1, 2. Oinsá mak apóstolu Paulo hatudu katak nia agradese duni ba Maromak nia laran-diʼak neʼebé boot?

APÓSTOLU PAULO hatete: “[Maromak nia] laran-diʼak ba haʼu la saugati deʼit.” (Lee 1 Korinto 15:9, 10.) Nia bele koʼalia nuneʼe tanba nia hatene katak nia la serve atu Maromak hatudu laran-sadiʼa ba nia, tanba uluk nia fó ona terus ba ema kristaun barak.

² Bainhira nia hakerek karta ba Timóteo, nia dehan: “Haʼu agradese tebes ba Kristu Jesus ita Naʼi, ida neʼebé fó kbiit mai haʼu, tanba nia haree haʼu nuʼudar ema neʼebé laran-metin hodi fó knaar mai haʼu atu halo ninia serbisu.” (1 Timóteo 1:12-14) Paulo koʼalia kona-ba serbisu saida? Nia hatete ba katuas kongregasaun iha Éfeso dehan: “Haʼu la haree haʼu-nia moris nuʼudar buat neʼebé iha folin; haʼu hanoin deʼit atubele halai toʼo rohan no halo hotu serbisu neʼebé haʼu simu husi Naʼi Jesus, hodi fó sasin ho loloos kona-ba liafuan diʼak husi Maromak nia laran-diʼak neʼebé boot.”—Apóstolu 20:24.

3. Paulo simu knaar espesiál saida? (Haree dezeñu iha pájina 26.)

 ³ Liafuan diʼak saida mak apóstolu Paulo haklaken neʼebé hatudu katak Jeová iha duni laran-diʼak neʼebé boot? Nia dehan: “Imi rona ona kona-ba knaar neʼebé haʼu simu atu ajuda imi liuhusi Maromak nia laran-diʼak.” (Éfeso 3:1, 2) Paulo simu knaar husi Jesus atu haklaken liafuan diʼak ba ema jentiu hodi sira mós bele hola parte atu ukun iha lalehan hamutuk ho Mesias. (Lee Éfeso 3:5-8.) Apóstolu Paulo haklaken ho badinas no nia mak ezemplu neʼebé diʼak tebes ba ita ohin loron. Nia hatudu duni katak Maromak hatudu ninia laran-diʼak neʼebé boot ba nia laʼós saugati deʼit.

4, 5. Tanbasá mak ita bele dehan katak “liafuan diʼak kona-ba Maromak nia Ukun” mós “liafuan diʼak husi Maromak nia laran-diʼak neʼebé boot”?

⁴ Iha loron ikus sira-neʼe, Jeová nia povu simu knaar atu haklaken “liafuan diʼak kona-ba Maromak nia Ukun iha mundu tomak nuʼudar sasin ba nasaun hotu”. (Mateus 24:14) Mensajen neʼebé ita haklaken mós “liafuan diʼak husi Maromak nia laran-diʼak neʼebé boot” tanba bensaun hotu neʼebé ita simu husi Maromak nia Ukun mai husi Jeová nia laran-diʼak. (Éfeso 1:3) Apóstolu Paulo hatudu ninia agradese ba Jeová nia laran-diʼak hodi haklaken ho badinas. Ita mós banati-tuir ninia ezemplu ka lae?—Lee Roma 1:14-16.

⁵ Iha lisaun uluk, ita aprende katak, tanba Maromak Jeová nia laran-diʼak neʼebé boot, nia fó ona bensaun barak ba ita ema sala-naʼin sira. No tanba ita simu ona buat diʼak sira-neʼe, ita mós iha responsabilidade atu hanorin fali ema seluk. Hodi nuneʼe sira bele hatene oinsá mak Jeová hatudu ninia domin no oinsá mak sira bele simu bensaun sira-neʼe. Bensaun saida deʼit husi Maromak nia laran-diʼak neʼebé boot mak ita presiza ajuda ema seluk atu hatene?

6, 7. Oinsá mak esplika Jesus nia sakrifísiu ba ema mak dalan neʼebé ita haklaken liafuan diʼak kona-ba Jeová nia laran-diʼak neʼebé boot?

⁶ Ohin loron, ema barak la sente moe bainhira sira halo sala, tan neʼe sira la komprende tansá mak ita presiza Jesus nia sakrifísiu. Maibé, iha ema barak mós komesa sente katak moris tuir sira-nia hakarak rasik loloos la lori ksolok ba sira. Uluk, antes koʼalia ho Testemuña ba Jeová, sira seidauk hatene sala mak saida, oinsá mak sala lori susar, no ema presiza halo saida deʼit hodi bele livre husi sala. Maibé kuandu sira komprende didiʼak ona sala mak saida, sira sente agradese tebes ba Jeová nia laran-diʼak neʼebé boot hodi haruka ninia Oan-Mane mai mundu atu halo ita livre husi sala no mate.—1 João 4:9, 10.

⁷ Apóstolu Paulo esplika nuneʼe kona-ba Jeová nia Oan-Mane, nia dehan katak Jeová “sosa fali ita liuhusi ninia Oan nia raan, no ita sai livre ona, neʼe katak ita-nia sala sira hetan perdua, ida-neʼe tuir Maromak nia laran-diʼak neʼebé boot”. (Éfeso 1:7) Kristu nia sakrifísiu mak evidénsia boot liu hotu neʼebé hatudu katak Jeová hadomi tebes ita no ida-neʼe hatudu mós nia iha laran-diʼak neʼebé boot tebes ba ita. Hodi hatene katak liuhusi tau fiar ba Jesus nia sakrifísiu mak Jeová sei fó perdua ba ita-nia sala no ita mós bele iha konxiénsia neʼebé moos, neʼe halo ita sente laran-kmaan tebes,  loos ka lae? (Ebreu 9:14) Neʼe mak liafuan neʼebé diʼak duni atu fahe ba ema seluk!

8. Tanbasá mak ema sala-naʼin presiza hadame malu fali ho Maromak?

⁸ Se ema mak la tau fiar ba Jesus nia sakrifísiu, Maromak sei haree sira hanesan ninia inimigu. Tan neʼe mak ita iha responsabilidade atu fó-hatene ba ema katak sira bele sai Maromak nia belun. Apóstolu João hatete: “Ema neʼebé hatudu fiar ba Oan-Mane hetan moris rohan-laek; no ema neʼebé lakohi halo tuir Oan-Mane sei la haree moris, maibé Maromak nia hirus hela iha nia.” (João 3:36) Ita bele haksolok tanba Jesus nia sakrifísiu mak halo ita bele sai Maromak nia belun. Tanba apóstolu Paulo dehan: “Uluk imi dook husi Maromak no sai nuʼudar inimigu tanba imi hanoin liu kona-ba hahalok aat sira, maibé agora Maromak hadame malu ona ho imi liuhusi ema neʼe nia isin neʼebé nia fó ba mate nuʼudar sakrifísiu.”—Koloso 1:21, 22.

9, 10. (a) Kristu fó responsabilidade saida ba ema kose-mina? (b) Iha dalan saida mak “bibi seluk” apoia ema kose-mina?

⁹ Kristu fó ona “knaar hadame-malu nian” ba ema kose-mina sira. Tan neʼe apóstolu Paulo hatete: “Buat hotu husi Maromak, ida neʼebé halo ita dame malu ho nia liuhusi Kristu no fó ita knaar hadame-malu nian, katak Maromak halo mundu hadame malu ho nia liuhusi Kristu, hodi la sura sira-nia sala. No nia tau fiar ba ita hodi fó ba ita liafuan hadame-malu nian. Nuneʼe ita mak Kristu nia embaixadór, neʼe hanesan Maromak bolu ema liuhusi ita. Tan neʼe, nuʼudar Kristu nia embaixadór ita husu: ‘Hadame malu ho Maromak bá.’”—2 Korinto 5:18-20.

¹⁰ Hodi apoia ema kose-mina atu halaʼo knaar neʼe mak priviléjiu ida ba “bibi seluk”. (João 10:16) Nuʼudar Kristu nia manu-ain, “bibi seluk” halo serbisu barak tebes iha parte serbisu haklaken, no hanorin lia-loos ba ema hodi ajuda sira atu iha relasaun neʼebé diʼak ho Jeová. Neʼe mak parte importante ida husi haklaken Maromak nia laran-diʼak neʼebé boot.

11, 12. Tanbasá mak aprende kona-ba halo orasaun ba Jeová mak liafuan diʼak ba ema?

¹¹ Ema barak reza tanba sira sente katak reza bele halo kmaan sira, maibé tuir loloos sira ladún fiar katak Maromak rona duni ba sira-nia orasaun. Sira presiza duni atu hatene katak Jeová mak Maromak “neʼebé rona ba orasaun”. David dehan: “Oh Maromak, neʼebé rona ba orasaun, ema oioin sei mai hakbesik ba Ita. Haʼu-nia sala sira barak tebes toʼo taka haʼu, maibé Ita fó perdua ba ami-nia sala sira.”—Salmo (Mazmur) 65:2, 3.

¹² Jesus hatete ba ninia dixípulu sira dehan: “Se imi husu buat naran deʼit hodi haʼu-nia naran, haʼu sei halo ida-neʼe.” (João 14:14) Neʼe dehan katak ita bele halo orasaun kona-ba “buat naran deʼit” neʼebé tuir Jeová nia hakarak. Apóstolu João hatete: “Neʼe mak buat neʼebé ita fiar kona-ba nia, katak, buat naran deʼit neʼebé ita husu hodi tuir ninia hakarak, nia rona ita.” (1 João 5:14) Ita kontente tebes bele ajuda ema seluk komprende katak orasaun mak dalan ida atu hakbesik ba Jeová nia “kadunan laran-diʼak nian”, neʼe laʼós atu halo ita sente kmaan deʼit! (Ebreu 4:16) Se ita mak hanorin ema seluk atu halo orasaun  iha dalan neʼebé loos, ba Maromak neʼebé loos, no halo orasaun kona-ba buat neʼebé loos, neʼe bele ajuda sira atu iha relasaun neʼebé diʼak ho Jeová no oinsá atu hetan kmaan iha tempu neʼebé sira hasoru susar.—Salmo (Mazmur) 4:1; 145:18.

13, 14. (a) Priviléjiu furak saida mak ema kose-mina sei simu iha futuru? (b) Sira sei halo serbisu saida atu ajuda ema?

¹³ Iha mundu foun, Jeová sei hatudu ninia laran-diʼak neʼebé boot liután ba ema. Apóstolu Paulo hatete katak Jeová sei fó priviléjiu furak ida ba ema kose-mina naʼin-144.000 neʼebé atu ukun hamutuk ho Kristu iha lalehan, nia dehan: “Maromak neʼebé riku ho laran-sadiʼa no neʼebé iha domin boot ba ita, nia halo ita moris ho Kristu maski ita mate iha ita-nia sala; no liuhusi ninia laran-diʼak neʼebé boot mak imi hetan salvasaun. Liután neʼe, tanba ita ida deʼit ho Kristu Jesus, Maromak halo ita moris hamutuk ho Kristu no fó fatin ba ita atu tuur hamutuk ho nia iha lalehan, atu nuneʼe iha mundu foun neʼebé atu mai, nia sei hatudu ninia laran-diʼak neʼebé boot hodi halo buat diʼak ba ita neʼebé ida deʼit ho Kristu Jesus.”—Éfeso 2:4-7.

¹⁴ Ita bele fiar katak Jeová prepara ona buat furak barak ba ema kose-mina sira iha lalehan bainhira sira tuur atu ukun hamutuk iha Kristu nia kadunan iha futuru. (Lucas 22:28-30; Filipe 3:20, 21; 1 João 3:2) Iha tempu neʼebá, Jeová sei hatudu ninia laran-diʼak neʼebé boot ba ema hotu, liuliu ba ema kose-mina sira. Sira sei forma “Jeruzalein foun”, neʼebé mós bolu nuʼudar Kristu nia noiva. (Apokalipse 3:12; 17:14; 21:2, 9, 10) Sira mós sei hamutuk ho Jesus atu “kura nasaun sira”, no ajuda ema sira-neʼe atu livre husi sala no mate hodi lori ema sira-neʼe sai perfeitu fali.—Lee Apokalipse 22:1, 2, 17.

15, 16. Oinsá mak Jeová sei hatudu ninia laran-diʼak neʼebé boot ba “bibi seluk” iha futuru?

¹⁵ Eskritura iha Éfeso 2:7 hatete katak Jeová sei hatudu ninia laran-diʼak neʼebé boot “iha mundu foun neʼebé atu mai”. Iha tempu neʼebá, ema hotu bele haree rasik Jeová nia laran-diʼak neʼebé boot sira-neʼe. (Lucas 18:29, 30) Laran-diʼak boot tebes neʼebé Jeová sei hatudu iha tempu neʼebá mak fó moris-hiʼas ba ema sira “iha rate” laran. (Jó [Ayub] 14:13-15; João 5:28, 29) Sesé deʼit mak sei hetan moris-hiʼas? Neʼe mak ema laran-metin sira neʼebé mate antes Jesus mate, no mós ema husi “bibi seluk” neʼebé mate ho laran-metin iha loron ikus sira-neʼe. Ema hotu sira-neʼe sei moris fali atu serbí Jeová ba nafatin.

¹⁶ Ema rihun ba rihun neʼebé mate antes koñese Jeová mós sei hetan moris-hiʼas. Sira sei hetan oportunidade atu halo tuir no simu Jeová nuʼudar sira-nia Ukun-Naʼin. Apóstolu João dehan: “Haʼu haree ema sira neʼebé mate ona, kiʼik no boot, sira hamriik iha kadunan nia oin, no livru sira loke tiha. Maibé, iha mós livru seluk neʼebé loke; neʼe mak livru moris nian. No ema mate sira simu tesi-lia tuir buat neʼebé hakerek iha livru sira-neʼe nia laran hodi tuir sira-nia hahalok. No tasi entrega sira neʼebé mate iha nia, no mate no rate entrega sira neʼebé mate iha nia, no sira ida-idak hetan tesi-lia tuir sira-nia hahalok.” (Apokalipse 20:12, 13) Loos duni, bainhira ema sira-neʼe hetan moris-hiʼas, sira presiza atu aprende no uza Bíblia nia prinsípiu no  matadalan foun husi “livru sira”. Matadalan foun sira-neʼe mós dalan ida tan neʼebé Jeová hatudu ninia laran-diʼak neʼebé boot.

17. Ita tenke hanoin-hetan saida bainhira bá haklaken?

¹⁷ Importante tebes ba ita atu haklaken liafuan diʼak tanba mundu nia rohan besik ona atu mai! (Marcos 13:10) Jeová hatudu duni ninia laran-diʼak neʼebé boot liuhusi liafuan diʼak. Ita tenke hanoin-hetan katak ita-nia objetivu ba haklaken mak atu fó glória ba Jeová. Ita presiza fó-hatene ba ema seluk katak tanba Jeová hatudu ninia laran-diʼak neʼebé boot mak ita sei hetan bensaun oioin iha mundu foun.

18, 19. Oinsá mak ita fó hahiʼi ba Jeová nia laran-diʼak neʼebé boot?

¹⁸ Bainhira haklaken, ita bele esplika ba ema katak, kuandu Kristu ukun ona mundu tomak, ema sei hetan bensaun barak husi Jesus nia sakrifísiu no neineik-neineik ita sei sai perfeitu fali. Bíblia hatete: “Kriasaun neʼe rasik sei sai livre husi atan ba isin neʼebé dodok, no hetan liberdade neʼebé furak nuʼudar Maromak nia oan sira.” (Roma 8:21) Só liuhusi Jeová nia laran-diʼak neʼebé boot liu hotu mak bele kumpre buat sira-neʼe.

¹⁹ Ita iha priviléjiu atu fó-hatene ba ema hotu kona-ba promesa furak neʼebé hakerek iha Apokalipse 21:4, 5 neʼebé dehan: “[Maromak] sei hamaran sira-nia matan-been hotu husi sira-nia matan, no mate sei la iha tan, no ema sei la tanis tan ka laran-susar ka laran-triste; basá buat neʼebé uluk nian lakon tiha ona.” No Jeová, ida neʼebé tuur iha kadunan hatete: “Haree! Haʼu halo buat hotu sai foun.” Nia hatutan dehan: “Hakerek ida-neʼe bá, basá liafuan sira-neʼe mak loos duni no ema bele tau fiar.” Bainhira ita haklaken liafuan diʼak ho badinas ba ema seluk, ita hatudu katak ita hahiʼi duni Jeová nia laran-diʼak neʼebé boot!