IHA loron-kuarta dadeer, 24 Janeiru 2018, família Betel iha Estadus Unidus no Kanadá rona avizu espesiál ida: Irmaun Kenneth Cook, Jr., komesa serbí nuʼudar membru ida husi Grupu Administradór husi Testemuña ba Jeová.

Irmaun Cook moris no boot iha Pensilvánia, Estadus Unidus. Nia aprende lia-loos husi ninia kolega eskola ida bainhira nia besik atu remata eskola sekundária no nia hetan batizmu iha 7 Juñu 1980. Nia komesa serbí nuʼudar pioneiru regulár iha 1 Setembru 1982. Nia pioneiru durante tinan rua, tuirmai iha 12 Outubru 1984 nia simu konvite atu serbí iha Betel iha Wallkill, Novaiorke.

Durante tinan 25, irmaun Cook halaʼo knaar oioin hanesan serbisu iha departamentu print no iha departamentu neʼebé tau matan família Betel. Nia kaben ho Jamie iha tinan 1996, no sira naʼin-rua komesa serbí hamutuk iha Betel iha Wallkill. Iha fulan-Dezembru 2009, irmaun no irmán Cook hetan knaar foun hodi muda ba Watchtower Educational Center iha Patterson, Novaiorke. Iha neʼebá, irmaun Cook serbisu iha departamentu neʼebé hatán ba karta sira neʼebé Betel simu. Tuirmai, sira fila fali ba Betel iha Wallkill ba tempu balu, depois iha fulan-Abríl 2016, sira muda fali ba Betel iha Brooklyn, Novaiorke. No fulan lima tuirmai, sira muda ba sede-jerál iha Warwick, Novaiorke. Iha fulan-Janeiru 2017, irmaun Cook hetan knaar nuʼudar ajuda-naʼin ba Komisaun Hakerek nian husi Grupu Administradór.