Maromak Kbiit Boot Liu Hotu hanoin ema
“[Jeová] hatene ho didiʼak nia kria ita husi saida, no nia hanoin-hetan katak ita mak rai-rahun deʼit.”—SALMO (MAZMUR) 103:14.
1, 2. (a) Oinsá mak dalan neʼebé Jeová haree ninia povu la hanesan ho ema neʼebé iha podér? (b) Ita sei koʼalia kona-ba saida iha lisaun neʼe?
BAIBAIN ema neʼebé iha podér hanehan no “domina” ema seluk. (Mateus 20:25; Eclesiastes [Pengkhotbah] 8:9) Jeová la hanesan neʼe. Maski nia mak Maromak neʼebé Kbiit Boot Liu Hotu, nia hanoin ema sala-naʼin nia sentimentu. Nia hatudu laran-diʼak no hanoin kona-ba ita-nia presiza. Nia “hanoin-hetan katak ita mak rai-rahun deʼit” no nia nunka husu ita atu halo buat neʼebé liu fali ita-nia kbiit.—Salmo (Mazmur) 103:13, 14.
2 Liuhusi Bíblia ita bele aprende oinsá Jeová hatudu katak nia hanoin ninia atan sira-nia sentimentu. Mai ita haree ezemplu tolu. Primeiru, oinsá Jeová hatudu laran-diʼak hodi ajuda Samuel neʼebé sei kiʼik atu hatoʼo mensajen tesi-lia nian ba Amlulik Boot Eli. Segundu, oinsá Jeová hatudu pasiénsia ba Moisés kuandu Moisés sente katak nia la iha kbiit atu lori nasaun Izraél sai husi rai-Ejitu. Terseiru, oinsá Jeová hanoin ema Izraél sira-nia sentimentu kuandu nia lori sira sai husi rai-Ejitu. Saida mak ita bele aprende kona-ba Jeová no oinsá mak ita bele aplika lisaun sira-neʼe?
JEOVÁ HANOIN KONA-BA LABARIK NIA SENTIMENTU
3. Saida mak akontese ba labarik Samuel iha kalan ida neʼebé la hanesan baibain, no neʼe hamosu pergunta saida? (Haree dezeñu iha leten.)
3 Samuel komesa “serbí Jeová” iha tenda santu kuandu nia sei kiʼik. (1 Samuel 3:1) Kalan ida, kuandu Samuel toba tiha, buat ruma akontese neʼebé la hanesan baibain. * (1 Samuel 3:2-10) Nia rona lian ida bolu ninia naran. Nia hanoin katak Amlulik Boot Eli neʼebé idade ona mak bolu, tan neʼe nia hadeer no halai ba Eli no dehan: “Haʼu mak neʼe, tanba Ita bolu haʼu.” Maibé Eli hatete ba nia: “Haʼu la bolu ó.” Kuandu ida-neʼe akontese tan ba dala rua, Eli rekoñese katak Maromak mak bolu Samuel. Entaun, nia hatete ba Samuel saida mak nia tenke halo no Samuel halo tuir. Tanbasá mak Jeová la hatete kedas ba Samuel katak nia mak bolu? Bíblia la esplika. Maibé karik Jeová hanoin labarik Samuel nia sentimentu.
4, 5. (a) Samuel halo saida kuandu Maromak fó knaar ba nia atu hatoʼo mensajen ba Eli? (b) Istória neʼe hanorin saida mai ita kona-ba Jeová?
4 Jeová nia Ukun-Fuan fó mandamentu ba oan sira atu hatudu respeitu ba ema neʼebé idade, liuliu ba xefe. (Êxodo [Keluaran] 22:28; Levítico [Imamat] 19:32) Tan neʼe, karik susar ba Samuel neʼebé sei kiʼik atu hadeer iha dadeer no ho aten-brani hatoʼo Maromak nia mensajen tesi-lia nian ba Eli. (1 Samuel 3:11-18) Bíblia hatete katak Samuel “taʼuk atu konta vizaun neʼe ba Eli”. Maibé, Jeová halo Eli hatene katak Nia mak bolu Samuel. Tan neʼe, Eli haruka Samuel atu fó sai buat hotu, nia dehan: “[Keta] subar husi haʼu liafuan ida husi buat neʼebé nia hatete ona ba ó.” Samuel halo tuir Eli no “konta buat hotu ba Eli”.
5 Karik Eli la hakfodak kona-ba mensajen neʼe, tanba “Maromak nia atan ida” mós fó sai ona mensajen hanesan neʼe ba Eli. (1 Samuel 2:27-36) Istória neʼe hanorin ita katak Jeová mak matenek no hanoin kona-ba ema nia sentimentu.
6. Ita bele aprende lisaun saida deʼit husi dalan neʼebé Maromak ajuda Samuel neʼebé sei kiʼik?
6 Ita mak joven ida ka lae? Se nuneʼe, istória kona-ba Samuel hatudu katak Jeová komprende kona-ba Ita-nia problema no sentimentu. Karik Ita mak moedór no sente susar atu haklaken ba ema neʼebé idade liu Ita ka atu hatudu hahalok neʼebé la hanesan ho kolega sira. Fiar bá katak Jeová hakarak ajuda Ita. Tan neʼe, halo orasaun hodi fakar sai Ita-nia sentimentu ba nia. (Salmo [Mazmur] 62:8) Hanoin kleʼan kona-ba joven sira-nia ezemplu husi Bíblia hanesan Samuel. No koʼalia ba irmaun-irmán sira neʼebé idade ka joven, neʼebé hasoru ona problema hanesan Ita-nian. Karik sira bele konta kona-ba oinsá Jeová ajuda sira no karik Jeová ajuda sira iha dalan neʼebé sira nunka imajina.
JEOVÁ HANOIN MOISÉS NIA SENTIMENTU
7, 8. Oinsá mak Jeová hatudu katak nia hanoin tebes Moisés nia sentimentu?
7 Kuandu Moisés tinan 80, Jeová fó knaar susar ida ba nia. Moisés presiza lori nasaun Izraél sai husi rai-Ejitu. (Êxodo [Keluaran] 3:10) Karik Moisés hakfodak ho knaar neʼe tanba durante tinan 40 nia mak bibi-atan iha rai-Midian. Tan neʼe nia dehan: “Haʼu neʼe sé? Haʼu labele bá hasoru Faraó no lori ema Izraél sai husi rai-Ejitu.” Maibé Jeová hatete ba nia: “Haʼu sei hamutuk ho ó.” (Êxodo [Keluaran] 3:11, 12) Jeová mós promete katak “katuas sira sei rona duni ba” ninia liafuan. Maski nuneʼe, Moisés dehan: “Oinsá se sira . . . la rona?” (Êxodo [Keluaran] 3:18; 4:1) Moisés nia liafuan kontra beibeik Jeová, maibé Jeová hatudu nafatin pasiénsia. Jeová mós fó kbiit ba Moisés atu halo milagre, no nia sai ema primeiru neʼebé iha kbiit hanesan neʼe, neʼebé temi iha Bíblia.—Êxodo [Keluaran] 4:2-9, 21.
8 Maski nuneʼe, Moisés buka razaun tan hodi hatete katak nia la iha matenek atu koʼalia. Tan neʼe, Maromak dehan ba nia: “Haʼu sei hamutuk ho ó bainhira ó koʼalia, no haʼu sei hanorin ó buat neʼebé ó tenke koʼalia.” Moisés sai fiar an ona ka lae? Lae. Nia husu Maromak atu haruka deʼit ema seluk. Ho ida-neʼe Jeová sai hirus. Maibé Jeová hanoin nafatin Moisés nia sentimentu, tan neʼe nia haruka Aarão atu reprezenta Moisés hodi koʼalia.—Êxodo (Keluaran) 4:10-16.
9. Oinsá mak Jeová nia pasiénsia no laran-diʼak ajuda Moisés hodi sai ulun-naʼin neʼebé diʼak?
9 Istória neʼe hanorin saida mai ita kona-ba Jeová? Nuʼudar Maromak neʼebé Kbiit Boot Liu Hotu, Jeová bele uza ninia forsa atu halo taʼuk Moisés hodi obriga nia atu halo tuir. Maibé Jeová hatudu pasiénsia no laran-diʼak, nia ajuda Moisés neʼebé haraik-an atu hatene katak nia sei hamutuk ho Moisés. Neʼe lori rezultadu diʼak ka lae? Sin. Ikusmai Moisés sai ulun-naʼin neʼebé diʼak tebes no nia hakaʼas an atu hatudu laran-diʼak no hanoin ema seluk nia sentimentu hanesan Jeová hatudu ba nia.—Números (Bilangan) 12:3.
Ita banati-tuir Jeová hodi hanoin ema seluk nia sentimentu ka lae? (Haree parágrafu 10)
10. Kuandu ita banati-tuir Jeová hodi hanoin ema nia sentimentu, neʼe sei lori benefísiu saida mai ita?
10 Oinsá mak ita bele aplika lisaun sira-neʼe ohin loron? Se Ita mak laʼen ida, inan-aman, ka katuas kongregasaun, Ita mós kaer podér ruma. Maibé importante tebes atu banati-tuir Jeová kona-ba hanoin ema seluk nia sentimentu, hatudu laran-diʼak no pasiénsia ba Ita-nia feen, oan no ema seluk iha kongregasaun. (Koloso 3:19-21; 1 Pedro 5:1-3) Se Ita hakaʼas an atu banati-tuir Jeová no Jesus Kristu, Ita sei halo fasil ba ema seluk atu hakbesik no koʼalia ba Ita, no Ita sei lori kmaan ba sira. (Mateus 11:28, 29) Ita mós sei sai ezemplu neʼebé diʼak ba sira.—Ebreu 13:7.
SALVADÓR NEʼEBÉ FORSA BOOT MAIBÉ HANOIN EMA
11, 12. Iha dalan saida deʼit mak Jeová ajuda ninia povu sente seguru kuandu nia lori sira sai husi rai-Ejitu?
11 Karik ema Izraél hamutuk naʼin-millaun tolu resin, sai husi rai-Ejitu iha tinan 1513 molok Kristu. Iha sira-nia leet, iha labarik, ferik-katuas no karik iha ema balu neʼebé moras ka aleijadu. Atu bele lori ema-lubun boot hanesan neʼe sai husi rai-Ejitu, presiza iha Ulun-Naʼin neʼebé komprende ema seluk nia sentimentu no hatudu domin. Liuhusi Moisés, Jeová sai Ulun-Naʼin hanesan neʼe. Tan neʼe, kuandu ema Izraél atu sai husi sira-nia moris-fatin iha rai-Ejitu, sira sente seguru.—Salmo (Mazmur) 78:52, 53.
12 Iha dalan saida deʼit mak Jeová ajuda ninia povu sente seguru? Jeová organiza sira “hanesan tropa” hodi lori sira sai husi rai-Ejitu iha dalan neʼebé la runguranga. (Êxodo [Keluaran] 13:18) Hodi haree katak buat hotu organiza ho didiʼak, sira bele fiar katak sira-nia Maromak kontrola situasaun hotu. Jeová mós uza “kalohan durante loron” no “naroman husi ahi” iha kalan atu fó-hanoin ba sira katak nia hamutuk ho sira hodi dirije no proteje sira. (Salmo [Mazmur] 78:14) Ida-neʼe importante tebes ba ema Izraél tanba buat neʼebé sira atu hasoru tuirmai.
Oinsá mak Jeová tau matan ba ema Izraél iha Tasi Mean? (Haree parágrafu 13)
13, 14. (a) Oinsá mak Jeová tau matan ba ema Izraél iha Tasi Mean? (b) Oinsá mak Jeová hatudu katak nia iha forsa boot liu fali ema Ejitu sira?
13 Imajina katak Ita mós iha Tasi Mean nia oin no tropa husi rai-Ejitu duni tuir husi kotuk. (Êxodo [Keluaran] 14:19-22) Tuirmai, Maromak halo buat ruma. Kalohan neʼebé iha Ita-nia oin muda fali ba kotuk hodi satan ema Ejitu no sira haree nakukun deʼit. Maibé iha Ita-nia leet iha naroman. Tuirmai, Ita haree Moisés lolo ninia liman ba tasi leten no anin husi parte leste huu makaʼas hodi fahe tasi ba rua atu loke dalan ba Ita. Ita hamutuk ho Ita-nia família no animál sira, no mós ema seluk hahú laʼo ba tasi sorin iha dalan neʼebé organiza tebes. Maibé Ita haree buat balu la hanesan baibain. Iha tasi-kidun la iha tahu no la namdoras, tasi-kidun maran, tan neʼe fasil atu hakur ba tasi sorin. Maski iha ema neʼebé laʼo neineik, maibé sira mós bele laʼo ho diʼak ba tasi sorin.
14 Maibé iha tempu neʼebé hanesan, Faraó neʼebé foti-an no beik, duni tuir Ita no maluk Izraél seluk. (Êxodo [Keluaran] 14:23, 26-30) Tuirmai, Moisés lolo fali ninia liman ba tasi leten, no tasi husi sorin-sorin taka sira. Tasi halo mout Faraó ho ninia tropa hotu. La iha ida mak moris!—Êxodo (Keluaran) 15:8-10.
15. Istória neʼe hanorin saida ba Ita kona-ba Jeová?
15 Istória neʼe hanorin Ita katak Jeová laʼós Maromak neʼebé runguranga nian. Ninia hahalok neʼe ajuda ita atu sente seguru. (1 Korinto 14:33) Jeová mós hatudu katak nia mak bibi-atan neʼebé tau matan didiʼak ba ninia povu. Nia proteje didiʼak sira husi inimigu sira. Ida-neʼe hametin ita-nia fiar no fó kmaan ba ita tanba lakleur tan mundu neʼe nia rohan sei toʼo mai.—Provérbios (Amsal) 1:33.
16. Hanoin kona-ba oinsá Jeová salva ema Izraél lori benefísiu saida mai ita?
16 Ohin loron, Jeová mós tau matan ba ninia povu nuʼudar grupu ida. Nia ajuda sira atu kaer metin ba sira-nia relasaun diʼak ho nia no proteje sira husi inimigu. Nia sei kontinua halo ida-neʼe durante terus boot neʼebé besik ona atu hahú. (Apokalipse 7:9, 10) Tan neʼe, maski joven ka idade, saúde diʼak ka aleijadu, Maromak nia povu sei la hakfodak ka sai taʼuk durante tempu terus boot. * Sira sei hatudu aten-brani no hanoin-hetan Jesus nia liafuan neʼebé dehan: “Hamriik loos bá no foti imi-nia ulun, tanba imi-nia salvasaun mai besik daudaun ona.” (Lucas 21:28) Maski sira hetan ataka husi Gog ka nasaun sira husi mundu tomak neʼebé iha forsa makaʼas liu fali Faraó husi tempu uluk, Maromak nia povu tau fiar nafatin katak Jeová sei proteje sira. (Ezequiel [Yehezkiel] 38:2, 14-16) Tanbasá mak sira bele iha fiar metin ba nia? Tanba sira hatene katak Jeová nunka troka. Nia sei hatudu tan katak nia mak Salvadór neʼebé iha domin no hanoin sira.—Isaías (Yesaya) 26:3, 20.
17. (a) Oinsá mak ezemplu sira husi Bíblia neʼebé hatudu katak Jeová tau matan ba ninia povu lori benefísiu ba ita? (b) Ita sei koʼalia kona-ba saida iha lisaun tuirmai?
17 Iha lisaun neʼe, ita aprende ona ezemplu balu kona-ba dalan neʼebé Jeová hatudu katak nia hanoin ema nia sentimentu no hatudu laran-diʼak hodi tau matan, dirije, no salva ninia povu. Kuandu Ita hanoin kleʼan kona-ba istória hanesan neʼe, fó atensaun ba informasaun oioin neʼebé hatudu sai Jeová nia hahalok furak sira-neʼe. Hodi halo nuneʼe bele ajuda Ita hafolin liután Jeová nia hahalok furak sira-neʼe no hametin Ita-nia fiar no domin ba nia. Iha lisaun tuirmai, ita sei koʼalia kona-ba dalan balu ita bele banati-tuir Jeová hodi hatudu katak ita hanoin ema seluk nia sentimentu, iha família, kongregasaun, no haklaken.
^ par. 3 Matenek-naʼin judeu ida naran Josefo hatete katak Samuel tinan 12 iha tempu neʼebá.
^ par. 16 Ita bele fiar katak ema balu neʼebé moris liu Armajedón, iha mós ema aleijadu. Kuandu Jesus moris iha rai, nia kura “moras oioin neʼebé kona ema”, inklui mós sira neʼebé aleijadu. Ida-neʼe hatudu saida mak nia sei halo ba ema neʼebé moris liu Armajedón, laʼós ba ema neʼebé hetan moris-hiʼas. (Mateus 9:35) Ema neʼebé hetan moris-hiʼas sei iha kedas saúde neʼebé diʼak.
