HAʼU moris iha tinan 1934. Haʼu-nia inan-aman naran Fred no Edna Molohan. Sira sai Estudante Bíblia (Testemuña ba Jeová) ba tinan 20 ona. Haʼu agradese sira hanorin haʼu atu hadomi Jeová. Ami hela iha Parsons, sidade kiʼik ida iha Kansas. Kuaze ema hotu iha ami-nia kongregasaun iha esperansa atu ukun ho Kristu iha lalehan. Ami-nia família sempre tuir reuniaun no haklaken. Baibain ami haklaken iha estrada iha loron-sábadu lokraik, ohin loron bolu haklaken públiku. Dala ruma ami sente kole, maibé apá sempre hola sorvete ba ami bainhira ramata serbisu haklaken.

Ami-nia kongregasaun la boot, maibé haklaken-fatin boot, inklui mós knua no agropekuáriu barak. Bainhira ami fahe livru ba agropekuáriu nia naʼin, sira fó modo, manu-tolun (foti kedas husi manu-luhan), ka manu neʼebé sei moris ba ami, duké fó osan. Antes foti livru sira, apá fó ona kontribuisaun ba kongregasaun, no ami-nia osan uitoan deʼit, tan neʼe ai-han sira-neʼe taka fali ami-nia presiza.

Haʼu-nia inan-aman iha fonógrafu ida hodi uza ba haklaken. Tanba haʼu sei kiʼik, haʼu ajuda deʼit sira atu loke irmaun Rutherford nia diskursu ba vizita fali no estudante Bíblia sira.

Ami iha karreta Ford ida neʼebé halo husi tinan 1936. Apá tau koluna boot ida iha ami-nia karreta nia kapó leten. Neʼe diʼak tebes atu haklaken. Baibain ami loke uluk múzika hodi dada ema nia atensaun no tuirmai loke diskursu kona-ba Bíblia. Hotu tiha ami fahe livru ba ema neʼebé hatudu interese.

 Iha sidade kiʼik Cherryvale, Kansas, apá lori karreta neʼe tama ba jardín ida neʼebé baibain ema barak deskansa iha loron-domingu. Tuirmai polísia mai no hatete ba apá katak la bele para karreta iha jardín laran, maibé para deʼit iha liʼur. Apá halo tuir deʼit polísia no muda karreta neʼe ba estrada, besik jardín neʼe hodi ema bele rona nafatin ba programa. Tuirmai ami loke fali diskursu ba ema atu rona. Haʼu gosta tebes hamutuk ho apá no haʼu-nia maun Jerry haklaken iha dalan hanesan neʼe.

Durante tinan sira-neʼe, ami halaʼo kampaña espesiál hodi haklaken hotu lalais iha haklaken-fatin sira neʼebé ema kontra makaʼas serbisu haklaken. Tan neʼe mak haʼu konta kona-ba ami presiza hadeer iha kalan no sikat nonook tratu ka livru kiʼik sira iha ema nia odamatan okos. Depois, ami hasoru malu fali iha sidade liʼur atu haree polísia kaer ema ida ka lae.

Dalan haklaken ida tan neʼebé kapás tebes mak ami hanaran marxa informasaun. Hodi haklaken kona-ba Maromak nia Ukun, ami tara kartás boot ida no marxa iha sidade laran. Haʼu sei hanoin-hetan loron ida irmaun sira marxa iha ami-nia sidade no tara kartás boot neʼebé hakerek “Religion Is a Snare and a Racket (Relijiaun lohi no lasu ema)”. Sira hahú husi ami-nia uma no laʼo maizumenus kilómetru ida ho balu iha sidade laran, depois, fila fali ba ami-nia uma. Diʼak tanba ema la hapara sira, maibé ema barak hakarak hatene saida mak akontese daudauk iha tempu neʼebá.

Ami bá beibeik Texas hodi tuir reuniaun boot sira. Apá serbisu iha kompañia ida neʼebé halo komboiu nia dalan, tan neʼe ami bele saʼe komboiu gratuitu hodi tuir reuniaun boot no vizita ami-nia família sira. Amá nia maun Fred Wismar ho ninia feen Eulalie hela iha sidade Temple, Texas. Liutiha tinan 1900 mak tiu Fred aprende kona-ba lia-loos bainhira nia sei joven. Hetan tiha batizmu, nia fó-hatene ba ninia feton sira, inklui mós haʼu-nia amá, kona-ba buat neʼebé nia aprende. Irmaun sira iha Texas koñese tiu Fred tanba uluk nia serbí nuʼudar atan zona (ohin loron bolu katuas área). Nia mak ema neʼebé laran-diʼak, kontente, badinas, no nia sai ezemplu diʼak tebes ba haʼu.

Iha tinan 1941, ami saʼe komboiu ba tuir reuniaun boot ida iha St. Louis, Missouri. Joven hotu hetan konvite atu tuur hamutuk iha palku nia oin hodi rona ba irmaun Rutherford nia diskursu ho títulu “Children of the King (Liurai nia labarik sira)”. Toʼo tiha ninia diskursu nia rohan, joven hamutuk naʼin–15.000 liu hetan prezente ida. Irmaun Rutherford no asistente sira fó livru foun ida ho títulu Children (Labarik) ba ami ida-idak.

Iha fulan-Abríl tinan 1943, ami tuir reuniaun boot ida ho tema “Call to Action”, iha Coffeyville, Kansas. Reuniaun boot neʼe fó sai katak kongregasaun hotu sei halaʼo eskola foun ida naran Eskola Serbisu Kristaun. Ami mós simu livru kiʼik ida neʼebé iha lisaun 52 atu uza ba eskola neʼe. Iha tinan neʼe, haʼu mós hatoʼo haʼu-nia diskursu  primeiru iha eskola neʼe. Reuniaun boot neʼe espesiál tebes ba haʼu no ema balu tanba ami hetan batizmu iha bee-lihun neʼebé malirin tebes iha agropekuáriu neʼebé besik.

Haʼu ramata eskola sekundária iha tinan 1951 no haʼu presiza halo desizaun kona-ba haʼu-nia moris. Haʼu-nia maun Jerry, uluk serbí iha Betel. Haʼu mós hakarak tebes atu serbí iha Betel, tan neʼe haʼu hatama formuláriu. Lakleur haʼu hetan konvite atu serbí iha Betel no haʼu komesa serbí iha neʼebá iha 10 Marsu 1952. Desizaun neʼebé haʼu halo ajuda tebes haʼu atu serbí Maromak liután.

Haʼu hakarak atu serbí iha departamentu print livru nian atu halo revista no livru seluk. Maibé haʼu nunka hetan knaar neʼe. Haʼu-nia knaar mak atu hein meza no ikusmai serbisu iha dapur. Haʼu gosta tebes knaar neʼe no haʼu aprende buat barak. Iha loron ida nia laran ami serbisu troka malu, no dala ruma hetan tempu deskansa. Haʼu uza tempu neʼe hodi bá biblioteka iha Betel atu halo estuda mesak. Halo nuneʼe ajuda hametin haʼu-nia fiar no relasaun ho Jeová. Neʼe hametin tebes haʼu-nia hakarak atu serbí Jeová iha Betel ba tempu kleur. Jerry sai husi Betel iha tinan 1949 no kaben ho Patricia, maibé sira hela besik iha Brooklyn no sira ajuda no fó laran-manas ba haʼu tanba haʼu foin tama Betel.

Tama tiha Betel lakleur, irmaun sira komesa buka ema Betel neʼebé bele hatoʼo diskursu públiku no halo lista kona-ba sira. Irmaun sira-nia naran neʼebé tama iha lista neʼe hetan knaar atu vizita kongregasaun sira, dala ruma dook kilómetru 320 husi Brooklyn. Sira sei hatoʼo diskursu no halaʼo serbisu haklaken hamutuk ho kongregasaun sira-neʼe. Haʼu-nia naran mós tama iha lista neʼe. Haʼu sente nakdedar tebes bainhira hatoʼo diskursu públiku primeiru, no iha tempu neʼebá diskursu hatoʼo ba oras ida. Baibain haʼu saʼe komboiu hodi bá kongregasaun sira-neʼe. Haʼu sei hanoin-hetan lokraik ida iha loron-domingu iha tinan 1954, haʼu saʼe komboiu atu fila fali ba Novaiorke no tuir oráriu haʼu sei toʼo Betel antes kalan. Maibé iha dalan, anin-boot no jelu tun makaʼas. Komboiu la bele laʼo tanba eletrisidade mate, no haʼu toʼo iha sidade Novaiorke iha tuku lima loron-segunda dadeer. Husi neʼe haʼu saʼe fali komboiu bá Brooklyn no tama kedas serbisu iha dapur. Haʼu tama tarde uitoan no sente kole tebes tanba kalan tomak la toba. Maibé ksolok neʼebé haʼu hetan hodi serbí kongregasaun sira-neʼe no hasoru irmaun-irmán barak neʼebé haʼu seidauk koñese iha folin-boot tebes ba haʼu.

Durante tinan balu bainhira haʼu foin tama Betel, haʼu mós partisipa iha programa estudu Bíblia neʼebé semana-semana fó sai liuhusi emisora-rádiu WBBR. Estúdiu neʼe halo iha andár segundu iha 124 Columbia Heights. Irmaun Alexander H. Macmillan serbí iha Betel ba tinan barak ona, no nia partisipa beibeik iha programa neʼe. Uluk ami bolu nia irmaun Mac. Nia hatudu ezemplu diʼak tebes ba ami joven sira neʼebé serbí iha Betel tanba nia hatudu laran-metin maski hasoru susar barak.

Iha tinan 1958, haʼu simu fali knaar foun hodi ajuda irmaun-irmán sira neʼebé ramata husi Eskola Gilead. Haʼu ajuda sira atu hetan vistu no halo arranju ba sira-nia viajen. Halo viajen ho aviaun iha tempu uluk karun tebes, tan neʼe estudante Gilead sira neʼebé hetan knaar atu bá Áfrika ka Ázia, barak saʼe deʼit ró. Tinan balu liutiha, billete ba aviaun komesa tun, no misionáriu barak uza fali aviaun hodi bá rai seluk atu halaʼo sira-nia knaar.

Iha tinan 1960, haʼu hetan knaar atu halo arranju ba viajen ho aviaun husi Estadus Unidus bá Europa ba sira neʼebé hakarak tuir reuniaun boot internasionál sira iha tinan 1961. Haʼu bá tuir reuniaun boot iha Hamburg, rai-Alemaña. Reuniaun boot hotu tiha, haʼu ho irmaun naʼin-tolu husi Betel aluga karreta ida hodi bá rai-Itália liuhusi rai-Alemaña no ami vizita sukursál iha Roma. Husi neʼebá ami bá fali rai-España neʼebé  serbisu haklaken hetan daudauk bandu, liuhusi rai-Fransa no Foho-Pirineus. Ami konsege fó livru balu ba irmaun sira iha Barcelona, no ami falun didiʼak livru sira-neʼe hodi ema hanoin katak ami fó prezente. Ami kontente tebes hodi hasoru sira. Husi neʼebá ami lori karreta ba Amsterdaun no saʼe aviaun hodi fila fali ba Novaiorke.

Iha tinan 1962, haʼu simu knaar hodi arranja viajen ba irmaun-irmán naʼin-583 neʼebé atu tuir reuniaun boot espesiál internasionál neʼebé sei halaʼo iha mundu tomak iha tinan 1963, ho tema “Everlasting Good News (Evanjellu Rohan-Laek)”. Sira sei tuir reuniaun boot iha Europa, Ázia, no Pasífiku Súl no tuirmai mós halo viajen ba Honolulu, rai-Havai, no ramata iha Pasadena, Kalifórnia. Sira mós sei bá vizita rai-Líbanu no Jordánia atu halo viajen espesiál ba fatin istóriku sira husi Bíblia. Ami-nia departamentu mak halo arranju ba viajen, otél no vistu hodi irmaun-irmán sira bele bá rai sira-neʼe.

Razaun seluk tan neʼebé halo tinan 1963 importante tebes ba haʼu mak tanba iha 29 Juñu haʼu kaben ho Lila Rogers husi Missouri neʼebé tama Betel iha tinan 1960. Kaben tiha ba semana ida, ami mós tuir reuniaun boot espesiál internasionál neʼebé halaʼo iha mundu tomak hodi bá rai-Grésia, Ejitu, no Líbanu. Husi neʼebá ami bá fali Jordánia. Maibé tanba serbisu haklaken hetan bandu iha fatin neʼe, autoridade sira la fó vistu ba Testemuña ba Jeová. Tan neʼe ami la hatene saida mak sei akontese bainhira ami toʼo iha neʼebá. Kuandu toʼo tiha fatin neʼe, ami hakfodak no kontente hodi haree irmaun-irmán sira hein daudauk iha aeroportu ho kartás boot neʼebé hakerek “Benvindu Testemuña ba Jeová”. Furak tebes hodi halo viajen ba fatin istóriku sira husi Bíblia atu haree fatin neʼebé Abraão, Isaac no Jacob hela, fatin neʼebé Jesus no apóstolu sira haklaken, no fatin neʼebé ema Kristaun sira hahú habelar “ba mundu tomak”.​—Apóstolu 13:47.

Lila mak haʼu-nia pár neʼebé laran-metin iha ami-nia knaar sira ba tinan 55. Ami vizita rai-España no Portugál ba dala balu iha tempu serbisu haklaken hetan bandu. Ami fó laran-manas ba irmaun-irmán sira iha neʼebá, ami lori livru no buat seluk tan neʼebé sira presiza. Ami mós konsege vizita irmaun balu iha komarka iha Cádiz, España. Haʼu kontente tebes tanba bele hatoʼo diskursu ida atu fó laran-manas ba sira.

Husi tinan 1963, haʼu halo arranju ba viajen sira kona-ba tuir reuniaun boot internasionál iha Áfrika, Austrália, Amérika Sentrál, Amérika Súl, Europa, Ázia, Havai, Novazelándia, no Porturriku. Haʼu no Lila tuir ona reuniaun boot balu neʼebé ami sei nunka haluha, inklui mós ida neʼebé halaʼo iha Varsóvia, rai-Polónia, iha tinan 1989. Irmaun-irmán barak husi rai-Rúsia konsege tuir reuniaun boot neʼe, no neʼe mak reuniaun boot primeiru ba sira barak. Ami hasoru irmaun-irmán balu neʼebé uluk tama komarka iha Uniaun Soviétika ba tinan barak tanba fiar.

 Knaar seluk neʼebé haʼu gosta tebes mak vizita no fó laran-manas ba família Betel no misionáriu sira iha mundu tomak. Bainhira ami halo vizita ba rai-Koreia Súl, ami konsege bá vizita irmaun naʼin-50 iha prizaun Suwon. Sira hotu iha hanoin neʼebé pozitivu no hein namanas ba tempu neʼebé sira bele halaʼo fali serbisu haklaken ho livre. Ami mós hetan laran-manas tebes husi sira.​—Roma 1:11, 12.

Iha tinan sira-neʼe haʼu haree duni oinsá Jeová haraik bensaun ba ninia povu. Bainhira haʼu hetan batizmu iha tinan 1943, iha deʼit haklaken-naʼin maizumenus 100.000 iha mundu tomak. Agora iha ema naʼin–8.000.000 liu neʼebé serbí daudauk Jeová iha rai 240. Estudante Gilead sira-nia hakaʼas-an kontribui duni ba mudansa neʼe. Haʼu haksolok tebes hodi hetan oportunidade atu serbisu hamutuk ho misionáriu barak no ajuda halo arranju ba sira hodi sira bele bá halaʼo sira-nia knaar iha rai seluk.

Haʼu agradese tebes tanba haʼu foti desizaun hodi serbí Jeová iha tempu joven no hatama formuláriu atu serbí iha Betel. Jeová haraik duni bensaun barak mai haʼu iha tinan sira-neʼe. Haʼu no Lila haksolok tebes hodi serbí iha Betel, no ami mós haksolok tebes hodi bele serbí iha kongregasaun sira iha Brooklyn ba tinan 50 liu no hetan belun barak neʼebé diʼak.

Haʼu hetan apoiu husi Lila loron ba loron hodi kontinua serbí iha Betel. Maski agora haʼu idade 84 liu ona, haʼu sei nafatin gosta halo Jeová nia serbisu no ajuda iha departamentu neʼebé tau matan no hatán ba karta sira neʼebé ema hakerek ba sukursál.

Haʼu haksolok tebes hodi sai parte ba Jeová nia organizasaun no haree oinsá liafuan husi Malaquias 3:18 sai loos: “Imi sei haree duni oinsá ema laran-loos la hanesan ho ema aat, ema neʼebé serbí Maromak la hanesan ho ema neʼebé la serbí nia.” Loron ida-idak ita bele haree katak Satanás nia mundu sai aat ba beibeik no ema barak la iha esperansa no ladún haksolok iha sira-nia moris. Maibé ema neʼebé hadomi no serbí Jeová iha moris neʼebé kontente maski moris iha tempu susar sira-neʼe, no sira iha esperansa neʼebé loos kona-ba futuru. Hodi bele fó-hatene ema seluk kona-ba liafuan diʼak sira-neʼe mak priviléjiu neʼebé furak tebes. (Mateus 24:14) Lakleur tan Maromak nia Ukun sei halakon mundu aat neʼe hodi lori fali Paraízu ba ita. Ita hein namanas duni ba tempu furak neʼe. Bainhira ida-neʼe akontese, ema hotu iha mundu sei iha saúde neʼebé diʼak, kontente no moris ba nafatin.