1. Inan-aman kristaun presiza hatene saida antes sira-nia oan atu hetan batizmu?

“HAʼU hatete ba haʼu-nia inan-aman fulan barak ona katak haʼu hakarak hetan batizmu, no sira koʼalia beibeik ho haʼu kona-ba haʼu-nia planu neʼe. Sira hakarak haʼu atu komprende katak, haʼu-nia desizaun neʼe sériu tebes. Loron 31 Dezembru 1934 haʼu hetan batizmu no neʼe mak loron neʼebé importante tebes iha haʼu-nia moris.” Neʼe mak buat neʼebé Blossom Brandt konta bainhira nia deside atu hetan batizmu. Ohin loron mós hanesan, inan-aman presiza ajuda oan atu halo desizaun matenek oioin. Se sira mak haruka oan demora hodi la bele hetan batizmu lalais, tan deʼit razaun neʼebé kiʼik, neʼe bele lori perigu ba oan nia relasaun ho Jeová. (Tiago 4:17) Antes oan atu hetan batizmu, inan-aman neʼebé matenek hakarak hatene didiʼak se sira-nia oan prontu duni ona ka lae atu sai Kristu nia dixípulu.

2. (a) Katuas área balu haree problema saida? (b) Ita sei koʼalia kona-ba saida iha lisaun neʼe?

² Katuas área balu haree katak, iha joven barak neʼebé besik tinan 20 toʼo tinan 23 seidauk hetan batizmu, maski sira aprende  no hatene lia-loos husi kiʼik kedas. Baibain joven sira-neʼe tuir reuniaun, bá haklaken, no haree sira-nia an nuʼudar Testemuña ba Jeová. Maski nuneʼe, sira seidauk dedika an ba Jeová no hetan batizmu. Iha situasaun balu, neʼe tanba inan-aman mak sente katak oan sira seidauk prontu atu hetan batizmu. Iha lisaun neʼe ita sei koʼalia kona-ba buat haat neʼebé halo inan-aman hanoin barak no hanetik sira atu ajuda sira-nia oan hodi hetan batizmu.

3. Blossom nia inan-aman hanoin barak kona-ba saida?

³ Blossom nia inan-aman neʼebé temi iha leten hanoin barak kona-ba nia tinan toʼo ona ka lae atu komprende batizmu katak sá no katak batizmu mak buat neʼebé sériu. Oinsá mak inan-aman bele hatene se sira-nia oan prontu ona ka lae atu dedika an ba Jeová?

4. Oinsá mak Jesus nia mandamentu neʼebé temi iha Mateus 28:19, 20 bele ajuda inan-aman?

⁴ Lee Mateus 28:19, 20. Bíblia la hatete ema presiza toʼo tinan hira mak foin bele hetan batizmu. Maski nuneʼe, karik diʼak ba inan-aman atu hanoin didiʼak kona-ba saida mak hakerek iha Mateus 28:19. Jesus fó mandamentu atu ‘hanorin ema atu sai ninia dixípulu’. Neʼe signifika katak hanorin ema ho objetivu ida atu ajuda nia sai estudante ka dixípulu ida. Dixípulu mak ema neʼebé aprende no komprende kona-ba Jesus nia hanorin no hakarak halo tuir nia. Tan neʼe mak, inan-aman presiza hanorin oan husi bebé kedas ho objetivu ida atu ajuda oan dedika an ba Jeová no atu sai Kristu nia dixípulu. Maski ita hatene katak bebé seidauk kumpre kritériu atu hetan batizmu, maibé Bíblia hatudu katak oan neʼebé sei kiʼik mós bele komprende no gosta lia-loos husi Bíblia.

5, 6. (a) Bíblia nia ezemplu kona-ba Timóteo ajuda ita atu komprende saida kona-ba batizmu? (b) Oinsá mak inan-aman neʼebé matenek bele ajuda sira-nia oan?

⁵ Timóteo mak dixípulu ida neʼebé foti desizaun hodi serbí Jeová bainhira nia sei joven. Apóstolu Paulo hatete katak Timóteo komesa aprende kona-ba lia-loos husi Maromak nia Liafuan “husi kiʼik kedas”. Timóteo nia aman la serbí Jeová, maibé ninia inan no avó-feto ajuda nia hodi iha domin ba Maromak nia Liafuan. Rezultadu husi neʼe mak Timóteo iha fiar neʼebé metin tebes. (2 Timóteo 1:5; 3:14, 15) Bainhira Timóteo maizumenus tinan 20, nia kumpre kritériu hodi simu knaar espesiál oioin iha kongregasaun.​—Apóstolu 16:1-3.

⁶ Labarik ida-idak la hanesan. Balu sai maduru lalais liu fali labarik seluk. Balu komprende lia-loos, halo desizaun ho matenek, no hakarak hetan batizmu maski sira idade kiʼik. Maibé, balu karik seidauk prontu atu hetan batizmu no presiza hein toʼo sira tinan boot tan uitoan. Duké obriga oan atu hetan batizmu, inan-aman neʼebé matenek ajuda oan laʼo ba oin tuir sira-nia kbiit. Inan-aman sira kontente bainhira oan halo tuir eskritura husi Provérbios 27:11. (Lee. *) Maibé inan-aman tenke hanoin-hetan beibeik katak sira-nia objetivu mak atu ajuda oan sai Kristu nia dixípulu. Ho objetivu ida-neʼe, sira tenke husu ba sira-nia an, ‘Haʼu-nia oan nia koñesimentu toʼo ona ka lae atu dedika an ba Maromak no hetan batizmu?’

7. Ema presiza hatene buat hotu kona-ba Bíblia atu bele hetan batizmu ka lae? Esplika toʼok.

⁷ Diʼak ba inan-aman atu hanorin oan hatene didiʼak kona-ba lia-loos. Koñesimentu neʼe bele ajuda oan atu dedika an ba Maromak. Maibé neʼe la dehan katak oan presiza hatene buat hotu husi Bíblia foin bele dedika ninia an no hetan batizmu. Tanba Jesus nia dixípulu hotu kontinua aprende maski hetan ona batizmu. (Lee Koloso 1:9, 10.) Entaun, ema ida presiza hatene kona-ba saida deʼit atu hetan batizmu?

8, 9. Saida mak akontese ba guarda ida iha sidade Filipe, no ita aprende saida husi ninia esperiénsia neʼe?

⁸ Esperiénsia husi família ida iha apóstolu sira-nia tempu bele ajuda inan-aman ohin loron. (Apóstolu 16:25-33) Iha tinan 50, bainhira Paulo halo hela ninia viajen segundu nuʼudar misionáriu, nia bá sidade Filipe. Ema iha sidade neʼe duun nia ho Silas, no kaer sira hodi hatama ba komarka. Iha kalan, rai-nakdoko makaʼas no odamatan iha sela hotu nakloke. Guarda hanoin katak dadur hotu halai ona, tan neʼe nia deside atu oho an. Maibé Paulo hapara nia. Liutiha neʼe, Paulo no Silas hanorin guarda ho ninia família lia-loos kona-ba Jesus. Sira tau fiar ba buat neʼebé sira aprende kona-ba Jesus no sira rekoñese katak sira tenke halo tuir Jesus. Tan neʼe sira hetan kedas batizmu. Ita bele aprende saida husi esperiénsia neʼe?

⁹ Karik guarda neʼe ema veteranu ida husi tropa Roma nian. Nia la hatene kona-ba Maromak nia Liafuan. Tan neʼe mak atu sai ema kristaun, nia presiza aprende lia-loos báziku husi Bíblia, komprende kona-ba saida mak Jeová hakarak ninia atan sira atu halo, no tenke halo tuir Jesus nia hanorin sira. Buat sira neʼebé nia aprende iha tempu badak nia laran ajuda duni nia hodi hakarak hetan batizmu. Maski nuneʼe, nia presiza aprende tan buat barak bainhira hetan tiha batizmu. Se nuneʼe, bainhira Ita-nia oan hatete ba Ita katak nia hakarak hetan batizmu tanba nia hadomi Jeová no hakarak halo tuir nia, Ita bele halo saida? Karik Ita bele husik nia koʼalia ho katuas kongregasaun sira hodi sira bele foti desizaun kona-ba nia kumpre kritériu ona ka lae atu hetan batizmu. * Hanesan ema kristaun hotu neʼebé hetan ona batizmu, Ita-nia oan presiza aprende tan buat barak kona-ba Jeová iha ninia moris tomak, no ba nafatin.​—Roma 11:33, 34.

10, 11. (a) Inan-aman balu sente oinsá? (b) Saida mak bele proteje Ita-nia oan?

¹⁰ Inan-aman balu sente katak diʼak liu husik sira-nia oan hetan uluk edukasaun diʼak ka serbisu diʼak depois mak foin hetan batizmu. Karik inan-aman sira-neʼe iha motivu neʼebé diʼak ba oan, maibé sira tenke husu ba sira-nia an: ‘Halo hanesan neʼe bele lori duni susesu ba oan nia moris ka lae? Bíblia hanorin ita atu halo hanesan neʼe ka lae? Oinsá mak Jeová hakarak ita uza ita-nia moris?’​—Lee Eclesiastes (Pengkhotbah) 12:1. *

¹¹ Importante atu hanoin-hetan katak mundu neʼe no buat sira iha mundu neʼe kontra Jeová nia hanoin no hakarak. (Tiago  4:7, 8; 1 João 2:15-17; 5:19) Relasaun diʼak ho Jeová mak protesaun neʼebé diʼak liu hotu atu kontra hasoru Satanás, mundu neʼe, no mundu nia hanoin aat sira. Se inan-aman mak tau uluk edukasaun ka serbisu, karik oan bele hanoin katak buat sira iha mundu neʼe mak importante liu fali sira-nia relasaun diʼak ho Jeová. Hanoin hanesan neʼe perigu. Se Ita mak hadomi Ita-nia oan, Ita hakarak husik mundu neʼe atu hanorin Ita-nia oan oinsá bele hetan susesu no ksolok ka lae? Dalan ida deʼit atu hetan susesu no ksolok neʼebé loos mak hodi tau uluk Jeová iha ita-nia moris.​—Lee Salmo (Mazmur) 1:2, 3. *

12. Tanbasá mak inan-aman balu hanoin diʼak liu oan lalika ansi atu hetan batizmu?

¹² Inan ida esplika tanbasá nia lakohi husik ninia oan-feto atu hetan batizmu. Nia dehan, “Haʼu sente moe atu fó-hatene katak haʼu-nia razaun mak haʼu hanoin barak kona-ba arranju hasai ema husi kongregasaun.” Hanesan irmán neʼe, inan-aman balu mós sente katak, diʼak liu hein sira-nia oan sai boot uitoan toʼo sira hatene oinsá atu hasees an husi sala mak foin hetan batizmu. (Gênesis [Kejadian] 8:21; Provérbios [Amsal] 22:15) Inan-aman sira-neʼe hanoin, se sira-nia oan seidauk hetan batizmu, kongregasaun lalika hasai sira. Maibé tanbasá mak hanoin hanesan neʼe sala?​—Tiago 1:22.

13. Se ema ida seidauk hetan batizmu, nia la presiza hatán ba Jeová, loos ka lae? Esplika toʼok.

¹³ Ita bele komprende inan-aman balu lakohi husik sira-nia oan atu hetan batizmu tanba oan seidauk prontu atu dedika ninia moris ba Jeová. Maibé se inan-aman hanoin katak, se oan seidauk hetan batizmu, nia lalika hatán ba Jeová kona-ba ninia hahalok sira, neʼe hanoin neʼebé sala. Tanbasá? Tanba bainhira oan ida hatene ona saida mak loos no sala, nia tenke hatán ba Jeová. (Lee Tiago 4:17.) Inan-aman neʼebé matenek lakohi hanetik oan atu hetan batizmu. Maski oan nia idade sei kiʼik, inan-aman hakarak hanorin nia liuhusi ezemplu no liafuan atu hadomi buat neʼebé loos tuir Jeová nia hanoin no odi buat neʼebé sala. (Lucas 6:40) Oan nia domin ba Jeová sei proteje nia atu la monu ba sala neʼebé sériu, tanba domin neʼe sei book nia atu halo buat neʼebé loos tuir Jeová nia haree.​—Isaías (Yesaya) 35:8.

14. Oinsá mak katuas kongregasaun sira bele apoia inan-aman atu ajuda oan?

¹⁴ Katuas kongregasaun sira bele apoia inan-aman liuhusi koʼalia pozitivu kona-ba halo planu espirituál. Irmán ida sei hanoin-hetan irmaun Charles T. Russell koʼalia ba nia bainhira nia foin tinan neen. Nia dehan, “Irmaun Russell uza minutu 15 hodi koʼalia ba haʼu kona-ba planu espirituál.” Neʼe lori rezultadu saida? Ikusmai irmán neʼe foti pioneiru no serbí ba tinan 70 liu nuʼudar pioneiru! Sin, liafuan neʼebé pozitivu no fó anima bele lori impaktu ba ema nia moris tomak. (Provérbios [Amsal] 25:11) Katuas kongregasaun sira mós bele konvida inan-aman ho sira-nia oan atu ajuda ho projetu ruma iha Reuniaun-Fatin. Sira bele fó knaar ba labarik sira atu halo, tuir sira-nia tinan no abilidade.

15. Oinsá mak ema seluk iha kongregasaun bele ajuda labarik sira?

 ¹⁵ Oinsá mak ema seluk iha kongregasaun bele ajuda? Ita bele fó atensaun ba oan sira-neʼe. Haree didiʼak ba labarik sira neʼebé hatudu lalaʼok ruma katak sira laʼo ba oin daudauk iha lia-loos. Porezemplu, nia hatoʼo komentáriu furak iha reuniaun, halaʼo parte ruma iha reuniaun loron baileet, haklaken iha eskola, ka foti desizaun ho matenek bainhira hetan tentasaun ruma. Se nia halo buat sira-neʼe, gaba kedas nia. Ita bele halo planu ida hodi koʼalia ba labarik sira antes reuniaun hahú no ramata. Se ita mak halo nuneʼe, labarik sira sei sente katak sira mós parte ida husi “kongregasaun boot nia leet”.​—Salmo (Mazmur) 35:18.

16, 17. (a) Tanbasá mak importante ba oan atu hetan batizmu? (b) Saida mak sei lori ksolok ba inan-aman kristaun sira? (Haree dezeñu iha pájina 8.)

¹⁶ Hanorin oan atu hadomi Jeová mak priviléjiu boot tebes ba inan-aman. (Salmo [Mazmur] 127:3; Éfeso 6:4) Iha Izraél antigu nia tempu, oan sira moris mai dedika ona ba Jeová. Maibé ita-nia oan la hanesan neʼe. Tan neʼe mak se inan-aman hadomi Jeová no lia-loos, neʼe la dehan katak oan mós sei halo tuir sira. Husi loron neʼebé oan moris, inan-aman tenke halo ona planu oinsá atu ajuda oan hodi sai Jesus nia dixípulu, dedika an ba Jeová no hetan batizmu. La iha buat seluk mak importante liu fali ida-neʼe. Tanba liuhusi ema nia dedikasaun, batizmu, no laran-metin hodi serbí Jeová mak sei fó oportunidade ba ema neʼe atu hetan salvasaun iha tempu terus boot akontese.​—Mateus 24:13.

¹⁷ Bainhira Blossom Brandt hakarak hetan batizmu, ninia inan-aman hakarak hatene ho loloos se nia prontu ona ka lae. No kuandu sira hatene katak nia prontu ona, sira mós apoia ninia desizaun neʼe. Blossom esplika fali ninia aman halo saida iha kalan antes nia atu hetan batizmu: “Ami hakneʼak hamutuk, no nia halo orasaun ba ami. Nia hatete ba Jeová katak nia sente kontente tebes kona-ba ninia oan-feto kiʼik neʼe nia desizaun atu dedika ninia moris ba Jeová.” Tinan 60 liutiha Blossom dehan: “Haʼu sei nunka haluha kona-ba kalan neʼe!” Sin, ba inan-aman sira neʼebé haree sira-nia oan dedika an no hetan batizmu hodi sai Jeová nia atan, sira mós sente kontente no haksolok tebes.