IMAJINA toʼok iha kalan boot ida ita laʼo hela iha estrada. Derrepente ita sente iha ema ida laʼo iha kotuk. Ita para, nia mós para. Ita laʼo lalais, nia mós laʼo lalais. No besik iha neʼebá iha kolega ida nia uma, tan neʼe ita halai makaʼas ba ninia uma. Bainhira nia loke odamatan, nia bolu ita tama ba ninia uma. Agora ita sente seguru ona.

Karik iha ita-nia moris ita seidauk hasoru situasaun hanesan neʼe, maibé karik iha buat seluk mak halo ita laran-taridu no hanoin barak. Porezemplu, ita luta hasoru hela fraku ruma, maibé ita sempre monu fali ka lae? Ita mak ema neʼebé hakaʼas an tebes atu buka serbisu, maibé toʼo agora seidauk hetan ka lae? Ita komesa iha hanoin barak tanba idade aumenta ka hanoin kona-ba problema ho saúde iha futuru ka lae? Ka iha buat seluk mak halo ita hanoin barak?

Bainhira ita hasoru problema sira, diʼak atu iha belun ida neʼebé ita bele koʼalia kona-ba ita-nia susar no husu ninia ajuda, loos ka lae? Ita iha belun ida hanesan neʼe ka lae? Iha duni! Ita-nia belun neʼe mak Jeová. Hanesan eskritura iha Isaías (Yesaya) 41:8-13 hatete katak nia mak Abraão nia belun. No Jeová promete ba ita ida-idak iha versíkulu 10 no 13, dehan: “Keta taʼuk tanba haʼu hamutuk ho imi. Keta laran-taridu tanba haʼu mak imi-nia Maromak. Haʼu sei hametin imi, sin, haʼu sei ajuda imi, haʼu sei kaer metin duni imi ho haʼu-nia liman-loos justisa nian. Tanba haʼu, Jeová imi-nia Maromak, mak kaer imi-nia liman-loos, Ida neʼebé dehan ba imi: ‘Keta taʼuk. Haʼu sei ajuda imi.’”

Jeová nia liafuan sira fó kmaan tebes ita. Hanoin toʼok ba buat neʼebé Jeová promete atu halo. Versíkulu sira-neʼe laʼós hatete katak ita laʼo hamutuk ho Jeová iha ninia sorin. Tanba se ita mak laʼo iha ninia sorin, ninia liman-loos mak kaer ita-nia liman-karuk. Maibé Jeová dehan nia lolo ninia “liman-loos justisa nian” hodi ‘kaer ita-nia liman-loos’, buat ida karik, neʼe hanesan nia dada hela ita atu sai husi situasaun susar ruma. No bainhira Jeová kaer metin hela ita-nia liman-loos, nia hametin ita hodi dehan: “Keta taʼuk. Haʼu sei ajuda imi.”

Ita haree Jeová hanesan Aman neʼebé iha domin no Belun neʼebé sempre prontu atu ajuda ita bainhira ita hasoru susar ka lae? Jeová hanoin tebes ita no nia hakarak tebes atu ajuda. Bainhira ita hasoru susar no problema ruma, Jeová lakohi ita atu sente taʼuk. Tanbasá? Tanba nia hadomi tebetebes ita. Loos duni, Jeová mak ajuda neʼebé ita bele hetan iha tempu susar sira.—Salmo (Mazmur) 46:1.

Ema balu la bele haluha kona-ba sala neʼebé uluk sira halo no sira sei duvida katak Maromak  seidauk fó perdua ba sira. Se ita mak ema neʼe, diʼak atu hanoin kona-ba ema laran-metin hanesan Job. Nia mós hanoin kona-ba ninia “sala sira iha tempu joven”. (Jó [Ayub] 13:26) David mós iha sentimentu hanesan neʼe, tan neʼe nia husu makaʼas ba Jeová dehan: “Keta hanoin-hetan haʼu-nia sala sira iha tempu neʼebé haʼu sei joven no haʼu-nia hahalok kontra.” (Salmo [Mazmur] 25:7) Tanba ita la perfeitu, tan neʼe la iha ema ida mak nunka halo sala.—Roma 3:23.

Liafuan sira iha Isaías kapítulu 41 mak liafuan neʼebé uluk Jeová koʼalia ba ninia povu iha tempu antigu. Tanba ema sira-neʼe halo sala todan hasoru Jeová mak nia fó kastigu ba sira hodi soe sira ba Babilónia. (Isaías [Yesaya] 39:6, 7) Maski nuneʼe, Maromak mós promete katak iha futuru, nia sei lori fali ema neʼebé hakarak arrepende an no fila fali ba nia. (Isaías [Yesaya] 41:8, 9; 49:8) Ohin loron, Jeová mós hatudu domin no laran-sadiʼa hanesan neʼe ba ema neʼebé arrepende an ho laran.—Salmo (Mazmur) 51:1.

Mai ita haree toʼok ezemplu ida kona-ba Takuya. * Nia luta makaʼas atu halakon ninia toman foʼer husi pornografia no masturbasaun. Dala barak ona nia koko atu hapara maibé lakleur nia monu fali ba toman foʼer sira-neʼe. Nia sente oinsá? Nia dehan: “Haʼu sente hanesan ema neʼebé laiha folin tebes. Maibé bainhira haʼu halo orasaun hodi husu makaʼas ba Jeová nia perdua, nia sempre hiʼit haʼu atu hamriik fali.” Oinsá mak Jeová ajuda nia? Katuas sira iha Takuya nia kongregasaun husu nia atu telefone katuas sira bainhira nia monu fali ba toman neʼe. Nia dehan: “La fasil atu bolu katuas sira, maibé bainhira haʼu koʼalia tiha ho sira, haʼu sente metin fali.” Loron ida katuas sira halo arranju hodi lori katuas área nian ba vizita nia. No katuas área neʼe hatete ba nia: “Haʼu mai laʼós tanba derrepente deʼit. Haʼu mai tanba katuas sira mak hakarak haʼu atu mai. Sira mak hili atu halo vizita neʼe ba Ita.” Takuya konta fali dehan: “Haʼu mak ema neʼebé halo sala, maibé Jeová ajuda fali haʼu liuhusi katuas sira.” Ikusmai Takuya laʼo ba oin toʼo nia foti pioneiru regulár no agora serbí daudaun iha sukursál ida. Husi esperiénsia neʼe ita bele haree katak, se ita mak monu ba problema ruma, Jeová sei hiʼit ita hamriik fali.

Ema balu sente laran-taridu tanba lakon serbisu no la hetan serbisu seluk. Hanoin toʼok se ita bá buka serbisu maibé ema hotu lakohi simu ita, ba ema balu sira bele sente laiha folin. Se nuneʼe, oinsá mak Jeová bele ajuda ita? Karik Jeová la fó kedas serbisu diʼak ida ba ita, maibé nia sei ajuda ita atu hanoin nafatin ba Liurai David nia liafuan neʼe: “Uluk haʼu joven no agora haʼu sai idade boot ona, maibé haʼu seidauk haree Maromak husik hela ema laran-loos, no seidauk haree ninia oan sira buka hahán.” (Salmo [Mazmur] 37:25) Jeová haree ita iha folin boot tebes, no nia hakarak fó ninia “liman-loos justisa nian” atu ajuda ita hodi ita bele serbí nia ba nafatin.

Sara, husi rai-Kolómbia mós haree ona oinsá Jeová ajuda nia. Nia serbisu full-time iha kompañia ida no manán osan diʼak. Maibé tanba nia hakarak halo serbisu barak liután ba Jeová, nia sai  husi serbisu neʼe no komesa pioneiru. Problema ba nia mak susar atu buka serbisu part-time. Tan neʼe nia loke rasik loja oan ida atu faʼan sorvete. Maibé neineik-neineik ninia osan latoʼo ona, entaun nia tenke taka deʼit ninia loja neʼe. Sara hatete: “Haʼu tahan situasaun neʼe ba tinan tolu nia laran, maibé haʼu agradese ba Jeová hodi ajuda haʼu tahan.” Ikusmai nia aprende saida mak buat neʼebé nia presiza no oinsá atu la hanoin resin kona-ba buat aban nian. (Mateus 6:33, 34) Toʼo ikus ninia patraun uluk nian bolu fali nia atu serbisu. Maibé Sara dehan katak nia hakarak deʼit atu serbisu part-time no se nia bele hetan folga atu halaʼo atividade espirituál mak nia simu fali serbisu neʼe. Maski Sara la manán tan osan barak hanesan uluk, maibé nia bele kontinua pioneiru. Nia dehan katak durante tempu susar sira-neʼe, nia sente duni Jeová nia liman mak ajuda nia.

Laran-taridu ida seluk mak kona-ba idade aumenta. Ema barak hanoin kona-ba se sira mak la bele tan atu serbisu, sira-nia osan toʼo ka lae atu bele moris. Sira mós hanoin barak kona-ba problema saúde iha futuru se sira ferik-katuas ona. Karik Liurai David mak ema neʼebé husu nuneʼe ba Jeová: “Keta soe tiha haʼu bainhira haʼu idade boot ona; keta husik hela haʼu bainhira haʼu-nia forsa lakon ona.”—Salmo (Mazmur) 71:9, 18.

Entaun, oinsá mak Jeová nia atan bele la hanoin barak kona-ba tempu ferik-katuas iha futuru? Sira presiza hametin beibeik sira-nia fiar ba Maromak no fiar katak nia sei tau matan ba sira-nia presiza. Maibé se sira mak toman ona moris ho buat riku iha sira-nia moris, karik sira presiza kontente atu moris deʼit ho buat neʼebé simples. Karik sira sei haree katak han deʼit “modo-tahan bikan ida” gostu liu fali “naʼan-karau neʼebé bokur” no karik diʼak liu ba sira-nia saúde! (Provérbios [Amsal] 15:17) Se ita mak tau fokus nafatin atu serbí Jeová, nia sei tau matan ba ita-nia presiza iha tempu ferik-katuas nian.

Haree tan ezemplu ida kona-ba José no Rosa, sira serbí Jeová tempu-tomak ba tinan 65 resin ona. Iha tinan sira-neʼe, sira mós hasoru hela susar balun, tanba Rosa nia apá presiza ema tau matan loron-kalan. No José mós hetan operasaun atu hasai kankru, tuirmai halaʼo tratamentu kimioterapia. Oinsá mak Jeová lolo ninia liman-loos hodi ajuda kaben-naʼin laran-metin neʼe? Jeová uza fiar-naʼin seluk, Tony no Wendy, mak ajuda sira. Tony no Wendy iha uma mamuk ida neʼebé sira hakarak fó ba pioneiru tempu-tomak hela no la presiza selu. Tony sei hanoin-hetan bainhira nia sei eskola, nia sempre haree husi janela José no Rosa sempre sai bá haklaken. Tony gosta tebes haree sira-nia badinas no sira-nia ezemplu book tebes nia. Tanba José no Rosa uza sira-nia moris tomak hodi serbí Jeová, tan neʼe Tony no Wendy oferese uma neʼe ba sira atu hela. Agora José no Rosa maizumenus tinan 85 ona no Tony ho Wendy ajuda ona sira ba tinan 15. José no Rosa sente duni katak Tony no Wendy mak prezente ida husi Jeová.

Jeová mós lolo ninia “liman-loos justisa nian” ba ita hodi promete ba ita: ‘Keta taʼuk. Haʼu sei ajuda ó.’ Ita mós sei lolo fali ita-nia liman hodi kaer ninia liman ka lae?