IHA mundu tomak, katuas kongregasaun sira hafolin sira-nia knaar atu serbí Maromak nia povu. Sira mak bensaun ida ba ita hotu. Maibé, foin daudauk iha mudansa ida. Irmaun sira neʼebé idade ona presiza fó fali responsabilidade balu ba katuas sira neʼebé idade kiʼik liu sira. Oinsá?

Tuir arranju foun neʼe, katuas área no mestre ba eskola Bíblia sira sei la halaʼo tan sira-nia knaar kuandu sira toʼo ona idade 70. No mós, katuas kongregasaun sira neʼebé idade 80 presiza fó fali sira-nia knaar balu ba katuas sira neʼebé idade kiʼik liu sira, hanesan koordenadór ba Komisaun ba Sukursál ka koordenadór ba grupu katuas nian. Irmaun idade sira sente oinsá kona-ba mudansa neʼe? Sira hatudu nafatin laran-metin ba Jeová no ninia organizasaun.

Ken serbí nuʼudar koordenadór ba Komisaun ba Sukursál besik tinan 49, nia dehan: “Haʼu konkorda ho arranju foun neʼe. Tuir loloos, iha dadeer antes haʼu hatene kona-ba arranju neʼe, haʼu halo orasaun ba Jeová hodi hatete katak presiza irmaun neʼebé idade kiʼik liu haʼu atu kaer fali knaar nuʼudar koordenadór.” Irmaun barak iha mundu tomak mós  iha sentimentu neʼebé hanesan Ken. Maibé, foufoun karik sira balu ladún kontente kona-ba mudansa neʼe tanba sira gosta tebes atu serbí irmaun-irmán sira.

Irmaun ida naran Esperandio serbí nuʼudar koordenadór ba grupu katuas nian, nia dehan: “Haʼu sente triste uitoan, maibé tuir loloos haʼu presiza tempu barak atu tau matan ba haʼu-nia saúde neʼebé sai fraku ba daudauk.” Maski nuneʼe, Esperandio kontinua serbí Jeová ho laran-metin no nia mak bensaun ida ba ninia kongregasaun.

Oinsá kona-ba katuas sira neʼebé vizita kongregasaun ba tinan barak ona neʼebé halaʼo fali knaar seluk? Allan serbí nuʼudar katuas neʼebé vizita kongregasaun ba tinan 38 no nia dehan: “Kuandu haʼu rona kona-ba arranju foun neʼe, haʼu hakfodak.” Maski nuneʼe, nia rekoñese katak importante atu fó treinu ba irmaun sira neʼebé idade kiʼik liu atu halaʼo serbisu neʼe, no Allan kontinua serbí Jeová ho laran-metin.

Russell serbí nuʼudar katuas neʼebé vizita kongregasaun no mestre ba eskola Bíblia sira durante tinan 40. Nia hatete katak foufoun nia ho ninia feen sente triste. “Ami hafolin tebes ami-nia knaar sira no ami sente katak ami sei iha forsa atu kontinua.” Agora Russell ho ninia feen uza treinu no esperiénsia neʼebé sira hetan atu serbí fali sira-nia kongregasaun, no haklaken-naʼin sira haksolok tebes atu serbí hamutuk ho sira.

Maski Ita seidauk sente buat neʼebé irmaun sira-neʼe sente, karik istória ida husi Segundu Samuel bele ajuda Ita atu komprende sira-nia sentimentu.

Hanoin fali ba tempu neʼebé Liurai David nia oan Absalão kontra nia. David halai husi Jeruzalein ba Manaim, iha Mota Jordaun nia parte leste. Iha neʼebá David ho sira neʼebé hamutuk nia presiza ai-han no buat seluk tan. Ita hanoin-hetan saida mak akontese?

Ema naʼin-tolu husi área neʼe ho laran-luak lori toba-fatin, ai-han oioin, no buat seluk tan. Barzilai mak ema ida husi ema naʼin-tolu neʼe. (2 Samuel 17:27-29) Kuandu Absalão nia planu la hetan susesu, David bele fila fali ba Jeruzalein, no Barzilai proteje nia toʼo Mota Jordaun. David husu nia atu bá Jeruzalein. Liurai dehan atu fó hahán ba nia, maski Barzilai mak “ema neʼebé riku tebes” no nia la presiza ema atu fó hahán ba nia. (2 Samuel 19:31-33) Maibé David hakarak Barzilai atu bá Jeruzalein hamutuk ho nia tanba Barzilai bele fó matadalan diʼak no nia mós iha esperiénsia barak. Neʼe mak priviléjiu neʼebé furak tebes atu hela no serbisu iha liurai nia palásiu.

Barzilai hatudu haraik-an hodi hatete katak nia tinan 80 ona. Nia hatutan hodi dehan: “Haʼu bele hatene buat diʼak husi buat  aat ka?” (2 Samuel 19:35) Ninia liafuan katak sá? Barzilai hetan ona matenek barak durante ninia moris. No nia bele fó nafatin matadalan neʼebé diʼak, hanesan “katuas sira” halo ba Liurai Roboão. (1 Reis [Raja-Raja] 12:6, 7; Salmo [Mazmur] 92:12-14; Provérbios [Amsal] 16:31) Tan neʼe Barzilai nia liafuan kona-ba hatene buat diʼak husi buat aat karik koʼalia kona-ba ninia isin ka idade nia limitadu. Nia rekoñese katak idade fó duni impaktu ba ninia saúde. (Eclesiastes [Pengkhotbah] 12:4, 5) Tan neʼe Barzilai husu David atu lori fali Kiman, ema neʼebé idade kiʼik liu nia hodi bá Jeruzalein, karik nia mak Barzilai nia oan.—2 Samuel 19:36-40.

Ita-nia organizasaun halo mudansa neʼebé temi iha leten hodi bazeia ba Barzilai nia hanoin no ezemplu. Ohin loron, presiza hanoin kona-ba buat barak, laʼós deʼit kona-ba ema ida nia situasaun ka abilidade, hanesan Barzilai nian. Presiza hanoin kona-ba saida mak diʼak liu ba katuas sira neʼebé serbí ho laran-metin iha mundu tomak.

Irmaun haraik-an sira neʼebé idade ona bele haree katak Jeová nia organizasaun sei sai metin liután, no laʼo ba oin se sira fó fali responsabilidade neʼebé sira kaer ba tinan barak ona ba irmaun neʼebé idade kiʼik liu sira. Dala barak, irmaun idade sira mak fó fali treinu ba irmaun neʼebé kiʼik liu sira, hanesan karik Barzilai mós fó treinu ba ninia oan no apóstolu Paulo fó treinu ba Timóteo. (1 Korinto 4:17; Filipe 2:20-22) Irmaun sira neʼebé idade kiʼik hatudu duni katak agora sira mak “ema nuʼudar prezente” neʼebé bele ajuda “atu harii Kristu nia isin-lolon”.—Éfeso 4:8-12; kompara Números (Bilangan) 11:16, 17, 29.

Ema barak iha Maromak nia kongregasaun iha mundu tomak neʼebé fó fali sira-nia responsabilidade balu ba ema seluk, uza oportunidade foun atu halo Jeová nia serbisu iha dalan oioin.

Marco serbí nuʼudar katuas neʼebé vizita kongregasaun sira ba tinan 19, nia dehan: “Haʼu-nia situasaun foun loke dalan ba haʼu atu koñese liután irmán sira-nia laʼen neʼebé la adora Jeová.”

Geraldo serbí nuʼudar katuas neʼebé vizita kongregasaun sira ba tinan 28, nia hatete: “Ami-nia planu foun mak atu ajuda irmaun-irmán sira neʼebé la ativu ona no halaʼo estuda Bíblia ho ema barak liután.” Nia hatete katak, agora nia ho ninia feen halaʼo estudu Bíblia 15 no irmaun-irmán barak neʼebé la ativu tuir fali reuniaun sira.

Allan neʼebé temi iha leten hatete: “Ami agora iha oportunidade atu haklaken liután. Ami gosta haklaken públiku, haklaken iha loja sira, no haklaken ba ami-nia viziñu no iha ema naʼin-rua husi ami-nia viziñu tuir ona ita-nia reuniaun.”

Se Ita mak irmaun laran-metin neʼebé simu ona knaar foun, iha dalan espesiál ida tan neʼebé Ita bele fó Ita-nia kontribuisaun. Ita bele fó apoiu ba Jeová nia serbisu hodi fahe Ita-nia esperiénsia ba irmaun neʼebé idade kiʼik liu Ita iha kongregasaun. Russell neʼebé temi iha leten hatete: “Jeová fó treinu no uza daudauk irmaun idade kiʼik sira neʼebé iha talentu. Kongregasaun sira hetan benefísiu barak husi irmaun idade kiʼik sira-neʼe nia hanorin no dalan sira tau matan ba irmaun-irmán sira.”—Haree kaixa “ Ajuda irmaun sira laʼo ba oin”.

Se Ita mak hetan knaar foun, hanoin pozitivu nafatin. Ita ajuda ona ema barak liuhusi Ita-nia serbisu neʼebé Ita halo ho laran, no Ita bele kontinua halo ida-neʼe. Irmaun-irmán hotu hadomi Ita no sei kontinua hadomi Ita.

 Importante liu mak Ita halo Jeová nia laran kontente. Nia sei la “haluha [Ita-nia] serbisu no [Ita-nia] domin neʼebé [Ita] hatudu ba ninia naran, basá [Ita] serbí ona no kontinua atu serbí santu sira”. (Ebreu 6:10) Eskritura neʼe ajuda ita atu haree katak Jeová nia promesa neʼe kona serbisu hotu neʼebé ita halo. Ita iha folin-boot tebes ba Jeová no nia la haluha kona-ba buat hotu neʼebé Ita halo ona iha tempu uluk no kontinua hakaʼas an atu halo kontente nia.

Oinsá se Ita rasik la hetan fali knaar foun hanesan sira neʼebé temi iha leten? Karik mudansa neʼe nafatin kona Ita-nia situasaun. Oinsá?

Se Ita ransu ho irmaun idade neʼebé hetan fali knaar foun, Ita bele hetan benefísiu husi ninia esperiénsia sira. Buka matadalan husi nia. Husu nia atu fó sujestaun ba Ita. Buka-hatene oinsá nia uza ninia esperiénsia atu halaʼo ninia knaar foun neʼe ho laran-metin.

Maski Ita mak ema idade neʼebé hetan fali knaar foun, ka irmaun-irmán neʼebé aprende daudauk husi irmaun idade sira, hanoin-hetan katak Jeová hafolin ema neʼebé serbí nia ba tinan barak ho laran-metin no kontinua atu halo ida-neʼe.