1. Arrepende sala envolve saida deʼit?

 BAINHIRA ita halo sala, importante atu arrepende an. Iha Bíblia, arrepende sala envolve sente triste kona-ba buat neʼebé ita halo ona, troka ita-nia hahalok, no deside metin atu la repete tan.—Haree Glosáriu iha Bíblia, “Arrepende”.

 2. Tanbasá ita hotu presiza aprende kona-ba arrepende sala? (Neemias 8:​9-11)

² Ema hotu presiza aprende kona-ba arrepende sala. Tanbasá? Tanba ita hotu halo sala loroloron. Nuʼudar Adão no Eva nia bei-oan, ita hotu mak sala-naʼin no mate tanba sala. (Rom 3:23; 5:12) Apóstolu Paulo neʼebé fiar metin mós presiza luta hasoru ninia hakarak neʼebé sala. (Rom 7:​21-24) Neʼe katak ita presiza triste hela deʼit tanba ita-nia sala ka lae? Lae, Jeová mak laran-sadiʼa, no nia hakarak ita kontente. Hanoin toʼok buat neʼebé akontese ba ema Judeu iha Neemias nia tempu. (Lee Neemias 8:​9-11.) Jeová lakohi sira atu triste nafatin tanba sala neʼebé sira halo, maibé nia hakarak sira atu serbí nia ho haksolok. Jeová hatene katak bainhira ita arrepende sala, ita sei kontente. Tan neʼe nia hanorin ita kona-ba neʼe. Se ita arrepende sala, ita bele fiar katak Aman Jeová sei perdua ita.

 3. Iha lisaun neʼe, ita sei aprende saida?

³ Iha lisaun neʼe, ita sei aprende liután kona-ba arrepende sala. Ita sei buka-hatene kona-ba pontu tolu. Primeiru, saida mak Jeová hanorin ba ema Izraél kona-ba arrepende sala? Segundu, oinsá Jeová ajuda ona ema sala-naʼin atu arrepende sala? No terseiru, saida mak Jesus nia dixípulu sira aprende kona-ba arrepende sala?

 SAIDA MAK JEOVÁ HANORIN BA EMA IZRAÉL KONA-BA ARREPENDE SALA

 4. Saida mak Jeová hanorin ba nasaun Izraél kona-ba arrepende sala?

⁴ Bainhira Jeová fó Ukun-Fuan ba nasaun Izraél, nia halo aliansa ida ho sira. Se sira halo tuir Jeová nia mandamentu, nia sei proteje no haraik bensaun ba sira. Kona-ba neʼe, Jeová hatete: “Mandamentu neʼebé haʼu fó sai ba imi ohin mak laʼós buat neʼebé susar liu ba imi, ka dook liu husi imi.” (Deut 30:​11, 16) Maibé se sira kontra hasoru nia, porezemplu, hodi hili atu adora fali maromak falsu, nia sei la haraik bensaun ba sira no sira sei hasoru susar. Maibé neʼe la dehan katak Jeová husik ona sira. Sira bele ‘fila fali ba Jeová, sira-nia Maromak, no rona ba ninia liafuan’. (Deut 30:​1-3, 17-20) Neʼe katak sira bele arrepende sala. Se sira halo nuneʼe, Jeová sei hakbesik no haraik fali bensaun ba sira.

 5. Oinsá mak Jeová hatudu katak nia la rende an atu ajuda povu Izraél? (2 Reis 17:​13, 14)

⁵ Povu Izraél kontra beibeik Jeová. Sira adora estátua no halo buat aat barak. Rezultadu mak sira hasoru susar. Maibé Jeová kontinua koko ajuda sira atu serbí fali nia. Nia haruka beibeik profeta sira atu book povu Izraél arrepende sala no fila fali ba nia.—Lee 2 Reis 17:​13, 14.

 6. Oinsá mak Jeová uza ninia profeta sira atu hanorin ninia povu kona-ba importante atu arrepende sala? (Haree mós dezeñu.)

⁶ Dala barak Jeová uza ninia profeta sira atu fó avizu no korrije povu Izraél. Porezemplu, Maromak koʼalia liuhusi Jeremias: “Fila fali mai haʼu, oh Izraél neʼebé ulun-toos . . . Haʼu sei la hateke tun ba ó ho hirus, tanba haʼu laran-metin. Haʼu sei la rai hirus ba nafatin, naran katak ó rekoñese ó-nia sala, tanba ó kontra hasoru ona Jeová.” (Jer 3:​12, 13) Liuhusi Joel, Jeová hatete: “Fila fali mai haʼu ho imi-nia laran tomak.”  (Joel 2:​12, 13) Nia haruka Isaias atu fó sai: “Halo imi-nia an sai moos; hasai tiha imi-nia hahalok aat iha haʼu-nia oin; labele halo tan buat neʼebé aat.” (Isa 1:​16-19) No liuhusi Ezequiel Jeová dehan: “Haʼu la kontente bainhira ema aat ida mate. Haʼu-nia hakarak mak nia husik tiha ninia hahalok aat no kontinua moris. Haʼu la kontente bainhira ema ida mate. Tan neʼe, arrepende an bá no kontinua moris.” (Eze 18:​23, 32) Jeová kontente tebes kuandu povu Izraél arrepende sala, tanba nia hakarak sira atu moris ba nafatin! Maibé, Jeová la hein deʼit toʼo sira arrepende tiha sala mak nia foin ajuda sira. Mai ita haree ezemplu balu.

 7. Liuhusi profeta Oseias nia ezemplu, saida mak Jeová hanorin ba ninia povu?

⁷ Haree toʼok oinsá Jeová hanorin ninia povu liuhusi profeta Oseias no ninia feen Gomer nia ezemplu. Depois Gomer halo tiha adultériu, nia husik hela Oseias no hamutuk fali ho mane seluk. Saida mak Jeová halo? Jeová neʼebé hatene ema nia laran hatete ba Oseias: “Dala ida tan, bá, hadomi fali feto neʼebé mane seluk hadomi ona no neʼebé halo daudaun adultériu, hanesan Jeová mós hadomi ninia povu Izraél maski sira adora fali maromak sira seluk.” (Os 3:1; Prov 16:2) Nota katak Gomer kontinua halo sala sériu. Maibé, Jeová haruka Oseias atu bá buka Gomer hodi fó perdua no foti fali nia nuʼudar feen. a Husi ezemplu neʼe, Jeová hakarak hanorin ninia povu kona-ba ninia sentimentu ba sira. Maski sira halo sala neʼebé boot tebes, nia kontinua hadomi no buka atu ajuda sira hodi bele arrepende no troka sira-nia hahalok. Ezemplu neʼe hanorin ita katak Jeová “buka-hatene didiʼak ema nia laran” no nia buka dalan atu ajuda ema ida-idak neʼebé kontinua halo sala sériu atu arrepende an. (Prov 17:3) Oinsá Jeová halo nuneʼe?

OINSÁ JEOVÁ AJUDA EMA SALA-NAʼIN ATU ARREPENDE SALA

 8. Oinsá Jeová ajuda Caim atu arrepende sala? (Génesis 4:​3-7) (Haree mós dezeñu.)

⁸ Caim mak Adão no Eva nia oan-mane primeiru. Nia moris mai nuʼudar sala-naʼin no iha hakarak atu halo buat neʼebé la loos. Caim husik ninia hakarak neʼe atu domina nia, tan neʼe Bíblia hatete: “Caim nia hahalok mak aat.” (1 João 3:12) Karik neʼe mak razaun tanbasá Jeová “la simu Caim no ninia sakrifísiu”. Duké troka ninia hahalok, “Caim sai hirus tebes no triste”. Saida mak Jeová halo? Nia koʼalia ba Caim. (Lee Génesis 4:​3-7.) Jeová koʼalia ho laran-diʼak hodi fó esperansa ba Caim no fó avizu ba nia katak se nia kontinua hirus, nia sei halo sala sériu. Triste mak Caim lakohi rona no lakohi simu Jeová nia ajuda. Tanba Caim lakohi halo tuir, neʼe katak Jeová mós lakohi ona atu ajuda ema seluk ka lae? Lae duni!

 9. Oinsá Jeová ajuda David atu arrepende sala?

⁹ Jeová hadomi tebes Liurai David no bolu nia nuʼudar ‘mane neʼebé monu loos ba ninia laran’. (Após 13:22) Maibé David halo sala balu neʼebé sériu, inklui adultériu no oho ema. Tuir Moisés nia Ukun-fuan, David tenke mate.  (Lev 20:10; Núm 35:31) Maibé, Jeová ho laran-diʼak ajuda nia atu arrepende sala. b Nia haruka profeta Natan atu vizita David maski David seidauk hatudu katak nia arrepende sala. Natan uza ai-knanoik atu ajuda David rekoñese ninia sala. Neʼe book tebes David nia laran. (2 Sam 12:​1-14) Nia hakerek salmo ida neʼebé hatudu katak nia arrepende an duni. (Sal 51, introdusaun) Ema barak neʼebé halo ona sala sente kmaan bainhira lee salmo neʼe, no neʼe book sira atu arrepende sala. Ita kontente tanba Jeová hadomi no ajuda David atu arrepende sala.

10. Ita sente oinsá kona-ba Jeová nia pasiénsia no laran-sadiʼa ba ema sala-naʼin?

¹⁰ Jeová odi hahalok sala hotu. (Sal 5:​4, 5) Maibé nia hadomi tebes ita, no bainhira ita halo sala, nia hakarak ajuda ita. Jeová sempre prontu ajuda ema neʼebé halo sala atu arrepende an no hakbesik ba nia maski sala neʼe mak boot tebes. Neʼe halo ita sente kmaan! Kuandu ita hanoin kona-ba Jeová nia pasiénsia no laran-sadiʼa, neʼe motiva ita atu nafatin laran-metin ba nia no la demora atu arrepende an bainhira halo sala. Mai ita haree Jesus hanorin saida ba ninia dixípulu sira kona-ba arrepende sala.

SAIDA MAK DIXÍPULU SIRA APRENDE KONA-BA ARREPENDE SALA

11-12. Jesus uza ai-knanoik saida atu hanorin kona-ba ninia Aman neʼebé prontu atu fó perdua? (Haree dezeñu.)

¹¹ Bainhira Mesias besik ona atu mosu mai, Jeová uza João Batista atu hanorin ninia povu no haruka sira atu arrepende sala. No bainhira Jesus Kristu komesa haklaken iha rai, nia mós hanorin kona-ba importante tebes atu arrepende an.—Mt 3:​1, 2; 4:17.

¹² Bainhira Jesus iha rai, nia hanorin katak ninia Aman prontu atu fó perdua. Jesus hanorin lisaun importante neʼe hodi konta ai-knanoik kona-ba oan-mane neʼebé lakon. Oan neʼe hili atu sai husi uma no halo hahalok aat oioin.  Tuirmai, “bainhira ninia hanoin loos ona”, nia fila fali ba uma. Aman nia reasaun mak oinsá? Jesus hatete katak nuʼudar oan neʼe “sei dook hela, ninia aman haree nia no hanoin tebetebes nia. Ninia aman halai hasoru nia hodi hakoʼak no reʼi nia.” Loloos, oan neʼe planu atu husu sai atan iha ninia aman nia umakain, maibé ninia aman bolu nia “haʼu-nia oan” no simu fali nia. Aman neʼe hatete: “Nia lakon tiha maibé hetan fali ona.” (Lc 15:​11-32) Antes Jesus mai mundu, nia haree duni ninia Aman hatudu beibeik laran-sadiʼa ba ema neʼebé arrepende an. Ai-knanoik neʼe hatudu katak Aman Jeová mak laran-sadiʼa duni, no neʼe fó kmaan mai ita!

13-14. Saida mak apóstolu Pedro aprende kona-ba arrepende sala, no oinsá nia hanorin ema seluk kona-ba neʼe? (Haree mós dezeñu.)

¹³ Apóstolu Pedro aprende lisaun importante husi Jesus kona-ba oinsá Jeová perdua ema neʼebé arrepende sala. Pedro halo sala barak, no Jesus prontu atu perdua nia. Porezemplu, depois Pedro nega tiha ninia Naʼi ba dala tolu, nia sente laran-susar tebetebes kona-ba buat neʼebé nia halo ona. (Mt 26:​34, 35, 69-75) Maibé depois Jesus moris hiʼas, nia mosu ba Pedro kuandu Pedro mesamesak. (Lc 24:​33, 34; 1 Kor 15:​3-5) Jesus hatene katak Pedro arrepende ona ninia sala, tan neʼe ho domin nia fó perdua no hametin Pedro.

¹⁴ Esperiénsia neʼe ajuda Pedro atu hanorin fali ema seluk kona-ba arrepende sala no hetan perdua. Liutiha tempu balu depois loron Pentekostes, Pedro fó sai ba ema Judeu katak sira oho ona Mesias. Maibé iha tempu hanesan, ho domin nia hatete: “Arrepende an bá no fila fali ba Maromak, atu nuneʼe Jeová bele hamoos tiha imi-nia sala sira no sei fó kmaan ba imi.” (Após 3:​14, 15, 17, 19)  Pedro nia liafuan hatudu katak se ema ida arrepende sala, neʼe sei book nia atu fila fali ba Maromak hodi troka ninia hanoin, para atu halo buat neʼebé aat, no halo hahalok neʼebé lori kontente ba Maromak. Pedro mós hatudu katak Jeová sei hamoos sira-nia sala iha dalan neʼebé kompletu. Tinan barak liu tiha, Pedro hatete ba ema Kristaun sira: “Jeová . . . hatudu pasiénsia ba imi tanba nia lakohi ema ida lakon maibé nia hakarak ema hotu atu arrepende sala.” (2 Ped 3:9) Liafuan neʼe hametin duni ita no halo ita sente dame tanba Jeová perdua ita ho kompletu!

15-16. (a) Apóstolu Paulo aprende saida kona-ba hetan perdua? (1 Timóteo 1:​12-15) (b) Iha lisaun tuirmai, ita sei aprende kona-ba saida?

¹⁵ Saul husi Tarsu halo ona hahalok aat barak. Nia fó-terus Jesus nia dixípulu sira. Ema Kristaun barak karik hanoin katak nia sei nunka troka ninia hahalok. Maibé Jesus hatene katak Saul bele troka ninia hahalok no arrepende sala. Jesus no ninia Aman haree Saul nia hahalok diʼak, tan neʼe Jesus dehan: “Haʼu hili tiha ona mane neʼe.” (Após 9:15) Jesus mós uza milagre atu ajuda Saul arrepende sala. (Após 7:58–8:3; 9:​1-9, 17-20) Ikusmai Saul sai ema Kristaun, no ema koñese nia nuʼudar apóstolu Paulo. Nia sempre fó agradese ba Jeová no Jesus nia laran-diʼak no laran-sadiʼa. (Lee 1 Timóteo 1:​12-15.) Paulo hatete: “Maromak ho laran-diʼak koko atu lori ó hodi arrepende ó-nia sala.”—Rom 2:4.

¹⁶ Loron ida, Paulo rona katak irmaun-irmán sira iha Korinto simu deʼit hahalok la morál iha kongregasaun laran. Saida mak Paulo hatete? Liuhusi Paulo nia konsellu, ita bele aprende kona-ba oinsá Jeová hatudu domin bainhira fó dixiplina ba ninia atan, no mós oinsá Jeová hatudu laran-sadiʼa ba ema neʼebé arrepende sala. Iha lisaun tuirmai, ita sei koʼalia kona-ba saida mak akontese ba kongregasaun iha Korinto.