1, 2. Tanbasá mak importante atu fó laran-manas ba ema?

CRISTINA neʼebé tinan 18 dehan: “Haʼu-nia inan-aman ladún fó laran-manas ba haʼu, maibé dala barak liu sira kritika deʼit haʼu. Sira-nia liafuan dala ruma sona tebes haʼu-nia laran. Sira dehan katak haʼu hanesan labarik, beik, no bokur. Neʼe halo haʼu tanis beibeik no haʼu la gosta atu koʼalia ho sira. Haʼu sente haʼu-nia an la iha folin.” ^[1] (Haree nota husi lisaun.) Loos duni, se ema la fó laran-manas ba ita, neʼe bele halo ita sente ita-nia moris la iha folin!

² Maibé bainhira ita fó laran-manas ba ema, neʼe ajuda tebes sira. Rubén hatete: “Haʼu luta hasoru haʼu-nia sentimentu neʼebé halo haʼu sente la iha folin ba tinan barak ona. Maibé loron ida, haʼu haklaken hela ho irmaun katuas ida, no nia haree katak haʼu sente ladún kontente iha tempu neʼebá. Haʼu koʼalia sai haʼu-nia sentimentu ba nia no nia rona didiʼak ba haʼu. Tuirmai nia hatete ba haʼu katak haʼu halo ona buat barak neʼebé diʼak tebes. Nia mós fó-hanoin haʼu kona-ba Jesus nia liafuan katak ita ida-idak folin-boot liu fali manu-liin barak. Ikusmai haʼu sempre hanoin-hetan eskritura neʼe, no eskritura neʼe book tebes haʼu-nia laran. Irmaun katuas neʼe nia liafuan sira halo haʼu sente diʼak tebes kona-ba haʼu-nia moris.”—Mateus 10:31.

3. (a) Apóstolu Paulo koʼalia saida kona-ba fó laran-manas ba ema seluk? (b) Ita sei koʼalia kona-ba saida deʼit iha lisaun neʼe?

 ³ Bíblia hatete katak ita presiza fó laran-manas beibeik ba malu. Bainhira apóstolu Paulo hakerek karta ba ema kristaun ebreu, nia dehan: “Matan-moris bá, maun-alin sira, atu imi labele haburas laran-aat neʼebé la iha fiar hodi hadook an husi Maromak neʼebé moris; maibé kontinua fó laran-manas ba malu loron-loron, . . . atu nuneʼe imi-nia laran la sai toos tanba sala nia kbiit atu lohi.” (Ebreu 3:12, 13) Bainhira ema ida fó laran-manas ba ita, neʼe halo ita-nia laran sente kmaan tebes. Hanoin-hetan razaun neʼe ajuda ita atu komprende katak importante atu fó fali laran-manas ba ema seluk. Tan neʼe, mai ita koʼalia kona-ba pergunta sira tuirmai neʼe: Tanbasá mak importante atu fó laran-manas ba malu? Saida mak ita bele aprende husi dalan neʼebé Jeová, Jesus, no apóstolu Paulo fó laran-manas ba ema seluk? No iha dalan saida deʼit mak ita bele fó laran-manas ba malu?

4. Sesé deʼit mak presiza atu hetan laran-manas, maibé tanbasá mak ohin loron susar atu hetan laran-manas?

⁴ Ita hotu presiza hetan laran-manas husi ema seluk. Liuliu ba inan-aman, sira presiza fó laran-manas ba sira-nia oan. Mestre ida naran Timothy Evans esplika katak “oan sira presiza hetan laran-manas hanesan ai-horis presiza bee. Se oan mak hetan laran-manas, neʼe bele halo sira sente katak sira iha folin no ema respeitu sira”. Maibé hela iha loron ikus sira-neʼe, susar atu hetan laran-manas husi ema seluk, tanba ema hanoin an deʼit no “la hadomi malu”. (2 Timóteo 3:1-5) Inan-aman balu la fó laran-manas ba oan tanba bainhira sira rasik sei kiʼik, sira-nia inan-aman mós nunka fó laran-manas ba sira. Ema boot mós presiza hetan laran-manas. Porezemplu, ema barak muramura iha serbisu-fatin tanba ema nunka fó laran-manas kona-ba sira-nia serbisu.

5. Oinsá mak ita bele fó laran-manas ba ema?

⁵ Ita bele fó laran-manas ba ema liuhusi gaba sira kona-ba buat diʼak neʼebé sira halo. Ita mós bele fó laran-manas ba ema seluk hodi fó-hatene ba sira katak sira iha hahalok furak no fó kmaan ba sira neʼebé sente ladún kontente ka laran-tun. (1 Tesalónika 5:14) Ita sempre hamutuk ho ita-nia irmaun-irmán sira, tan neʼe ita iha oportunidade barak atu fó laran-manas ba sira. (Lee Eclesiastes [Pengkhotbah] 4:9, 10. *) Husu ba Ita-nia an: ‘Haʼu fó-hatene ba ema seluk katak haʼu hafolin no hadomi sira ka lae? Haʼu halo beibeik nuneʼe ka lae?’ Hanoin kona-ba liafuan sira husi eskritura neʼe: “Liafuan neʼebé koʼalia iha tempu loloos mak furak tebetebes!”—Provérbios (Amsal) 15:23.

6. Tanbasá mak Diabu hakarak halo ita laran-tun? Fó toʼok ezemplu ida oinsá mak nia halo nuneʼe.

⁶ Diabu Satanás hakarak halo ita laran-tun tanba nia hatene katak neʼe bele halo fraku ita-nia relasaun ho Jeová no halo ita kbiit-laek. Hodi nuneʼe mak eskritura iha Provérbios (Amsal) 24:10 dehan: “Se ó sai laran-tun iha tempu susar, ó-nia kbiit sei sai menus.” Satanás uza susar oioin hodi halo Job laran-tun, hanesan nia uza terus no duun Job. Maibé Job laran-metin nafatin ba Jeová. (Jó [Ayub] 2:3; 22:3; 27:5) Ita mós bele luta manán hasoru Satanás nia planu atu halo ita sente laran-tun. Kuandu ita mak kontinua fó laran-manas ba ema hotu iha ita-nia família laran no irmaun-irmán sira iha kongregasaun, ita bele apoia malu atu haksolok no hakbesik nafatin ba Jeová.

7, 8. (a) Ezemplu saida deʼit husi Jeová neʼebé hatudu katak importante atu fó laran-manas ba ema seluk? (b) Oinsá mak inan-aman bele banati-tuir Jeová nia ezemplu? (Haree dezeñu iha pájina 4.)

⁷ Ezemplu husi Jeová. Ema neʼebé hakerek  salmu dehan: “Jeová besik ba ema sira neʼebé laran-kanek; nia salva sira neʼebé laran-triste.” (Salmo [Mazmur] 34:18) Jeová halo nuneʼe duni, porezemplu bainhira profeta Jeremias sai taʼuk no laran-tun, Jeová fó anima hodi hametin fali nia. (Jeremias [Yeremia] 1:6-10) Jeová mós haruka anju ida atu hametin profeta Daniel neʼebé idade liu ona. Anju neʼe bolu nia “mane neʼebé folin-boot tebes”! (Daniel 10:8, 11, 18, 19) Ita mós bele banati-tuir Jeová nia ezemplu hodi fó laran-manas ba irmaun-irmán sira, inklui pioneiru no sira neʼebé idade ona ka lae?

⁸ Maski Jeová no Jesus hamutuk iha lalehan ba tinan barak tebes, maibé bainhira Jesus tun mai rai, Jeová hatene katak nia presiza atu fó nafatin laran-manas ba ninia Oan-Mane doben neʼe. Porezemplu, bainhira Jesus komesa ninia serbisu haklaken no durante ninia tinan ikus iha rai, Jeová koʼalia husi lalehan dala rua ba Jesus iha tempu neʼebé la hanesan hodi dehan: “Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.” (Mateus 3:17; 17:5) Ita bele fiar katak Jesus sente kmaan tebes hodi rona ninia Aman hatete ba nia katak Nia hadomi nia no sente orgullu tebes ba nia. Ikusmai, iha kalan antes Jesus mate, nia sente laran-susar tebes, no Jeová haruka anju ida mak tun ba atu hametin no fó laran-manas ba Jesus. (Lucas 22:43) Inan-aman sira bele banati-tuir Jeová nia ezemplu neʼe hodi fó laran-manas ba oan. Gaba oan bainhira sira halo buat neʼebé diʼak, no hakaʼas an atu hametin sira hodi ajuda sira tahan bainhira sira hasoru susar ruma husi eskola.

9. Ita bele aprende saida husi dalan neʼebé Jesus trata ninia apóstolu sira?

⁹ Ezemplu husi Jesus. Iha kalan antes nia mate, Jesus haree ninia apóstolu sira hatudu hahalok foti-an. Tan neʼe, ho haraik-an nia fase sira-nia ain no hatete ba sira katak sira mós tenke hatudu haraik-an. Maibé ninia apóstolu sira kontinua haksesuk malu nafatin kona-ba sé mak boot liu iha sira-nia leet. No Pedro gaba an ba Jesus katak nia sei nunka atu husik Jesus. (Lucas 22:24, 33, 34) Maski nuneʼe, Jesus la hanoin kona-ba hahalok fraku oioin neʼebé apóstolu sira hatudu. Nia gaba deʼit sira kona-ba sira-nia laran-metin ba nia. Nia fó-hatene ba sira katak sira sei halo buat barak liu fali nia, no nia fó laran-manas ba sira katak Jeová hadomi tebes sira. (Lucas 22:28; João 14:12; 16:27) Husu ba ita-nia an, ‘Haʼu halo tuir Jesus nia ezemplu ka lae hodi gaba hahalok diʼak husi ema seluk duké hanoin liu kona-ba sira-nia hahalok fraku sira?’

10, 11. Oinsá mak apóstolu Paulo fó laran-manas ba ema seluk?

¹⁰ Ezemplu husi apóstolu Paulo. Iha ninia karta sira, apóstolu Paulo sempre koʼalia diʼak kona-ba irmaun-irmán sira. Nia halo viajen beibeik ho sira balu ba tinan barak ona no nia mós koñese sira ho diʼak, maibé nia la hakerek kona-ba sira-nia fraku, nia hakerek liafuan gaba deʼit kona-ba sira. Porezemplu, nia hatete katak Timóteo mak ‘ida neʼebé nia hadomi no oan neʼebé laran-metin iha Naʼi’, no Paulo tau fiar ba Timóteo katak nia sei tau matan ba maluk fiar-naʼin sira ho laran. (1 Korinto 4:17; Filipe 2:19, 20) Paulo mós gaba Tito ba kongregasaun Korinto hodi dehan: “Nia mak haʼu-nia maluk serbisu-naʼin no ami halo serbisu hamutuk ba imi-nia diʼak.” (2 Korinto 8:23) Ita bele fiar Paulo nia liafuan sira-neʼe fó laran-manas tebes ba Timóteo no Tito tanba sira hatene Paulo hanoin tebes sira.

¹¹ Apóstolu Paulo ho Barnabé hakaʼas an hodi fó laran-manas ba maluk fiar-naʼin sira maski neʼe bele lori perigu ba sira-nia moris. Porezemplu, sira hatene katak ema iha sidade Listra hakarak oho sira, maibé sira bá nafatin sidade neʼe hodi fó laran-manas ba dixípulu foun atu ajuda sira laran-metin nafatin ba Jeová. (Apóstolu 14:19-22) Iha Éfeso, Paulo mós hasoru perigu husi ema-lubun neʼebé hirus, maibé ba tempu uitoan nia hela nafatin iha neʼebá hodi fó laran-manas ba irmaun-irmán sira. Apóstolu 20:1, 2 hatete:  “Kuandu sidade hakmatek ona, Paulo bolu dixípulu sira, no depois fó laran-manas tiha ba sira no fó adeus, nia hahú laʼo ba Masedónia. No nia vizita fatin balu iha área neʼe no koʼalia liafuan barak hodi fó laran-manas ba dixípulu sira iha neʼebá, no tuirmai nia laʼo ba Grésia.” Ba apóstolu Paulo, fó laran-manas ba ema mak buat neʼebé importante tebes atu halo.

12. Tanbasá mak diʼak ba ita atu tuir reuniaun sira?

¹² Razaun ida neʼebé Jeová hakarak ita atu bá tuir beibeik reuniaun mak atu aprende kona-ba nia no fó laran-manas ba malu. (Lee Ebreu 10:24, 25.) Jesus nia dixípulu iha apóstolu sira-nia tempu mós halo hanesan neʼe. (1 Korinto 14:31) Cristina, irmán neʼebé temi iha leten hatete: “Buat neʼebé haʼu gosta tebes kona-ba reuniaun sira mak haʼu bele hetan domin no laran-manas iha neʼebá. Dala ruma haʼu sente laran-tun, maibé bainhira haʼu toʼo iha Reuniaun-Fatin, irmán sira hakbesik haʼu, hakoʼak haʼu, no hatete katak haʼu bonita. Sira fó-hatene haʼu katak sira hadomi haʼu no sira kontente tebes hodi haree haʼu laʼo ba oin ho diʼak iha lia-loos. Liafuan sira neʼebé fó laran-manas halo haʼu sente laran kmaan tebes.” Tan neʼe mak importante tebes ba ita ida-idak atu fó laran-manas ba malu!—Roma 1:11, 12.

13. Tanbasá mak sira neʼebé serbí Jeová ba tempu kleur ona mós presiza atu hetan laran-manas?

¹³ Jeová nia atan sira neʼebé serbí nia ba tempu kleur ona mós presiza atu hetan laran-manas. Porezemplu, hanoin kona-ba Josué. Jeová hili nia atu lori ema Izraél hodi tama ba rai neʼebé Nia promete ona. No Jeová haruka Moisés atu fó laran-manas ba Josué maski Josué serbí Nia ba tinan barak ona. Jeová dehan: “Hili Josué no fó laran-manas ba nia no hametin nia, tanba nia mak ida neʼebé sei hakur mota neʼe iha povu nia oin no nia mak sei lori sira atu foti rai neʼebé ó sei haree.” (Deuteronômio [Ulangan] 3:27, 28) Josué presiza duni atu hetan laran-manas tanba tuirmai nia sei kaer responsabilidade boot hodi lori ema Izraél halo funu barak no pelumenus lakon dala ida. (Josué [Yosua] 7:1-9) Hanesan neʼe mós ohin loron, ita presiza fó laran-manas ba katuas kongregasaun no katuas área nian tanba sira hakaʼas an atu tau matan ba Maromak nia bibi. (Lee 1 Tesalónika 5:12, 13.) Katuas área ida hatete: “Dala ruma irmaun-irmán sira hakerek karta hodi fó agradese katak ami-nia vizita fó ksolok ba sira. Ami sempre rai karta sira-neʼe no bainhira ami sente laran-tun, ami lee fali. Neʼe fó laran-manas tebes ba ami.”

14. Tanbasá mak gaba no fó laran-manas importante bainhira atu fó konsellu ruma?

¹⁴ Apóstolu Paulo gaba kongregasaun Korinto tanba bainhira nia fó konsellu, sira halo tuir konsellu sira-neʼe. Ninia liafuan fó laran-manas ba sira atu kontinua halo buat neʼebé loos. (2 Korinto 7:8-11) Ohin loron, katuas no inan-aman sira mós bele banati-tuir Paulo nia ezemplu. Andreas  iha oan naʼin-rua, nia dehan: “Fó laran-manas ajuda oan atu laʼo ba oin iha lia-loos no ajuda sira atu sente seguru ho sira-nia moris. Fó laran-manas ajuda sira halo tuir konsellu. Maski haʼu-nia oan sira hatene saida mak loos, maibé liuhusi fó laran-manas, neʼe fasil ba sira atu halo tuir buat neʼebé loos.”

15. Iha dalan saida mak ita bele fó laran-manas ba ema seluk?

¹⁵ Fó-hatene ba irmaun-irmán sira katak ita hafolin sira-nia hakaʼas-an no hahalok furak sira. (2 Crônicas [Tawarikh] 16:9; Jó [Ayub] 1:8) Jeová no Jesus hafolin tebes buat hotu neʼebé ita halo hodi fó apoia ba Maromak nia Ukun, maski ita bele halo deʼit buat neʼebé tuir ita-nia kbiit. (Lee Lucas 21:1-4; 2 Korinto 8:12.) Porezemplu, ita hatene katak irmaun-irmán balu neʼebé idade ona hakaʼas an tebes hodi bele tuir beibeik reuniaun no bá haklaken. Ita fó laran-manas no gaba sira kona-ba buat sira neʼebé sira halo ka lae?

16. Tanbasá mak ita tenke uza oportunidade neʼebé ita iha atu fó laran-manas ba ema seluk?

¹⁶ Buka oportunidade atu fó laran-manas ba ema seluk. Bainhira ita haree ema ida halo buat neʼebé diʼak, gaba sira. Neʼe mak buat neʼebé akontese ba apóstolu Paulo ho ninia belun Barnabé bainhira sira iha sidade Antiokia, iha Pisídia. Sinagoga nia ulun-naʼin hatete ba sira: “Maluk sira, se imi iha liafuan ruma atu fó laran-manas ba povu, bele fó-hatene bá.” Apóstolu Paulo aproveita duni oportunidade neʼe atu fó laran-manas ba ema hodi hatoʼo diskursu ida. (Apóstolu 13:13-16, 42-44) Se ita mak uza oportunidade sira atu fó laran-manas ba ema, sira mós sei fó fali laran-manas ba ita.—Lucas 6:38.

17. Ita tenke gaba ema iha dalan saida?

¹⁷ Fó laran-manas kona-ba buat espesífiku no ho laran. Bainhira Jesus gaba ema kristaun sira iha Tiatira, nia la koʼalia jerál deʼit, maibé nia temi kona-ba buat diʼak ida-idak neʼebé sira halo. (Lee Apokalipse 2:18, 19.) Oinsá mak ita bele banati-tuir Jesus nia ezemplu neʼe? Karik ita bele fó-hatene ba inan neʼebé haboot oan mesak katak ita hafolin tebes dalan neʼebé nia haboot ninia oan maski neʼe susar ba nia. Ka se ita mak inan-aman, karik ita bele fó-hatene ba oan katak ita hafolin tebes sira-nia hakaʼas-an hodi laʼo ba oin iha lia-loos. Se ita mak gaba no fó laran-manas ba ema kona-ba buat espesífiku neʼebé sira halo, neʼe sei ajuda tebes sira-nia moris.

18, 19. Oinsá mak ita bele ajuda malu atu hakbesik nafatin ba Jeová?

¹⁸ Ohin loron, Jeová la koʼalia ba ita atu fó laran-manas ba ema ruma hanesan nia koʼalia ba Moisés atu fó laran-manas ba Josué. Maibé Jeová sente haksolok tebes bainhira nia haree ita hakaʼas an hodi fó laran-manas ba ema seluk. (Provérbios [Amsal] 19:17; Ebreu 12:12) Porezemplu, bainhira irmaun ida hatoʼo tiha diskursu públiku, karik ita bele fó-hatene nia katak ninia diskursu ajuda ita oinsá atu tahan hasoru problema ruma ka ajuda ita komprende kona-ba eskritura ruma. Iha irmaun ida neʼebé hatoʼo tiha diskursu, irmán ida hakerek karta ba nia hodi fó agradese ba ninia diskursu neʼebé ajuda tebes nia. Nia dehan: “Haʼu sente Ita-nia liafuan sira hanesan Jeová nia prezente ida mai haʼu. Ita-nia liafuan sira fó kmaan tebes mai haʼu kona-ba haʼu-nia susar sira.”

¹⁹ Ita bele ajuda malu atu hakbesik ba Jeová se ita halo tuir apóstolu Paulo nia konsellu neʼe: “Kontinua fó aten-brani ba malu no hametin malu, hanesan imi halo daudaun ona.” (1 Tesalónika 5:11) Loos duni, se ita mak “kontinua fó laran-manas ba malu loron-loron”, ita sei halo Jeová kontente tebes!