Ita hanoin-hetan ka lae?

Ita lee didiʼak informasaun sira husi ita-nia Livru Haklaken foin daudauk neʼe ka lae? Koko atu hatán ba pergunta sira tuirmai neʼe:

Buat haat saida mak ita bele halo atu hadiʼa dalan neʼebé ita kanta?

Hamriik loos no hiʼit aas ita-nia livru. Dada iis ho loloos, no loke ibun luan hodi kanta ho lian makaʼas.​—w17.11, p. 5.

Saida mak interese kona-ba Izraél nia sidade protesaun nian no dalan sira atu bá sidade sira-neʼe?

Iha sidade protesaun nian hamutuk neen iha Izraél, ho dalan sira neʼebé kabeer atu bá sidade sira-neʼe. Hodi nuneʼe sai fasil no lalais ba ema ida atu buka protesaun.​—w17.11, p. 14.

Tanbasá mak Jesus nia moris neʼebé Jeová fó ba ita mak prezente diʼak liu hotu?

Prezente neʼe kumpre ita-nia hakarak atu kontinua moris, no mós ita-nia presiza atu sai livre husi sala no mate. Tanba Maromak hadomi Adão nia oan sira hotu, nia fó prezente neʼe kuandu ita sei sala-naʼin hela.​—wp17.6, p. 6-7.

Oinsá mak Salmo (Mazmur) 118:22 refere ba Jesus nia moris-hiʼas?

Ema la simu Jesus nuʼudar Mesias no sira oho nia. Atu nia bele sai “fatuk neʼebé importante liu”, nia tenkesér hetan moris-hiʼas.​—w17.12, p. 9-10.

Mesias nia liña jerasaun mai husi ema neʼebé iha direitu nuʼudar oan primeiru ka lae?

Dala ruma liña jerasaun neʼe mai duni husi oan-mane primeiru, maibé dala ruma lae. Jesse nia oan David laʼós oan primeiru. Maski nuneʼe, Mesias mai husi David nia liña jerasaun.​—w17.12, p. 14-15.

Saida mak informasaun balu neʼebé loos kona-ba saúde neʼebé bele hetan iha Bíblia?

Moisés nia Ukun-Fuan haruka atu haketak ema neʼebé kona moras balu. Se ema ida kaer mate-isin, tenke fase liman. Moisés nia Ukun-Fuan hatete katak ema tenke hakoi sira-nia foʼer. No ema Izraél tenke halo sirkunsizaun ba sira-nia oan-mane neʼebé moris ona ba loron ualu tanba bebé nia isin bele kontrola raan neʼebé sai husi kanek.​—wp18.1, p. 7.

Tanbasá la sala ba ema kristaun ida atu hadomi ninia an?

Ita tenke hadomi ita-nia maluk hanesan ita-nia an rasik. (Marcos 12: 31) Laʼen sira tenke “hadomi sira-nia feen nuʼudar sira-nia isin rasik”. (Éfeso 5:28) Maibé ita tenke kuidadu tanba domin neʼe bele halo ita hanoin an demais.​—w18.01, p. 23.

Saida mak ita bele halo atu laʼo ba oin nuʼudar ema espirituál?

Ita presiza estuda Maromak nia Liafuan, medita kona-ba buat neʼebé ita lee, no moris tuir buat neʼebé ita aprende. Loke ita-nia neon no laran atu espíritu santu bele ajuda ita, no ho laran simu ajuda husi ema seluk.​—w18.02, p. 26.

Tanbasá mak astrolojia no siʼik futuru laʼós dalan atu hatene loloos kona-ba futuru?

Iha razaun barak, maibé razaun importante mak Bíblia hatudu katak buat rua neʼe Maromak la simu.​—wp18.2, p. 4-5.

Saida mak ita tenke halo se ita simu konvite husi ema seluk atu han hamutuk?

Se ita mak simu ona ema nia konvite, ita la bele dada fali ita-nia liafuan. (Salmo [Mazmur] 15:4) La diʼak atu kansela se la iha razaun neʼebé loos. Karik ema neʼebé konvida ita prepara ona buat barak hodi hein ita.​—w18.03, p. 18.

Irmaun sira neʼebé serbí iha kongregasaun bele aprende saida husi Timóteo?

Timóteo iha interese tebes ba ema no nia tau uluk serbisu haklaken. Nia halo serbisu santu ho badinas no aplika buat neʼebé nia aprende. Nia treinu beibeik ninia an no sadere ba Jeová nia espíritu. Katuas kongregasaun no ema seluk mós bele banati-tuir ninia ezemplu.​—w18.04, p. 13-14.