JESUS fó-hatene nanis katak iha loron ikus sira, ninia dixípulu sira sei haksolok ho serbisu koʼa nian neʼebé boot tebes. (Mateus 9:37; 24:14) Oinsá mak Jesus nia liafuan sai loos iha dalan neʼebé úniku iha área Zakarpatskaya, rai-Ukránia? Área neʼe iha sidade tolu neʼebé besik malu no iha kongregasaun 50 no iha haklaken-naʼin 5.400 liu. * Neʼe katak husi ema naʼin-haat, ida mak Testemuña ba Jeová.

Oinsá ho haklaken iha neʼebá? Irmaun ida naran Vasile hatete: “Ema iha fatin neʼe respeitu tebes Bíblia, hafolin justisa, hafolin família, no fó ajuda ba malu ho laran tomak. Maski dala ruma sira la konkorda ho ita-nia fiar, maibé bainhira ita hatudu eskritura ba sira, sira sempre rona ho didiʼak.”

Irmaun-irmán sira hasoru dezafiu neʼebé úniku bainhira haklaken iha fatin neʼebé iha haklaken-naʼin barak liu. Porezemplu, kongregasaun ida iha haklaken-naʼin 134, maibé iha sira-nia haklaken-fatin iha deʼit uma 50. Irmaun-irmán sira halo saida iha situasaun neʼe?

Irmaun-irmán barak fó sira-nia an hodi haklaken iha fatin neʼebé presiza haklaken-naʼin liután. Irmaun Ionash neʼebé idade 90, hela iha fatin neʼebé iha Testemuña ba Jeová barak tebes, nia dehan: “Agora haʼu haklaken iha haʼu-nia knua deʼit tanba saúde sai fraku, maibé uluk haʼu bá haklaken iha fatin ida neʼebé seidauk iha kongregasaun, dook maizumenus kilómetru 160 hodi haklaken iha língua úngaru.” Haklaken-naʼin sira presiza halo sakrifísiu oioin atu bele ajuda iha haklaken-fatin seluk. Ionash hatete: “Haʼu hadeer iha tuku 4 dadeer-saan hodi saʼe komboiu no haklaken toʼo tuku 6 lokraik bainhira komboiu fila fali mai. Iha semana ida haʼu bá dala rua ka tolu.” Nia sente oinsá? Nia dehan: “Haʼu haksolok tebes hodi haklaken hanesan neʼe. Haʼu kontente tanba bele ajuda família ida neʼebé hela iha fatin izoladu ida hodi aprende kona-ba lia-loos.”

Maski laʼós ema hotu husi kongregasaun sira iha área neʼe bele haklaken iha fatin dook, maibé sira hotu, inklui mós sira neʼebé idade ona, hakaʼas an atu haklaken hamutuk ho sira-nia kongregasaun. Rezultadu mak iha 2017, ema hotu neʼebé tuir Memoriál iha sidade tolu neʼe atu barak liu fali haklaken-naʼin ba dala rua. Sin, iha fatin neʼebé deʼit, sei iha serbisu barak atu halo “iha Naʼi nia serbisu”.​—1 Korinto 15:58.