JAMES no Jessie Sinclair mak haʼu-nia inan-aman, sira husi rai-Eskósia. Antes haʼu moris, sira muda ba sidade boot ida iha Novaiorke naran Bronx, maizumenus iha tinan 1935. Iha neʼebá sira hetan kolega foun ida neʼebé mós mai husi rai-Eskósia, nia naran Willie Sneddon. Maski sira foin koñese malu, sira koʼalia barak kona-ba sira-nia família.

Haʼu-nia inan konta ba Willie katak antes Funu Mundiál Primeiru akontese, ninia aman ho maun ida mate iha Tasi Norte tanba sira-nia ró peska nian xoke bomba neʼebé ema tau iha tasi. Depois Willie hatán, “Ita-nia apá iha infernu!” * Willie mak Testemuña ida no nia uza dalan neʼebé úniku tebes hodi haklaken ba haʼu-nia inan.

Buat neʼebé Willie hatete halo haʼu-nia inan hirus tanba nia hatene katak ninia apá mak ema diʼak. Maibé Willie hatutan hodi husu, “Ita sente oinsá se haʼu hatete katak Jesus bá infernu?” Haʼu-nia inan hanoin didiʼak fali kona-ba igreja nia doutrina, no nia rekoñese katak sira hatete duni ‘Jesus tun ba infernu’ no iha loron tolu nia moris hiʼas fali. Neʼe halo nia hanoin, ‘Se infernu mak fatin neʼebé uza atu sunu ema aat, tanbasá mak Jesus mós ba fatin neʼe?’ Husi tempu neʼebá, haʼu-nia inan komesa hatudu interese kona-ba lia-loos. Nia hahú tuir reuniaun sira iha kongregasaun Bronx no hetan batizmu iha tinan 1940.

Ba inan-aman sira iha tempu neʼebá, ita-nia organizasaun ladún fó laran-manas ba sira atu estuda Bíblia ho sira-nia oan. Bainhira haʼu sei kiʼik, haʼu-nia aman mak tau matan ba haʼu iha tempu neʼebé haʼu-nia inan bá tuir reuniaun sira no halaʼo serbisu haklaken iha findesemana. Tinan balu liutiha, haʼu no haʼu-nia aman mós komesa tuir reuniaun sira hamutuk ho haʼu-nia inan. Amá badinas tebes haklaken no nia estuda Bíblia ho ema barak. Iha tempu ida, nia estuda Bíblia ho ema grupu ida tanba estudante balu hela besik malu. Bainhira eskola feriadu haʼu mós tuir nia bá haklaken. Iha dalan hanesan neʼe mak haʼu aprende buat barak kona-ba Bíblia  no oinsá atu hanorin fali ema seluk kona-ba Bíblia.

Haʼu triste tanba bainhira haʼu sei kiʼik, haʼu ladún hafolin lia-loos. Maibé bainhira haʼu maizumenus tinan 12, haʼu sai haklaken-naʼin no komesa haklaken. Bainhira haʼu tinan 16, haʼu dedika haʼu-nia moris ba Jeová no hetan batizmu iha loron 24 Jullu 1954 iha reuniaun boot ida iha Toronto, rai-Kanadá.

Iha ami-nia kongregasaun, iha irmaun-irmán balu neʼebé serbí iha Betel. Sira-nia ezemplu book tebes haʼu iha dalan neʼebé sira koʼalia no esplika kona-ba lia-loos husi Bíblia. Maski profesora sira husi haʼu-nia eskola hakarak haʼu bá universidade, maibé haʼu-nia planu loloos mak atu serbí iha Betel. Tan neʼe, bainhira tuir reuniaun boot iha Toronto, haʼu hatama formuláriu atu serbí iha Betel. Tuirmai haʼu hatama tan formuláriu neʼe bainhira tuir reuniaun boot iha Yankee Stadium, iha sidade Novaiorke iha tinan 1955. Lakleur, haʼu hetan konvite no haʼu komesa serbí iha Betel Brooklyn iha loron 19 Setembru 1955 ho idade 17. Tama tiha Betel ba loron rua, haʼu hetan knaar hodi serbisu iha fatin neʼebé atu halo livru iha 117 Adams Street. Haʼu tau matan ba mákina neʼebé halibur livru sira ho tahan 32 hamutuk, depois suku surat-tahan sira-neʼe hodi sai livru ida.

Serbisu tiha maizumenus ba fulan ida, haʼu hetan fali knaar hodi serbisu iha departamentu revista nian tanba haʼu hatene oinsá atu ketik. Iha tempu neʼebá, irmaun-irmán sira ketik ema foun nia hela-fatin iha kartaun kaleen kiʼik ida ba sira neʼebé hakarak hameno Livru Haklaken no livru Matan-moris bá! Fulan balu liutiha, haʼu serbisu fali iha departamentu neʼebé haruka livru sira. Irmaun Klaus Jensen mak tau matan ba departamentu neʼe no nia husu se haʼu hakarak  bá hamutuk ho xofér neʼebé tula livru iha kaixa sira bá ponte-kais atu haruka ba rai oioin. Haʼu mós presiza lori revista sira iha bornál ba korreiu hodi haruka ba kongregasaun sira iha Estadus Unidus. Irmaun Jensen hatete katak serbisu neʼe presiza uza forsa maibé diʼak ba haʼu. Tuir loloos haʼu krekas tebes iha tempu neʼebá, no haʼu-nia todan mak kilograma 57 deʼit. Lori livru sira bá-mai ponte-kais no korreiu fó treinu ba haʼu atu aumenta forsa. Afinál irmaun Jensen hatene duni saida mak diʼak ba haʼu!

Kongregasaun sira mós hameno revista husi departamentu revista nian. Tan neʼe haʼu hatene língua saida deʼit mak Betel Brooklyn halo kona-ba revista sira neʼebé atu haruka ba rai seluk. Língua balun haʼu nunka rona maibé haʼu kontente hodi hatene katak ami haruka revista rihun ba rihun ba fatin sira neʼebé dook. Iha tempu neʼebá haʼu la hatene katak, lakleur tan haʼu sei hetan priviléjiu ida atu bá vizita fatin oioin ba tinan barak.

Iha 1961 haʼu hetan knaar atu serbisu iha departamentu neʼebé tau matan ba osan, no irmaun Grant Suiter mak tau matan ba departamentu neʼe. Liutiha tinan balu, irmaun Nathan Knorr neʼebé dirije serbisu haklaken iha mundu tomak bolu haʼu ba ninia eskritóriu. Nia esplika ba haʼu katak iha irmaun ida atu tuir Eskola ba Katuas no Atan ba Kongregasaun ba fulan ida, no hotu tiha nia sei ba serbisu fali iha Departamentu Serbisu nian. Haʼu mak sei halo fali ninia knaar no serbisu hamutuk ho irmaun Don Adams. Afinál Don mak irmaun neʼebé simu haʼu-nia formuláriu atu serbí iha Betel iha reuniaun boot tinan 1955. Irmaun naʼin-rua seluk tan neʼebé serbisu hamutuk iha departamentu neʼe mak Robert Wallen no Charles Molohan. Ami naʼin-haat serbisu hamutuk ba tinan 50 liu. Haʼu haksolok tebes hodi bele serbí hamutuk ho irmaun laran-metin sira-neʼe!—Salmo (Mazmur) 133:1.

Komesa husi 1970, haʼu simu knaar ida atu halo vizita ba sukursál balu husi Watch  Tower Society no haʼu presiza halaʼo knaar neʼe ba semana balu kada tinan ida ka rua, uluk bolu nuʼudar vizita zona nian. Vizita neʼe inklui mós vizita irmaun-irmán sira iha Betel no misionáriu sira iha rai oioin atu fó laran-manas ba sira no haree relatóriu husi sukursál sira. Haʼu haksolok tebes hodi bele hasoru irmaun-irmán sira neʼebé uluk tuir ona eskola Gilead tinan barak liubá maibé serbí nafatin ho laran-metin iha rai seluk! Haʼu hetan duni priviléjiu boot hodi bele vizita nasaun 90 liu ho knaar neʼebé haʼu halo.

Ema hotu neʼebé serbisu iha Betel Brooklyn fahe ba kongregasaun sira iha área Novaiorke nian. Ami-nia kongregasaun mak iha Bronx. Kongregasaun primeiru iha sidade neʼe aumenta lalais no fahe tan ba kongregasaun seluk. Ami-nia kongregasaun primeiru neʼe naran Upper Bronx.

Maizumenus iha 1965, família Testemuña ida husi rai-Letónia neʼebé hetan lia-loos husi Bronx parte súl muda mai ami-nia área. Sira-nia oan-feto boot naran Livija no bainhira nia ramata eskola sekundária, nia foti kedas pioneiru regulár. Liutiha fulan balu nia muda ba Massachusetts tanba iha neʼebá presiza tan haklaken-naʼin. Haʼu hakerek beibeik karta ba nia hodi fó-hatene kona-ba ami-nia kongregasaun, no nia mós hakerek fali hodi fó-hatene haʼu kona-ba ninia serbisu haklaken iha área Boston.

Tinan balu liutiha, Livija hetan knaar hodi sai pioneiru tempu-tomak. Nia hakarak tebes atu halo serbisu barak liután ba Jeová, tan neʼe nia mós hatama formuláriu atu serbí iha Betel no nia hetan konvite hodi tama Betel iha tinan 1971. Haʼu agradese ba Jeová tanba Livija serbí iha Betel. Iha loron 27 Outubru 1973 ami kaben no ami hetan priviléjiu boot tanba irmaun Nathan Knorr mak hatoʼo diskursu iha ami-nia kazamentu. Provérbios 18:22 dehan: “Ema neʼebé hetan feen neʼebé diʼak, nia hetan ona buat diʼak, no nia simu Jeová nia laran-diʼak.” Haʼu ho Livija serbí iha Betel hamutuk tinan 40 liu. Ami kontinua fó apoiu ba kongregasaun ida iha Bronx.

Haʼu haksolok tebes bele serbisu hamutuk ho irmaun Knorr. Nia badinas kona-ba lia-loos no mós hafolin tebes misionáriu sira iha mundu tomak. Dala barak, misionáriu sira-neʼe mak sai hanesan Testemuña primeiru iha nasaun neʼebé sira atu bá. Maibé triste tebes bainhira haʼu haree irmaun Knorr hetan moras kankru iha tinan 1976. Dala ida nia latan deʼit iha kama no la bele hamriik. Nia husu haʼu atu lee deʼit informasaun balu husi livru sira neʼebé atu lori ba print. Nia husu haʼu bolu Frederick Franz mai hodi nia mós bele rona ba informasaun neʼebé haʼu lee. Ikusmai haʼu foin hatene katak, tanba irmaun Franz nia matan ladún diʼak mak dala barak irmaun Knorr tenke lee informasaun hanesan neʼe ba nia.

Irmaun Knorr mate iha tinan 1977, maibé ba sira neʼebé koñese no hadomi nia la sente triste demais tanba irmaun Knorr ramata  ona ninia moris iha rai ho laran-metin. (Apokalipse 2:10) Tuirmai irmaun Franz mak dirije fali serbisu haklaken iha mundu tomak.

Iha tempu neʼebá, haʼu-nia knaar mak atu halo serbisu sekretáriu nian ba Milton Henschel, nia serbisu ho irmaun Knorr ba tinan barak tebes. Irmaun Henschel fó-hatene ba haʼu katak, komesa husi tempu neʼebá, haʼu-nia responsabilidade importante liu mak atu fó ajuda ba irmaun Franz. Haʼu sempre lee livru sira ba nia antes lori ba print. Irmaun Franz nia kakutak úniku tebes tanba nia bele fó atensaun tomak no hanoin-hetan informasaun hotu neʼebé nia rona. Haʼu haksolok tebes hodi bele ajuda nia toʼo nia ramata ninia moris iha rai iha fulan-Dezembru 1992!

Maski haʼu serbí iha Betel ba tinan 61, maibé tempu liu lalais. Haʼu-nia inan-aman laran-metin ba Jeová toʼo sira mate, no haʼu hein ho namanas atu simu fali sira iha mundu foun. (João 5:28, 29) La iha buat ida husi mundu aat neʼe mak bele kompara ho priviléjiu neʼebé haʼu iha hodi serbisu hamutuk ho irmaun-irmán laran-metin sira atu ajuda Maromak nia povu iha mundu tomak. Haʼu ho Livija bele koʼalia husi laran katak, durante tempu neʼebé ami serbí Jeová tempu-tomak, “Jeová nia ksolok mak [ami-nia] fatin seguru”.—Neemias 8:10.

Serbisu atu habelar lia-loos sempre laʼo ba oin tanba Jeová nia organizasaun la depende deʼit ba ema ida. Haʼu hetan duni ksolok no priviléjiu hodi serbisu ba tinan barak hamutuk ho irmaun-irmán sira neʼebé laran-metin ba Jeová. Sira barak neʼebé iha esperansa atu saʼe ba lalehan, neʼebé uluk serbisu hamutuk ho haʼu, ramata ona sira-nia moris iha rai. Maibé haʼu agradese tebes hodi bele iha belun neʼebé laran-metin no maduru hanesan sira hodi halaʼo Jeová nia serbisu!