1. Iha Jesus nia kalan ikus hamutuk ho ninia dixípulu sira, nia koʼalia kona-ba tópiku importante saida?

IHA Jesus nia kalan ikus hamutuk ho ninia dixípulu sira, nia temi domin maizumenus ba dala 30. Nia hatete ba ninia dixípulu katak sira presiza “hadomi malu”. (João 15:12, 17) Ema sei rekoñese katak sira mak Kristu nia dixípulu liuhusi domin neʼebé sira hatudu ba malu. (João 13:34, 35) Domin neʼebé Jesus temi laʼós kona-ba sentimentu deʼit, maibé domin neʼebé kleʼan tebes toʼo ema ida bele fó ninia moris ba ema seluk. Jesus dehan: “La iha ema ida iha domin boot liu fali ema neʼebé fó nia moris ba ninia belun sira. Imi mak haʼu-nia belun sira se imi halo buat neʼebé haʼu haruka imi atu halo.”—João 15:13, 14.

2. (a) Ema rekoñese Maromak nia povu kona-ba saida? (b) Lisaun neʼe sei koʼalia kona-ba pergunta saida deʼit?

² Ohin loron, Jeová nia povu hatudu domin neʼebé loos no iha unidade, tan neʼe ema rekoñese katak sira mak Maromak nia povu. (1 João 3:10, 11) Jeová nia atan iha mundu tomak hatudu domin neʼebé kleʼan ba malu maski sira mai husi nasaun, suku, língua ka kultura neʼebé la hanesan. Tanbasá importante  atu hatudu domin ohin loron? Oinsá mak Jeová no Jesus harii ka hametin ita liuhusi domin? No oinsá mak ita bele hatudu domin hanesan neʼe atu fó kmaan no hametin ema seluk?—1 Korinto 8:1.

3. Oinsá mak “problema barak” iha mundu neʼe fó impaktu ba ema nia moris?

³ Ohin loron, ema hasoru daudauk “problema barak” no moris “nakonu ho susar no triste”. (2 Timóteo 3:1-5; Salmo [Mazmur] 90:10) Ema barak hasoru terus neʼebé halo sira sente atu rende an deʼit. Tinan-tinan, hamutuk ema naʼin–800.000 resin mak hakotu sira rasik nia moris, neʼe katak kada segundu 40, ema ida mate. Ita sente triste hodi haree ita-nia irmaun-irmán balu mós sente hanesan neʼe no ikusmai oho-an.

4. Maromak nia atan sesé deʼit mak hakarak mate deʼit?

⁴ Iha tempu uluk, Maromak nia atan balu neʼebé laran-metin hasoru problema oioin neʼebé halo sira sente hakarak mate deʼit. Porezemplu, tanba terus oioin neʼebé Job hasoru, nia hatete: “Haʼu odi haʼu-nia moris, haʼu lakohi moris tan.” (Jó [Ayub] 7:16; 14:13) Jonas sente laran-kraik tebes toʼo nia dehan: “Agora oh Jeová, favór ida, hasai tiha haʼu-nia moris, tanba diʼak liu haʼu mate deʼit duké moris.” (Jonas [Yunus] 4:3) Profeta Elias sente nia hasoru daudauk situasaun neʼebé susar tebes no nia hatete: “Oh Jeová, toʼo ona! Agora hasai deʼit haʼu-nia moris.” (1 Reis [Raja-Raja] 19:4) Maski nuneʼe, Jeová nafatin hadomi tebes sira no hakarak sira atu moris. Nia la fó sala ba sira tanba sira sente hanesan neʼe, maibé nia ajuda sira hodi halakon sira-nia hakarak atu mate no hametin sira liuhusi domin, atu nuneʼe sira bele kontinua serbí nia ho laran-metin.

5. Tanbasá mak ita-nia irmaun-irmán sira presiza tebes ita-nia domin ohin loron?

⁵ Ohin loron, ita-nia irmaun-irmán barak hasoru daudauk situasaun estrese oioin no ita presiza hametin sira liuhusi domin. Balu ema goza no fó-terus ba sira. Balu presiza tahan tanba ema trata no koʼalia aat sira iha serbisu-fatin. Balu kole tebes tanba sira tenke serbisu ba oras barak ka halo serbisu neʼebé lori estrese ba sira. Balu tan hasoru problema boot iha família laran, karik tanba sira-nia kaben neʼebé la adora Jeová kritika beibeik sira. Tanba estrese no problema oioin, neʼe halo ema barak iha kongregasaun sente kole tebes iha dalan fíziku no emosaun. Sé mak bele ajuda sira?

6. Oinsá mak Jeová hametin ninia atan sira liuhusi domin?

⁶ Jeová hametin ninia atan sira hodi fó sai katak nia hadomi sira ba nafatin. Karik ema Izraél sira sente kontente tebes bainhira Jeová hatete ba sira: “Haʼu haree ó hanesan buat folin-boot, ó hetan ona glória, no haʼu hadomi ona ó. . . . Keta taʼuk, tanba haʼu hamutuk ho ó.” (Isaías [Yesaya] 43:4, 5) Ita bele fiar metin katak ita ida-idak iha folin-boot tebes ba Jeová. * Bíblia promete hodi dehan: “Hanesan asuwaʼin ida, nia sei salva ó. Nia sei haksolok tebes kona-ba ó.”—Sofonias (Zefanya) 3:16, 17.

7. Iha dalan saida mak Jeová nia domin kompara hanesan inan neʼebé tau matan bebé? (Haree dezeñu iha leten.)

 ⁷ Maski ita hasoru problema saida deʼit Jeová promete katak nia sei hametin no fó kmaan ba ita. Jeová dehan: “Imi sei sai hanesan labarik ida neʼebé ninia inan koʼus no fó-susu no nia tuur halimar iha ninia inan nia hitin. Hanesan inan ida fó kmaan ba nia oan, nuneʼe mós haʼu sei kontinua fó kmaan ba imi.” (Isaías [Yesaya] 66:12, 13) Bebé ida sente seguru tebes bainhira ninia inan koʼus ka halimar ho nia. Jeová uza komparasaun neʼe hodi hatudu sai ninia domin neʼebé kleʼan ba sira neʼebé adora nia. Fiar bá katak Ita iha folin-boot tebes ba Jeová!—Jeremias (Yeremia) 31:3.

8, 9. Oinsá mak Jesus nia domin bele hametin ita?

⁸ Razaun ida tan ita bele fiar katak Jeová hadomi ita mak tanba nia “hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar iha nia sei la lakon maibé hetan moris rohan-laek”. (João 3:16) Jesus nia sakrifísiu fó prova katak Jesus mós hadomi ita, no ninia domin neʼe hametin ita. Bíblia hatete katak susar ka terus labele haketak ita husi Kristu nia domin.—Roma 8:35, 38, 39.

⁹ Dala ruma problema oioin bele halo ita sente kole tebes iha dalan fíziku no emosaun toʼo ita la iha tan ksolok atu serbí Jeová. Maibé hodi hanoin kona-ba Kristu nia domin neʼebé kleʼan ba ita, neʼe bele fó forsa ba ita atu tahan. (Lee 2 Korinto 5:14, 15.) Jesus nia domin fó kbiit no motivasaun ba ita atu la rende an maski ita hasoru problema oioin hanesan, dezastre, ema fó-terus, laran-kraik, ka laran-taridu.

10, 11. Sé mak iha responsabilidade atu hametin no fó kmaan ba irmaun-irmán sira neʼebé laran-kraik? Esplika toʼok.

¹⁰ Jeová mós hametin ita ho domin liuhusi ita-nia kongregasaun. Ita bele hatudu katak ita hadomi Jeová hodi hatudu fali domin ba irmaun-irmán sira. Ita presiza hakaʼas an atu ajuda irmaun-irmán sira hatene katak Jeová hafolin no hadomi tebes sira. (1 João 4:19-21) Apóstolu Paulo dehan: “Kontinua fó aten-brani ba malu no hametin malu, hanesan imi halo daudaun ona.” (1 Tesalónika 5:11) Katuas kongregasaun no ita hotu bele banati-tuir Jeová no Jesus atu fó kmaan ba ita-nia irmaun-irmán sira.—Lee Roma 15:1, 2.

¹¹ Ema balu iha kongregasaun  neʼebé hasoru daudauk moras depresaun ka laran-taridu presiza buka ajuda husi doutór no hemu ai-moruk. (Lucas 5:31) Maski katuas no ema seluk iha kongregasaun rekoñese katak sira laʼós doutór, maibé dalan neʼebé sira bele fó kmaan no ajuda irmaun-irmán sira-neʼe mak importante tebes. Ema hotu iha kongregasaun bele “fó laran-manas ba sira neʼebé laran-tun, apoia sira neʼebé fraku, hatudu pasiénsia ba ema hotu”. (1 Tesalónika 5:14) Ita presiza koko atu komprende kona-ba irmaun-irmán sira-nia sentimentu. Ita presiza hatudu pasiénsia ba sira no koʼalia iha dalan neʼebé bele fó kmaan ba sira bainhira sira sente laran-kraik. Ita koko atu hametin ema seluk ka lae? Ita bele halo saida atu bele fó kmaan no laran-manas liután ba ema seluk?

12. Konta toʼok ezemplu ida husi ema neʼebé hetan kmaan liuhusi domin neʼebé kongregasaun hatudu.

¹² Irmán ida iha Europa hatete: “Dala ruma haʼu hanoin atu oho-an, maibé apoiu neʼebé haʼu hetan ajuda tebes haʼu. Kongregasaun salva duni haʼu-nia moris. Irmaun-irmán sira sempre fó kmaan no hatudu domin ba haʼu. Maski ema balu deʼit mak hatene katak haʼu iha moras depresaun, maibé haʼu bele sadere ba kongregasaun iha tempu hotu. Kaben-naʼin ida sai hanesan haʼu-nia inan-aman espirituál. Sira tau matan ba haʼu no sempre prontu atu ajuda haʼu.” Maski laʼós ema hotu bele fó ajuda hanesan neʼe, maibé ita hotu bele hakaʼas an atu fó apoiu ba ita-nia irmaun-irmán sira. *

13. Ita bele halo saida atu fó kmaan ba ema seluk?

¹³ Rona ho pasiénsia. (Tiago 1:19) Ita hatudu domin hodi rona didiʼak ba irmaun ka irmán. Husu pergunta ho laran-diʼak hodi koko komprende sira-nia sentimentu. Sira bele haree husi Ita-nia oin se Ita hanoin sira ka lae. Se sira hakarak koʼalia sai sira-nia sentimentu, rona ho pasiénsia no keta korta sira-nia liafuan. Se Ita mak rona ho pasiénsia, Ita sei komprende liután sira-nia sentimentu no neʼe sei book sira atu tau konfiansa ba Ita. Se Ita halo nuneʼe, fasil ba sira atu rona ba Ita-nia hakaʼas-an hodi ajuda sira. Se Ita hanoin tebes ema seluk, neʼe bele fó kmaan tebes ba sira.

14. Tanbasá mak ita labele kritika ema seluk?

¹⁴ Keta kritika. Ema neʼebé depresaun sei sente laran-kraik liután se nia hanoin katak ita kritika nia. Neʼe bele halo susar ba ita atu ajuda nia. Bíblia dehan: “Liafuan neʼebé koʼalia sai hodi la hanoin uluk mak hanesan sona ho surik, maibé ema matenek nia nanál mak bele kura.” (Provérbios [Amsal] 12:18) Maski ita la iha intensaun atu hakanek ema neʼebé iha moras depresaun, maibé se ita koʼalia hodi la hanoin uluk, neʼe bele hakanek tebes ema neʼe. Atu bele hametin ema hanesan neʼe ho domin, ita  presiza tau ita-nia an iha ninia situasaun hodi bele komprende ninia sentimentu.—Mateus 7:12.

15. Ita iha livru saida atu fó kmaan ba ema seluk ho domin?

¹⁵ Uza Maromak nia Liafuan hodi fó kmaan ba ema seluk. (Lee Roma 15:4, 5.) Bíblia mai husi Maromak neʼebé “fó kmaan mai ita no hametin ita atu tahan”. Tan neʼe, ita bele hetan liafuan neʼebé fó kmaan husi eskritura sira. Ita mós bele uza livru Indeks Publikasi Menara Pengawal no Livru atu ajuda Testemuña ba Jeová buka informasaun. Hodi uza livru sira-neʼe ita bele buka eskritura no publikasaun sira neʼebé ita bele uza hodi fó kmaan no hametin irmaun-irmán sira ho domin.

16. Hahalok saida mak bele ajuda ita atu fó kmaan ba ema neʼebé iha moras depresaun?

¹⁶ Hatudu laran-sadiʼa. Jeová mak “Aman neʼebé laran-sadiʼa no Maromak neʼebé fó kmaan ba ema iha situasaun hotu”. Nia hanoin tebes ninia atan sira. (Lee 2 Korinto 1:3-6; Lucas 1:78; Roma 15:13) Paulo hatudu ezemplu neʼebé diʼak hodi banati-tuir Jeová. Nia dehan: “Hanesan inan neʼebé fó-susu no tau matan didiʼak ba nia oan, ami mós tau matan didiʼak ba imi. Entaun, ami hanoin tebes imi, no ami kontente atu fahe ba imi laʼós deʼit liafuan diʼak kona-ba Maromak, maibé mós fó ami-nia moris hodi ajuda imi, tanba ami hadomi imi tebetebes.” (1 Tesalónika 2:7, 8) Se ita mak hatudu laran-sadiʼa hanesan Jeová, karik Jeová bele uza ita atu hatán ba irmaun-irmán sira-nia orasaun neʼebé husu kmaan.

17. Hanoin hanesan saida mak bele ajuda ita atu hametin irmaun-irmán sira?

¹⁷ Hanoin-hetan katak irmaun-irmán sira la perfeitu. Ita presiza iha hanoin neʼebé loos kona-ba Ita-nia irmaun-irmán sira. Se Ita mak buka hahalok perfeitu husi sira, neʼe sei halo Ita rasik laran-kraik. (Eclesiastes [Pengkhotbah] 7:21, 22) Jeová nunka husu ita atu halo buat neʼebé ita la iha kbiit atu halo. Tan neʼe ita hakarak halo tuir ninia ezemplu hodi hatudu pasiénsia ba ita-nia maluk sira. (Éfeso 4:2, 32) Ita lakohi halo ita-nia irmaun-irmán sira sente katak, ita hanoin sira ladún hakaʼas an ka ita kompara sira ho ema seluk. Ita hakarak hametin sira no gaba sira kona-ba buat diʼak oioin neʼebé sira halo daudauk hodi serbí Jeová. Neʼe sei anima sira no bele ajuda sira atu sai kontente hodi serbí Jeová.—Galásia 6:4.

18. Tanbasá mak ita hakarak hametin malu ho domin?

¹⁸ Ema hotu neʼebé adora Jeová iha folin-boot ba nia no Jesus. (Galásia 2:20) Ita hadomi tebes ita-nia irmaun-irmán sira, tan neʼe ita hakarak hatudu laran-sadiʼa ba sira. Ita “buka buat neʼebé haburas dame no buat neʼebé hametin malu”. (Roma 14:19) Ita hein namanas atu moris iha Paraízu, tempu neʼebé la iha tan buat ida atu halo ema sente laran-kraik. La iha tan moras no funu. Ema sei la mate tan husi Adão nia sala. Ema sei la fó-terus tan ba ita, problema sei la mosu tan iha família laran. Bainhira Jesus nia Ukun ba Tinan Rihun Ida ramata ona, ema hotu sei sai perfeitu. Ema neʼebé moris liu koko ba dala ikus sei sai Jeová nia oan no simu “liberdade neʼebé furak nuʼudar Maromak nia oan sira”. (Roma 8:21) Tan neʼe, mai ita hotu hatudu domin hodi hametin malu no ajuda malu atu moris toʼo Maromak nia mundu foun neʼebé furak.