1, 2. (a) Serbisu saida mak sai importante liu hotu iha Jesus nia moris, no tanbasá? (b) Ita tenke halo saida atu sai susesu nuʼudar “Maromak nia maluk serbisu-naʼin”?

BAINHIRA iha rai, Jesus Kristu mak badain-ai no mestre. (Marcos 6:3; João 13:13) Nia halo serbisu rua neʼe iha dalan neʼebé perfeitu. Bainhira nia sei badain-ai, nia aprende oinsá atu uza didiʼak ekipamentu sira, no halo sasán oioin husi ai. No kuandu nia sai fali mestre, nia uza didiʼak ninia matenek kona-ba eskritura sira hodi ajuda povu baibain atu komprende lia-loos husi Maromak nia Liafuan. (Mateus 7:28; Lucas 24:32, 45) Iha tempu Jesus tinan 30, nia para husi serbisu badain-ai no sai fali mestre tanba nia hatene katak hanorin mak serbisu neʼebé importante liu hotu. Nia hatete katak haklaken kona-ba Maromak nia Ukun mak razaun ida neʼebé Maromak haruka nia mai iha mundu. (Mateus 20:28; Lucas 3:23; 4:43) Jesus tau fokus liu ba haklaken liafuan diʼak, no nia hakarak ema seluk mós halo buat neʼebé hanesan.​—Mateus 9:35-38.

² Karik ita laʼós badain-ai, maibé ita hotu mestre neʼebé hanorin ema seluk kona-ba liafuan diʼak. Serbisu neʼe importante tebes toʼo Maromak rasik mós envolve iha serbisu neʼe. Tan neʼe mak Bíblia bolu ita nuʼudar “Maromak nia maluk serbisu-naʼin”. (1 Korinto 3:9; 2 Korinto 6:4) Ita rekoñese duni katak “[Jeová nia] liafuan mak lia-loos”. (Salmo [Mazmur] 119:159, 160) Tan neʼe mak  ita tenke kuidadu atu “uza ho didiʼak liafuan lia-loos nian” iha ita-nia serbisu haklaken. (Lee 2 Timóteo 2:15.) Neʼe duni, hakaʼas an nafatin atu aumenta ita-nia matenek kona-ba oinsá atu uza didiʼak Bíblia, ekipamentu prinsipál atu hanorin ema seluk kona-ba Jeová, Jesus, no Maromak nia Ukun. Jeová nia organizasaun fó ona ekipamentu barak atu ajuda ita hodi hetan susesu iha serbisu haklaken, no ita presiza buka-hatene oinsá atu uza ekipamentu sira-neʼe. Ita bele hetan ekipamentu sira-neʼe iha Ekipamentu Hanorin nian.

3. Ita tenke tau fokus liu kona-ba saida iha serbisu haklaken, no tuir Apóstolu 13:48 ita hakarak buka ema hanesan saida?

³ Karik Ita hanoin tanbasá mak ita bolu Ekipamentu Hanorin nian, laʼós Ekipamentu Haklaken nian. Tanba “haklaken” signifika fó sai mensajen ruma, maibé “hanorin” signifika katak esplika mensajen neʼe atu ema bele komprende kona-ba buat neʼebé nia rona hodi nia bele aplika buat neʼebé nia aprende. Ita hakarak aproveita tempu badak neʼebé ita uza ba serbisu haklaken atu tau fokus liu atu estuda Bíblia ho ema no hanorin sira kona-ba lia-loos, atu nuneʼe sira bele sai Kristu nia dixípulu. Neʼe katak ita tenke badinas atu buka ema neʼebé “prontu atu simu lia-loos neʼebé lori ba moris rohan-laek” no ajuda sira atu hahú serbí Jeová.​—Lee Apóstolu 13:44-48.

4. Oinsá mak ita buka ema neʼebé “prontu atu simu lia-loos neʼebé lori ba moris rohan-laek”?

⁴ Oinsá mak ita buka ema neʼebé “prontu atu simu lia-loos neʼebé lori ba moris rohan-laek”? Iha apóstolu sira-nia tempu, dalan ida deʼit atu buka ema sira-neʼe mak liuhusi haklaken. Jesus hatete ba ninia dixípulu sira: “Iha sidade ka knua naran deʼit neʼebé imi tama, buka ema neʼebé mak merese atu imi vizita.” (Mateus 10:11) Ita hatene katak ema neʼebé la iha motivu loos, foti-an, ka la interese ba Maromak, sei la rona ba liafuan diʼak. Ita-nia objetivu mak atu buka ema neʼebé laran-moos, haraik-an, no hakarak hatene kona-ba lia-loos. Ita bele kompara buka ema hanesan buat neʼebé Jesus halo bainhira nia sei badain-ai. Primeiru Jesus tenke buka ai neʼebé diʼak ba sasán ida-idak, hanesan armáriu sira, odamatan, ai-leba, ka sasán seluk. Tuirmai nia hasai ninia kaixa ekipamentu nian, uza ninia matenek hodi halo sasán sira-neʼe. Hanesan neʼe mós ohin loron. Ita tenke buka uluk ema neʼebé hakarak aprende, no tuirmai uza didiʼak ita-nia ekipamentu no matenek atu ajuda sira sai Kristu nia dixípulu.​—Mateus 28:19, 20.

5. Tanbasá ita presiza hatene kona-ba ekipamentu ida-idak iha Ekipamentu Hanorin nian? Fó toʼok ezemplu. (Haree dezeñu iha leten.)

⁵ Iha kaixa ekipamentu, iha ekipamentu ida-idak ho ninia objetivu rasik. Ezemplu ida mak kona-ba ekipamentu sira neʼebé Jesus uza nuʼudar badain-ai. * Nia iha ekipamentu atu sukat, tau marka, tesi, fura, supila, no mós ekipamentu atu halo tetuk no tutan hamutuk ai. Hanesan neʼe mós iha Ekipamentu Hanorin nian, ita iha ekipamentu ida-idak ho ninia objetivu rasik. Entaun, mai ita buka-hatene oinsá atu bele uza didiʼak ekipamentu importante sira-neʼe.

6, 7. (a) Oinsá mak Ita rasik fahe kartaun kontaktu sira? (b) Tanbasá mak ita hakarak fahe konvite ba reuniaun nian?

⁶ Kartaun kontaktu. Maski ekipamentu neʼe kiʼik maibé diʼak tebes atu fó koñese ita ba ema seluk no lori sira ba ita-nia sítiu jw.org. Liuhusi sítiu neʼe ema bele aprende liután kona-ba ita no husu ita atu  estuda Bíblia ho sira. Toʼo agora iha ona ema naʼin–400.000 liu mak husu liuhusi jw.org atu estuda Bíblia, no loron ida-idak iha ema atus ba atus mós halo nuneʼe. Ita bele lori kartaun kontaktu balu hodi fahe bainhira koʼalia ho ema iha atividade loron-loron nian.

⁷ Konvite sira. Iha konvite ba reuniaun nian hatete: “Ami konvida Ita atu estuda Bíblia ho Testemuña ba Jeová.” Tuirmai neʼe fó opsaun atu “tuir ami-nia reuniaun sira” “ka ema ida mai uma estuda ho ita”. Nuneʼe, konvite neʼe ajuda ema atu hatene kona-ba ita no mós konvida sira neʼebé “hatene katak sira presiza Maromak nia matadalan” atu estuda Bíblia ho ita. (Mateus 5:3) Maski ema hakarak estuda ka lakohi estuda, sira hotu benvindu atu tuir ita-nia reuniaun sira. Se sira tuir ita-nia reuniaun, sira sei haree rasik katak sira bele aprende buat barak kona-ba Bíblia.

8. Tanbasá mak importante ba ema atu tuir reuniaun sira, maski dala ida deʼit? Fó toʼok ezemplu.

⁸ Importante atu konvida beibeik ema tuir reuniaun sira, tuir dala ida mós diʼak. Tanbasá? Tanba sira rasik bele haree katak Testemuña ba Jeová hanorin duni lia-loos husi Bíblia la hanesan relijiaun falsu sira. (Isaías [Yesaya] 65:13) Porezemplu, feen-laʼen ida iha Estadus Unidus naran Ray no Linda deside atu buka igreja. Sira fiar ba Maromak no hakarak hatene liután kona-ba nia. Tan neʼe sira foti desizaun atu bá igreja hotu iha sira-nia sidade. Maibé antes atu sai membru, sira hakarak haree igreja neʼe kumpre kritériu rua. Primeiru, sira tenke aprende buat ruma, no segundu, ema iha igreja tenkesér hatais ho respeitu. Tinan balu liu tiha, sira vizita igreja hotu iha sira-nia sidade, maibé la iha ida mak halo sira sente kontente. Sira nunka aprende buat ida, no igreja nia membru sira mós la hatais ho respeitu. Vizita tiha igreja ikus, Linda fila ba serbisu no Ray fila uma no liuhusi Reuniaun-Fatin ida. Nia hanoin: ‘Haʼu tama toʼok no haree sira halo saida.’ Neʼe mak esperiénsia neʼebé diʼak liu hotu ba nia. Ema hotu iha Reuniaun-Fatin hatudu laran-diʼak no hatais ho respeitu. Ray tuur iha oin liu no nia gosta tebes buat neʼebé nia aprende. Esperiénsia neʼe hanesan deʼit ho buat neʼebé apóstolu Paulo hatete kona-ba ema neʼebé tuir reuniaun primeiru no dehan: “Maromak iha duni imi-nia leet.” (1 Korinto 14:23-25) Komesa husi tempu neʼebá, Ray tuir beibeik reuniaun iha loron-domingu. Tuirmai nia mós tuir reuniaun loron baileet nian. Linda mós komesa tuir reuniaun sira, no maski sira-nia idade liu ona 70, sira estuda Bíblia no hetan batizmu.

9, 10. (a) Tanbasá mak fasil atu uza tratu sira? (b) Esplika toʼok dalan atu uza tratu Saida mak Maromak nia Reinu?

⁹ Tratu sira. Ita iha tratu ualu iha ita-nia Ekipamentu Hanorin nian. Fasil atu uza tratu sira-neʼe hodi hahú koʼalia ho ema. Tratu sira-neʼe komesa fó sai iha 2013, no husi tempu neʼebá print ona hamutuk biliaun lima resin. Tratu sira-neʼe hakerek iha dalan neʼebé hanesan deʼit. Tan neʼe, se Ita aprende oinsá atu fahe tratu ida, Ita hatene atu fahe tratu hotu. Oinsá mak Ita bele uza tratu ida atu hahú koʼalia ho ema?

¹⁰ Karik Ita bele uza tratu Saida mak Maromak nia Reinu? Hatudu pergunta husi tratu oin no husu: “Uluk Ita hanoin ona kona-ba saida mak Maromak nia Reinu ka lae? Tuir Ita-nia hanoin, . . . ?” Tuirmai husu ema neʼe atu hili resposta ida husi resposta tolu iha tratu. Ita la presiza fó sai katak ninia resposta neʼe loos ka sala, loke deʼit tratu neʼe ba pergunta neʼebé husu “Saida mak Bíblia hatete?” no lee Daniel 2:44 no  Isaías 9:6 neʼebé temi iha tratu neʼe. Ikus, husu pergunta iha tratu kotuk kona-ba “Hanoin toʼok”: “Iha Maromak nia Ukun nia okos, Ita-nia moris sei sai oinsá?” Ita bele hatán ba pergunta neʼe iha Ita-nia koʼalia tuirmai. Bainhira Ita hasoru fali ema neʼe, Ita bele hatudu lisaun 7 husi broxura Liafuan Diʼak Husi Maromak. Broxura neʼe mós ita-nia ekipamentu ida atu hahú estuda Bíblia ho ema.

11. Saida mak objetivu ba ita-nia revista sira, no ita presiza hatene saida kona-ba ita-nia revista sira?

¹¹ Revista sira. Livru Haklaken no Matan-moris bá! mak revista neʼebé fahe no tradús ona ba língua barak liu iha mundu tomak. Ema husi nasaun oioin lee revista sira-neʼe, tan neʼe informasaun sira iha oin tenkesér dada ema oioin nia atensaun. Ita tenke uza revista sira-neʼe atu ajuda ema hatene saida mak importante liu iha sira-nia moris. Maibé primeiru, ita presiza hatene revista ida-idak hakerek ba sé no iha objetivu saida.

12. (a) Matan-moris bá! hakerek ba sé, no iha objetivu saida? (b) Foin daudauk neʼe Ita hetan esperiénsia diʼak saida hodi uza revista neʼe?

¹² Matan-moris bá! hakerek ba ema neʼebé ladún ka seidauk hatene kona-ba Bíblia. Karik sira la hatene kona-ba Kristu nia hanorin sira, ladún tau fiar ba relijiaun, ka la hatene katak Bíblia bele ajuda sira. Objetivu ida husi Matan-moris bá! mak atu ajuda lee-naʼin fiar katak Maromak iha duni. (Roma 1:20; Ebreu 11:6) No mós atu ajuda lee-naʼin tau fiar katak Bíblia mak “Maromak nia liafuan”. (1 Tesalónika 2:13) Tópiku tolu ba 2018 mak: “Oinsá mak atu moris kontente”, “Segredu 12 ba família atu moris kontente”, no “Tahan hasoru laran-triste bainhira ema mate”.

13. (a) Livru Haklaken edisaun públiku nian hakerek ba sé? (b) Foin daudauk neʼe Ita hetan esperiénsia diʼak saida hodi uza revista neʼe?

¹³ Objetivu importante husi Livru Haklaken edisaun públiku nian mak atu esplika Bíblia nia hanorin sira ba ema neʼebé hatudu respeitu ba Maromak no Bíblia. Karik sira hatene ona buat balu kona-ba Bíblia, maibé seidauk iha koñesimentu neʼebé loos. (Roma 10:2; 1 Timóteo 2:3, 4) Tópiku tolu ba 2018 mak atu hatán ba pergunta sira tuirmai: “Bíblia bele ajuda ita ohin loron ka lae?”, “Ita-nia futuru sei sai oinsá?”, no “Maromak hanoin Ita ka lae?”

14. (a) Objetivu husi vídeo haat iha Ekipamentu Hanorin nian mak saida? (b) Esperiénsia diʼak saida mak Ita hetan hodi hatudu vídeo sira-neʼe?

¹⁴ Vídeo sira. Iha Jesus nia tempu, badain-ai sira uza liman deʼit. Maibé ohin loron, iha mós ekipamentu mákina hanesan, mákina-kadoo, furadór, no lixadór. Hanesan neʼe mós kona-ba ita-nia publikasaun sira. Agora ita bele hatudu vídeo ba ema. Vídeo haat husi ita-nia Ekipamentu Hanorin nian mak: Tanbasá Estuda Bíblia?, Oinsá mak ami halaʼo estuda Bíblia ho ema?, Oinsá mak ami halaʼo reuniaun sira?, no Testemuña ba Jeová mak ema hanesan saida? Vídeo sira neʼebé la liu minutu rua diʼak tebes atu uza bainhira hasoru ema ba dala primeiru. Sira neʼebé liu minutu rua bele uza ba vizita fali ka ema neʼebé iha tempu. Ekipamentu sira-neʼe diʼak atu book ema hodi estuda Bíblia no tuir reuniaun sira.

15. Haree vídeo sira iha ema nia lian rasik lori impaktu saida ba sira? Fó toʼok ezemplu.

¹⁵ Porezemplu, irmán ida hasoru feto ida neʼebé muda husi Mikronézia no ninia língua materna mak Yapese. Irmán hatudu vídeo Tanbasá Estuda Bíblia? ba nia iha língua Yapese. Bainhira foin loke vídeo neʼe, feto  neʼe dehan: “Neʼe haʼu-nia lian. Haʼu la fiar! Haʼu bele rona husi logat neʼe katak nia mai husi haʼu-nia rai. Nia koʼalia duni haʼu-nia lian!” Hotu tiha, feto neʼe hatete katak nia sei lee livru no haree vídeo hotu iha ninia lian liuhusi jw.org. (Kompara Apóstolu 2:8, 11.) Ezemplu ida tan mak irmán ida iha Estadus Unidus. Ninia sobriñu hela iha rai seluk. Irmán neʼe haruka link ida ba nia kona-ba vídeo neʼe iha ninia lian rasik. Haree tiha vídeo neʼe, nia haruka e-mail ba irmán neʼe hodi dehan: “Parte ida kona-ba aat-naʼin ida mak ukun daudauk mundu neʼe dada duni haʼu-nia atensaun. Haʼu husu ona atu estuda Bíblia.” Nia hela iha rai neʼebé serbisu haklaken hetan bandu.

16. Esplika objetivu ida-idak ba broxura: (a) Rona ba Maromak hodi Hetan Moris ba Nafatin. (b) Liafuan Diʼak Husi Maromak. (c) Sé mak Halo Jeová nia Hakarak Ohin Loron?

¹⁶ Broxura sira. Oinsá mak ita bele hanorin lia-loos ba ema neʼebé ladún hatene lee ka ita la iha livru iha sira-nia língua? Ita bele uza broxura Rona ba Maromak hodi Hetan Moris ba Nafatin. * Ekipamentu neʼebé diʼak tebes atu hahú estuda Bíblia mak broxura Liafuan Diʼak Husi Maromak. Ita bele hatudu tópiku 14 husi broxura kotuk no husu ida neʼebé mak nia gosta liu. Tuirmai hahú estuda hodi uza lisaun neʼe. Ita koko ona halo nuneʼe ba Ita-nia vizita fali ka lae? Broxura terseiru husi Ekipamentu Hanorin nian mak Sé mak Halo Jeová nia Hakarak Ohin Loron? Objetivu husi broxura neʼe mak atu hanorin estudante Bíblia kona-ba ita-nia organizasaun. Atu hatene oinsá bele uza broxura neʼe iha estudu Bíblia ida-idak, haree informasaun husi Moris Kristaun no Haklaken​—Programa no nota, Marsu 2017.

17. (a) Saida mak objetivu ida-idak ba livru neʼebé ita uza hodi estuda ho ema? (b) Ema neʼebé laʼo ba oin toʼo batizmu tenke halo saida, no tanbasá?

¹⁷ Livru sira. Bainhira Ita hahú estuda ho ema liuhusi broxura ida, Ita bele halo planu atu uza fali livru Tuir Loloos, Saida mak Bíblia Hanorin? Ekipamentu neʼe bele ajuda ema aprende liután hanorin báziku kona-ba Bíblia. Se estudante laʼo ba oin no ramata ona livru neʼe, kontinua uza fali livru “Hela Nafatin iha Maromak nia Domin” hodi estuda ho nia. * Ekipamentu neʼe bele ajuda estudante oinsá atu aplika Bíblia nia prinsípiu sira iha ninia moris. Presiza hanoin-hetan katak, maski estudante hetan ona batizmu, nia tenke estuda livru rua neʼe toʼo ramata. Neʼe sei ajuda nia atu iha fiar neʼebé metin no hatudu laran-metin ba Jeová.​—Lee Koloso 2:6, 7.

18. (a) 1 Timóteo 4:16 fó laran-manas ba ita atu halo saida, no neʼe sei lori rezultadu saida? (b) Ita iha objetivu saida hodi uza ita-nia Ekipamentu Hanorin nian?

¹⁸ Nuʼudar Testemuña ba Jeová, ita iha responsabilidade atu hanorin ema “mensajen lia-loos nian husi liafuan diʼak” neʼebé bele lori ema ba moris rohan-laek. (Koloso 1:5; lee 1 Timóteo 4:16.) Atu halo nuneʼe, ita iha Ekipamentu Hanorin nian neʼebé bele ajuda ita. (Haree kaixa “ Ekipamentu Hanorin nian”.) Mai ita hotu uza didiʼak ekipamentu sira-neʼe. Ita ida-idak bele deside ekipamentu saida mak diʼak atu uza no iha tempu saida. Presiza hanoin-hetan katak, ita-nia objetivu laʼós atu fahe livru deʼit, ka fahe ba ema neʼebé la interese ba lia-loos. Maibé atu ajuda ema neʼebé “prontu atu simu lia-loos neʼebé lori ba moris rohan-laek”, ema neʼebé laran-moos, haraik-an, no hakarak hatene kona-ba Maromak hodi sai Kristu nia dixípulu.​—Apóstolu 13:48; Mateus 28:19, 20.