1, 2. (a) Tanbasá mak irmaun-irmán sira-nia laran-metin hodi haklaken beibeik iha fatin neʼebé ema barak lakohi rona fó laran-manas ba ita? (Haree dezeñu iha leten.) (b) Jesus hatete saida kona-ba haklaken iha ninia “rai rasik”? (Haree nota.)

SERGIO NO OLINDA mak feen-laʼen pioneiru ida iha Estadus Unidus. Sira idade 80 liu ona. Ikus-ikus neʼe, susar ba sira atu laʼo tanba ain moras. Maibé, iha tuku hitu dadeer, sira iha toman ba tinan barak ona hodi laʼo nafatin ba largu iha sidade laran neʼebé iha ema barak. Sira hein besik terminál bís ida no fahe ita-nia livru ba ema. Ema barak la liga sira, maibé Sergio no Olinda hamriik nafatin iha neʼebá no hatudu oin-midar ba ema sira neʼebé hateke ba sira. Iha meiudia sira laʼo fila fali ba uma. Tuku hitu dadeer-saan tuirmai sira bá fali terminál neʼe. Sira haklaken iha dalan neʼe semana ida dala neen durante tinan ida.

² Iha irmaun-irmán barak neʼebé laran-metin hanesan Sergio no Olinda neʼebé haklaken iha sira-nia haklaken-fatin ba tinan barak maski ema lakohi rona ba sira. Karik Ita-nia haklaken-fatin  mós hanesan neʼe. Se nuneʼe, ami gaba tebes Ita tanba Ita tahan no kontinua haklaken maski susar tebes atu halo nuneʼe. * Ita-nia ezemplu fó laran-manas ba irmaun-irmán barak, inklui balu neʼebé iha esperiénsia ba tinan barak ona. Katuas área balu dehan: “Bainhira haʼu haklaken hamutuk ho irmaun-irmán sira hanesan neʼe, haʼu sente sira-nia ezemplu fó forsa ba haʼu.” “Sira-nia laran-metin fó laran-manas ba haʼu atu tahan no fó aten-brani ba haʼu atu haklaken.” “Sira-nia ezemplu book tebes haʼu-nia laran.”

3. Ita sei koʼalia kona-ba pergunta tolu saida, no tanbasá?

³ Ita sei koʼalia kona-ba pergunta tolu iha lisaun neʼe: Tanbasá mak dala ruma ita sente laran-kraik? Fó fuan signifika saida? Saida mak bele ajuda ita atu tahan no fó fuan nafatin? Hetan resposta ba pergunta sira-neʼe bele fó laran-manas ba ita atu kontinua halaʼo serbisu haklaken neʼebé Jesus fó ba ita atu halo.

4. (a) Ema judeu barak nia hahalok ladiʼak halo Paulo sente oinsá? (b) Tanbasá mak Paulo sente nuneʼe?

⁴ Ita sente ona laran-kraik tanba ema iha Ita-nia haklaken-fatin lakohi rona ba mensajen kona-ba Maromak nia Ukun ka lae? Se nuneʼe, Ita sei komprende kona-ba Paulo nia sentimentu. Nia haklaken maizumenus ba tinan 30, no nia ajuda ona ema barak hodi sai Jesus nia dixípulu. (Apóstolu 14:21; 2 Korinto 3:2, 3) Maski nuneʼe, nia la konsege ajuda ema judeu barak atu sai ema kristaun. Sira barak lakohi rona ba Paulo no balu fó terus ba nia. (Apóstolu 14:19; 17:1, 4, 5, 13) Ema sira-neʼe nia hahalok ladiʼak halo Paulo sente oinsá? Nia dehan: “Haʼu laran-susar tebes no hanoin barak iha haʼu-nia laran.” (Roma 9:1-3) Tanbasá mak Paulo sente nuneʼe? Tanba nia gosta tebes haklaken no nia hadomi ema. Paulo hanoin tebes ema judeu sira no nia sente triste bainhira sira lakohi simu Maromak nia laran-sadiʼa.

5. (a) Saida mak book ita atu haklaken? (b) Tanbasá normál se dala ruma ita sente laran-kraik?

⁵ Ita mós hanesan Paulo, ita haklaken ba ema tanba ita hanoin sira no hakarak ajuda sira. (Mateus 22:39; 1 Korinto 11:1) Husi ita-nia esperiénsia rasik ita hatene katak serbí Jeová mak dalan neʼebé diʼak liu hotu ba moris. Ita hakarak ajuda ema seluk hodi haree katak sira-nia moris mós bele sai diʼak liután! Tan neʼe mak ita anima beibeik ema atu aprende lia-loos kona-ba Jeová no kona-ba ninia hakarak ba ema. Buat neʼebé ita halo, hanesan lori prezente furak ida ba sira no husu makaʼas ba sira: ‘Favór ida, simu bá.’ Tan neʼe mak bainhira ema lakohi simu prezente neʼe, ita sente ita-nia laran moras tebes hanesan Paulo. Ita sente hanesan neʼe laʼós tanba ita fiar-laek, maibé tanba ita hadomi tebes ema. Tan neʼe, maski dala ruma ita sente laran-kraik, ita haklaken nafatin. Karik ita konkorda ho Elena, nia pioneiru ba tinan 25 liu ona, nia dehan: “Haʼu sente susar tebes atu haklaken. Maski nuneʼe, haʼu gosta serbisu haklaken liu fali serbisu seluk.”

6. Ita sei buka resposta ba pergunta saida?

⁶ Tanbasá mak ita bele fiar katak ita bele hetan susesu iha fatin neʼebé deʼit bainhira ita haklaken? Atu hatán ba pergunta importante neʼe, mai ita haree ai-knanoik rua neʼebé Jesus konta kona-ba tansá presiza “fó  fuan”. (Mateus 13:23) Ai-knanoik primeiru mak kona-ba uvas-hun.

7. (a) Iha Jesus nia ai-knanoik, “toʼos-naʼin”, “uvas-hun”, no “sanak sira” reprezenta sé? (b) Ita presiza buka-hatene resposta ba pergunta saida?

⁷ Lee João 15:1-5, 8. Iha ai-knanoik neʼe, Jesus esplika katak Jeová mak “toʼos-naʼin”, Jesus rasik mak “uvas-hun”, no ninia dixípulu sira mak “sanak sira”. * Tuirmai Jesus hatete ba ninia apóstolu sira: “Haʼu-nia Aman hetan glória ho ida-neʼe, katak imi kontinua fó fuan barak no hatudu imi-nia an nuʼudar haʼu-nia dixípulu sira.” Entaun, fó fuan signifika saida? Iha ai-knanoik neʼe Jesus la esplika ho espesífiku kona-ba fuan neʼe refere ba saida, maibé nia fó sai informasaun ruma neʼebé bele ajuda ita atu buka-hatene resposta ba pergunta neʼe.

8. (a) Iha Jesus nia ai-knanoik, tanbasá mak “fó fuan” la koʼalia kona-ba ajuda ema sai Jesus nia dixípulu? (b) Jeová nunka husu ita atu halo saida?

⁸ Jesus koʼalia kona-ba ninia Aman hodi hatete: “Ai-sanak hotu husi haʼu neʼebé la fó fuan nia tesi tiha.” Neʼe hatudu katak Jeová simu deʼit ninia atan neʼebé fó fuan. (Mateus 13:23; 21:43) Tan neʼe, iha Jesus nia ai-knanoik, fó fuan la koʼalia kona-ba ajuda ema foun sai ninia dixípulu. (Mateus 28:19) Tanba selae, Testemuña laran-metin neʼebé seidauk ajuda ema ida atu sai Jesus nia dixípulu mak hanesan ai-sanak neʼebé la fó fuan. Maibé neʼe la loos. Tanbasá? Tanba ita la bele obriga ema atu sai Jesus nia dixípulu. No Jeová mak domin, nia nunka husu ita atu halo buat neʼebé ita la iha kbiit atu halo. Nia husu ita atu halo deʼit buat neʼebé ita bele halo.​—Deuteronômio (Ulangan) 30:11-14.

9. (a) Iha dalan saida mak ita bele fó fuan? (b) Tuirmai ita sei koʼalia kona-ba ai-knanoik saida?

⁹ Se nuneʼe, fó fuan signifika saida? Neʼe mak kona-ba serbisu neʼebé ita hotu iha kbiit atu halo. Serbisu saida mak Jeová fó ba ninia atan hotu atu halo? Neʼe mak haklaken liafuan diʼak kona-ba Maromak nia Ukun. * (Mateus 24:14) Neʼe hatudu sai iha Jesus nia ai-knanoik kona-ba toʼos-naʼin. Mai ita koʼalia kona-ba Jesus nia ai-knanoik segundu.

10. (a) Fini no rai iha Jesus nia ai-knanoik signifika saida? (b) Trigu-kain fó fuan ba saida?

¹⁰ Lee Lucas 8:5-8, 11-15. Husi Jesus nia ai-knanoik kona-ba toʼos-naʼin, Jesus esplika katak fini mak “Maromak nia liafuan”, ka mensajen kona-ba Maromak nia Ukun. Rai signifika ema nia laran. Fini neʼe monu ba rai diʼak, iha abut, sai buras, no sai ai-horis ida. Tuirmai ai-horis neʼe “fó fuan dala atus ida”. Se ai-horis neʼe mak trigu-kain ida, nia sei fó fuan ba saida? Trigu-kain kiʼik-kiʼik ka lae? Lae, trigu-kain neʼe sei fó fuan ba trigu-musan neʼebé neineik-neineik mak sei moris sai fali trigu-kain. Iha ai-knanoik neʼe, musan ida fó fuan ba atus ida. Oinsá mak ai-knanoik neʼe liga ho serbisu haklaken?

11. (a) Ai-knanoik kona-ba toʼos-naʼin hanorin saida ba ita kona-ba serbisu haklaken? (b) Iha dalan saida mak ita fó fuan ba musan foun?

¹¹ Foufoun ita-nia inan-aman ka Testemuña seluk mak hanorin ita kona-ba Maromak nia Ukun, neʼe hanesan sira kuda trigu-musan iha rai neʼebé diʼak. Sira kontente tebes hodi haree katak ita simu mensajen neʼe. Trigu-musan neʼe moris no sai buras ba beibeik toʼo nia prontu ona atu fó fuan. Hanesan ita koʼalia ona katak trigu-kain laʼós  atu fó fuan ba trigu-kain, maibé fó fuan ba trigu-musan, hanesan neʼe mós ho ita, ita laʼós fó fuan atu halo dixípulu foun, maibé musan foun. * Iha dalan saida mak ita fó fuan ba musan foun? Tempu ida-idak neʼebé ita fó sai mensajen kona-ba Maromak nia Ukun, neʼe hanesan ita kari fali musan neʼebé uluk kuda iha ita-nia laran. (Lucas 6:45; 8:1) Tan neʼe, bainhira ita la para hodi haklaken mensajen kona-ba Maromak nia Ukun, neʼe hatudu katak ita kontinua tahan no fó fuan.

12. (a) Ita aprende saida husi Jesus nia ai-knanoik kona-ba uvas-hun no toʼos-naʼin? (b) Lisaun husi Jesus nia ai-knanoik halo Ita sente oinsá?

¹² Ita aprende saida husi Jesus nia ai-knanoik kona-ba uvas-hun no toʼos-naʼin? Ita aprende katak “fó fuan” la depende ba ema rona ka la rona ba ita-nia mensajen, maibé depende ba ita-nia hakaʼas-an atu kontinua haklaken. Paulo mós koʼalia kona-ba buat neʼebé hanesan hodi dehan: “Ema ida-idak sei simu nia kolen tuir ninia serbisu rasik.” (1 Korinto 3:8) Jeová sei fó kolen ba ita-nia serbisu, laʼós kona-ba rezultadu husi ita-nia serbisu neʼe. Matilda pioneiru ona ba tinan 20, no nia dehan: “Hodi hatene katak Jeová fó kolen ba ita-nia hakaʼas-an halo haʼu sente kontente tebes.”

13, 14. Tuir Roma 10:1, 2, razaun saida deʼit mak book Paulo hodi nunka para atu haklaken?

¹³ Saida mak bele ajuda ita atu tahan no fó fuan nafatin? Mai ita koʼalia kona-ba Paulo nia ezemplu. Ita hatene katak Paulo sente triste tanba ema judeu sira lakohi simu mensajen kona-ba Maromak nia Ukun. Maibé Paulo la rende an hodi haklaken ba sira. Nia esplika ninia sentimentu kona-ba ema judeu sira-neʼe hodi dehan: “Tuir loloos haʼu hakarak ho laran no harohan ba Maromak atu ema Izraél sira hetan salvasaun. Basá haʼu fó sasin katak sira laran-manas ba Maromak; maibé laʼós tuir lia-loos kona-ba Maromak.” (Roma 10:1, 2) Entaun tanbasá mak Paulo kontinua haklaken?

 ¹⁴ Primeiru, Paulo hatete katak buat neʼebé book nia atu haklaken ba sira mak tanba nia “hakarak ho laran”. Nia hakarak tebes sira atu hetan salvasaun. (Roma 11:13, 14) Segundu, nia fó sai ninia “harohan ba Maromak” kona-ba sira. Paulo husu makaʼas ba Jeová atu ajuda ema judeu sira hodi hakarak simu mensajen kona-ba Maromak nia Ukun. Terseiru, Paulo dehan: “Sira laran-manas ba Maromak.” Paulo iha hanoin diʼak kona-ba ema no nia hatudu konfiansa katak ema sira-neʼe sei serbí Jeová. Nia hatene katak ema judeu sira neʼebé fó laran ba Maromak bele sai Kristu nia dixípulu neʼebé badinas hanesan nia.

15. Oinsá mak ita bele banati-tuir Paulo? Fó toʼok ezemplu balu.

¹⁵ Oinsá mak ita bele banati-tuir Paulo? Primeiru, ita presiza iha hakarak husi laran hodi buka sira neʼebé “prontu atu simu lia-loos neʼebé lori ba moris rohan-laek”. Segundu, ita harohan makaʼas ba Jeová atu ajuda ema neʼebé hakarak rona bainhira ita haklaken ba sira. (Apóstolu 13:48; 16:14) Neʼe mak buat neʼebé Silvana halo, nia pioneiru ona besik tinan 30. Nia dehan: “Antes haklaken iha uma ida-idak, haʼu halo orasaun ba Jeová atu husu nia ajuda haʼu hodi iha hanoin neʼebé pozitivu.” Ita mós halo orasaun ba Jeová atu husu ninia anju sira ajuda ita buka ema neʼebé hakarak rona. (Mateus 10:11-13; Apokalipse 14:6) Robert pioneiru ona ba tinan 30 liu dehan: “Serbisu hamutuk ho anju sira mak buat neʼebé furak tebes tanba sira hatene ema ida-idak nia situasaun.” Terseiru, ita hakarak hakaʼas an atu iha hanoin neʼebé diʼak kona-ba ema no hanoin pozitivu katak ema sei serbí Jeová. Irmaun Carl, katuas neʼebé hetan batizmu ba tinan 50 liu ona hatete: “Haʼu fó atensaun didiʼak ba sinál balu neʼebé hatudu katak ema iha duni interese, hanesan oin-midar, la hirus, ka husu pergunta ruma.” Se ita mak halo buat sira-neʼe, ita bele tahan no fó fuan nafatin hanesan Paulo.

16, 17. (a) Ita bele aprende lisaun saida husi Eclesiastes 11:6? (b) Ita-nia haklaken fó impaktu saida ba ema sira neʼebé haree ita?

¹⁶ Keta haluha katak ita-nia haklaken bele fó impaktu ba ema seluk maski haree hanesan ema la rona ba ita. (Lee Eclesiastes [Pengkhotbah] 11:6. *) Ema seluk nota ita. Sira bele haree katak ita hatais kabeer, hatudu respeitu, no diʼak ba ema hotu. Karik neʼe bele book sira, no neineik-neineik karik sira neʼebé hanoin sala kona-ba ita bele komesa iha fali hanoin neʼebé loos kona-ba ita. Sergio no Olinda sente hanesan neʼe duni.

¹⁷ Sergio dehan: “Ba tempu uitoan ami la bá largu tanba moras. Bainhira ami bá fali, ema neʼebé laʼo iha dalan hatete: ‘Saida mak akontese ba imi? Ami hanoin kona-ba imi.’” Ho oin-midar Olinda hatutan: “Xofér sira husi bís foti liman ba ami no hakilar husi bís hodi dehan: ‘Imi halo serbisu diʼak!’ Sira mós husu ami-nia revista sira.” Sergio no Olinda hakfodak tebes bainhira mane ida laʼo ba sira-nia karrosa hodi fó ai-funan ba sira no hatoʼo obrigadu ba serbisu neʼebé sira halo.

18. Tanbasá mak Ita hakarak tahan no fó fuan nafatin?

¹⁸ Ita envolve daudauk iha serbisu importante hodi fó “sasin ba nasaun hotu”, tan neʼe keta husik Ita-nia “liman deskansa” hodi fó sai ba ema kona-ba Maromak nia Ukun. (Mateus 24:14) Importante liu mak Ita sei hetan ksolok neʼebé boot tanba Ita halo Jeová sente kontente. Nia hadomi ema hotu neʼebé tahan no fó fuan nafatin!