1, 2. (a) Oinsá mak mudansa neʼebé akontese derrepente fó impaktu ba ita-nia moris? (Haree dezeñu iha leten.) (b) Tuir Salmo 131, saida mak bele ajuda ita atu iha hanoin neʼebé kalma?

LLOYD no Alexandra serbí iha Betel ba tinan 25 liu ona, no sira simu fali knaar foun atu serbí nuʼudar pioneiru. Foufoun sira sente triste. Lloyd dehan: “Haʼu sente Betel no knaar iha Betel mak parte ida husi haʼu-nia identidade. Iha haʼu-nia neon, haʼu simu mudansa neʼe, maibé tempu balu liutiha, haʼu sente katak irmaun sira lakohi uza ona haʼu.” Dala ruma Lloyd sente diʼak kona-ba mudansa neʼe, maibé dala ruma nia sente fali laran-kraik.

² Dala ruma ita hasoru mudansa neʼebé akontese derrepente no bele halo ita sente laran-taridu no estrese. (Provérbios [Amsal] 12:25) Se ita sente susar atu simu mudansa sira-neʼe, saida mak bele ajuda ita atu sai kalma nafatin? (Lee Salmo [Mazmur] 131:1-3. *) Mai ita haree toʼok ezemplu balu husi Jeová nia atan iha tempu uluk no ohin loron kona-ba oinsá sira bele iha hanoin  neʼebé kalma nafatin bainhira hasoru mudansa balu iha sira-nia moris.

3. Oinsá mak José nia moris troka derrepente?

³ Haree toʼok ezemplu kona-ba José. Jacob hadomi nia liu fali oan sira seluk, no neʼe halo ninia maun sira laran-moras ba nia. Bainhira nia tinan 17, sira faʼan nia hodi sai atan. (Gênesis [Kejadian] 37:2-4, 23-28) Nia moris ho terus iha rai-Ejitu maizumenus ba tinan 13. Primeiru nia sai atan no depois tama komarka. Nia moris dook husi ninia aman neʼebé hadomi tebes nia. Tuir loloos ninia situasaun bele halo nia sente lakon esperansa no rai-hirus, maibé nia la halo nuneʼe. Saida mak ajuda nia?

4. (a) Bainhira José iha komarka, nia tau fokus ba saida? (b) Jeová hatán José nia orasaun iha dalan oinsá?

⁴ Bainhira José hasoru daudauk terus iha komarka, ita fiar katak nia tau fokus kona-ba oinsá Jeová ajuda ona nia. (Gênesis [Kejadian] 39:21; Salmo [Mazmur] 105:17-19) Karik nia mós hanoin kona-ba mehi neʼebé Jeová fó ba nia bainhira nia sei joven no neʼe fó konfiansa ba nia katak Jeová hamutuk ho nia. (Gênesis [Kejadian] 37:5-11) Karik nia halo orasaun beibeik no fó sai ba Jeová buat hotu iha ninia laran. (Salmo [Mazmur] 145:18) Hodi hatán ba José nia orasaun, Jeová halo nia fiar katak Jeová sei “hamutuk ho nia” iha ninia terus hotu. (Apóstolu 7:9, 10) *.

5. Oinsá mak “Maromak nia dame” bele ajuda ita atu kontinua serbí nia?

⁵ Iha situasaun susar naran deʼit neʼebé ita hasoru, ita bele iha “Maromak nia dame” neʼebé bele proteje ita-nia “kbiit atu hanoin” no halo ita kalma nafatin. (Lee Filipe 4:6, 7.) Bainhira ita sente laran-taridu ka estrese, se ita halo orasaun, “Maromak nia dame” bele fó forsa ba ita atu kontinua serbí Jeová no la rende an. Mai ita haree toʼok ezemplu balu husi irmaun-irmán sira.

6, 7. Oinsá mak halo orasaun kona-ba buat neʼebé espesífiku bele ajuda ita atu iha fali dame no kalma iha laran? Fó toʼok ezemplu.

⁶ Bainhira Ryan no Juliette rona katak sira-nia knaar temporáriu nuʼudar pioneiru tempu-tomak besik ona atu ramata, sira sente laran-kraik tebes. Ryan hatete: “Ami halo kedas orasaun ba Jeová kona-ba neʼe. Ami hatene katak neʼe mak oportunidade espesiál ba ami atu tau fiar deʼit ba Jeová. Ema barak iha ami-nia kongregasaun seidauk kleur iha lia-loos, tan neʼe ami halo orasaun ba Jeová atu ajuda ami hatudu ezemplu neʼebé diʼak katak ami tau fiar ba Jeová.”

⁷ Oinsá mak Jeová hatán ba sira-nia orasaun? Ryan hatete: “Orasaun hotu tiha, ami sente kedas katak ami-nia sentimentu susar no laran-taridu lakon ona. Maromak nia dame mak proteje daudauk ami-nia laran no kbiit atu hanoin. Ami rekoñese katak Maromak sei kontinua uza ami, naran katak ami iha hanoin neʼebé loos.”

8-10. (a) Oinsá mak Maromak nia espíritu ajuda ita kuandu ita sente laran-taridu? (b) Se ita tau fokus hodi serbí Jeová, karik Jeová sei ajuda ita iha dalan oinsá?

⁸ Maromak nia espíritu bele halo ita sente kalma no mós ajuda ita atu hetan eskritura neʼebé sei ajuda ita tau uluk buat neʼebé importante liu iha ita-nia moris. (Lee João 14:26, 27.) Haree toʼok buat neʼebé akontese ba Philip no Mary, feen-laʼen neʼebé uluk serbí iha Betel maizumenus ba tinan 25. Iha  fulan haat nia laran, sira ida-idak nia inan mate no ema ida husi Philip nia família mós mate, no sira presiza tau matan ba Mary nia aman neʼebé kona moras deménsia.

⁹ Philip hatete: “Haʼu hanoin haʼu tahan hasoru situasaun neʼe, maibé haʼu sente sei falta buat ruma. Haʼu lee Koloso 1:11 iha Livru Haklaken ida. Haʼu tahan duni, maibé haʼu-nia dalan atu tahan seidauk kompletu. Haʼu presiza ‘tahan buat hotu ho pasiénsia no ksolok’. Eskritura neʼe fó-hanoin haʼu katak, haʼu-nia ksolok la depende ba situasaun, maibé depende ba Maromak nia espíritu.”

¹⁰ Philip no Mary tau fokus hodi serbí nafatin Jeová, tan neʼe Jeová fó bensaun oioin ba sira. Bainhira sira sai husi Betel, sira hetan estudante Bíblia balu neʼebé laʼo ba oin, no sira hakarak estuda Bíblia dala barak iha semana ida nia laran. Mary hatete: “Sira mak ami-nia ksolok no neʼe hanesan Jeová koʼalia ba ami katak buat hotu sei laʼo diʼak.”

11, 12. (a) José halo saida hodi Jeová bele haraik bensaun ba nia? (b) José nia hahalok tahan lori rezultadu saida?

¹¹ Se ita-nia moris troka derrepente, karik ita sei sai laran-taridu tebes toʼo hanoin deʼit kona-ba ita-nia problema sira. José mós bele sai hanesan neʼe, maibé nia halo buat ruma iha ninia situasaun neʼe hodi Jeová bele haraik bensaun. Maski nia hetan kastigu iha komarka, nia hakaʼas an hodi halo buat hotu neʼebé xefe boot ba komarka fó ba nia atu halo hanesan bainhira nia serbisu ba Potifar.​—Gênesis (Kejadian) 39:21-23.

¹² Loron ida José hetan knaar atu tau matan ba prizioneiru naʼin-rua neʼebé uluk serbí iha Faraó nia palásiu. José hatudu laran-diʼak ba sira, tan neʼe sira konta ba José kona-ba sira-nia susar no mehi neʼebé sira hetan iha kalan. (Gênesis [Kejadian] 40:5-8) José la hatene katak sira-nia koʼalia neʼe ikusmai sei lori nia sai husi komarka. Tinan rua liutiha, José sai husi komarka no sai naʼi-ulun neʼebé iha kbiit boot iha rai-Ejitu ho pozisaun segundu husi Faraó.​—Gênesis (Kejadian) 41:1, 14-16, 39-41.

13. Oinsá mak Jeová sei haraik bensaun ba ita se ita monu ba situasaun neʼebé susar?

¹³ Hanesan José, karik ita bele monu ba situasaun neʼebé ita la bele kontrola. Maibé se ita hatudu pasiénsia no halo buat neʼebé ita bele halo, Jeová sei haraik bensaun ba ita. (Salmo [Mazmur] 37:5) Maski iha tempu neʼebé ita la hatene atu halo saida ka sente laran-taridu, ita la presiza sente la iha dalan atu sai ka lakon esperansa. (2 Korinto 4:8) Jeová sei hamutuk ho ita, liuliu se ita tau fokus nafatin ba ita-nia serbisu haklaken.

14-16. Oinsá mak dixípulu Filipe tau fokus ba serbisu haklaken maski ninia situasaun moris nian troka?

¹⁴ Dixípulu Filipe hatudu ezemplu neʼebé diʼak tebes kona-ba tau fokus iha serbisu haklaken maski situasaun moris nian troka. Iha tempu ida nia haksolok hodi halaʼo ninia knaar foun iha Jeruzalein. (Apóstolu 6:1-6) Tuirmai situasaun troka. Ema oho Estevão no depois fó-terus makaʼas ba ema kristaun sira. * Tanba terus sira-neʼe, ema kristaun sira halai husi Jeruzalein. Maski nuneʼe, Filipe hakarak serbí nafatin Jeová ho badinas, tan neʼe nia bá haklaken iha Samaria, sidade neʼebé ema presiza rona kona-ba liafuan diʼak.​—Mateus 10:5; Apóstolu 8:1, 5.

¹⁵ Filipe husik Maromak nia espíritu dirije nia hodi bá fatin neʼebé Jeová hakarak nia atu bá. Tan neʼe Jeová uza nia atu haklaken iha fatin neʼebé ema seidauk rona kona-ba liafuan diʼak. Ema judeu barak la hafolin ema Samaria no trata aat sira. Maibé Filipe la halo diskriminasaun ba sira, nia fahe liafuan diʼak ba sira ho laran-manas, no ema Samaria sira rona ba nia “ho hanoin ida deʼit”.​—Apóstolu 8:6-8.

¹⁶ Tuirmai Maromak nia espíritu dirije Filipe hodi haklaken iha Asdod no Sezareia, sidade sira-neʼe iha ema jentiu barak. (Apóstolu 8:39, 40) Tuirmai, Filipe nia situasaun troka tan. Nia hela metin no harii umakain. Maski Filipe nia situasaun troka beibeik, nia badinas nafatin hodi haklaken, no Jeová kontinua haraik bensaun ba nia no ba ninia família.​—Apóstolu 21:8, 9.

17, 18. Se situasaun ruma iha ita-nia moris troka, oinsá mak tau fokus nafatin ba serbisu haklaken bele ajuda ita?

¹⁷ Ema barak neʼebé serbí tempu-tomak hatete katak tau fokus iha serbisu haklaken ajuda sira atu kontente nafatin no iha hanoin pozitivu maski situasaun troka. Porezemplu, bainhira feen-laʼen ida iha rai-Áfrika Súl naran Osborne no Polite sai husi Betel, sira hanoin katak lakleur sira bele buka serbisu part-time no fatin atu hela. Maibé Osborne hatete: “Susar atu buka serbisu, la hanesan buat neʼebé ami hanoin.” Polite dehan: “Ami buka serbisu ba fulan tolu maibé la hetan, no ami osan la iha ona. Neʼe susar tebes ba ami.”

¹⁸ Saida mak ajuda Osborne no Polite iha situasaun estrese neʼe? Osborne hatete:  “Haklaken hamutuk ho kongregasaun ajuda tebes ami atu tau fokus nafatin no iha hanoin pozitivu.” Duké hela deʼit iha uma hodi hanoin barak, sira deside atu sai badinas nafatin iha serbisu haklaken. Halo nuneʼe lori ksolok boot ba sira. Osborne hatutan: “Ami buka serbisu iha fatin oioin, ikusmai hetan duni serbisu.”

19-21. (a) Saida mak bele ajuda ita atu sai kalma nafatin? (b) Halo mudansa tuir situasaun foun lori benefísiu saida ba ita?

¹⁹ Esperiénsia sira-neʼe hatudu katak, se ita hakaʼas an halo buat ruma iha situasaun neʼebé troka no tau fiar tomak ba Jeová, neʼe bele ajuda ita atu sai kalma nafatin. (Lee Miquéias [Mikha] 7:7. *) Ikusmai ita sei haree katak mudansa neʼebé ita halo hodi tuir situasaun foun hametin duni ita-nia relasaun ho Jeová. Polite esplika katak bainhira sai husi Betel no simu fali knaar foun hanorin nia oinsá atu sadere ba Jeová maski haree hanesan moris nakonu ho susar. Nia dehan: “Haʼu-nia relasaun ho Jeová sai metin liután.”

²⁰ Mary neʼebé temi iha leten, nia pioneiru nafatin no tau matan ba ninia aman neʼebé idade ona. Nia dehan: “Haʼu aprende katak, se haʼu sente laran-taridu, haʼu presiza para, halo orasaun, no deskansa. Lisaun importante liu neʼebé haʼu aprende mak, entrega haʼu-nia susar sira ba Jeová, no haʼu presiza halo nuneʼe liután iha futuru.”

²¹ Lloyd no Alexandra rekoñese katak, situasaun neʼebé troka koko tebes sira-nia fiar iha dalan neʼebé sira nunka hanoin. Maibé sira bele haree katak koko sira-neʼe tuir loloos ajuda sira. Agora sira hatene katak sira iha fiar neʼebé metin hodi ajuda sira bainhira hasoru problema ruma, no sira sente katak sira sai ema neʼebé diʼak liután.

22. Ita bele tau fiar kona-ba saida se ita hakaʼas an atu halo buat ruma iha situasaun neʼebé troka?

²² Ita-nia moris bele troka derrepente. Karik ita simu fali knaar foun, problema ho saúde, ka presiza tau matan ba ita-nia família. Maski buat saida deʼit mak akontese, tau fiar nafatin katak Jeová sei tau matan ba Ita no nia sei ajuda Ita iha tempu neʼebé loos. (Ebreu 4:16; 1 Pedro 5:6, 7) Tan neʼe, hakaʼas an atu halo buat ruma iha situasaun neʼebé troka. Halo orasaun ba Ita-nia Aman Jeová, no aprende oinsá atu sadere ba nia. Halo nuneʼe bele ajuda Ita atu sempre sai kalma no iha dame neʼebé mai husi Jeová maski ita-nia situasaun moris nian troka.