1. Kanta bele ajuda ita halo saida?

EMA naran boot ida neʼebé hakerek liafuan ba múzika sira hatete: “Liafuan book ita-nia hanoin. Múzika book ita-nia sentimentu. Maibé knananuk book ita-nia hanoin no mós sentimentu.” Ita-nia knananuk sira fó glória no fó sai ita-nia domin ba ita-nia Aman Jeová iha lalehan. Ita-nia knananuk sira halo ita hakbesik liután ba Jeová. Tan neʼe, ita bele komprende tanbasá mak kanta mesak ka kanta hamutuk ho irmaun-irmán sira importante tebes ba adorasaun neʼebé moos.

2, 3. (a) Ema balu bele sente oinsá kona-ba hasaʼe lian atu kanta iha kongregasaun? (b) Ita sei koʼalia kona-ba pergunta saida deʼit iha lisaun neʼe?

² Maibé Ita sente oinsá kona-ba hasaʼe lian atu kanta iha kongregasaun? Ita sente moe ka lae? Iha rai balu, mane sira sente moe bainhira kanta iha ema barak nia oin. Sentimentu hanesan neʼe bele fó impaktu ladiʼak ba kongregasaun tomak, liuliu se katuas kongregasaun sira moe atu kanta, ka sira preokupa atu halo buat seluk iha tempu kanta.—Salmo (Mazmur) 30:12.

³ Kanta mak parte ida husi ita-nia adorasaun ba Jeová. Tan neʼe ita lakohi atu laʼo sees iha tempu kanta knananuk sira, ka toʼo tarde no fila sedu durante kongregasaun kanta hamutuk. Diʼak atu husu ba ita-nia an: ‘Haʼu sente oinsá kona-ba kanta iha  reuniaun sira? Haʼu bele halo saida se haʼu sente moe atu kanta iha ema barak nia oin? No oinsá mak haʼu bele kanta knananuk sira ho sentimentu?

4, 5. Iha tempu antigu ema Izraél iha arranju saida deʼit kona-ba kanta knananuk iha adorasaun?

⁴ Jeová nia atan sira sempre uza múzika hodi hahiʼi nia ba tinan barak ona. Se ita haree fali ba tempu neʼebé ema Izraél sei laran-metin ba Jeová, sira sempre uza múzika iha sira-nia adorasaun. Porezemplu, bainhira David organiza ema nia knaar iha templu, nia organiza ema levita naʼin–4.000 hodi hahiʼi Jeová ho múzika. Ema naʼin-288 husi sira mak ema neʼebé “simu ona treinu atu kanta ba Jeová. Sira hotu matenek atu kanta”.—1 Crônicas (Tawarikh) 23:5; 25:7.

⁵ Bainhira dedika templu, sira mós uza múzika no kanta knananuk. Bíblia dehan: “Amlulik sira huu trombeta no kantadór sira fó hahiʼi no fó-agradese ba Jeová ho lian ida deʼit. Bainhira sira huu trombeta, baku simbala, no toka instrumentu múzika nian seluk nuʼudar sira fó hahiʼi ba Jeová, . . . Maromak neʼebé loos, nia glória nakonu iha uma neʼe.” Ida-neʼe hametin tebes ema Izraél sira-nia fiar bainhira sira tuir programa neʼe!—2 Crônicas (Tawarikh) 5:13, 14; 7:6.

6. Iha tempu Neemias serbí nuʼudar governadór iha Jeruzalein, nia halo arranju saida deʼit kona-ba múzika no kanta knananuk?

⁶ Bainhira Neemias organiza ema Izraél sira atu harii fali moru sira iha Jeruzalein, nia mós organiza ema levita hodi kanta no toka múzika. Iha tempu sira halo dedikasaun kona-ba moru sira-neʼe, múzika nia lian halo ema hotu haksolok liután. Neemias organiza “kantadór sira neʼebé fó-agradese ba Maromak iha grupu boot rua”. Grupu ida laʼo iha moru leten ba sorin loos, no grupu seluk laʼo ba sorin karuk hodi haleʼu moru toʼo sira hasoru malu besik área templu nian. Sira-nia lian makaʼas tebes toʼo ema husi fatin dook mós bele rona. (Neemias 12:27, 28, 31, 38, 40, 43) Ita bele fiar katak Jeová kontente tebes hodi rona ema neʼebé adora nia kanta ho laran-manas atu hahiʼi nia.

7. Jesus halo saida hodi hatudu katak kanta mak parte importante ida ba ema kristaun nia adorasaun?

⁷ Toʼo tiha Jesus nia tempu, múzika mós sei importante nafatin ba adorasaun neʼebé loos. Porezemplu, iha kalan ida neʼebé importante liu hotu ba ema nia moris, kalan neʼebé Jesus halaʼo Naʼi nia Han-Kalan hamutuk ho ninia dixípulu sira, sira kanta knananuk hahiʼi nian ba Jeová.—Lee Mateus 26:30.

8. Oinsá mak ema kristaun iha apóstolu sira-nia tempu hatudu ezemplu diʼak kona-ba fó hahiʼi ba Maromak liuhusi knananuk?

⁸ Ema kristaun iha apóstolu sira-nia tempu hatudu ezemplu neʼebé diʼak kona-ba fó hahiʼi ba Maromak liuhusi knananuk. Maski sira halibur deʼit iha uma, maibé sira kanta nafatin ho laran-manas ba Jeová. Tan neʼe apóstolu Paulo hatete ba ninia irmaun-irmán kristaun sira hodi dehan: “Kontinua hanorin no fó laran-manas ba malu ho salmu no hahiʼi ba Maromak, no kanta knananuk adorasaun nian ho agradese, kanta ba Jeová iha imi-nia laran.” (Koloso 3:16) Knananuk sira husi ita-nia livru kanta nian mós parte husi “ai-han iha tempu loloos” neʼebé “atan laran-metin no matenek” fó ba ita. Tan neʼe, diʼak atu “kanta knananuk adorasaun nian ho agradese”.—Mateus 24:45.

9. (a) Tanbasá mak ema balu sente moe atu kanta ho haksolok iha ita-nia reuniaun no reuniaun boot sira? (b) Oinsá mak ita bele kanta hahiʼi ba Jeová, no sé mak tenke hatudu ezemplu uluk? (Haree foto iha pájina 3.)

⁹ Saida deʼit mak bele halo Ita moe atu kanta? Karik iha Ita-nia família ka kultura Ita la iha toman atu kanta. Ka karik bainhira Ita rona kantadór profisionál sira kanta iha rádiu ka televizaun, no se Ita kompara ho Ita-nia lian, Ita sai moe ka laran-kraik. Maibé ita hotu iha responsabilidade atu kanta knananuk hahiʼi nian ba Jeová. Tan neʼe bainhira atu kanta, foti saʼe Ita-nia livru kanta, foti Ita-nia ulun, no kanta ho laran-manas! (Esdras [Ezra] 3:11; lee Salmo [Mazmur] 147:1. *) Ohin loron, Reuniaun-Fatin barak iha televizaun neʼebé hatudu liafuan husi ita-nia livru kanta, neʼe bele ajuda ita atu hasaʼe ita-nia lian. No iha eskola ida neʼebé katuas kongregasaun sira tuir, agora programa mós inklui kanta hahiʼi ba Jeová. Ida-neʼe atu hatudu katak importante tebes ba katuas sira atu hatudu ezemplu uluk kona-ba kanta iha reuniaun sira.

10. Ita presiza hanoin kona-ba saida se ita taʼuk atu kanta ho lian makaʼas?

¹⁰ Ema barak taʼuk atu kanta ho lian makaʼas tanba sira lakohi ema hateke sira ka tanba hanoin sira-nia lian ladún diʼak. Maibé hanoin toʼok kona-ba neʼe. “Ita hotu halo sala dala barak” ho ita-nia liafuan sira, maibé neʼe la hapara ita atu koʼalia. (Tiago 3:2) Tan neʼe, keta husik ita-nia lian neʼebé ladún diʼak atu hapara ita hodi kanta knananuk hahiʼi nian ba Jeová.

11, 12. Oinsá mak ita bele hadiʼa dalan neʼebé ita kanta?

¹¹ Karik ita taʼuk kanta tanba ita la hatene oinsá atu kanta. Maibé iha buat simples balu ita bele halo atu ajuda ita hodi kanta.

 ¹² Ita bele aprende atu kanta ho lian makaʼas liuhusi dalan Ita dada iis. Hanesan forsa husi eletrisidade neʼebé halo ampolas lakan, Ita-nia iis mós bele fó forsa ba Ita atu koʼalia ka kanta. Ita tenkesér kanta makaʼas hanesan bainhira Ita koʼalia, ka bele makaʼas liu mós diʼak. (”Haree Aprende husi Eskola Serbisu Kristaun nian ho subtítulu “Dada iis ho didiʼak” iha pájina 182 toʼo 184”.) Tuir loloos, Bíblia mós dala ruma haruka ema neʼebé adora Jeová atu “haklalak ho haksolok” bainhira kanta hahiʼi ba Jeová.—Salmo (Mazmur) 33:1-3.

13. Esplika toʼok oinsá mak ita bele kanta ho fiar an liután.

¹³ Iha tempu Ita halaʼo adorasaun ho família ka mesak, koko halo buat balu tuirmai neʼe: Hili knananuk balu husi livru kanta neʼebé Ita gosta liu. Lee liafuan sira ho lian makaʼas no fiar an. Tuirmai, uza lian neʼebé hanesan no tahan Ita-nia iis hodi temi liafuan hotu iha fraze ida, dala ida deʼit. Depois, kanta fraze neʼe ho lian neʼebé hanesan. (Isaías [Yesaya] 24:14) Halo nuneʼe bele ajuda Ita-nia lian atu sai makaʼas liután, no keta sente taʼuk ka moe atu kanta ho lian makaʼas!

14. (a) Ita bele halo saida tan atu ajuda ita hodi kanta? (Haree kaixa “ Oinsá atu hadiʼa dalan neʼebé Ita kanta.”) (b) Sujestaun saida deʼit mak ajuda Ita hodi hadiʼa Ita-nia lian?

¹⁴ Ita presiza loke Ita-nia ibun bainhira kanta atu bele kanta ho lian makaʼas. Tan neʼe, diʼak atu loke Ita-nia ibun luan liu fali baibain Ita koʼalia. Maibé, se Ita sente katak Ita-nia lian mak fraku duni ka Ita iha lian neʼebé lotuk, Ita bele halo saida? Ita bele hetan sujestaun balu iha livru Aprende husi Eskola Serbisu Kristaun nian, iha kaixa “Oinsá hadiʼa problema balu kona-ba lian”, iha pájina 184.

15. (a) Iha reuniaun tinan nian neʼebé halaʼo iha 2016, fó sai anúnsiu saida? (b) Tanba razaun saida deʼit mak halo revizaun ba livru kanta nian?

¹⁵ Ema hotu neʼebé tuir reuniaun tinan nian neʼebé halaʼo iha 2016 sente haksolok tebes bainhira irmaun Stephen Lett husi  Grupu Administradór fó sai livru knananuk foun iha lia-inglés ho títulu “Sing Out Joyfully” to Jehovah (lia-tetun seidauk iha.) Irmaun Lett esplika katak razaun ida atu halo livru foun neʼe mak tanba halo ona revizaun ba Bíblia Sagrada Tradusaun Mundu Foun iha lia-inglés. Liafuan sira neʼebé Tradusaun Mundu Foun la uza ona, hasai hotu husi livru kanta foun neʼe. No sira aumenta tan knananuk foun balu kona-ba haklaken no Jesus nia sakrifísiu. No mós, tanba kanta mak parte importante ida husi ita-nia adorasaun, Grupu Administradór hakarak halo livru foun neʼe ho kualidade neʼebé diʼak tebes. Tan neʼe sira halo livru kanta nia kulit kór hanesan ho Tradusaun Mundu Foun.

16, 17. Mudansa saida tan mak ita hetan iha livru knananuk foun?

¹⁶ Knananuk sira iha livru kanta neʼe forma tuir tópiku atu halo fasil ba ema hodi uza livru neʼe. Porezemplu, knananuk 12 primeiru kona-ba Jeová, no knananuk ualu tuirmai kona-ba Jesus no ninia sakrifísiu. Iha livru kanta nia lista, hakerek tópiku ida-idak, no neʼe diʼak tebes atu ajuda irmaun sira neʼebé hatoʼo diskursu públiku atu hili knananuk sira.

¹⁷ Liafuan balu troka fali atu ita bele komprende knananuk neʼe kanta kona-ba saida. No liafuan balu neʼebé agora ema ladún uza ona, hasai deʼit. Mudansa sira-neʼe atu ajuda ema hotu kanta husi laran. Títulu balu mós hetan mudansa. Porezemplu, knananuk ho títulu “Guard Your Heart” (Proteje bá ó-nia laran) agora troka ba “We Guard Our Hearts” (Ami proteje ami-nia laran). Tanbasá? Tanba, uluk ema kanta knananuk neʼe, rona hanesan manda ema. Neʼe halo ema foun, joven, no irmán sira sente an bainhira kanta knananuk neʼe iha reuniaun no reuniaun boot sira. Tan neʼe mak troka títulu no liafuan sira husi ita-nia livru kanta nian.

18. Tanbasá presiza hatene didiʼak kona-ba knananuk sira iha ita-nia livru foun? (Haree nota.)

¹⁸ Knananuk barak husi livru knananuk foun hakerek iha dalan hanesan ita halo orasaun. Knananuk sira-neʼe bele ajuda Ita fó sai Ita-nia sentimentu ba Jeová. Knananuk seluk tan bele fó laran-manas ba ita atu “hatudu domin no hahalok diʼak”. (Ebreu 10:24) Ita hakarak atu hatene didiʼak kona-ba knananuk sira-nia melodia, ritmu, no liafuan sira. Dalan ida atu ajuda ita mak hodi rona ba knananuk sira neʼebé hetan husi jw.org. Se Ita mak treinu beibeik atu kanta knananuk sira-neʼe iha uma, Ita bele aprende oinsá atu kanta ho fiar an no sentimentu. *

19. Iha dalan saida mak ema iha kongregasaun tomak bele hola parte atu adora Jeová?

¹⁹ Diʼak atu hanoin-hetan beibeik katak kanta mak parte importante ida husi ita-nia adorasaun. Liuhusi kanta ita bele hatudu ba Jeová katak ita hadomi nia no agradese ba buat hotu neʼebé nia halo ba ita. (Lee Isaías [Yesaya] 12:5. *) Se Ita kanta ho laran, neʼe bele fó laran-manas ba ema seluk atu halo tuir Ita. Sin, ema hotu iha kongregasaun, maski idade boot, kiʼik, ka foun iha lia-loos, bele adora Jeová iha dalan neʼe. Tan neʼe keta sente moe atu kanta husi laran. Halo tuir matadalan husi hakerek-naʼin ba salmu ida neʼebé dehan: “Kanta ba Jeová!” Sin, kanta ho haksolok bá!—Salmo (Mazmur) 96:1.