“SERBISU koʼa nian boot tebes, maibé serbisu-naʼin uitoan deʼit. Tan neʼe, husu ba toʼos-naʼin atu haruka tan ema hodi halo serbisu koʼa nian.” (Lucas 10:2) Jesus koʼalia ida-neʼe maizumenus tinan 2.000 liubá, maibé situasaun neʼe kona Myanmar ohin loron. Tanbasá? Tanba iha Myanmar, iha haklaken-naʼin maizumenus 4.200 neʼebé tenke haklaken ba ema naʼin–55.000.000.

Maibé nuʼudar “toʼos-naʼin”, Jeová book irmaun-irmán atus ba atus nia laran, neʼebé mai husi rai oioin atu bá Myanmar iha Ázia nia parte súl hodi ajuda iha serbisu koʼa nian. Tanbasá mak irmaun-irmán sira-neʼe hakarak muda dook husi sira-nia rai? Saida mak ajuda sira atu muda? No bensaun saida deʼit mak sira hetan? Mai ita haree.

Tinan balu liubá, Kazuhiro, irmaun pioneiru ida husi Japaun, kona moras bibi-maten, nia oin-nakukun, no ema lori nia ba ospitál. Doutór dehan nia la bele lori karreta ba tinan rua. Kazuhiro triste tebes. Nia hanoin, ‘Oinsá mak haʼu bele kontinua pioneiru neʼebé haʼu hadomi loos?’ Nia halo orasaun makaʼas ba Jeová hodi husu Jeová loke dalan ba nia atu kontinua serbí nuʼudar pioneiru.

Kazuhiro dehan: “Fulan ida liutiha, haʼu-nia kolega ida neʼebé serbí iha Myanmar rona kona-ba haʼu-nia situasaun. Nia telefone haʼu no dehan: ‘Iha Myanmar, transporte neʼebé ema barak liu uza mak bís. Se Ita mai iha neʼe, Ita bele kontinua Ita-nia serbisu haklaken maski Ita la iha karreta!’ Haʼu husu doutór se haʼu-nia situasaun husik haʼu atu bá Myanmar. Haʼu hakfodak tanba nia dehan: ‘Iha doutór espesialista kona-ba kakutak husi Myanmar neʼebé agora daudauk vizita hela Japaun. Haʼu sei fó koñese Ita ba nia. Se Ita kona fali moras bibi-maten, nia bele tau matan ba Ita.’ Ba haʼu, doutór nia liafuan sira-neʼe hanesan resposta husi Jeová.”

Kazuhiro haruka kedas e-mail ba sukursál iha Myanmar no fó sai nia ho ninia feen nia hakarak atu bá serbí iha neʼebá. Liutiha loron lima deʼit, sukursál haruka fali e-mail, dehan, “Mai, ami presiza pioneiru barak tan!” Kazuhiro no ninia feen Mari, faʼan sira-nia karreta rua, hetan visa neʼebé sira presiza, no hola sira-nia billete aviaun. Ohin loron, sira kontente serbí ho grupu língua liman nian iha sidade Mandalay. Kazuhiro dehan:  “Liuhusi esperiénsia neʼe, ami-nia fiar ba Maromak nia promesa iha Salmo (Mazmur) 37:5 sai metin liután: ‘Husik Jeová dirije ó-nia dalan; sadere ba nia, no nia sei ajuda ó.’”

Iha 2014, Testemuña ba Jeová halaʼo reuniaun boot espesiál iha Myanmar. Testemuña ba Jeová husi rai oioin mak bá asiste. Monique, tinan 34 husi Estadus Unidus, hatete: “Fila tiha husi reuniaun boot, haʼu halo orasaun ba Jeová kona-ba saida mak haʼu tenke halo tuirmai iha haʼu-nia moris. Haʼu mós koʼalia ho haʼu-nia inan-aman kona-ba haʼu-nia planu espirituál sira. Ami hotu konkorda katak diʼak ba haʼu atu fila fali ba Myanmar, maibé presiza tempu no orasaun barak mak haʼu foin foti desizaun.” Tanbasá?

Monique hatete: “Jesus anima ninia dixípulu sira atu ‘sura sira-nia osan.’ Tan neʼe, haʼu husu haʼu-nia an: ‘Haʼu-nia osan toʼo atu muda ka lae? Haʼu-nia osan toʼo atu tau matan ba haʼu-nia an iha rai neʼe hodi la presiza gasta tempu barak liután atu serbisu ka lae?’” Nia hatete: “Haʼu haree katak tuir loloos, haʼu-nia osan la toʼo atu muda ba rai seluk.” Se nuneʼe, oinsá mak Monique bele muda?​—Lucas 14:28.

Nia hatete: “Loron ida, haʼu-nia patraun bolu haʼu atu koʼalia ho nia. Haʼu sente nakdedar uitoan, tanba hanoin nia atu haruka haʼu sai husi serbisu. Maibé, haʼu-nia patraun fó obrigadu ba haʼu-nia serbisu diʼak. Nia dehan katak nia atu fó bonus ba haʼu, no osan neʼebé haʼu simu mak natoon atu selu haʼu-nia debe sira hotu.”

Monique serbí iha Myanmar husi Dezembru 2014. Oinsá mak nia sente kona-ba serbí iha neʼebá? Nia dehan: “Haʼu kontente tebes hela iha neʼe. Haʼu halaʼo estudu Bíblia tolu. Ida mak tinan 67. Nia sempre hakoʼak haʼu ho oin-midar bainhira haʼu bá estuda ho nia. Bainhira nia aprende Maromak nia naran Jeová, neʼe book ninia laran toʼo nia tanis. Nia dehan mai haʼu: ‘Neʼe primeiravés haʼu rona Maromak nia naran mak Jeová. Ita mak idade kiʼik liu haʼu maibé Ita hanorin haʼu buat neʼebé importante liu hotu.’ Iha tempu nia konta ida-neʼe, haʼu mós tanis. Esperiénsia sira hanesan neʼe, halo haʼu gosta tebes atu serbí iha fatin neʼebé presiza tan haklaken-naʼin sira.” Foin daudauk neʼe, Monique hetan priviléjiu hodi tuir Eskola ba Haklaken-Naʼin Tempu-Tomak.

Buat seluk neʼebé book irmaun-irmán balu atu muda ba Myanmar mak Buku Tahunan Saksi-Saksi Yehuwa 2013 neʼebé konta kona-ba rai neʼe. Irmán ida tinan 30 liu naran Li hela ona iha Ázia parte súl. Nia serbisu full-time maibé Buku Tahunan kona-ba rai-Myanmar book nia hanoin atu serbí iha neʼebá. Nia hatete: “Iha 2014, bainhira haʼu tuir reuniaun boot iha Yangon, haʼu hasoru feen-laʼen ida neʼebé muda husi rai seluk atu serbí iha Myanmar hodi ajuda ho lia-xinés. Tanba haʼu mós koʼalia lia-xinés, haʼu deside atu muda ba Myanmar atu ajuda ho grupu xinés iha neʼebá. Haʼu no Monique muda ba Mandalay. Jeová fó bensaun ba ami tanba ami hetan serbisu part-time hodi hanorin iha eskola neʼebé hanesan, no hetan mós uma neʼebé besik. Maski ami hasoru susar balu no rai mós manas iha neʼe, maibé haʼu gosta tebes serbí iha neʼe. Ema neʼebé hela iha Myanmar moris simples deʼit, maibé sira hatudu respeitu no prontu atu rona ita koʼalia kona-ba liafuan diʼak. Kontente tebes atu haree Jeová nia serbisu iha neʼe laʼo ba oin lalais. Haʼu fiar duni katak Jeová nia hakarak ba haʼu atu hela iha neʼe, iha Mandalay.”

Irmaun-irmán barak neʼebé muda ba Myanmar hatene katak orasaun iha kbiit boot. Porezemplu, Jumpei no ninia feen Nao, neʼebé tinan 30 liu. Sira serbí ona iha kongregasaun língua liman nian iha Japaun. Se nuneʼe, tanbasá mak sira muda ba rai seluk? Jumpei hatete: “Haʼu no haʼu-nia feen sempre iha planu atu muda hodi serbí iha rai seluk. Irmaun ida husi ami-nia kongregasaun língua liman nian iha Japaun muda ona ba Myanmar. Maski osan neʼebé ami rai mak uitoan deʼit, iha Maiu 2010 ami muda ba neʼebá. Irmaun-irmán sira iha Myanmar simu ami ho kontente!” Oinsá mak Jumpei sente kona-ba ajuda ho língua liman nian iha neʼebá? Nia dehan: “Ema barak interese. Bainhira ami hatudu vídeo iha língua liman nian, ema tilun-diuk sira hakfodak tebes. Ami kontente tebes ho ami-nia desizaun atu muda hodi serbí Jeová iha neʼe!”

Oinsá ho sira-nia situasaun osan nian? Jumpei hatete: “Liutiha tinan tolu, ami-nia osan besik hotu, no osan la toʼo atu selu uma aluga ba tinan tuirmai. Haʼu no haʼu-nia feen halo orasaun barak. Ami hakfodak bainhira ami simu surat husi sukursál konvida ami atu serbí nuʼudar pioneiru tempu-tomak! Tanba ami tau fiar ba Jeová, nia la husik ami. Nia tau matan ba ami iha dalan hotu.” Foin daudauk neʼe, Jumpei no Nao mós tuir Eskola ba Haklaken-Naʼin Tempu-Tomak.

Saida mak book Simone, irmaun ida tinan 43 husi Itália, no ninia feen Anna, tinan 37 husi Novazelándia, atu muda ba Myanmar? Anna hatete: “Neʼe tanba Buku Tahunan 2013 kona-ba Myanmar!” Simone hatete: “Priviléjiu boot ba ami atu serbí iha Myanmar. Moris iha neʼe simples loos, no haʼu bele fó tempu barak liután ba Jeová. Kapás tebes atu bele sente Jeová tau matan ba ami nuʼudar ami serbí iha fatin neʼebé presiza tan haklaken-naʼin.” (Salmo [Mazmur] 121:5) Anna hatete: “Agora haʼu kontente liu fali tempu uluk. Ami hetan ona moris neʼebé simples. Haʼu uza tempu barak hamutuk ho haʼu-nia laʼen, no ami sai besik liu fali uluk. Ami mós hetan belun sira neʼebé folin boot tebes. Iha neʼe, ema la diskrimina Testemuña ba Jeová, sira interese tebes ba Bíblia!” Iha dalan saida deʼit?

Anna hatete: “Loron ida, haʼu haklaken ba estudante universidade ida iha merkadu. Bainhira haʼu hasoru fali ho feto neʼe, nia lori kolega ida tan hamutuk nia. Depois, nia lori balu tan, no iha tempu seluk, nia lori barak liután. Agora haʼu estuda ho sira naʼin-lima.” Simone hatete: “Ema iha neʼe laran-diʼak no hakarak hatene kona-ba ami. Barak hatudu interese ba Bíblia. Ami-nia tempu la toʼo atu estuda ho ema ida-idak.”

Maibé oinsá mak irmaun-irmán sira-neʼe foti desizaun hodi muda ba Myanmar? Mizuho husi Japaun hatete: “Ba tempu kleur ona, haʼu no haʼu-nia  laʼen, Sachio, hakarak atu serbí iha rai neʼebé presiza haklaken-naʼin tan, maibé ami la hatene atu bá neʼebé. Esperiénsia sira husi Buku Tahunan 2013 kona-ba Myanmar, book tebes ami-nia laran no ami komesa hanoin se ami bele muda ba neʼebá ka lae.” Sachio hatete: “Ami deside atu ba sidade Yangon ba semana ida atu haree rai.” Durante sira-nia tempu iha neʼebá, sira iha oportunidade atu buka-hatene buat barak, no ikusmai foti desizaun atu muda ba neʼebá.

Rodney no ninia feen, Jane, husi Austrália, neʼebé tinan 50 liu, hamutuk ho sira-nia oan naʼin-rua, Jordan no Danica, serbí iha Myanmar husi tinan 2010. Rodney hatete: “Ami gosta tebes haree ema barak hakarak hatene kona-ba Maromak. Haʼu hakarak anima família sira seluk atu koko bá serbí iha fatin seluk hanesan Myanmar.” Tanbasá? Nia dehan: “Kapás tebes atu haree oinsá ami-nia esperiénsia neʼe halo ami besik liután ba Jeová. Joven barak ohin loron preokupa ho sira-nia telefone, karreta, serbisu no seluk tan. Maibé ami-nia oan okupadu hodi aprende língua foun atu uza iha haklaken. Sira aprende oinsá atu fó resposta ba ema neʼebé ladún hatene kona-ba Bíblia no atu hatoʼo komentáriu iha reuniaun. No iha mós atividade espirituál barak tan.”

Oliver, irmaun ida tinan 37 husi Estadus Unidus, esplika tanbasá mak nia hakarak anima ema seluk atu koko haklaken iha rai seluk. Nia dehan: “Hodi serbí Jeová iha fatin neʼebé haʼu la toman, neʼe lori benefísiu barak. Hodi muda dook husi uma ajuda haʼu atu sai fiar an liután no atu tau fiar ba Jeová iha haʼu-nia situasaun hotu. Haʼu serbí Jeová hamutuk ho irmaun-irmán sira neʼebé uluk haʼu la koñese, maibé ami iha unidade kona-ba ami-nia fiar. Só Maromak nia organizasaun deʼit mak bele halo ida neʼe!” Ohin loron, Oliver no ninia feen Anna, kontinua serbí ho laran-manas hodi haklaken ba ema Xina.

Trazel, irmán ida tinan 52 husi Austrália, serbí iha Myanmar husi tinan 2004. Nia dehan: “Ba sira neʼebé bele, haʼu hakarak anima sira atu serbí iha fatin neʼebé presiza tan haklaken-naʼin. Husi haʼu-nia esperiénsia, haʼu hatene katak, se ita iha hakarak atu serbí Jeová, nia sei fó bensaun ba ita-nia hakaʼas-an. Haʼu nunka mehi atu halaʼo moris hanesan neʼe. Neʼe mak moris neʼebé lori bensaun no haksolok tebes.”

Karik irmaun-irmán sira-neʼe nia liafuan bele book Ita atu hakaʼas an haklaken ba ema laran-loos sira neʼebé seidauk iha oportunidade atu rona kona-ba lia-loos. Sin, irmaun-irmán sira iha Myanmar fó konvite hodi dehan: “Hakat liu mai Myanmar no ajuda ami!”