1, 2. (a) Tanbasá mak joven sira manán daudauk funu hasoru Satanás no anju aat sira? (Haree dezeñu iha leten.) (b) Ita sei koʼalia kona-ba saida?

APÓSTOLU PAULO kompara ema kristaun hanesan soldadu. Ita halo daudauk funu, no ita-nia inimigu iha duni! Ita-nia funu laʼós hasoru ema, maibé hasoru Satanás ho anju aat sira. Sira mak funu-naʼin neʼebé matenek. Karik ita sente ita la bele manán funu neʼe, liuliu se ita mak joven. Maibé joven bele funu manán hasoru inimigu ho forsa boot sira-neʼe ka lae? Bele tanba iha joven balu neʼebé manán daudauk. Oinsá? Tanba sira hetan forsa husi Jeová. Sira “tau hatais funu nian hotu husi Maromak” hanesan soldadu hodi prepara an ba funu.​—Lee Éfeso 6:10-12.

² Bainhira Paulo halo komparasaun neʼe, karik nia hanoin kona-ba hatais funu nian ka ekipamentu funu nian neʼebé soldadu Roma sira uza. (Apóstolu 28:16) Mai ita haree tanbasá mak Paulo uza komparasaun neʼe. Ita mós sei koʼalia kona-ba buat neʼebé joven balu hatete kona-ba difikuldade no benefísiu husi tau ekipamentu ida-idak.

3, 4. Iha dalan saida mak lia-loos husi Bíblia hanesan soldadu Roma nia sintu?

³ Lee Éfeso 6:14. Soldadu Roma nia sintu taka ho besi hodi proteje soldadu nia knotak no neʼe ajuda besi todan neʼebé taka ninia hirus-matan atu la book an. Sintu neʼe forte no balu iha fatin atu sikat surik no tudik. Bainhira soldadu kesi-metin ninia sintu, nia bele fiar an hodi hamriik metin atu halo funu.

⁴ Lia-loos neʼebé ita aprende husi Maromak nia Liafuan mak hanesan sintu ida atu proteje ita husi hanorin falsu sira. (João 8:31, 32; 1 João 4:1) Se ita mak hadomi liután lia-loos husi Maromak nia Liafuan, neʼe sei halo fasil ba ita atu lori besi neʼebé taka ita-nia hirus-matan ho hahalok neʼebé loos ka Jeová nia morál sira. (Salmo [Mazmur] 111:7, 8; 1 João 5:3) No se ita mak komprende didiʼak lia-loos husi Maromak nia Liafuan, ita mós sei brani liután atu hamriik metin hodi defende lia-loos husi ema sira neʼebé kontra ita.​—1 Pedro 3:15

5. Tanbasá mak ita tenke koʼalia buat neʼebé loos iha tempu hotu?

⁵ Se ita mak kesi metin ita-nia an ho lia-loos husi Bíblia, neʼe sei book ita atu moris tuir lia-loos no sempre koʼalia buat neʼebé loos. Tanbasá mak ita lakohi bosok? Tanba lia-bosok mak Satanás nia armas ida neʼebé perigu tebes. Lia-bosok bele estraga ninia naʼin no mós ema seluk neʼebé fiar ba lia-bosok neʼe. (João 8:44) Tan neʼe, maski ita la perfeitu, ita hakarak hakaʼas an atu nunka bosok. (Éfeso 4:25) Neʼe la fasil. Abigail neʼebé tinan 18 hatete: “Dala ruma ita sente ladiʼak atu koʼalia buat neʼebé loos, liuliu se bosok bele ajuda ita atu sees husi situasaun susar.” Maibé tanbasá mak Abigail hakaʼas an atu koʼalia buat neʼebé loos? Nia dehan: “Se haʼu la bosok, haʼu sente iha konxiénsia neʼebé moos ba Jeová. No haʼu-nia inan-aman ho belun sira bele tau fiar ba haʼu.” Victoria neʼebé tinan 23 hatete: “Se Ita la bosok no defende Ita-nia fiar, karik ema sei haterus Ita. Maibé ita sempre hetan benefísiu neʼebé diʼak, hanesan Ita sai aten-brani liután, Ita sente besik liu ba Jeová, no ema seluk neʼebé hadomi Ita tau fiar ba Ita.” Ita haree ka lae tanbasá importante atu sempre kesi “sintu lia-loos nian”?

6, 7. Tanbasá mak hahalok neʼebé loos, ka Jeová nia morál kompara hanesan besi hirus-matan nian?

⁶ Besi neʼebé soldadu Roma uza hodi taka hirus-matan dala ruma iha tahan ida-idak neʼebé silu tuir ninia hirus-matan. Sira uza tali neʼebé halo husi animál kulit mak kesi-metin besi tahan ida-idak. Soldadu nia kabaas mós taka metin ho besi tahan ida-idak. Besi neʼe halo soldadu la bele book an ho livre, no nia presiza fó atensaun beibeik hodi besi sira-neʼe metin nafatin. Maibé besi neʼe proteje ninia fuan no orgaun seluk husi surik ka husi rama-oan.

⁷ Jeová nia morál neʼebé loos mak hanesan besi hirus-matan nian neʼebé bele proteje ita-nia “laran”. (Provérbios [Amsal] 4:23) Soldadu nunka hakarak troka besi neʼe ho besi neʼebé fraku. Hanesan neʼe mós, ita sei nunka hakarak troka Jeová nia morál neʼebé loos ho ita rasik nia hanoin kona-ba saida mak loos. Neʼe tanba ita-nia matenek latoʼo atu proteje ita-nia laran. (Provérbios [Amsal] 3:5, 6) Tan neʼe mak ita tenke fó atensaun beibeik ba besi hirus-matan nian hodi proteje nafatin ita-nia laran.

8. Tanbasá mak ita tenke halo tuir Jeová nia morál sira?

 ⁸ Dala ruma Ita sente katak Jeová nia morál hanetik Ita-nia liberdade ka fó todan ba Ita ka lae? Daniel neʼebé tinan 21 hatete: “Mestre no kolega eskola sira goza haʼu tanba haʼu moris tuir Bíblia nia morál. Ba tempu uitoan haʼu sente la fiar an no depresaun.” Maibé ohin loron nia sente oinsá? Nia dehan: “Ikusmai, haʼu haree katak halo tuir Jeová nia morál lori benefísiu oioin. Kolega sira-neʼe balu uza droga no balu para eskola. Triste tebes hodi haree sira-nia moris sai hanesan neʼe. Jeová proteje duni ita.” Madison neʼebé tinan 15 dehan: “La fasil atu halo tuir Jeová nia morál sira hodi la halo tuir kolega sira.” Maibé irmán neʼe halo saida? Nia dehan: “Haʼu tenke hanoin-hetan beibeik katak haʼu lori Jeová nia naran no tentasaun sira mak dalan neʼebé Satanás uza atu ataka haʼu. Bainhira haʼu manán hasoru susar ida, haʼu sente kontente.”

9-11. (a) Saida mak sapatu simbóliku neʼebé ema kristaun hatais? (b) Saida mak bele ajuda ita atu la sente taʼuk hodi haklaken?

⁹ Lee Éfeso 6:15. Se sapatu laiha, soldadu Roma la bele bá halo funu. Sapatu sira-neʼe halo husi animál nia kulit ho dalas tolu, tan neʼe forte tebes. Sapatu sira-neʼe mamar, tan neʼe soldadu sira bele laʼo ho diʼak no la monu.

¹⁰ Soldadu Roma sira hatais sapatu neʼebé ajuda sira hodi halo funu, sapatu simbóliku neʼebé ita hatais ajuda ita “atu haklaken liafuan diʼak dame nian”. (Isaías [Yesaya] 52:7; Roma 10:15) Maski nuneʼe, ita presiza aten-brani atu bele haklaken. Bo neʼebé tinan 20 hatete: “Uluk haʼu taʼuk atu haklaken ba kolega eskola sira. Karik tanba haʼu sente moe. Se haʼu hanoin fali, haʼu la hatene tanbasá haʼu presiza moe. Ohin loron haʼu gosta haklaken ba ema neʼebé tinan hanesan haʼu.”

¹¹ Joven barak sente katak, se sira prepara nanis, sira sei la sente taʼuk atu haklaken. Ita bele prepara oinsá? Julia tinan 16 hatete: “Haʼu rai livru sira iha pasta eskola, no rona didiʼak ba haʼu-nia kolega eskola sira-nia hanoin no fiar. Tuirmai haʼu hanoin kona-ba saida mak bele ajuda sira. Se haʼu prepara uluk, haʼu hatene oinsá atu ajuda sira.” Makenzie tinan 23 dehan: “Se Ita mak hatudu laran-diʼak no rona bainhira ema koʼalia, Ita bele hatene saida mak ema ho tinan hanesan Ita hasoru daudauk. Haʼu koko atu lee publikasaun sira neʼebé halo ba joven sira. Hodi nuneʼe haʼu bele hatudu informasaun ruma husi Bíblia ka husi jw.org neʼebé bele ajuda sira.” Prepara uluk atu haklaken mak hanesan hatais “sapatu” neʼebé sente mamar.

12, 13. Saida deʼit mak Satanás nia “rama-oan ho ahi”?

¹² Lee Éfeso 6:16. Soldadu Roma kaer eskudu kuadradu boot ida. Eskudu neʼe taka husi ninia kabaas toʼo ain-tuur hodi proteje nia husi surik, diman, no rama-oan.

¹³ Saida mak “rama-oan ho ahi” neʼebé Satanás uza hodi ataka ita? Karik nia uza lia-bosok kona-ba Jeová hodi ataka Ita. Satanás hakarak ita atu sente katak Jeová la hanoin ita no nia la hadomi Ita. Ida tinan 19 dehan: “Dala barak haʼu sente Jeová dook husi haʼu no nia lakohi sai haʼu-nia Belun.” Irmán neʼe halo saida  bainhira sentimentu neʼe mosu? Nia dehan: “Reuniaun sira hametin tebes haʼu. Uluk, haʼu nunka fó komentáriu iha reuniaun, tanba haʼu hanoin ema lakohi rona haʼu-nia komentáriu sira. Maibé agora haʼu prepara didiʼak no koko atu fó komentáriu rua ka tolu. Neʼe la fasil, maibé haʼu sente diʼak bainhira fó tiha komentáriu sira. Irmaun-irmán sira fó laran-manas tebes ba haʼu. Bainhira fila husi reuniaun, haʼu hatene Jeová hadomi haʼu.”

14. Ita aprende saida husi Ida nia esperiénsia?

¹⁴ Maski medida ba soldadu nia eskudu nunka troka, maibé husi Ida nia esperiénsia ita aprende katak, ita-nia fiar bele aumenta boot no mós bele sai menus, bele sai forte ka sai fraku. Neʼe depende ba ita. (Mateus 14:31; 2 Tesalónika 1:3) Ita tenke halo ita-nia “eskudu boot” fiar nian sai boot no forte liután hodi bele proteje ita!

15, 16. Iha dalan saida mak ita-nia esperansa hanesan kapasete ida?

¹⁵ Lee Éfeso 6:17. Soldadu Roma taka kapasete atu proteje ninia ulun, kakorok, no oin. Kapasete balu iha kaer fatin hodi soldadu bele kaer no lori iha liman.

¹⁶ Hanesan kapasete bele proteje soldadu nia kakutak, ita-nia “esperansa salvasaun nian” mós bele proteje ita-nia neon no kbiit atu hanoin. (1 Tesalónika 5:8; Provérbios [Amsal] 3:21) Esperansa ajuda ita atu tau fokus ba Jeová nia promesa sira no atu la sai laran-kraik kona-ba ita-nia problema sira. (Salmo  [Mazmur] 27:1, 14; Apóstolu 24:15) Maibé se ita hakarak esperansa neʼe atu proteje ita, ita tenke fiar duni ba esperansa neʼe. Ita tenke tau “kapasete” iha ita-nia ulun, laʼós lori deʼit iha liman.

17, 18. (a) Oinsá mak Satanás bele lasu ita atu hasai tiha kapasete neʼe? (b) Ita bele halo saida hodi hatudu katak ita la monu ba Satanás nia lasu?

¹⁷ Oinsá mak Satanás bele lasu ita atu hasai tiha kapasete neʼe? Hanoin toʼok saida mak nia koko atu halo ba Jesus. Satanás hatene katak Jesus sei sai liurai ba ema hotu. Maibé, Jesus tenkesér hetan uluk terus no mate. Tuirmai Jesus tenkesér hein toʼo Jeová nia tempu mak nia foin bele sai Liurai. Tan neʼe, Satanás promete ba Jesus katak, se Jesus adora nia dala ida deʼit, Jesus bele sai kedas liurai ba mundu tomak. (Lucas 4:5-7) Satanás mós hatene katak Jeová promete ona mai ita atu fó buat furak oioin iha mundu foun. Maibé ita presiza hein atu haree promesa neʼe sai realidade, no agora daudauk tenke hasoru problema barak. Tan neʼe, Satanás oferese oportunidade ba ita atu moris diʼak agora. Nia hakarak ita atu tau uluk ita rasik nia diʼak tuirmai mak Maromak nia Ukun.​—Mateus 6:31-33.

¹⁸ Joven barak la monu ba Satanás nia lasu neʼe. Porezemplu, Kiana neʼebé tinan 20 hatete: “Haʼu hatene katak iha dalan ida deʼit atu rezolve ita-nia problema hotu, neʼe mak Maromak nia Ukun.” Oinsá mak esperansa neʼe fó impaktu ba dalan neʼebé nia hanoin no halaʼo ninia moris? Esperansa neʼe ajuda nia atu hanoin-hetan beibeik katak buat hotu iha mundu neʼe temporáriu deʼit. Duké uza ninia forsa tomak atu buka serbisu diʼak iha mundu neʼe, Kiana uza ninia tempu no forsa hodi serbí Jeová.

19, 20. Oinsá mak ita bele aumenta matenek atu uza Maromak nia Liafuan?

¹⁹ Soldadu Roma sira kaer surik neʼebé naruk ho sentímetru 50. Soldadu sira matenek tebes kona-ba uza surik neʼe tanba loron-loron sira treinu oinsá atu kaer surik.

²⁰ Apóstolu Paulo kompara Maromak nia Liafuan hanesan surik ida. Jeová fó ona surik neʼe mai ita. Maibé ita presiza aprende uza surik neʼe ho matenek hodi defende ita-nia fiar ka hadiʼa dalan neʼebé ita hanoin. (2 Korinto 10:4, 5; 2 Timóteo 2:15) Oinsá mak ita bele aumenta matenek atu uza surik neʼe? Sebastian neʼebé tinan 21 hatete: “Bainhira haʼu lee Bíblia, haʼu sempre hakerek versíkulu ida husi kapítulu ida-idak. Haʼu halo lista kona-ba haʼu-nia eskritura favoritu sira.” Halo nuneʼe ajuda nia atu komprende liután Jeová nia hanoin. Daniel neʼebé temi uluk hatutan: “Bainhira haʼu lee Bíblia, haʼu hili versíkulu balu neʼebé haʼu bele uza hodi ajuda ema iha serbisu haklaken. Haʼu haree ema rona ho didiʼak bainhira sira haree katak Ita respeitu tebes Bíblia no hakaʼas an atu ajuda sira.”

21. Tanbasá mak ita la presiza taʼuk ba Satanás no anju aat sira?

²¹ Iha lisaun neʼe, ita lee oinsá joven barak hatudu katak ita la presiza taʼuk ba Satanás no anju aat sira. Maski sira iha forsa boot, maibé sira la forsa boot liu fali Jeová. Sira mós sei la moris ba nafatin. Durante Kristu nia Ukun ba Tinan Rihun Ida, Jesus sei sulan sira hodi sira la bele halo aat ba ema ida, no ikusmai sei harahun sira. (Apokalipse 20:1-3, 7-10) Ita hatene ita-nia inimigu, ninia lasu, no ninia planu. Ho Jeová nia ajuda, ita bele hamriik metin hodi kontra nia!