1. Ita hetan benefísiu saida hodi koʼalia kona-ba oinsá ita hetan “lia-loos”?

 “OINSÁ Ita hetan lia-loos?” Klaru katak Ita hatán beibeik ona pergunta neʼe. Dala barak Ita mak husu uluk pergunta neʼe ba maluk fiar-naʼin sira kuandu Ita hakarak koñese sira diʼak liután. Ita gosta atu rona oinsá irmaun-irmán sira koñese no hadomi Jeová, no ita mós kontente atu konta ba sira oinsá ita hafolin tebes lia-loos. (Rom 1:11) Rezultadu mak ita kontinua hanoin kona-ba oinsá lia-loos mak folin-boot tebes. Ita mós hakaʼas an liután atu “kontinua laʼo iha lia-loos”, neʼe katak kontinua halaʼo moris iha dalan neʼebé Jeová simu no hetan bensaun husi Jeová.​—3 João 4.

2. Iha lisaun neʼe, ita sei aprende saida?

² Iha lisaun neʼe, ita sei aprende razaun balu tanbasá ita hafolin lia-loos. Ita mós sei aprende oinsá ita bele kontinua hafolin prezente furak neʼe. Klaru katak ida-neʼe ajuda ita hafolin liután saida mak Jeová halo ona atu dada ita ba lia-loos. (João 6:44) Neʼe mós sei book ita atu fahe lia-loos ba ema seluk.

3. Saida mak razaun importante tanbasá ita hafolin lia-loos?

³ Ita hafolin lia-loos tanba razaun oioin. Razaun importante  liu mak tanba ita hadomi Jeová, Hun ba lia-loos. Bainhira ita aprende Bíblia, ita koñese Jeová nuʼudar Kriadór neʼebé iha kbiit boot, no mós nuʼudar Aman neʼebé hadomi ita no tau matan ba ita ho laran-diʼak. (1 Ped 5:7) Ita hatene katak ita-nia Maromak mak “laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos”. (Éx 34:6) Jeová hadomi justisa. (Isa 61:8) Nia sente laran-kanek bainhira haree ita hasoru susar, no nia mós prontu no hakarak atu halakon susar hotu iha tempu neʼebé nia deside ona. (Jer 29:11) Ita hein namanas ba tempu neʼe. Neʼe mak razaun ida tanbasá ita hadomi tebes Jeová.

4-5. Tanbasá apóstolu Paulo kompara esperansa ho ankor?

⁴ Saida mak razaun seluk atu hafolin lia-loos? Lia-loos lori benefísiu mai ita. Hanoin toʼok ezemplu ida. Lia-loos husi Bíblia mós inklui esperansa kona-ba futuru. Atu komprende tanbasá esperansa mak folin-boot tebes, hanoin kona-ba apóstolu Paulo nia liafuan tuirmai: “Ita iha esperansa neʼe hanesan ankor neʼebé loos no metin.” (Ebr 6:19) Hanesan ankor neʼebé halo ró la muda arbiru, ita-nia fiar neʼebé bazeia ba Bíblia mós bele ajuda ita hamriik metin bainhira hasoru susar.

⁵ Iha eskritura neʼe, Paulo koʼalia kona-ba esperansa atu bá lalehan. Maibé ninia liafuan mós aplika ba ema Kristaun sira neʼebé hein namanas atu moris ba nafatin iha mundu paraízu. (João 3:16) Klaru katak ita-nia moris iha objetivu bainhira ita aprende tiha kona-ba esperansa atu moris ba nafatin.

6-7. Irmán Ivonia hetan benefísiu saida tanba aprende lia-loos kona-ba futuru?

⁶ Hanoin toʼok irmán Ivonia nia esperiénsia. Nia la boot iha lia-loos, no bainhira kiʼik nia taʼuk ba mate. Nia nunka haluha fraze ida neʼebé nia lee: “Loron ida sei la iha tan loron aban.” Nia hatete: “Liafuan neʼe halo haʼu toba la dukur iha kalan no hanoin barak kona-ba futuru. Haʼu hanoin: ‘Moris mak hanesan neʼe deʼit ka? Tanbasá ita moris?’ Haʼu lakohi mate!”

⁷ Bainhira joven, Ivonia hasoru Testemuña ba Jeová. Nia konta: “Haʼu komesa fiar katak haʼu iha esperansa atu moris ba nafatin iha mundu paraízu.” Benefísiu saida mak nia hetan tanba aprende lia-loos? Nia hatete: “Haʼu bele toba-dukur iha kalan no la hanoin barak tan kona-ba futuru ka mate.” Klaru katak Ivonia hafolin lia-loos husi Bíblia no nia gosta atu fó-hatene ema seluk kona-ba esperansa ba futuru.​—1 Tim 4:16.

8-9. (a) Iha Jesus nia ai-knanoik ida, oinsá mak mane ida hafolin rikusoin neʼebé nia hetan? (b) Ita hanoin oinsá kona-ba lia-loos?

⁸ Lia-loos husi Bíblia mós inklui liafuan diʼak kona-ba Maromak nia Ukun. Jesus kompara lia-loos kona-ba Maromak nia Ukun ho rikusoin neʼebé subar hela. Iha Mateus 13:44, Jesus hatete: “Ukun lalehan nian mak hanesan rikusoin neʼebé subar iha toʼos, neʼebé mane ida hetan no subar fali. Tanba nia kontente tebes, nia bá faʼan buat hotu neʼebé nia iha hodi sosa rai neʼe.” Tuir eskritura neʼe, mane neʼe la buka rikusoin. Maibé kuandu nia hetan ida-neʼe, nia halo sakrifísiu boot oioin atu sosa rai neʼebé iha rikusoin neʼe. Tuir loloos nia faʼan buat hotu neʼebé nia iha atu bele hetan  ida-neʼe. Tanbasá? Tanba nia hatene katak rikusoin neʼe folin-boot liu fali buat hotu neʼebé nia faʼan ona.

⁹ Ita sente hanesan neʼe kona-ba lia-loos ka lae? Klaru katak ita hafolin duni lia-loos! Ita hatene katak iha mundu neʼe la iha buat ida mak folin-boot liu fali ksolok neʼebé ita hetan tanba serbí Jeová agora, no ita iha esperansa atu moris ba nafatin iha futuru iha ninia Ukun okos. Priviléjiu atu iha relasaun diʼak ho Jeová mak folin-boot tebes, tan neʼe ita prontu atu halo sakrifísiu naran deʼit. Ita sente haksolok bainhira halo Jeová sente “kontente iha buat hotu”.​—Kol 1:10.

10-11. Saida mak book Michael atu halo mudansa?

¹⁰ Ita barak halo ona sakrifísiu oioin atu bele halo Jeová kontente. Irmaun-irmán balu husik sira-nia serbisu neʼebé diʼak, para atu buka rikusoin ka halo mudansa boot iha sira-nia moris bainhira sira aprende kona-ba Jeová. Irmaun Michael mós halo ida-neʼe. Nia la boot iha lia-loos. Bainhira joven, nia tuir arte marsiais. Nia hatete: “Ba haʼu, iha isin neʼebé forte mak importante. Dala ruma haʼu sente katak ema ida labele manán hasoru haʼu.” Maibé bainhira Michael komesa estuda Bíblia, nia aprende oinsá Jeová sente kona-ba violénsia. (Sal 11:5) Michael konta kona-ba feen-laʼen Testemuña neʼebé estuda ho nia, hodi dehan: “Sira nunka haruka haʼu atu para tuir arte marsiais. Sira kontinua deʼit hanorin lia-loos husi Bíblia mai haʼu.”

¹¹ Bainhira Michael kontinua aprende kona-ba Jeová, ninia domin ba Jeová mós sai boot liután. Jeová nia hahalok laran-sadiʼa ba ninia povu mak book tebes Michael nia laran. Ikusmai Michael rekoñese katak nia presiza halo mudansa. Nia hatete: “Haʼu sente susar tebes atu la treinu tan karaté. Maibé haʼu hatene katak Jeová la kontente ho ida-neʼe, no haʼu fiar katak serbí Jeová mak folin-boot liu fali sakrifísiu naran deʼit neʼebé haʼu halo.” Michael hafolin lia-loos neʼebé nia hetan ona, no neʼe book nia atu halo mudansa boot iha ninia moris.​—Tgo 1:25.

12-13. Benefísiu saida mak Mayli hetan tanba aprende lia-loos husi Bíblia?

¹² Atu hatudu katak lia-loos mak importante, Bíblia kompara lia-loos ho ahi-oan neʼebé fó naroman iha nakukun laran. (Sal 119:105; Éf 5:8) Feto ida naran Mayli husi rai-Azerbaijaun hafolin tebes ajuda neʼebé nia hetan husi Maromak nia Liafuan. Ninia inan-aman tuir relijiaun neʼebé la hanesan. Ninia aman Izlaun no ninia inan tuir relijiaun Judeu. Nia hatete: “Maski haʼu nunka duvida katak Maromak iha, maibé haʼu iha pergunta barak. Haʼu hanoin: ‘Tanbasá Maromak kria ema? Tanbasá ema ida tenke hetan susar iha ninia moris tomak no depois neʼe hetan kastigu iha infernu?’ Ema dehan katak buat hotu akontese tanba Maromak nia hakarak, tan neʼe haʼu hanoin: ‘Maromak kontrola ema no kontente atu haree ema hetan terus ka?’”

¹³ Mayli kontinua buka resposta ba ninia pergunta sira. Ikusmai nia komesa estuda Bíblia no simu lia-loos. Nia hatete: “Bíblia nia esplikasaun neʼebé lójiku ajuda haʼu sente kontente liu no sente dame iha laran.” Hanesan Mayli, ita hotu fó glória ba Jeová, “Ida neʼebé bolu  [ita] atu sai husi nakukun hodi tama fali ba ninia naroman neʼebé furak”.​—1 Ped 2:9.

14. Oinsá ita bele hafolin liután lia-loos? (Haree mós kaixa “ Komparasaun seluk”.)

¹⁴ Neʼe mak komparasaun balu deʼit neʼebé hatudu katak lia-loos iha folin-boot. Klaru katak ita bele hanoin kona-ba komparasaun seluk tan. Diʼak atu estuda mesak hodi buka-hatene razaun seluk tanbasá ita tenke hafolin lia-loos. Bainhira ita hafolin liután lia-loos, ita mós sei buka dalan oioin atu hatudu sai neʼe liuhusi ita-nia hahalok.

15. Saida mak dalan ida atu hatudu katak ita hafolin lia-loos?

¹⁵ Ita bele hatudu katak ita hafolin lia-loos liuhusi estuda beibeik Bíblia no ita-nia publikasaun sira. Maski ita iha lia-loos kleur ona ka lae, iha buat barak neʼebé ita bele aprende. Livru Haklaken edisaun primeiru hatete: “Lia-loos mak hanesan ai-funan ida iha rai-fuik maran. Iha lia-bosok barak iha mundu neʼe, no neʼe bele halo susar ba ema atu hetan lia-loos. Se ita hakarak hetan lia-loos, ita tenke buka ida-neʼe, . . . no presiza hakaʼas  an. Keta kontente deʼit ho lia-loos báziku. . . . Hakaʼas an atu aumenta tan ita-nia koñesimentu kona-ba lia-loos.” Maski ita presiza hakaʼas an atu estuda, maibé ida-neʼe sei la sai saugati deʼit.

16. Ita rasik gosta estuda lia-loos iha dalan oinsá? (Provérbios 2:4-6)

¹⁶ Laʼós ema hotu gosta lee no estuda. Maibé Jeová konvida ita atu “kontinua buka” hodi bele komprende diʼak liután lia-loos. (Lee Provérbios 2:4-6.) Bainhira ita hakaʼas an, ita sei hetan benefísiu. Irmaun ida naran Corey koʼalia kona-ba dalan neʼebé nia lee Bíblia no dehan katak nia tau fokus ba eskritura ida ba ida. Nia esplika: “Haʼu lee nota-rodapé no referénsia marjinál hotu, no mós halo riset liután. . . . Neʼe ajuda haʼu atu aprende buat barak.” Maski ita halo tuir irmaun Corey nia dalan atu estuda ka lae, maibé atu hatudu katak ita hafolin lia-loos, ita presiza uza tempu no hakaʼas an atu estuda lia-loos.​—Sal 1:1-3.

17. Moris tuir lia-loos katak sá? (Tiago 1:25)

¹⁷ Atu bele hetan benefísiu, la toʼo atu estuda deʼit lia-loos, ita tenke moris tuir lia-loos, neʼe katak aplika ida-neʼe iha ita-nia moris. Hodi halo nuneʼe, ita-nia moris sei kontente liu. (Lee Tiago 1:25.) Oinsá mak ita bele moris tuir lia-loos? Irmaun ida dehan katak diʼak atu buka-hatene saida mak ita aplika ona no saida mak ita hakarak hadiʼa liután. Apóstolu Paulo dehan: “Hanesan ita laʼo ba oin ona, mai ita kontinua laʼo ba oin iha dalan neʼebé hanesan.”​—Flp 3:16.

18. Tanbasá ita presiza hakaʼas an atu “kontinua laʼo iha lia-loos”?

¹⁸ Hanoin kona-ba benefísiu oioin neʼebé ita hetan tanba hakaʼas an atu “kontinua laʼo iha lia-loos”. Lia-loos ajuda ita atu halaʼo moris iha dalan neʼebé diʼak liu no lori ksolok ba Jeová no mós ba ita-nia maluk fiar-naʼin. (Prov 27:11; 3 João 4) Neʼe mak razaun furak liu atu hafolin lia-loos no moris tuir lia-loos.