1, 2. (a) Iha kalan antes Jesus mate, nia koʼalia saida ba ninia dixípulu sira? (Haree dezeñu iha leten.) (b) Tanbasá importante ba ita atu hanoin-hetan razaun tanbasá ita presiza haklaken? (c) Ita sei koʼalia kona-ba saida deʼit?

IHA kalan antes Jesus mate, nia koʼalia naruk hamutuk ho ninia apóstolu sira. Nia hakarak sira hatene katak nia hadomi tebes sira. Nia mós konta ba sira kona-ba ai-knanoik uvas-hun neʼebé ita koʼalia ona iha lisaun uluk. Jesus hakarak anima ninia dixípulu sira atu “kontinua fó fuan barak” hodi tahan nafatin no haklaken mensajen kona-ba Maromak nia Ukun.​—João 15:8.

² Jesus la fó-hatene deʼit saida mak ninia dixípulu sira presiza halo, maibé fó-hatene mós kona-ba tanbasá mak sira presiza haklaken nafatin. Importante mós ba ita atu hanoin-hetan tanbasá mak ita presiza haklaken nafatin. Hanoin kona-ba neʼe bele book ita atu tahan hodi fó “sasin ba nasaun hotu”. (Mateus 24:13, 14) Iha lisaun neʼe ita sei koʼalia kona-ba razaun haat husi eskritura tanbasá mak ita presiza haklaken. No ita mós sei koʼalia kona-ba prezente haat neʼebé Jeová fó hodi ajuda ita kontinua fó fuan.

3. (a) Tuir João 15:8, razaun saida mak importante liu hotu tanbasá ita haklaken? (b) Uvas iha Jesus nia ai-knanoik reprezenta saida, no tanbasá Jesus uza ai-knanoik neʼe?

³ Razaun importante liu tanbasá ita haklaken mak atu fó glória ba Jeová no halo santu ninia naran. (Lee João 15:1, 8.) Iha Jesus nia ai-knanoik kona-ba uvas-hun, nia kompara Jeová hanesan toʼos-naʼin ka jardineiru neʼebé kuda uvas. Jesus hatete katak nia rasik mak uvas-hun neʼe no ninia dixípulu mak sanak sira. (João 15:5) Tan neʼe, iha ai-knanoik neʼe, uvas reprezenta fuan sira neʼebé Jesus nia dixípulu sira fó ka serbisu haklaken neʼebé sira halo. Jesus hatete ba ninia apóstolu sira: “Haʼu-nia Aman hetan glória ho ida-neʼe, katak imi kontinua fó fuan barak.” Kuandu uvas-hun fó fuan neʼebé diʼak, neʼe lori glória ba toʼos-naʼin. Hanesan neʼe mós se ita hakaʼas an haklaken mensajen kona-ba Maromak nia Ukun, ita fó hahiʼi ka glória ba Jeová.​—Mateus 25:20-23.

4. (a) Iha dalan saida mak ita bele halo santu Maromak nia naran? (b) Ita sente oinsá kona-ba priviléjiu neʼebé Ita iha hodi halo santu Maromak nia naran?

⁴ Maromak nia naran santu ona. La iha buat seluk tan mak ita bele halo atu halo naran neʼe sai santu liu. Entaun, iha dalan saida mak ita-nia haklaken bele halo santu Maromak nia naran? Profeta Isaías hatete: “Jeová neʼebé ukun tropa lalehan nian mak Ida neʼebé imi tenke hafolin nuʼudar santu.” (Isaías [Yesaya] 8:13) Se ita hafolin ka hatudu respeitu ba Jeová nia naran liu fali naran sira seluk no ajuda ema seluk atu komprende katak naran neʼe santu, tuir loloos ita halo santu daudauk Jeová nia naran. (Mateus 6:9) Porezemplu, hodi hanorin ema kona-ba Jeová nia hahalok furak no hakarak sira, tuir loloos ita defende daudauk Jeová nia naran atu hatudu katak Satanás mak bosok-teen. (Gênesis [Kejadian] 3:1-5) Ita mós halo santu Maromak nia naran bainhira ita ajuda ema atu hatene katak Jeová mak merese atu “simu glória, hahiʼi no kbiit”. (Apokalipse 4:11) Rune neʼebé pioneiru ona ba tinan 16 hatete: “Haʼu agradese tanba haʼu hetan oportunidade hodi fó sasin kona-ba Kriadór. Neʼe halo haʼu hakarak haklaken beibeik.”

5. (a) Eskritura husi João 15:9, 10 temi razaun saida mak ita hakarak haklaken? (b) Jesus uza liafuan saida hodi énfaze katak ninia dixípulu sira presiza duni atu tahan?

⁵ Lee João 15:9, 10. Razaun segundu tanbasá ita hakarak haklaken mak tanba ita hadomi Jeová no Jesus. (Marcos 12:30; João 14:15) Jesus hatete ba ninia dixípulu sira katak sira tenke ‘hela nafatin iha ninia domin’. Tanbasá? Tanba nia hatene katak ninia dixípulu sira presiza tahan hodi kontinua moris nuʼudar kristaun neʼebé loos. Iha João 15:4-10, Jesus uza liafuan “hela nafatin” ba dala barak hodi ajuda ninia dixípulu sira komprende katak sira presiza duni atu tahan.

6. Ita bele halo saida hodi hatudu katak ita hakarak hela nafatin iha Kristu nia domin?

⁶ Ita bele halo saida hodi hatudu katak ita hakarak hela nafatin iha Kristu nia domin no atu nia simu ita? Liuhusi halo tuir nia mandamentu sira. Jesus husu ita atu halo deʼit buat neʼebé uluk nia mós halo. Nia dehan: “Haʼu mós halo tuir Aman nia ukun-fuan, no hela nafatin iha nia domin.” (João 15:10) Jesus hatudu duni ezemplu neʼebé diʼak ba ita.​—João 13:15.

7. Iha dalan saida mak hahalok halo tuir iha ligasaun ho domin?

⁷ Jesus esplika ho klaru katak hahalok halo tuir iha ligasaun ho domin. Nia dehan:  “Ema neʼebé hatene haʼu-nia ukun-fuan no halo tuir sira, ema neʼe mak hadomi haʼu.” (João 14:21) Jesus nia mandamentu sira mai husi ninia Aman, tan neʼe mak bainhira ita halo tuir Jesus nia mandamentu hodi haklaken, ita mós hatudu katak ita hadomi Jeová. (Mateus 17:5; João 8:28) Se ita hatudu ba Jeová no Jesus katak ita hadomi sira, sira-nia domin mós sei hela nafatin ho ita.

8, 9. (a) Tanba razaun saida tan mak ita hakarak haklaken? (b) Oinsá mak Jeová nia liafuan sira neʼebé temi iha Ezequiel 3:18, 19 no 18:23 book ita hodi kontinua haklaken?

⁸ Razaun terseiru tanbasá ita kontinua haklaken mak atu fó avizu ba ema seluk kona-ba Jeová nia loron. Bíblia bolu Noé nuʼudar “haklaken-naʼin”. (Lee 2 Pedro 2:5.) Ita bele fiar katak, antes Rai-Nabeen toʼo mai, Noé nia haklaken inklui mós fó avizu kona-ba Jeová atu halakon ema aat hotu. Tanbasá mak ita hatene? Tanba Jesus dehan: “Iha loron sira neʼebá antes rai-nabeen, ema han no hemu, mane no feto sira kaben, toʼo loron neʼebé Noé tama ba ró laran. No sira lakohi rona toʼo rai-nabeen mosu no halakon sira hotu, nuneʼe mós sei mosu iha tempu neʼebé Oan-Mane husi ema toʼo ona mai.” (Mateus 24:38, 39) Maski ema lakohi rona, Noé halo tuir nafatin Jeová ho laran-metin hodi haklaken mensajen avizu nian ba ema.

⁹ Ohin loron, ita haklaken mensajen kona-ba Maromak nia Ukun ba ema hodi fó oportunidade ba sira atu aprende kona-ba Jeová nia hakarak ba futuru. Hanesan Jeová, ita mós hakarak tebes ema atu fó atensaun ba mensajen neʼe hodi “kontinua moris”. (Ezequiel [Yehezkiel] 18:23) Iha tempu ita haklaken husi uma ba uma no iha fatin públiku, ita fó daudauk avizu ba ema katak Maromak nia Ukun sei mai no halakon mundu aat neʼe.​—Ezequiel (Yehezkiel) 3:18, 19; Daniel 2:44; Apokalipse 14:6, 7.

10. (a) Eskritura iha Mateus 22:39 temi razaun saida mak ita hakarak haklaken? (b) Konta toʼok oinsá mak Paulo no Silas ajuda guarda ida iha Filipe.

¹⁰ Razaun importante ida tan tanbasá ita hakarak haklaken nafatin mak tanba ita hadomi ema. (Mateus 22:39) Domin ba ema book ita atu kontinua haklaken tanba ita hatene katak ema nia hahalok no situasaun bele troka. Porezemplu, inimigu sira hatama Paulo no Silas ba komarka iha sidade Filipe. Maibé iha kalan-boot rai nakdoko makaʼas toʼo odamatan iha sela hotu nakloke. Guarda sai taʼuk tebes tanba hanoin katak dadur hotu halai ona no nia koko atu oho-an. Maibé Paulo hakilar ba nia: “Keta oho an!” Ikusmai guarda neʼe husu: “Saida mak haʼu tenke halo atu hetan salvasaun?” Paulo no Silas hatete ba nia atu “tau fiar ba Naʼi Jesus” hodi bele hetan salvasaun.​—Apóstolu 16:25-34.

11, 12. (a) Buat neʼebé akontese ba guarda iha Filipe hanorin saida ba ita kona-ba serbisu haklaken? (b) Tanbasá mak ita hakarak kontinua haklaken?

¹¹ Buat neʼebé akontese ba guarda hanorin saida ba ita kona-ba serbisu haklaken?  Ita nota ka lae katak, rai-nakdoko liutiha mak guarda neʼe troka ninia hanoin no buka ajuda? Hanesan neʼe mós, ema balu lakohi rona ba mensajen sira husi Bíblia, maibé bainhira susar ruma kona tiha sira, karik neʼe sei book sira atu troka sira-nia hanoin no buka ajuda. Porezemplu, karik ema balu lakon sira-nia serbisu derrepente ka foin soe-malu no neʼe halo sira hanoin barak. Karik ema seluk tan sente triste tanba sira foin kona moras neʼebé grave ka tanba ema ruma foin mate. Kuandu buat hanesan neʼe akontese, karik ema komesa husu pergunta barak kona-ba moris, pergunta sira neʼebé uluk sira nunka hanoin atu husu. Karik sira mós bele hanoin: ‘Saida mak haʼu tenke halo atu hetan salvasaun?’ Karik neʼe mak primeiravés sira hakarak rona mensajen neʼebé ita hatoʼo ba sira kona-ba esperansa ba moris.

¹² Tan neʼe mak se ita kontinua haklaken ho laran-metin, ita prontu atu haklaken ba ema bainhira sira presiza hetan kmaan. (Isaías [Yesaya] 61:1) Charlotte pioneiru ba tinan 38 ona, nia dehan: “Ohin loron ema la iha esperansa. Sira presiza hetan oportunidade atu rona ba liafuan diʼak.” Ejvor pioneiru ona ba tinan 34 no nia dehan: “Ohin loron, ema barak sente laran-susar. Haʼu hakarak atu ajuda sira. Neʼe book tebes haʼu atu haklaken.” Sin, domin ba ema mak razaun importante ida atu kontinua haklaken!

13, 14. (a) Prezente saida mak temi iha João 15:11? (b) Oinsá mak ita bele hetan ksolok neʼebé Jesus iha? (c) Oinsá mak ksolok bele ajuda ita iha serbisu haklaken?

¹³ Iha kalan antes Jesus mate, nia mós temi prezente balu neʼebé sei ajuda ninia apóstolu sira atu kontinua tahan no fó fuan. Prezente sira-neʼe mak saida, no oinsá mak prezente sira-neʼe bele ajuda ita ohin loron?

¹⁴ Prezente ksolok nian. Haklaken mak buat neʼebé todan ka lae? Lae. Bainhira Jesus koʼalia tiha ai-knanoik kona-ba uvas-hun, nia hatete katak ita bele hetan ninia ksolok liuhusi haklaken. (Lee João 15:11.) Oinsá? Iha Jesus nia ai-knanoik, nia kompara ninia an hanesan uvas-hun no ninia dixípulu sira hanesan sanak sira. Sanak neʼebé moris hela iha uvas-hun deʼit mak bele hetan bee no rai nia bokur. Hanesan neʼe mós se ita hamutuk nafatin ho Jesus no laʼo tuir ninia ain-fatin mak bele haksolok hanesan nia. Ksolok neʼe mai husi halo tuir Maromak nia hakarak. (João 4:34; 17:13; 1 Pedro 2:21) Hanne pioneiru ona ba tinan 40 liu no nia dehan: “Ksolok neʼebé haʼu hetan beibeik husi serbisu haklaken book haʼu atu kontinua halo Jeová nia serbisu.” Ksolok fó forsa ba ita atu kontinua haklaken maski ema barak lakohi rona ba ita.​—Mateus 5:10-12.

15. (a) Prezente saida mak temi iha João 14:27? (b) Oinsá mak dame bele ajuda ita atu kontinua fó fuan?

¹⁵ Prezente dame nian. (Lee João 14:27.) Iha kalan antes Jesus mate, nia hatete ba apóstolu sira: “Haʼu fó haʼu-nia dame ba imi.” Oinsá mak Jesus nia dame bele ajuda ita atu kontinua haklaken? Se ita mak kontinua haklaken, ita bele sente dame tanba ita hatene katak ita halo daudauk Jeová no Jesus kontente. No dame neʼe mak fó forsa ba ita atu tahan iha serbisu haklaken. (Salmo [Mazmur] 149:4; Roma 5:3, 4; Koloso 3:15) Ulf pioneiru ona ba tinan 45, nia dehan: “Maski serbisu haklaken halo haʼu kole, maibé haʼu haksolok no sente haʼu-nia moris iha folin.” Ita agradese tebes tanba hetan ona dame neʼebé sei hela ba nafatin!

16. (a) Prezente saida mak temi iha João 15:15? (b) Oinsá mak apóstolu sira bele sai Jesus nia belun ba nafatin?

 ¹⁶ Prezente belun nian. Bainhira Jesus hatete tiha ba apóstolu sira katak nia hakarak sira atu iha ksolok, nia esplika ba sira tanbasá importante atu hatudu domin neʼebé la hanoin an deʼit. (João 15:11-13) Tuirmai nia dehan: “Haʼu bolu imi belun sira.” Sai Jesus nia belun mak prezente neʼebé furak duni! Maibé oinsá mak apóstolu sira bele sai Jesus nia belun ba nafatin? Jesus esplika hodi dehan: “Kontinua fó fuan.” (Lee João 15:14-16.) Maizumenus tinan rua antes neʼe Jesus hatete ba apóstolu sira: “Bá hodi haklaken katak Ukun lalehan nian besik ona.” (Mateus 10:7) Tan neʼe mak iha kalan antes Jesus mate nia anima sira atu tahan hodi kontinua haklaken. (Mateus 24:13; Marcos 3:14) Jesus hatene katak neʼe la fasil. Maibé dixípulu sira bele halo serbisu neʼe no sai Jesus nia belun ba nafatin. Oinsá? Liuhusi prezente ida tan.

17, 18. (a) Prezente saida mak temi iha João 15:16? (b) Iha dalan saida mak prezente neʼe ajuda Jesus nia dixípulu sira? (c) Prezente saida mak ajuda ita ohin loron?

¹⁷ Prezente kona-ba Jeová hatán orasaun. Jesus dehan: “Buat naran deʼit neʼebé imi husu ba Aman hodi haʼu-nia naran, nia sei fó ba imi.” (João 15:16) Jesus nia promesa neʼe hametin tebes apóstolu sira. * Tuir loloos iha tempu neʼebá, apóstolu sira la hatene katak lakleur tan Jesus sei mate. Maski Jesus sei mate, maibé neʼe la dehan katak sira la hetan ona ajuda. Jeová prontu atu hatán ba sira-nia orasaun no ajuda sira iha serbisu haklaken. No Jeová halo hanesan neʼe duni. Jesus mate tiha lakleur, apóstolu sira husu ba Jeová atu fó aten-brani ba sira, no Jeová hatán duni sira-nia orasaun.​—Apóstolu 4:29, 31.

¹⁸ Ohin loron mós hanesan. Se ita tahan hodi kontinua haklaken, ita sai Jesus nia belun ba nafatin. Ita bele fiar katak Jeová prontu atu hatán ba ita-nia orasaun no ajuda ita bainhira hasoru susar ruma kona-ba haklaken. (Filipe 4:13) Ita agradese tebes ba Jeová tanba nia hatán ita-nia orasaun no ita bele sai Jesus nia belun. Prezente sira neʼebé Jeová fó, hametin duni ita atu kontinua fó fuan.​—Tiago 1:17.

19. (a) Tanbasá mak ita kontinua haklaken? (b) Saida mak ajuda ita atu halo serbisu neʼebé Maromak fó ba ita toʼo ramata?

¹⁹ Husi lisaun neʼe ita aprende ona kona-ba razaun haat tanbasá ita presiza kontinua haklaken. Razaun sira-neʼe mak atu fó glória ba Jeová no halo santu ninia naran, atu hatudu domin ba Jeová no Jesus, atu fó avizu ba ema, no atu hatudu katak ita hadomi ema. Ita mós aprende kona-ba prezente haat: ksolok, dame, belun, no Jeová hatán ita-nia orasaun. Prezente sira-neʼe fó forsa ba ita atu halo serbisu neʼebé Maromak fó ba ita toʼo ramata. Jeová kontente tebes bainhira nia haree ita serbisu ho badinas hodi “kontinua fó fuan barak”!