HAʼU sai boot iha sidade Graz, rai-Áustria. Bainhira haʼu tinan hitu, haʼu tuir eskola relijiaun ida. Maibé haʼu hakfodak tebes hodi haree padre no madre sira halo hahalok foʼer seksuál nian. Tan neʼe, latoʼo tinan ida, haʼu-nia inan husik haʼu sai husi eskola neʼe.

Ikusmai, haʼu tuir no hela iha eskola ida neʼebé dook husi inan-aman. Kalan ida, haʼu-nia apá mai lori haʼu ba fatin seguru tanba funu makaʼas iha Graz. Ami subar iha sidade Schladming. Iha tempu ami foin hakat liu ponte ida, ponte neʼe rabenta. Loron ida, aviaun sira semo badak tebes no koko tiru haʼu-nia avó-feto ho haʼu iha ami-nia kintál. Bainhira funu neʼe ramata, ami bele haree katak governu no mós igreja sira halo ami lakon ona fiar ba sira.

Iha 1950, ema ida husi Testemuña ba Jeová fahe mensajen husi Bíblia ba haʼu-nia inan. Haʼu rona tuir bainhira sira koʼalia ba malu no haʼu mós tuir haʼu-nia inan ba sira-nia reuniaun balu. Kuandu haʼu-nia inan hatene katak Testemuña ba Jeová mak hanorin lia-loos, nia hetan kedas batizmu iha 1952.

Iha tempu neʼebá, haʼu sente ami-nia kongregasaun hanesan fatin ba ema idade sira. Maibé ikusmai ami bá vizita kongregasaun ida neʼebé iha joven barak mak haʼu foin haree katak tuir loloos kongregasaun la hanesan neʼe! Bainhira fila fali ba Graz, haʼu komesa tuir reuniaun sira, no lakleur haʼu mós fiar katak buat neʼebé haʼu aprende daudaun mak lia-loos. Haʼu aprende katak Jeová mak Maromak neʼebé sempre fó apoiu ba ninia atan, no nia nunka halo ita lakon fiar ba nia, maski iha tempu neʼebé ita sente katak ita mesak hasoru daudaun situasaun neʼebé susar tebes.​—Salmo (Mazmur) 3:5, 6.

 Haʼu hakarak tebes fahe lia-loos ba ema seluk. Haʼu koko uluk ho haʼu-nia biin-alin no maun ida. Haʼu-nia biin naʼin-haat hanorin iha eskola no sira muda sai husi uma. Maibé haʼu bá vizita iha sira-nia fatin no anima sira atu estuda Bíblia. Ikusmai haʼu-nia biin-alin no maun neʼe, sira hotu estuda no sai Testemuña ba Jeová.

Iha haʼu-nia serbisu haklaken ba semana segundu, haʼu hasoru feto ida maizumenus tinan 30 liu no haʼu komesa estuda Bíblia ho nia. Nia laʼo ba oin toʼo hetan batizmu, no ikusmai ninia laʼen no oan-mane naʼin-rua mós hetan batizmu. Estuda neʼe hametin tebes haʼu-nia fiar. Tanbasá? Tanba la iha ema fó estuda Bíblia ho loloos ba haʼu. Haʼu tenke prepara didiʼak lisaun ida-idak. Haʼu tenke hanorin uluk haʼu-nia an hodi nuneʼe mak haʼu foin bele hanorin fali haʼu-nia estudante! Halo hanesan neʼe ajuda tebes haʼu hodi komprende liután lia-loos. Iha Abríl 1954, haʼu hetan batizmu hodi hatudu sai haʼu-nia dedikasaun ba Jeová.

Iha 1955, haʼu tuir reuniaun boot internasionál balu iha Alemaña, Fransa, no Inglaterra. Bainhira iha Londres, haʼu hasoru Albert Schroeder. Nia mak mestre Bíblia neʼebé hanorin iha Eskola Gilead, no ikusmai nia serbí nuʼudar membru ida iha Grupu Administradór. Iha tempu ami asiste muzeu Bretaña, irmaun Schroeder hatudu manuskritu Bíblia balu ba ami kona-ba Maromak nia naran ho letra ebraiku, no nia esplika tanbasá mak manuskritu sira-neʼe importante tebes. Neʼe book tebes haʼu-nia laran no halo haʼu hadomi liután Jeová no lia-loos. Haʼu mós hakarak liután atu fahe lia-loos ba ema seluk.

Haʼu hahú pioneiru iha 1 Janeiru 1956. Fulan haat liutiha, haʼu hetan konvite hodi serbí nuʼudar pioneiru tempu-tomak iha sidade Mistelbach, rai-Áustria. Iha tempu neʼebá, seidauk iha Testemuña iha sidade neʼe. Haʼu hasoru susar ida ho irmán pioneiru neʼebé hela hamutuk ho haʼu. Ami gosta halo buat neʼebé la hanesan. Haʼu besik tinan 19 no mai husi sidade; nia tinan 25, mai husi distritu. Haʼu gosta hadeer tarde; nia gosta hadeer sedu. Iha kalan haʼu gosta toba tarde; nia gosta toba sedu. Maski nuneʼe, uza Bíblia nia matadalan ajuda ami hodi serbisu hamutuk no hetan susesu iha ami-nia moris hamutuk nuʼudar pioneiru.

Ami mós hasoru susar boot seluk tan. Dala ruma ema fó terus ami, maibé ami la sente “mesak”. (2 Korinto 4:7-9) Loron ida ami haklaken hela iha fatin rurál, uma-naʼin sira kore sira-nia asu. Lakleur deʼit asu boboot neʼebé siʼak tebes hatenu no atu ataka ami. Ami kaer liman hamutuk, no haʼu halo orasaun hodi dehan, “Favór ida Jeová, se asu sira tata ami, halo ami mate kedas!” Bainhira asu sira besik loos ona atu tata ami, derrepente sira para, doko sira-nia ikun no fila fali ba fatin seluk. Ami sente katak Jeová mak proteje duni ami. Neʼe hotu tiha, ami kontinua haklaken ba knua tomak no ami hakfodak hodi haree katak ema hakarak rona. Karik tanba sira hakfodak haree asu la tata ami ka tanba ami la rende an hodi haklaken nafatin maski hasoru situasaun perigu neʼe. Ikusmai ema balu iha fatin neʼe sai Testemuña.

 Ami hasoru situasaun perigu ida tan. Loron ida ami-nia uma-naʼin fila uma ho lanu todan, nia ameasa atu oho ami tanba nia dehan katak ami interrompe viziñu sira-nia moris. Ninia feen koko atu halo kalma nia maibé la bele. Husi andár ami bele rona buat hotu neʼebé akontese daudaun. Ami tau lalais kadeira sira hodi satan odamatan no haloot ami-nia roupa. Bainhira ami loke odamatan, uma-naʼin hamriik hela iha eskada leten ho tudik boot ida. Tan neʼe ami halai husi odamatan kotuk liu husi jardín ho ami-nia sasán hotu, no nunka fila tan ba fatin neʼe.

Ami bá buka otél ida no hela iha neʼebá besik tinan ida. Hela iha otél neʼe diʼak tebes ba ami-nia haklaken. Tanbasá? Tanba otél neʼe iha sidade laran, no estudante Bíblia barak hakarak estuda iha neʼebá. Lakleur ami halaʼo Reuniaun Estudu Livru nian no Estudu Livru Haklaken semana-semana iha ami-nia kuartu no ema naʼin-15 mak tuir.

Ami hela iha sidade Mistelbach ba tinan ida liu. Tuirmai haʼu simu fali knaar hodi serbí iha sidade Feldbach, parte súl husi Graz. Haʼu hela fali ho pioneiru foun ida, maibé kongregasaun seidauk iha. Ami hela deʼit iha kuartu kiʼik ida iha andár. Uma neʼe halo husi ai, tan neʼe anin bele tama husi ai leet sira no ami koko sulan kuak sira-neʼe ho jornál. Ami mós presiza kuru bee husi bee-posu. Maibé halo buat hotu neʼe lori rezultadu diʼak, tanba fulan balu liutiha, ami harii grupu ida. Ikusmai ema naʼin-30 husi família ida neʼebé estuda Bíblia ho ami simu lia-loos!

Esperiénsia sira-neʼe halo haʼu agradese tebes ba Jeová nia apoiu neʼebé nia fó ba ema neʼebé tau uluk ninia Ukun no nia nunka halo ita lakon fiar ba nia. Maski iha tempu neʼebé ema la iha kbiit atu ajuda ita, maibé Jeová sempre prontu atu apoia ita.​—Salmo (Mazmur) 121:1-3.

Reuniaun boot internasionál ida atu halaʼo iha 1958 iha estádiu Yankee, sidade Novaiorke. Haʼu hatama formuláriu atu tuir reuniaun boot neʼe, maibé sukursál Áustria husu haʼu kona-ba haʼu iha interese ka lae atu tuir Eskola Gilead ba klase 32. Sé mak lakohi simu priviléjiu neʼe? Haʼu hatán kedas, “Hakarak!”

Iha Gilead haʼu tuur iha Martin Poetzinger nia sorin. Nia hasoru ona terus makaʼas iha Nazi nia komarka. Ikusmai nia mós serbí nuʼudar membru ida iha Grupu  Administradór. Iha klase laran, dala ruma Martin bisu-bisu ba haʼu dehan, “Erika, neʼe iha lian alemaun hatete saida?”

Eskola toʼo tiha klaran, irmaun Nathan Knorr fó sai kona-ba ami-nia knaar sira. Haʼu hetan knaar atu bá rai-Paraguai. Haʼu presiza hetan lisensa husi haʼu-nia aman atu bá rai neʼe tanba haʼu-nia idade sei kiʼik. Haʼu toʼo iha Paraguai iha fulan-Marsu 1959. Haʼu ho irmán ida hetan knaar hodi hela iha uma misionáriu ida iha sidade Asunción.

Lakleur haʼu hasoru misionáriu ida naran Walter Bright, nia tuir Eskola Gilead klase 30. Tempu balu liutiha, haʼu kaben ho nia hodi hasoru dezafiu seluk hamutuk. Iha tempu neʼebé ami hasoru problema boot balu, ami lee Jeová nia promesa iha Isaías (Yesaya) 41:10 neʼebé hatete: “Keta taʼuk tanba haʼu hamutuk ho ó. Keta laran-taridu tanba haʼu mak ó-nia Maromak. Haʼu sei hametin ó.” Liafuan sira-neʼe fó fiar ba ami katak, se ami laran-metin nafatin ba Maromak no tau uluk ninia Ukun, nia sei nunka halo ami lakon fiar ba nia.

Tempu balu liutiha, ami hetan fali knaar hodi serbí iha fatin neʼebé besik ho rai-Brazíl nia fronteira. Ami hela iha uma misionáriu ida neʼebé kondisaun ladún diʼak ona, maski nuneʼe padre sunu joven sira tuda ami-nia uma neʼe. Depois, Walter estuda Bíblia ho komandante polísia ida. Nia haruka polísia atu hein ami-nia uma durante semana ida, no ema sira neʼebé fó terus ami la halo tan problema ba ami. Lakleur, ami muda ba fatin diʼak ida iha fronteira Brazíl nia sorin bá. Mudansa neʼe diʼak tebes tanba ami bele halaʼo reuniaun iha Paraguai no Brazíl. Antes ami ramata ami-nia knaar, kongregasaun kiʼik rua mós harii iha fatin neʼe.

Uluk, doutór sira fó-hatene haʼu katak haʼu la bele hetan oan, tan neʼe iha 1962 ami hakfodak tebes hodi hatene katak haʼu sai isin-rua! Ikusmai ami muda bá hela iha Hollywood, Florida, besik Walter nia família. Ba tinan barak Walter no haʼu la bele serbí nuʼudar pioneiru tanba ami presiza tau matan ba família. Maski nuneʼe, ami kontinua tau uluk Maromak nia Ukun iha ami-nia moris.​—Mateus 6:33.

Bainhira ami toʼo iha Florida iha Novembru 1962, ami hakfodak hodi haree katak komunidade sira la gosta haree ema mutin no ema metan halibur hamutuk, tan neʼe irmaun sira halaʼo reuniaun no haklaken iha fatin ketaketak. Maibé Jeová la gosta haree ema todan ba sorin, tan neʼe, lakleur irmaun-irmán sira neʼebé kór la hanesan halibur hamutuk fali. Ita bele haree katak Jeová apoia arranju neʼe, tanba ohin loron kongregasaun barak harii ona iha área neʼe.

Triste tanba Walter mate iha 2015 ho moras kankru iha kakutak. Nia laʼen neʼebé diʼak tebes ba haʼu ba tinan 55 ona. Nia hadomi Jeová no gosta ajuda irmaun-irmán sira. Haʼu hein namanas atu hasoru fali nia ho saúde neʼebé diʼak bainhira hetan fali moris-hiʼas.​—Apóstolu 24:15.

Haʼu agradese tebes bele serbí Jeová tempu-tomak ba tinan 40 liu ho haksolok no hetan bensaun oioin. Porezemplu, Walter no haʼu iha oportunidade hodi asiste ami-nia estudante Bíblia naʼin-136 hetan batizmu. Maski ami hasoru susar oioin, maibé ami nunka husik susar sira-neʼe hapara ami atu serbí Maromak ho laran-metin. Ami hakbesik liután ba nia, no ami sempre fiar katak nia sei rezolve problema sira tuir ninia tempu no ninia dalan rasik. No nia halo nuneʼe duni!​—2 Timóteo 4:16, 17.

Haʼu hanoin tebes Walter, maibé serbisu pioneiru ajuda haʼu hodi tahan. Hanorin ema seluk no fahe esperansa moris-hiʼas ba sira fó impaktu diʼak tebes ba haʼu. Haʼu bele haree duni, Jeová nunka halo haʼu lakon fiar ba nia. Nia sempre kumpre ninia promesa hodi tau matan ba haʼu, no nia nunka husik ninia “liman-loos justisa nian”.​—Isaías (Yesaya) 41:10.