LARAN-SUSAR bele halo ita sente laran-todan. (Prov 12:25) Dala ruma Ita sente laran-susar ka lae? Dala ruma Ita sente katak Ita labele tahan ona tanba Ita laran-susar tebes ka lae? Se nuneʼe, Ita la mesak. Ema barak mós sente kole tebes, laran-susar no depresaun tanba razaun oioin. Porezemplu, ema balu presiza tau matan ba família neʼebé moras, ema neʼebé sira hadomi mate, ka sira hasoru susar tanba dezastre naturais. Saida mak bele ajuda ita tahan hasoru laran-susar? a

Ita bele aprende buat barak husi Liurai David kona-ba oinsá atu tahan hasoru laran-susar. Nia hasoru situasaun susar oioin, no dala ruma ninia moris mós iha perigu laran. (1 Sam 17:34, 35; 18:10, 11) Saida mak ajuda David atu tahan hasoru laran-susar? Oinsá ita bele banati-tuir nia?

David hasoru problema oioin iha tempu hanesan. Hanoin toʼok kona-ba buat neʼebé akontese bainhira nia halai daudaun husi Liurai Saul neʼebé hakarak atu oho nia. Bainhira David no ninia ema sira fila fali ba sira-nia fatin iha Ziklag, sira deskobre katak inimigu naʼok sira-nia sasán, sunu sira-nia hela-fatin no lori sira-nia família nuʼudar dadur. David halo saida? “David no ema sira neʼebé hamutuk ho nia komesa tanis makaʼas toʼo sira la iha tan forsa atu tanis.” Tuirmai, David mós sente laran-susar liután tanba ninia ema sira “koʼalia hamutuk ona atu tuda” nia. (1 Sam 30:1-6) David hasoru problema tolu iha tempu hanesan. Ninia família iha perigu laran, nia sente taʼuk tanba ninia ema sira hakarak oho nia, no Liurai Saul nafatin buka nia. Ita bele fiar katak David sente laran-susar tebes.

Tuirmai David halo saida? Nia “hametin [kedas] ninia an hodi sadere ba Jeová, ninia Maromak”. Oinsá David halo ida-neʼe? Ita hatene katak David toman atu halo orasaun ba Jeová hodi husu ajuda no mós hanoin fila fali kona-ba oinsá Jeová ajuda ona nia iha pasadu. (1 Sam 17:37; Sal 18:2, 6) David hatene katak nia presiza husu matadalan husi Jeová, tan neʼe nia husu Jeová kona-ba saida mak nia presiza halo. Bainhira David rona tiha Jeová nia matadalan, nia halo tuir kedas. Rezultadu mak Jeová haraik bensaun ba David no ninia ema sira, no sira salva sira-nia família no hetan fali sira-nia sasán. (1 Sam 30:7-9, 18, 19) David halo hakat tolu. Nia halo orasaun ba Jeová hodi husu ajuda, nia hanoin fila fali kona-ba oinsá Jeová ajuda ona nia iha pasadu, no nia halo tuir Jeová nia matadalan. Oinsá ita bele banati-tuir David? Mai ita haree dalan tolu.

1. Halo orasaun. Dala ida-idak neʼebé ita komesa sente laran-susar, ita bele halo orasaun ba Jeová hodi husu ajuda no matenek. Ita bele halo orasaun naruk no fó sai buat hotu neʼebé halo ita hanoin resin. Ka se ita-nia situasaun la permite atu halo orasaun neʼebé naruk, ita bele halo deʼit orasaun badak iha laran. Tempu ida-idak neʼebé ita buka ajuda husi Jeová, ita banati-tuir David neʼebé fiar metin ba Jeová no hatete: “Jeová mak haʼu-nia fatuk boot, haʼu-nia fatin seguru no Maromak neʼebé salva haʼu. Haʼu-nia Maromak mak haʼu-nia fatuk boot, haʼu buka protesaun  husi nia.” (Sal 18:2) Orasaun bele ajuda duni ka lae? Irmán Kahlia neʼebé serbí nuʼudar pioneiru hatete: “Bainhira haʼu halo tiha orasaun, haʼu sente dame iha laran. Orasaun ajuda haʼu atu iha hanoin hanesan Jeová nian, no haʼu-nia fiar sai metin liután.” Loos duni, orasaun mak prezente furak husi Jeová no iha kbiit boot atu ajuda ita tahan hasoru laran-susar.

2. Hanoin fila fali. Ita bele hanoin-hetan susar balu neʼebé Ita konsege tahan tanba deʼit Jeová ajuda Ita ka lae? Bainhira ita hanoin kona-ba oinsá Jeová ajuda ona ita no mós ninia atan sira seluk, neʼe bele ajuda ita sente dame iha laran no mós hametin ita-nia fiar ba Jeová. (Sal 18:17-19) Katuas kongregasaun ida naran Joshua hatete: “Haʼu halo lista kona-ba haʼu-nia orasaun sira neʼebé Jeová hatán ona. Neʼe ajuda haʼu atu hanoin-hetan tempu neʼebé haʼu husu buat espesífiku husi Jeová no nia fó buat neʼebé haʼu presiza.” Bainhira ita hanoin kleʼan kona-ba buat neʼebé Jeová halo ona ba ita, neʼe sei fó kbiit ba ita atu luta hasoru laran-susar.

3. Halo tuir. Antes halo desizaun kona-ba situasaun ruma, ita bele buka matadalan husi Bíblia. (Sal 19:7, 11) Ema barak dehan katak bainhira sira halo riset kona-ba eskritura espesífiku, neʼe ajuda sira atu komprende oinsá atu aplika eskritura neʼe iha sira-nia moris. Katuas kongregasaun ida naran Jarrod hatete: “Halo riset ajuda haʼu atu aprende liután kona-ba eskritura neʼe, no komprende buat neʼebé Jeová dehan mai haʼu. Neʼe book haʼu atu tau fiar ba buat neʼebé haʼu lee no halo tuir Jeová nia matadalan.” Bainhira ita buka Jeová nia matadalan husi Bíblia no halo tuir, fasil liu ba ita atu tahan hasoru laran-susar, sente laran-hakmatek no mós haksolok.

David komprende katak atu bele tahan hasoru laran-susar ho susesu, nia presiza Jeová nia ajuda. David hafolin tebes Jeová nia ajuda. Nia hatete: “Ho Maromak nia kbiit, haʼu bele saʼe moru aas ida. Maromak loos mak fó kbiit mai haʼu nuʼudar haʼu-nia hatais.” (Sal 18:29, 32) Karik ita sente katak ita-nia problema sira mak hanesan ho moru aas neʼebé susar atu saʼe. Maibé ho Jeová nia ajuda, ita bele tahan hasoru problema naran deʼit. Ita bele halo orasaun hodi husu ajuda, hanoin fila fali kona-ba oinsá Jeová ajuda ona ita iha pasadu, no halo tuir ninia matadalan. Bainhira ita halo nuneʼe, ita bele fiar metin katak nia sei fó ita kbiit no matenek atu bele tahan hasoru laran-susar ho susesu.