1. Tanbasá Jesus husu Jeová atu tau matan ba ninia dixípulu sira?

 IHA kalan antes Jesus mate, nia husu Aman Jeová atu tau matan ba ninia dixípulu sira. (João 17:15, 20) Jeová sempre tau matan no proteje ninia povu. Maibé Jesus hatene katak Satanás sei fó-terus makaʼas ba ninia dixípulu. Jesus rekoñese katak sira presiza Jeová nia ajuda atu bele tahan hasoru Diabu nia ataka.

2. Tuir Salmo 33:18-20, tanbasá ita la presiza taʼuk ba susar sira?

² Ohin loron, Satanás nia mundu aat neʼe hamosu problema oioin ba ema Kristaun loos. Ita hotu hasoru problema sira neʼebé bele halo ita laran-kraik no koko ita-nia laran-metin ba Jeová. Iha lisaun neʼe, ita sei aprende katak ita la presiza taʼuk. Jeová tau matan ba ita, neʼe katak nia haree susar hotu neʼebé ita hasoru no nia mós prontu atu ajuda ita tahan. Ita sei haree ezemplu rua husi Bíblia neʼebé hatudu oinsá Jeová tau matan ba ema “sira neʼebé hamtaʼuk nia”.​—Lee Salmo 33:18-20.

3. Situasaun saida deʼit mak bele halo ita sente mesamesak?

³ Maski iha irmaun-irmán barak, maibé dala ruma ita bele sente mesamesak. Porezemplu, karik joven sira sente mesamesak kuandu muda ba kongregasaun foun ka kuandu esplika sira-nia fiar ba mestre no alunu sira seluk.  Karik ita sente triste ka depresaun no hanoin katak ita tenke tahan neʼe mesak. Karik ita dada an atu koʼalia sai ita-nia sentimentu ba ema seluk tanba taʼuk katak sira sei la komprende ita. Dala ruma karik ita hanoin: ‘La iha ema ida mak hanoin haʼu.’ Bainhira ita sente mesamesak, neʼe bele halo ita sente la iha kbiit no laran-taridu. Jeová lakohi ita atu sente hanesan neʼe. Tanbasá ita bele fiar ida-neʼe?

4. Tanbasá profeta Elias hatete: “Só haʼu deʼit mak [profeta neʼebé sei] moris”?

⁴ Hanoin toʼok kona-ba Elias nia ezemplu. Jezabel jura atu oho Elias, tan neʼe Elias tenke subar an durante loron 40. (1 Reis 19:1-9) Ikusmai kuandu Elias mesak iha fatuk-kuak, nia hatete ba Jeová: “Só haʼu deʼit mak [profeta neʼebé sei] moris.” (1 Reis 19:10) Tuir loloos Elias la mesak tanba Obadias konsege salva profeta 100 husi Jezabel. (1 Reis 18:7, 13) Entaun tanbasá Elias sente mesamesak? Karik nia hanoin katak profeta sira-neʼe mate ona. Ka karik nia hanoin katak ema seluk lakohi serbí Jeová maski Jeová prova ona iha Foho Karmel katak nia mesak deʼit mak Maromak neʼebé loos. Karik nia hanoin katak ema seluk la hatene ninia moris iha perigu laran ka ema seluk la hanoin nia. Bíblia la esplika ho klaru tanbasá Elias sente mesamesak. Maibé ita hatene katak Jeová komprende tanbasá Elias sente hanesan neʼe no Jeová hatene oinsá atu ajuda nia.

5. Oinsá Jeová ajuda Elias atu la sente mesamesak?

⁵ Jeová ajuda Elias iha dalan oioin. Jeová anima Elias atu fó sai ninia hanoin. Dala rua Jeová husu Elias: “Ó halo saida iha neʼe?” (1 Reis 19:9, 13) Jeová rona didiʼak bainhira Elias fakar sai ninia sentimentu. Tuirmai Jeová hatudu ba Elias katak nia hamutuk ho Elias no nia iha forsa boot. Jeová mós fó sai katak iha ema Izraél barak neʼebé adora nia. (1 Reis 19:11, 12, 18) Klaru katak Elias sente kmaan bainhira nia fakar  sai tiha ninia sentimentu no Jeová hatán nia. Jeová mós fó knaar importante oioin ba Elias. Nia husu Elias atu foti Hazael nuʼudar liurai ba rai-Síria, foti Jeú nuʼudar liurai ba Izraél no foti Eliseu nuʼudar profeta ida. (1 Reis 19:15, 16) Hodi fó knaar sira-neʼe ba Elias, Jeová ajuda Elias atu tau fokus ba buat neʼebé pozitivu. Jeová mós fó belun diʼak ida ba Elias, neʼe mak Eliseu. Oinsá Jeová ajuda Ita bainhira Ita sente mesamesak?

6. Ita bele halo orasaun kona-ba saida bainhira Ita sente mesamesak? (Salmo 62:8)

⁶ Jeová konvida Ita atu halo orasaun ba nia. Nia haree problema sira neʼebé Ita hasoru, no nia promete atu rona ba Ita-nia orasaun iha tempu naran deʼit. (1 Tes 5:17) Nia gosta atu rona ba ninia atan sira. (Prov 15:8) Ita bele halo orasaun kona-ba saida bainhira Ita sente mesamesak? Hanesan Elias, Ita mós bele fakar sai Ita-nia sentimentu ba Jeová. (Lee Salmo 62:8.) Fó sai Ita-nia problema sira ba Jeová no mós Ita-nia sentimentu kona-ba problema sira-neʼe. Husu Jeová ajuda Ita hatene oinsá atu tahan bainhira sente triste ka mesamesak. Porezemplu, se Ita sente mesamesak no taʼuk bainhira alunu seluk husu kona-ba Ita-nia fiar, halo orasaun ba Jeová hodi husu aten-brani atu fó sai Ita-nia fiar. Ita mós bele husu matenek atu bele esplika Ita-nia fiar ho respeitu. (Lc 21:14, 15) Se Ita sente depresaun, husu Jeová atu ajuda Ita koʼalia kona-ba neʼe ba ema Kristaun neʼebé maduru. Ita bele husu Jeová atu ajuda ema neʼe komprende Ita-nia sentimentu. Fakar sai Ita-nia sentimentu ba Jeová, haree oinsá nia hatán Ita-nia orasaun no sai prontu atu simu ajuda husi ema seluk. Neʼe sei ajuda Ita atu la sente mesamesak.

7. Saida mak Ita aprende husi Mauricio?

⁷ Jeová fó ita serbisu diʼak atu halo. Ita bele fiar metin katak nia haree no hafolin serbisu hotu neʼebé Ita halo iha kongregasaun no iha serbisu haklaken. (Sal 110:3) Oinsá mak halo atividade espirituál ho badinas bele ajuda Ita bainhira sente mesamesak? Hanoin toʼok kona-ba irmaun joven ida naran Mauricio. * Lakleur depois Mauricio hetan batizmu, ninia belun ida neineik-neineik husik lia-loos. Mauricio hatete: “Bainhira haʼu haree nia husik lia-loos, haʼu sai la fiar an. Haʼu duvida katak haʼu bele moris tuir haʼu-nia dedikasaun no nafatin sai parte ba Jeová nia família. Haʼu sente mesamesak no sente katak la iha ema ida mak bele komprende haʼu-nia  sentimentu.” Saida mak ajuda Mauricio? Nia hatete: “Haʼu uza tempu barak liután atu haklaken. Neʼe ajuda haʼu atu la hanoin deʼit kona-ba haʼu-nia an no haʼu-nia sentimentu. Haʼu sente kontente no la sente mesamesak bainhira haklaken ho irmaun-irmán sira.” Maski agora ita labele haklaken hamutuk ho irmaun-irmán seluk, maibé ita nafatin bele hetan anima hodi haklaken hamutuk liuhusi telefone ka hakerek karta. Saida tan mak ajuda Mauricio? Nia hatutan tan: “Haʼu mós halo serbisu barak tan iha kongregasaun laran. Haʼu hakaʼas an atu prepara no hatoʼo ho didiʼak haʼu-nia knaar sira. Neʼe ajuda haʼu sente katak Jeová no ema seluk hafolin haʼu.”

8. Susar sira bele halo ita sente oinsá?

⁸ Ita hatene katak ita sei hasoru susar sira iha loron ikus sira. (2 Tim 3:1) Maibé karik ita hakfodak ho susar neʼebé ita hasoru ka ida-neʼe mosu iha tempu neʼebé ita la espera. Karik derrepente deʼit ita hasoru problema ekonomia, hetan moras todan ka ema neʼebé ita hadomi mate. Bainhira ida-neʼe akontese, karik ita sente laran-susar no laran-kraik, liuliu se susar sira-neʼe mosu tuituir malu ka mosu iha tempu neʼebé hanesan. Maibé hanoin-hetan bá katak Jeová tau matan ba ita, no ita bele tahan hasoru susar naran deʼit ho ninia ajuda.

9. Esplika toʼok susar balu neʼebé Job hasoru.

⁹ Haree oinsá Jeová ajuda mane laran-metin ida naran Job. Job hasoru susar oioin iha tempu badak nia laran. Iha loron ida deʼit, Job rona katak ema oho ka naʼok ninia animál hakiak, oho ninia atan sira no mós ninia oan sira hotu mate. (Job 1:13-19) Maski nia sente triste hela, nia mós kona moras neʼebé aat tebes. (Job 2:7) Job nia situasaun mak aat tebes toʼo nia hatete: “Haʼu odi haʼu-nia moris, haʼu lakohi moris tan.”—Job 7:16.

10. Oinsá Jeová ajuda Job atu tahan ninia susar sira? (Haree dezeñu iha livru oin.)

¹⁰ Jeová kontinua tau matan ba Job. Jeová hadomi Job, tan neʼe nia ajuda Job atu tahan hasoru susar no kontinua laran-metin. Bainhira koʼalia ho Job, Jeová fó sai kona-ba ninia matenek no domin ba ninia kriatura sira. Nia koʼalia kona-ba animál oioin. (Job 38:1, 2; 39:9, 13, 19, 27; 40:15; 41:1, 2) Jeová mós uza mane joven ida neʼebé laran-metin naran Eliú atu hametin no fó kmaan ba Job. Eliú hatete ba Job katak Jeová sempre fó kolen ba ninia atan sira neʼebé tahan susar ho laran-metin. Maibé Jeová mós uza Eliú atu fó konsellu ba Job. Eliú fó-hanoin Job katak nia mak kiʼik deʼit se kompara ho Jeová neʼebé kria universu, no neʼe ajuda Job atu tau fokus ba buat neʼebé importante liu no la tau fokus deʼit ba ninia an rasik. (Job 37:14) Jeová mós haruka Job atu halo orasaun kona-ba ninia belun naʼin-tolu neʼebé halo sala. (Job 42:8-10) Oinsá Jeová ajuda ita ohin loron bainhira ita hasoru susar?

11. Oinsá Bíblia fó kmaan ba ita bainhira hasoru susar?

¹¹ Jeová la koʼalia diretamente ba ita hanesan nia halo ba Job. Maibé Jeová koʼalia ba ita liuhusi Bíblia. (Rom 15:4) Nia fó kmaan mai ita hodi fó ita esperansa ba futuru. Hanoin toʼok kona-ba Bíblia nia hanorin balu neʼebé bele fó  kmaan ba ita bainhira ita hasoru susar. Iha Bíblia, Jeová promete katak la iha buat ida mak bele “haketak ita husi Maromak nia domin”, inklui susar neʼebé ita hasoru daudaun. (Rom 8:38, 39) Nia mós promete katak nia “besik ba ema hotu neʼebé bolu nia” liuhusi orasaun. (Sal 145:18) Jeová hatete katak se ita sadere ba nia, ita bele tahan hasoru susar naran deʼit no mós sente kontente. (1 Kor 10:13; Tgo 1:2, 12) Bíblia mós fó-hanoin ita katak susar sira mak temporáriu deʼit, no badak deʼit se kompara ho moris ba nafatin neʼebé Jeová promete mai ita. (2 Kor 4:16-18) Jeová promete katak nia sei halakon Diabu Satanás, hun ba susar hotu no mós sira neʼebé halo tuir Satanás nia hahalok aat. (Sal 37:10) Ita dekór ona eskritura balu neʼebé bele ajuda Ita tahan ka lae?

12. Atu bele hetan benefísiu husi Bíblia, Jeová hakarak ita atu halo saida?

¹² Jeová hakarak ita uza beibeik tempu atu estuda Bíblia no hanoin kleʼan kona-ba neʼe. Bainhira ita aplika buat neʼebé ita aprende, ita-nia fiar sei sai metin liután no ita hakbesik liután ba Aman Jeová. Rezultadu mak ita bele tahan hasoru susar sira. Jeová mós haraik espíritu santu ba ema sira neʼebé sadere ba ninia Liafuan. Espíritu santu bele fó ita “kbiit neʼebé la hanesan baibain” atu bele tahan hasoru susar naran deʼit.​—2 Kor 4:7-10.

13. Oinsá ai-han espirituál neʼebé “atan laran-metin no matenek” prepara ajuda ita tahan?

¹³ Jeová ajuda “atan laran-metin no matenek” atu prepara informasaun, vídeo no múzika barak tebes no neʼe bele ajuda ita hametin ita-nia fiar no nafatin hakbesik ba Jeová. (Mt 24:45) Ita presiza aproveita didiʼak ai-han espirituál hotu. Irmán ida husi Estadus Unidus fó sai katak nia hafolin ai-han espirituál hotu. Nia hatete: “Haʼu serbí Jeová durante tinan 40 ona, no haʼu-nia laran-metin hetan koko beibeik.” Nia hasoru susar boot oioin, hanesan ninia avó-mane mate iha asidente karreta tanba xofér seluk lanu, ninia inan-aman mate tanba moras todan, no nia hetan moras-kankru dala rua. Saida mak ajuda nia tahan? Nia esplika: “Jeová sempre tau matan haʼu. Ai-han espirituál neʼebé Jeová fó liuhusi atan laran-metin no matenek  ajuda haʼu atu tahan. Tan neʼe, haʼu bele sente hanesan Job neʼebé hatete: ‘Toʼo haʼu mate, haʼu sei nunka husik haʼu-nia laran-metin!’”—Job 27:5.

14. Oinsá Jeová uza irmaun-irmán sira atu ajuda ita kuandu ita hasoru susar? (1 Tesalónika 4:9)

¹⁴ Jeová treinu ninia povu atu hadomi malu no fó kmaan ba malu durante tempu susar. (2 Kor 1:3, 4; lee 1 Tesalónika 4:9.) Irmaun-irmán sira banati-tuir Eliú hodi ajuda ita laran-metin nafatin bainhira hasoru susar. (Após 14:22) Hanoin toʼok kona-ba oinsá irmán Diane nia kongregasaun anima nia no ajuda nia atu laran-metin nafatin ba Jeová bainhira ninia laʼen moras todan. Irmán Diane hatete: “Tempu neʼe susar tebes. Maibé ami bele sente Jeová nia domin no forsa durante tempu susar neʼe. Irmaun-irmán sira halo buat oioin atu ajuda ami. Sira vizita ami, telefone ami no hakoʼak ami, ida-neʼe ajuda ami atu tahan. Haʼu la hatene lori karreta, entaun irmaun-irmán sira ajuda haʼu atu bá reuniaun no bá haklaken.” Ita sente kontente tebes tanba irmaun-irmán sira hadomi ita.

15. Tanbasá ita fiar katak ita bele tahan susar?

¹⁵ Ita hotu sei hasoru susar ruma. Maibé hanesan ita aprende ona, ita la presiza tahan susar sira-neʼe mesak. Jeová mak hanesan aman neʼebé hadomi ita no nia sempre tau matan ba ita. Nia hamutuk ho ita no prontu atu rona kuandu ita husu ajuda no nia mós prontu atu apoia ita. (Isa 43:2) Ita fiar metin katak ita bele tahan susar sira tanba ho laran-luak nia fó buat neʼebé ita presiza. Nia fó Bíblia, ai-han espirituál barak, irmaun-irmán sira neʼebé hadomi ita no prontu atu ajuda ita, no mós ita bele halo orasaun.

16. Ita presiza halo saida atu Jeová tau matan ita?

¹⁶ Ita agradese tebes tanba Jeová tau matan ba ita. “Ita-nia laran haksolok tan nia.” (Sal 33:21) Ita bele hatudu agradese ba Jeová hodi aproveita buat hotu neʼebé nia fó atu ajuda ita. Ita mós presiza hakaʼas an atu halo tuir Jeová no halo buat neʼebé loos tuir ninia haree. Se ita halo nuneʼe, nia sei tau matan ita ba nafatin.—1 Ped 3:12.