mai husi kontribuisaun ohin loron? Lisaun neʼe sei esplika kona-ba pergunta sira-neʼe.

4. Bainhira ita fó apoiu ba Jeová nia serbisu, ita hatudu saida ba nia?

⁴ Ita fó ba Jeová tanba ita hadomi no hakarak hatudu agradese ba nia. Ita-nia laran sente haksolok duni bainhira ita hanoin kona-ba buat hotu neʼebé Jeová halo ona ba ita. Liurai David mós sente hanesan neʼe bainhira nia esplika kona-ba sasán neʼebé sira presiza atu harii Jeová nia templu. Nia dehan katak buat hotu neʼebé ita iha mai husi Jeová no buat saida deʼit neʼebé ita fó ba Jeová, tuir loloos Jeová mak fó ba ita.​—Lee 1 Crônicas (Tawarikh) 29:11-14. *

5. Oinsá mak Bíblia ajuda ita atu haree katak fó ba Jeová husi laran mak parte importante ida husi adorasaun neʼebé loos?

⁵ Razaun seluk tan ita fó ba Jeová tanba neʼe mak dalan ida atu adora nia. Iha apóstolu João nia vizaun, nia rona Jeová nia kriatura espíritu sira iha lalehan hatete: “Jeová, ami-nia Maromak, Ita-Boot merese simu glória, hahiʼi no kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.” (Apokalipse 4:11) Jeová merese duni simu glória no hahiʼi, tan neʼe ita hakarak fó buat neʼebé diʼak liu hotu ba nia. Jeová fó mandamentu ba nasaun Izraél liuhusi Moisés atu halaʼo festa adorasaun tinan ida dala tolu. Ema Izraél sira sei lori buat balu ba festa sira-neʼe tanba neʼe mak parte ida ba sira-nia adorasaun. Sira la bele “hamriik iha Jeová nia oin ho liman-mamuk”. (Deuteronômio [Ulangan] 16:16) Ohin loron, fó ba Jeová husi laran mak parte importante ida husi ita-nia adorasaun. Liuhusi dalan neʼe ita hatudu katak ita hafolin no apoia serbisu neʼebé halaʼo iha Jeová nia organizasaun.

6. Tanbasá mak diʼak ba ita atu fó? (Haree foto iha pájina 17.)

⁶ Diʼak ba ita atu hatudu laran-luak hodi fó, laʼós atu simu deʼit. (Lee Provérbios [Amsal] 29:21. *) Hanoin toʼok oan neʼebé simu osan husi inan-aman atu rai no nia uza osan balu hodi hola fali prezente ba ninia inan-aman. Ninia inan-aman sente oinsá kona-ba ninia prezente neʼe? Ka hanoin toʼok pioneiru joven neʼebé hela ho inan-aman no nia fó osan balu ba sira atu ajuda selu aluga ka hola hahán. Maski ninia inan-aman la husu nia atu halo nuneʼe, maibé sira simu buat neʼebé oan neʼe fó. Tanbasá? Tanba neʼe mak dalan ida husi sira-nia oan atu hatudu agradese ba buat hotu neʼebé sira halo ba nia. Hanesan neʼe mós, Jeová hatene katak diʼak ba ita se ita fó buat neʼebé folin-boot ba nia.

7, 8. Oinsá mak Jeová nia povu hatudu ezemplu diʼak kona-ba fó kontribuisaun hodi (a) halo projetu espesiál? (b) fó apoiu ba Jeová nia serbisu?

⁷ Ita haree husi Bíblia katak Jeová nia  povu fó kontribuisaun hodi apoia ninia serbisu. Dala ruma sira fó kontribuisaun hodi ajuda projetu espesiál balu. Porezemplu, Moisés fó laran-manas ba ema Izraél atu fó kontribuisaun hodi harii tabernákulu. Liurai David mós halo buat neʼebé hanesan bainhira atu harii Jeová nia templu. (Êxodo [Keluaran] 35:5; 1 Crônicas [Tawarikh] 29:5-9) Iha tempu neʼebé Liurai Jeoás ukun, amlulik sira uza osan neʼebé povu fó hodi hadiʼa fali templu. (2 Reis [Raja-Raja] 12:4, 5) Iha apóstolu sira-nia tempu, irmaun-irmán sira rona katak rai-hamlaha akontese iha Judeia no irmaun-irmán sira iha fatin neʼe presiza ajuda. Tan neʼe irmaun-irmán “deside katak sira ida-idak sei fó ajuda tuir sira-nia kbiit, no haruka neʼe ba maun-alin sira neʼebé hela iha Judeia”.​—Apóstolu 11:27-30.

⁸ Jeová nia povu sempre kontribui hodi apoia ema neʼebé dirije Jeová nia serbisu. Porezemplu, tuir Moisés nia Ukun-Fuan, ema Levi sira la simu liman-rohan hanesan suku sira seluk. Tan neʼe ema Izraél sira fó porsentu sanulu husi buat neʼebé sira iha ba ema Levi sira. Kontribuisaun sira-neʼe ajuda ema Levi hodi bele tau fokus ba sira-nia serbisu iha tabernákulu. (Números [Bilangan] 18:21) Nuneʼe mós iha apóstolu sira-nia tempu, Jesus no ninia apóstolu sira simu ajuda husi feto sira neʼebé uza sira-nia rikusoin rasik atu fó apoia ba sira.​—Lucas 8:1-3.

9. Kontribuisaun iha tempu uluk mai husi neʼebé?

⁹ Kontribuisaun iha tempu uluk mai husi buat oioin. Bainhira atu harii tabernákulu, karik ema Izraél sira fó sasán folin-boot oioin neʼebé lori husi rai-Ejitu. (Êxodo [Keluaran] 3:21, 22; 35:22-24) Iha apóstolu sira-nia tempu, ema kristaun balu faʼan sasán neʼebé sira iha, hanesan toʼos ka uma, no lori osan neʼebé sira hetan ba apóstolu sira. Depois apóstolu sira uza fali osan sira-neʼe hodi fó ajuda ba irmaun-irmán sira neʼebé presiza ajuda. (Apóstolu 4:34, 35) Ema kristaun balu tau ketak osan hodi sira bele fó beibeik kontribuisaun atu apoia Jeová nia serbisu. (1 Korinto 16:2) Tan neʼe, ema hotu, maski kiak ka riku, bele fó buat ruma nuʼudar kontribuisaun.​—Lucas 21:1-4.

10, 11. (a) Oinsá mak ita bele halo tuir Jeová nia atan sira husi tempu uluk neʼebé hatudu laran-luak? (b) Ita sente oinsá kona-ba fó apoiu ba Jeová nia serbisu?

¹⁰ Ohin loron, dala ruma ita fó kontribuisaun atu apoia projetu espesiál ruma. Porezemplu, karik Ita-nia kongregasaun halo daudaun planu atu hadiʼa ka harii Reuniaun-Fatin foun. Ka karik presiza hafoun edifísiu husi Ita-nia sukursál. Ita mós bele fó ajuda ho ita-nia osan atu halaʼo reuniaun boot sira. Karik Ita-nia irmaun-irmán sira iha fatin seluk hetan dezastre naturais no presiza ajuda. Ita-nia kontribuisaun mós fó ajuda ba misionáriu, pioneiru tempu-tomak, katuas área, no sira neʼebé serbisu iha sede-jerál no sukursál. Karik Ita-nia kongregasaun mós fó beibeik kontribuisaun ba irmaun-irmán sira iha rai seluk atu ajuda harii fatin ba reuniaun boot no Reuniaun-Fatin sira.

¹¹ Ita hotu bele fó buat ruma hodi apoia serbisu neʼebé Jeová nia organizasaun halo daudaun iha loron ikus sira-neʼe. Kontribuisaun barak, ema seluk la hatene sé mak fó. Bainhira ita tau osan iha kaixa kontribuisaun iha Reuniaun-Fatin ka fó kontribuisaun online liuhusi jw.org, ita la fó-hatene ba ema seluk ita fó osan hira. Maibé oinsá se Ita sente katak kontribuisaun neʼebé Ita fó kiʼik tebes no la iha folin? Realidade mak, kontribuisaun barak neʼebé Jeová nia organizasaun simu, barak liu mak mai husi prezente neʼebé kiʼik, no kontribuisaun neʼebé boot ladún barak. Maski irmaun-irmán balu iha osan uitoan deʼit, sira halo tuir ema kristaun Masedónia iha apóstolu sira-nia tempu. Maski “sira-nia situasaun kiak” maibé sira husu ho  hakarak rasik atu fó, no sira fó ho laran-luak tebes.​—2 Korinto 8:1-4.

12. Oinsá mak ita-nia organizasaun hakaʼas an atu uza kontribuisaun sira ho kuidadu?

¹² Grupu Administradór hatudu laran-metin no matenek iha dalan neʼebé sira uza kontribuisaun. (Mateus 24:45) Sira halo orasaun hodi foti desizaun neʼebé matenek, no sira halo planu oinsá atu uza osan sira ho kuidadu. (Lucas 14:28) Iha tempu uluk, Maromak nia atan laran-metin sira neʼebé tau matan ba kontribuisaun, uza didiʼak osan sira ba Jeová nia adorasaun deʼit. Porezemplu, Esdras fila ba Jeruzalein ho kontribuisaun folin-boot oioin husi liurai Pérsia, hanesan osan-mean, osan-mutin, no rikusoin seluk neʼebé ohin loron maizumenus iha folin hamutuk millaun $100 liu. Esdras haree kontribuisaun sira-neʼe nuʼudar prezente ba Jeová. Tan neʼe, nia fó matadalan oinsá atu proteje didiʼak kontribuisaun sira-neʼe bainhira ema lori ba Jeruzalein liuhusi fatin sira neʼebé perigu. (Esdras [Ezra] 8:24-34) Iha apóstolu sira-nia tempu, apóstolu Paulo halibur osan hamutuk hodi fó ajuda ba irmaun-irmán sira iha Judeia. Nia husu ema sira neʼebé lori osan neʼe atu “tau matan didiʼak ba buat hotu ho laran-moos, laʼós deʼit iha Jeová nia oin, maibé mós iha ema nia oin”. (Lee 2 Korinto 8:18-21.) Ohin loron, ita-nia organizasaun halo tuir Esdras ho Paulo nia ezemplu hodi uza kontribuisaun sira ho kuidadu tebes.

13. Tanbasá mak foin daudauk neʼe organizasaun halo mudansa balu?

¹³ Se família ida hakarak kuidadu atu la gasta osan barak liu fali osan neʼebé sira manán, karik sira presiza halo mudansa kona-ba dalan neʼebé sira uza osan. Ka karik sira bele buka dalan oioin atu halaʼo moris neʼebé simples hodi sira bele halo serbisu barak liu ba Jeová. Hanesan neʼe mós kona-ba Jeová nia organizasaun. Foin daudauk neʼe ita haree iha projetu foun oioin, no dala ruma, osan neʼebé hasai barak liu fali kontribuisaun neʼebé simu. Tan neʼe, hanesan família neʼe, ita-nia organizasaun mós buka dalan oioin atu rai osan no halo simples serbisu sira, atu nuneʼe organizasaun bele uza didiʼak kontribuisaun sira neʼebé ita fó.

14-16. (a) Kontribuisaun neʼebé ita fó, uza ba saida deʼit? (b) Oinsá mak buat sira-neʼe fó ajuda fali ba Ita?

¹⁴ Ema barak neʼebé iha lia-loos ba tempu kleur ona hatete katak, ohin loron sira simu prezente barak tebes husi organizasaun liu fali tempu uluk. Agora ita iha jw.org no JW Broadcasting. Ita iha Bíblia Sagrada Tradusaun Mundu Foun iha língua barak liután. Iha 2014/2015, reuniaun boot internasionál ba loron tolu ho tema “Kontinua Buka Uluknanain Maromak Nia Ukun!” halaʼo iha estádiu boot oioin iha sidade 14 iha mundu tomak. Ema hotu neʼebé tuir sente kontente tebes!

 ¹⁵ Ema barak hatoʼo agradese ba prezente sira neʼebé mai husi Jeová nia organizasaun. Porezemplu, feen-laʼen ida neʼebé serbí iha rai-Ázia hatete: “Ami halaʼo ami-nia knaar iha sidade kiʼik ida. Tan neʼe dala ruma ami sente mesamesak, no fasil ba ami atu haluha katak Jeová nia serbisu boot tebes. Maibé bainhira ami haree programa oioin husi JW Broadcasting, ami hanoin-hetan fali katak ami mós parte husi família boot ida iha mundu tomak. Irmaun-irmán sira husi fatin neʼe mós haksolok tebes kona-ba JW Broadcasting. Dala barak sira haree tiha programa fulan-fulan nian, sira dehan katak sira sente besik ba irmaun ida-idak husi Grupu Administradór. Sira agora sente orgullu liu fali tempu uluk hodi sai parte ida ba Maromak nia organizasaun.”

¹⁶ Agora daudaun, ita harii ka hadiʼa hela Reuniaun-Fatin maizumenus hamutuk 2.500 iha mundu tomak. Irmaun-irmán sira iha kongregasaun ida husi rai-Onduras hatete katak, uluk sira-nia mehi mak atu iha Reuniaun-Fatin rasik, maibé mehi neʼe ohin loron sai ona realidade. Sira dehan: “Ami sente kontente tebes hodi bele sai parte ba Jeová nia família boot iha mundu tomak.” Ema barak fó sai sentimentu neʼebé hanesan bainhira sira simu Bíblia no livru seluk iha sira rasik nia língua, hetan ajuda husi irmaun-irmán sira iha tempu dezastre naturais, ka bainhira sira haree haklaken públiku lori rezultadu neʼebé diʼak tebes husi sira-nia haklaken-fatin.

17. Oinsá mak ita hatene katak Jeová mak fó apoiu daudaun ba ninia organizasaun ohin loron?

¹⁷ Ema barak neʼebé laʼós Testemuña ba Jeová la bele komprende oinsá mak ita bele halo buat sira-neʼe hotu ho kontribuisaun voluntáriu deʼit. Manajer husi kompañia boot ida neʼebé mai haree fatin neʼebé ita halo livru, nia hakfodak tebes hodi haree katak serbisu hotu ema voluntáriu deʼit mak halo, no uza deʼit kontribuisaun voluntáriu nian. Ita nunka halo arranju espesiál atu husu ezmola. Nia dehan nia la bele komprende oinsá mak ita bele halo buat sira-neʼe. Maibé ita hatene katak, tanba Jeová nia ajuda mak ita bele halaʼo serbisu sira-neʼe.​—Jó (Ayub) 42:2.

18. (a) Fó apoiu ba Maromak nia Ukun sei lori bensaun saida deʼit ba ita? (b) Oinsá mak ita bele hanorin ita-nia oan no ema foun atu halo buat neʼebé hanesan?

¹⁸ Jeová fó dignidade no oportunidade ba ita hodi apoia ninia serbisu neʼebé boot tebes. Nia fó garantia atu fó bensaun ba ita hodi apoia ninia serbisu. (Malaquias [Maleakhi] 3:10) Jeová halo promete ba ita katak, se ita mak fó ho laran-luak, ita-nia moris mós sei sai kontente. (Lee Provérbios [Amsal] 11:24, 25. *) Jeová mós dehan katak ita sei hetan ksolok bainhira ita fó, tanba “kontente liu atu fó duké simu”. (Apóstolu 20:35) Liuhusi buat neʼebé ita koʼalia no halo, ita bele hanorin ita-nia oan no ema foun sira katak, sira mós bele fó kontribuisaun ba serbisu neʼe no simu bensaun oioin.

19. Oinsá mak lisaun neʼe fó laran-manas ba Ita?

¹⁹ Buat hotu neʼebé ita iha mai husi Jeová. Bainhira ita fó fali ba nia, ita hatudu katak ita hadomi nia no hafolin buat hotu neʼebé nia halo ba ita. (1 Crônicas [Tawarikh] 29:17) Bainhira ema Izraél sira fó kontribuisaun hodi harii Jeová nia templu, sira “haksolok atu fó sakrifísiu husi laran, tanba sira fó sakrifísiu sira-neʼe ho laran tomak ba Jeová”. (1 Crônicas [Tawarikh] 29:9) Mai ita mós kontinua hetan ksolok hodi fó fali ba Jeová husi buat sira neʼebé nia fó ba ita.