Ita buka daudaun protesaun husi Jeová ka lae?
“Jeová sei salva ninia atan sira-nia moris; Nia sei fó perdua ba ema hotu neʼebé buka protesaun husi nia.”—SALMO (MAZMUR) 34:22.
KNANANUK: 49, 32
1. Tanba sala, neʼe halo Maromak nia povu barak sente oinsá?
APÓSTOLU PAULO dehan: “Haʼu kasian loos duni!” (Roma 7:24) Ohin loron, Maromak nia atan barak sente laran-kraik no estrese hanesan Paulo, tanbasá? Tanba maski ita hotu hakarak Jeová simu ita, maibé ita moris mai iha sala no la perfeitu. Tan neʼe ita bele sente laran-kraik bainhira ita halo buat neʼebé Jeová la simu. Ema kristaun balu neʼebé monu ba sala boot sente katak Jeová sei nunka fó perdua ba sira.
2. (a) Oinsá mak Salmo 34:22 hatudu katak Maromak nia atan sira la presiza fó sala beibeik sira-nia an? (b) Ita sei aprende saida iha lisaun neʼe? (Haree kaixa “ Lisaun ka símbolu?”)
2 Eskritura sira fó fiar ba ita katak, se ita mak buka protesaun husi Jeová, nia sei fó perdua ba ita. (Lee Salmo [Mazmur] 34:22. *) Maibé buka protesaun husi Jeová katak sá? Ita presiza halo saida se ita hakarak Jeová hatudu laran-sadiʼa no fó perdua ba ita? Ita bele hetan resposta ba pergunta sira-neʼe husi arranju kona-ba sidade protesaun iha Izraél antigu nia tempu. Arranju neʼe mak parte husi aliansa Ukun-Fuan neʼebé ramata iha loron Pentekostes tinan 33. Ita hatene katak Ukun-Fuan neʼe mai husi Jeová. Tan neʼe, husi arranju kona-ba sidade protesaun, ita bele aprende Jeová nia haree kona-ba sala, ema neʼebé halo sala, no ema neʼebé arrepende an. Ulukliu, mai ita buka-hatene tanbasá ema Izraél presiza sidade protesaun no arranju neʼe kona-ba saida deʼit.
“HILI SIDADE SIRA BA IMI-NIA AN RASIK HODI SAI SIDADE PROTESAUN NIAN”
3. Ema Izraél tenke halo saida ba ema neʼebé oho ema seluk ho neon?
3 Ba Jeová, bainhira ema oho ema seluk ho neon, neʼe mak buat neʼebé sériu tebes. Se ema Izraél ida mak oho ema ho neon, vítima nia família mane neʼebé besik sei oho fali ema neʼe. (Números [Bilangan] 35:19) Hodi nuneʼe, ema neʼe selu fali nia rasik nia moris ba vítima neʼebé la halo sala. Se sira la oho kedas ema neʼebé oho ema seluk, neʼe sei hafoʼer rai neʼebé Jeová promete, ka halo rai neʼe la santu ona. Jeová fó mandamentu ba sira: “Imi labele hafoʼer rai neʼe neʼebé imi hela bá, tanba [fakar ema nia] raan mak hafoʼer rai neʼe.”—Números (Bilangan) 35:33, 34.
4. Saida mak akontese se ema Izraél oho ema ida la ho neon?
4 Maibé oinsá ho ema Izraél neʼebé oho ema la ho neon? Maski asidente mak halo ema ida mate, maibé ema neʼe sala nafatin tanba oho ona ema neʼebé la halo sala. (Gênesis [Kejadian] 9:5) Iha situasaun hanesan neʼe, Jeová dehan katak bele hatudu laran-sadiʼa ba ema neʼe. Nia bele halai husi vítima nia família no bá hela iha sidade protesaun nian. Maibé nia tenke hela iha sidade protesaun toʼo amlulik boot mate atu nia bele hetan protesaun.—Números (Bilangan) 35:15, 28.
5. Tanbasá mak arranju kona-ba sidade protesaun bele ajuda ita komprende diʼak liután kona-ba Jeová?
5 Arranju kona-ba sidade protesaun sira mai husi Jeová, laʼós ema. Jeová fó mandamentu ba Josué: “Hatete ba ema Izraél, ‘Hili sidade sira ba imi-nia an rasik hodi sai sidade protesaun nian.’” Jeová mak haketak sidade sira-neʼe sai nuʼudar sidade santu. (Josué [Yosua] 20:1, 2, 7, 8) Tanba arranju neʼe mai husi Jeová, ita bele aprende buat barak kona-ba nia. Porezemplu, neʼe ajuda ita atu komprende diʼak liután kona-ba Jeová nia laran-sadiʼa. No arranju neʼe mós hanorin ita oinsá ita bele buka protesaun husi Jeová ohin loron.
NIA TENKE “FÓ SAI NINIA KAZU” BA KATUAS SIRA
6, 7. (a) Katuas sira iha knaar atu halo saida bainhira tesi-lia ba ema neʼebé oho ema seluk la ho neon? (Haree dezeñu iha pájina 8.) (b) Tanbasá mak diʼak ba ema neʼebé oho ema seluk la ho neon atu koʼalia ba katuas sira?
6 Se ema Izraél oho ema ida la ho neon, nia tenke halai ba sidade protesaun no “fó sai ninia kazu” ba katuas sira iha sidade nia portaun. Katuas sira tenke simu nia. (Josué [Yosua] 20:4) Liutiha tempu balu sira sei haruka fali ema neʼe ba katuas sira iha sidade neʼebé nia oho ema atu halaʼo tesi-lia. (Lee Números [Bilangan] 35:24, 25. *) Se katuas sira foti desizaun katak mate neʼe akontese tanba asidente deʼit, sira sei haruka fali ema neʼe ba sidade protesaun.
7 Tanbasá mak ema neʼe presiza koʼalia ba katuas sira? Atu katuas sira bele proteje kongregasaun Izraél moos nafatin no mós ajuda ema neʼebé oho ema seluk la ho neon atu hetan Jeová nia laran-sadiʼa. Matenek-naʼin ida kona-ba Bíblia hatete katak, se ema neʼe la halai ba katuas sira, ema bele oho nia. No se ida-neʼe mak akontese, neʼe ninia sala rasik tanba nia la halo tuir buat neʼebé Maromak haruka nia atu halo. Ema neʼebé oho ema seluk la ho neon tenke buka ajuda no halo tuir hodi bele moris nafatin. Se nia mak la halai ba sidade protesaun ida, família besik husi vítima iha liberdade atu oho fali nia.
8, 9. Tanbasá mak ema kristaun neʼebé monu ba sala boot tenke koʼalia ba katuas sira?
8 Ohin loron, ema kristaun neʼebé monu ba sala boot presiza buka ajuda husi katuas sira hodi sira bele ajuda nia atu iha fali relasaun diʼak ho Jeová. Tanbasá mak importante atu halo nuneʼe? Tanba, primeiru, Jeová mak arranja katuas sira atu tau matan ba kazu kona-ba sala neʼebé boot. (Tiago 5:14-16) Segundu, katuas sira bele ajuda ema neʼebé arrepende an atu Maromak simu fali nia no atu la halo fali sala neʼebé hanesan. (Galásia 6:1; Ebreu 12:11) Terseiru, katuas sira simu ona knaar no treinu atu ajuda ema neʼebé arrepende an atu la lori tan sala nia todan no la fó sala tan ba sira-nia an kona-ba sala neʼebé nia halo. Jeová bolu katuas sira-neʼe hanesan “subar-fatin husi anin”. (Isaías [Yesaya] 32:1, 2) Arranju neʼe mak dalan ida neʼebé Maromak hatudu ninia laran-sadiʼa ba ita.
9 Maromak nia atan barak sente duni katak, koʼalia ba katuas no simu sira-nia ajuda, fó kmaan tebes ba sira. Porezemplu, irmaun ida naran Daniel monu ba sala neʼebé boot, maibé fulan balu liu ona nia seidauk bá koʼalia ho katuas sira. Nia dehan: “Husik tiha ba tempu naruk, haʼu hanoin katuas sira la bele halo tan buat ida atu ajuda haʼu.” Maski nuneʼe, nia sempre sente taʼuk katak ema ruma sei hatene kona-ba ninia sala neʼe, no bainhira nia halo orasaun, nia sente katak, nia tenke husu uluk Jeová nia perdua. Ikusmai, nia buka duni ajuda husi katuas sira. Agora nia hanoin fali ba tempu uluk, nia dehan: “Haʼu taʼuk duni atu hakbesik ba katuas sira. Maibé bainhira hetan tiha ajuda husi sira, haʼu sente hanesan ema ida foti sai tiha buat todan ida husi haʼu-nia kabaas. Agora haʼu sente livre fali atu koʼalia ho Jeová.” Ohin loron Daniel sente iha konxiénsia neʼebé moos, no foin daudaun neʼe nia simu knaar hodi serbí nuʼudar atan ba kongregasaun.
“NIA TENKE HALAI BA SIDADE SIRA-NEʼE IDA”
10. Ema neʼebé oho ema seluk la ho neon tenke halo saida atu bele hetan perdua?
10 Ema neʼebé oho ema seluk la ho neon tenkesér halai ba sidade protesaun neʼebé besik liu nia atu bele hetan perdua. (Lee Josué [Yosua] 20:4. *) Ninia moris depende ba nia atu halai ba sidade neʼe no hela iha neʼebá toʼo amlulik boot mate. Halo nuneʼe mak sakrifísiu boot tebes ba nia, tanba nia tenke husik hela ninia serbisu, uma, no la iha tan liberdade atu bá fatin seluk. * (Números [Bilangan] 35:25) Maibé halo sakrifísiu sira-neʼe importante ba ninia moris. Se nia mak sai husi sidade neʼe, neʼe hatudu katak nia la interese hodi oho ona ema seluk, no nia mós bele tau nia rasik nia moris iha perigu laran.
11. Ema kristaun neʼebé arrepende an tenke halo saida hodi hatudu katak nia agradese tebes ba Maromak nia laran-sadiʼa?
11 Ohin loron, ema neʼebé arrepende an mós tenke halo buat balu atu Maromak fó perdua ba nia. Nia tenke husik tiha ninia hahalok sala neʼe, inklui hasees an husi sala kiʼik neʼebé lori nia ba sala boot. Apóstolu Paulo esplika buat neʼebé ema kristaun sira iha Korinto halo, nia dehan: “Haree toʼok ba buat diʼak neʼebé imi hetan hodi sai triste tuir Maromak: Ida-neʼe book imi atu badinas, hamoos imi-nia an, laran-nakali kona-ba sala, sai taʼuk, hakarak tebes atu hakribi sala, sai laran-manas, halo loos buat neʼebé sala!” (2 Korinto 7:10, 11) Tan neʼe, se ita hakaʼas an atu la halo tan sala, ita hatudu ba Jeová katak ita hanoin tebes kona-ba ita-nia situasaun no ita hatene katak Maromak la hatudu ninia laran-sadiʼa automátika deʼit.
12. Ema kristaun ida presiza halo saida hodi Maromak hatudu nafatin laran-sadiʼa ba nia?
12 Ema kristaun ida presiza halo saida hodi Maromak hatudu nafatin laran-sadiʼa ba nia? Nia presiza husik tiha buat hotu neʼebé bele halo nia monu ba sala, maski nia gosta tebes buat sira-neʼe. (Mateus 18:8, 9) Porezemplu, se Ita-nia kolega sira book Ita atu halo buat neʼebé Jeová la simu, Ita prontu ka lae atu la ransu tan ho ema sira-neʼe? Se Ita sente susar atu kontrola Ita-nia an kona-ba hemu tua, Ita prontu ka lae atu hasees an husi situasaun neʼebé bele tenta Ita atu hemu demais? Se Ita sente difisil atu kontrola hakarak seksuál nian, Ita prontu ka lae atu la haree filme, loke sítiu, ka la halo buat naran deʼit neʼebé bele hamosu hanoin foʼer? Presiza hanoin-hetan katak, sakrifísiu hotu neʼebé ita halo tanba hakarak halo tuir Jeová nia ukun-fuan sira sempre lori rezultadu diʼak ba ita. La iha sentimentu seluk mak aat liu fali hodi sente katak Jeová husik ona ita. No la iha buat seluk mak bele halo ita sente diʼak liu fali hodi hatene katak Jeová hatudu “domin ho laran-metin neʼebé iha ba nafatin” ba ita.—Isaías (Yesaya) 54:7, 8.
“SIDADE SIRA-NEʼE SEI SAI NUʼUDAR FATIN PROTESAUN NIAN”
13. Esplika toʼok tanbasá mak ema neʼebé halai ba sidade protesaun bele sente seguru no iha moris neʼebé kontente.
13 Bainhira ema tama ba sidade protesaun, nia seguru ona, tanba Jeová hatete katak: “Sidade sira-neʼe sei sai nuʼudar fatin protesaun nian.” (Josué [Yosua] 20:2, 3) Jeová la husu atu halaʼo tesi-lia dala ida tan ba ema neʼe kona-ba kazu neʼebé hanesan. Vítima nia família mós la bele tama ba sidade neʼe atu oho ema neʼe. Bainhira nia iha ona sidade laran, nia hetan ona protesaun husi Jeová. Sidade protesaun laʼós hanesan komarka, tanba ema neʼe bele halo serbisu, fó ajuda ba ema seluk, no serbí Jeová ho hakmatek. Sin, ema neʼe bele moris ho kontente!
Tau fiar ba Jeová nia perdua (Haree parágrafu 14-16)
14. Ema kristaun neʼebé arrepende an bele fiar kona-ba saida?
14 Maromak nia povu balu bele fó sala nafatin ba sira-nia an kona-ba sala boot neʼebé sira halo maski sira arrepende an ona. Balu bele sente katak Jeová sei nunka haluha kona-ba sala neʼebé sira halo. Se Ita mak sente nuneʼe, fiar bá katak, bainhira Jeová fó perdua, nia la hanoin tan kona-ba Ita-nia sala sira. Tan neʼe Ita la presiza fó sala tan ba Ita-nia an. Daniel neʼebé temi iha leten, nia rasik esperiénsia kona-ba neʼe. Bainhira katuas sira korrije tiha nia no ajuda nia hodi iha fali konxiénsia neʼebé moos, nia sente kmaan tebes. Nia dehan: “Haʼu la fó sala tan ba haʼu-nia an. Se Jeová fó ona perdua, sala neʼe la iha tan ona. Hanesan Jeová hatete ona katak, nia sei hasai tiha Ita-nia todan sira no tau sala sira-neʼe dook husi Ita. Ita sei nunka haree tan sala sira-neʼe.” Hanesan neʼe mós, bainhira ema ida iha ona sidade protesaun laran, nia la presiza sente taʼuk tan katak vítima nia família sei mai atu oho nia. Loos duni, bainhira Jeová fó ona perdua ba ita-nia sala, ita la presiza taʼuk tan katak Jeová sei keʼe sai fali ita-nia sala sira ka fó kastigu ba ita kona-ba sala sira-neʼe.—Lee Salmo (Mazmur) 103:8-12. *
15, 16. Ita iha razaun saida atu tau fiar ba Jeová nia laran-sadiʼa?
15 Tuir loloos, ita iha razaun barak liu fali ema Izraél atu tau fiar ba Jeová nia laran-sadiʼa. Bainhira Paulo temi tiha katak nia sente “kasian loos” tanba nia la iha kbiit atu halo tuir Jeová iha dalan neʼebé kompletu, tuirmai nia dehan: “Obrigadu ba Maromak liuhusi Jesus Kristu ita Naʼi!” (Roma 7:25) Paulo nia liafuan katak sá? Maski Paulo luta daudaun hasoru hakarak neʼebé sala no halo ona sala iha tempu uluk, maibé nia arrepende an ona. Tan neʼe nia fiar katak Jeová fó ona perdua ba nia bazeia ba Jesus nia sakrifísiu. Jesus sosa ona ita liuhusi ninia sakrifísiu neʼe, tan neʼe ita bele iha konxiénsia neʼebé moos no laran neʼebé hakmatek. (Ebreu 9:13, 14) Jesus nuʼudar ita-nia Amlulik Boot, “nia bele fó salvasaun neʼebé kompletu ba ema sira neʼebé hakbesik ba Maromak liuhusi nia, basá nia moris nafatin hodi harohan ba sira”. (Ebreu 7:24, 25) Iha tempu antigu, amlulik boot mak ajuda ema Izraél sira atu fiar katak Jeová sei fó perdua ba sira-nia sala. Nuneʼe mós, liuhusi Jesus nuʼudar ita-nia Amlulik Boot, ita iha razaun barak atu fiar katak, “ita bele simu laran-sadiʼa no hetan ajuda iha tempu neʼebé loos liuhusi Maromak nia laran-diʼak neʼebé boot”.—Ebreu 4:15, 16.
16 Tan neʼe ita presiza tau fiar ba Jesus nia sakrifísiu atu bele hetan protesaun husi Jeová. Keta iha hanoin katak Jesus nia sakrifísiu fó deʼit ajuda ba ema jerál. Tenkesér fiar katak Jesus mós fó sakrifísiu neʼe ba Ita rasik. (Galásia 2:20, 21) Ita tenke fiar katak, tanba Jesus nia sakrifísiu neʼe mak Jeová fó perdua ba Ita-nia sala sira. Ita tenke iha fiar katak Jesus nia sakrifísiu mak fó esperansa ba Ita atu moris ba nafatin. Jesus nia sakrifísiu mak Jeová nia prezente ba Ita!
17. Tanbasá mak Ita hakarak buka protesaun husi Jeová?
17 Sidade protesaun sira ajuda ita komprende kona-ba Jeová nia laran-sadiʼa. Maromak nia arranju neʼe hanorin ita katak moris mak buat neʼebé sagradu. Arranju neʼe mós hatudu oinsá mak katuas sira bele ajuda ita, saida mak arrepende an neʼebé loos, no tanbasá mak ita bele tau fiar tomak ba Jeová nia perdua. Ita buka daudaun protesaun husi Jeová ka lae? La iha tan fatin seluk mak seguru liu fali protesaun husi Jeová! (Salmo [Mazmur] 91:1, 2) Iha lisaun tuirmai, ita sei haree oinsá mak sidade protesaun sira bele ajuda ita atu banati-tuir Jeová nia ezemplu neʼebé diʼak liu hotu kona-ba hatudu hahalok justisa no laran-sadiʼa.
^ par. 2 Salmo 34:22 Jeová sei salva ninia atan sira-nia moris; Nia sei fó perdua ba ema hotu neʼebé buka protesaun husi nia.
^ par. 6 Números 35:24, 25 24 Povu tenke tesi-lia entre ema neʼebé oho ema seluk no família husi ema neʼebé mate, hodi tuir ukun-fuan sira-neʼe. 25 Tuirmai povu tenke salva ema neʼe husi ema mate neʼe nia família no entrega ema neʼe ba sidade protesaun nian neʼebé nia halai ona bá, no nia tenke hela iha neʼebá toʼo amlulik boot mate, katak amlulik boot neʼebé simu ona mina santu.
^ par. 10 Josué 20:4 Nia tenke halai ba sidade sira-neʼe ida, no hamriik iha sidade neʼe nia portaun no fó sai ninia kazu ba katuas sira husi sidade neʼe. Tuirmai sira tenke simu nia iha sidade neʼe no fó fatin ida ba nia no nia sei hela ho sira.
^ par. 10 Tuir matenek-naʼin judeu sira hatete katak, karik família besik husi ema neʼebé oho ema seluk la ho neon mós bá hela iha sidade protesaun hamutuk ho ema neʼe.
^ par. 14 Salmo 103:8-12 8 Jeová laran-sadiʼa no laran-diʼak, nia la hirus lalais no nakonu ho domin neʼebé laran-metin. 9 Nia sei nunka buka deʼit sala, no nia sei la sai hirus ba nafatin. 10 Nia la fó kastigu ba ita tuir ita-nia sala, no nia la selu fali ba ita ho buat neʼebé ita merese simu tuir ita-nia sala. 11 Tanba hanesan lalehan aas liu fali rai, nuneʼe mós ninia domin ho laran-metin mak boot tebes ba sira neʼebé hamtaʼuk nia. 12 Hanesan lorosaʼe dook husi loromonu, nuneʼe mós nia tau ita-nia sala sira dook loos husi ita.
